KALKIRA 16
16
Manna u cekera
1Asi yow ha hu Elim, suu Israelna halaŋ tuɗ ŋgoo bagi hu fulla Sinda. Ni duk ɦoŋ Elim u Ҥinira Sinayra. Hu buu ma doogo yam vadlna, hu til ma mbana ma asi cuk ay ki hu Egiptena. 2Ŋgoo bagi hu fulla ni suu Israelna halaŋ ka gurni eg gi Moiz u Aaron. 3Suu Israelna dasi ana, «Lini Yawe cami ha ni hu li ma ami ay laki hu Egipte, fun doy tliw mamina ti may hoɓ lay na ni mariyaɗ, agi hin mbaarami cukumi ki ŋgoo bagi tani a suu mamisina laɓ ki ko mayra.»
4Yawe di Moiz ana, «Ay kolo huulona day an min sagi funa ay kaŋgaa. Hu buuna halaŋ suuna cuk ki a nda hal ti ma asi tam hu buuna tew tewna kay an a tukusi kay a wi ki ana asi ka tuɗ u gaɗ manda ɗowba ɦawa sura?#Jaŋ 6.31 5Hu buu ma karkiyana ni asi yow su mayra asi kaaday yowom hu buuna dew dewra.»
6Moiz u Aaron di suu Israelna ana, «Fiɗigira karamba ni agi hin wi ki ana Yawe cukugi ay ki hu mbassa Egiptera ni namu. 7Vin maɗii ni agi hin wi bibiŋilla vi Yawera kay nam humugi gurni magira egemba ha wa, ami ni me kay tami mayge? Agi gurni ni ka egemiɗi, ni eg Yawe.» 8Moiz min dasi ni ana, «Hu fiɗigira ni Yawe hin ɦagi tliwna maɗiira ni nam ɦagi funa agi ti, hoɓ may. Kay Yawe humugi gurni magira ha wa agi gurni ni egemu, ami ni gege a agi gurni egemi nige? Agi gurni ni eg Yawe.»
9Moiz di Aaron ana, «Aŋ di suu Israelna ana, Ҥuɗugi tagi ay eg Yawe, kay nam humugi gurni magira ha wa.» 10Hu li ma Aaron ka ɓak suu Israelna na ni, nam mbuɗ irim ha ŋgoo bagi hu fulla na. Bibiŋilla vi Yawera tak taɗ ay ki hu ɗugulla.
11Yawe di Moiz ay ana, 12«An hum gurnira vi suu Israelna ha wa. Aŋ dasi ana, fiɗigi goona gege ni agi hin kommi tliwna, maɗiira ni agi hin hoɓ u funa may. Agi hin wi ki ana anni Yawe, Loogina.» 13Fiɗigira ni cekera oy ki egesi hu kaŋ masina cocoo. Vin maɗiira ni mbaɗagira ŋgufusi yam ziisi ki na cutl. 14Mbaɗagira gasi ki may ni, vana hin ga kay ndaŋgara ko ndal fuɗta na ka wi yam ndaŋgara kiɗi. 15Suu Israelna gol va namma na ni, ɓak duk tasi ana, «Na ni mege?» Kay asi ka wi va nammaɗi. Moiz dasi ana, «Ni fu ma Yawe ɦagina a agi tamma.#1 Kor. 10.3 16Gola Yawe di ana, Yowogina ni gegelay yow ni kay tiim ma karamma doy hol, suuna li voni gage ni ŋga tassana fiɗi kasi dew dew halaŋ, gegelay yow ni u ndum suu mam suu vo taraŋ varamma.» 17Suu Israelna li ni ko ndaɗta na may. Asi yow ni suu ɦiw yow ŋgolo, suu daŋŋa yow ew ew may. 18Asi ŋgaammi u tassana, ka su kiɗi lay, ka kaɗakgi lay. Gegelay yow ni ii a ndakam a tira u suu mamsina.#2 Kor. 8.15
Gaɗta kay manna
19Moiz dasi ana, «Agi yowommi ka sa buu u mamma koloɗi.» 20Suu daŋŋa vi vun Moiz kaɗi, buu u masina koloo, ma buu kolo namma cuk ki njufulna mbuɗ hissa, Moiz hurum ɓeŋ eg suu asina.
21Asi hinni gegelay tuɗ yow ay ni ii a ndakasi a tira u suu mamsinara doy hol hol. Faɗta hol ki wa ni nam vaɗ ki gaw.
22Hu buu ma karkiyana ni asi yow ki usi ii buuna mba' mba'. Sana dew ni yow tassana kammi mba' mba' may. Suu ŋgolo suu fok suu Israelna mba cuɗ boy namma ki maŋ Moiz. 23Nam dasi ana, «Ni na Yawe di ni na daŋ may. Kay vinni buu ma koɗ tara ni buu ma vi Yawena. Zalagi tlesuu agi min a zalasina, lagi tlesuu agi min a lasina. Suu kal ki ŋgolna tinisi kolo ta ta vin lay.»#Kal. 20.8-11 24Asi ŋgay u tle asina kolo ta ta vin ko Moiz dasira na may. Ca vinda ni va bu ka kiɗi, cuk ka ki njufulɗi lay. 25Moiz dasi ana, «Tagi tle asina, kay karammi buu ma koɗ tara, ni buu ma vi Yawena. Agi ka fi va ay ki kiɗik oloɗi. 26Agi yowommi hu buuna karkiya, hu buu ma kiɗisiyana ni buu ma koɗ tara, agi ka fi va hu buu nammaɗi.» 27Na may hu buu ma kiɗisiyana suu ɦiw tuɗ a halla ni fi va ay kaɗi. 28Yawe di Moiz ana, «Agi hin li u gaɗ manda ni saɓa tuge? 29Lini Yawe ɦagi buu ma kiɗisiyana a koɗ tara ni nam ɦagi tina hu buu ma karkiyana ii buuna mba' kay ana sa kal ki hu buu ma kiɗisiyana oloɗi.» 30Kay ndaɗta hu buu ma kiɗisiyana ni suuna koɗ tasiya.
31Suu Israelna tin sem va namma ana manna, va namma tli tam ko ii galaŋŋa#16.31 ii galaŋŋa koriander. na. Nam haɓi, ti jeɓeɗta ko mbul yumma na.#Ndu. 11.7-8
32Moiz di ana, «Gola Yawe di ana, Agi ŋgay maa kolo tassa dew a hin takam ka maŋ goryogi a asi hin wi ti ma an ɦagina ay ŋgoo bagi hu fullana ka may, hu li ma an cukugi ay ki hu Egiptena.» 33Moiz di Aaron ana, «Aŋ tli va maa dew yow manna tassa dew ni cukum huwa, tinim fok Yawe a ɗokom kolo maŋ goryogiya.»#Heb. 9.4 34Ni ko ndal Yawe di ka maŋ Moiz u Aaronda na may. Tinim kolo fok Yawe a ɗokomba.
35Suu Israelna ti manna ŋgoo bagi hu fulla basara dok-fiɗi, ta ta tew hu mbassa asi cuk hura. Asi ti ni manna gak gak tew fun mbassa Kanaanda.#Jos. 5.12 36Tassa ma dewna ni nus tassa ma doogona.
Currently Selected:
KALKIRA 16: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
