KALKIRA 14
14
Faraw cuɗ u suu Israelna
1Yawe di Moiz ana, 2«Di suu Israelna ana asi hoŋ ay mba cuk fok Pi Hahirot na, duk ɦoŋ Migdol u lum ŋgolna na. Ni vok tasi u Baal-Sefon na, agi cukŋi fun lumma kolo na peɗeɗ gaw. 3Faraw hin dini ana, Ŋgola suu Israelna viɗ ki wa, asi ka dafaɗ ŋgoo bagi hu fulla hu mbas mayra tuwa. Bagira dug vunuɗ kasi wa. 4An hin so huu Faraw, nam hin dikisi usiya. An hin ŋga tan kay Faraw u suu duu mamsina, suu Egiptena hin wi ki ana anni Yawe.» Asi hin li ni na may.
5Asi tuɗ di mulna ana suuna pii wa. Faraw u suu sun mamsina mbuɗ hurusi ni na gaw kay suu Israelna, asi di ana, «Aygi a li na ni dla mege? Aygi hin suu Israelna hiniygi sunda ka koygi na ni nanage?» 6Nam gan kulumina u pus pus mamma, yow suu mamsina um may. 7Nam yow kulumi suu pus pusna kis kis karkiya, kulumi suu pusna suu hu Egiptena halaŋ u suu duuna kasi bel bel. 8Yawe so huu Faraw mul ma Egiptena, nam dik u suu Israelna, suu Israelna cuk ay ki ni u furira kosi tlii kolo cocoo. 9Suu Egiptena cuɗusi usiya, tuɗ fasi fun lumma, kay asi cukŋi fun lumma huwa, kulumina u suu fuli kasina halaŋ, Faraw u suu duu mamsina bel hin tok a tew hu Pi Hahirotta, fok Baal-Sefon.
10Faraw mbay egesi na tok, suu Israelna gol irisiya ni suu Egiptena egesi ni na tok gaw ka cuɗusi usi aya. Suu Israelna mbuɗ ki ndaa cocoo, asi gijaŋ yi kolo eg Yawe. 11Asi di Moiz ana, «Aŋ a mbaarami ki tani na ni ndaŋgara pamira ha ka hu Egipteɗi su? Aŋ mba baami ki ŋgoo tani ni kay mege? Aŋ a lami egemi na ni dla mege? 12Ami daŋ ay Egipte ni ana mege? Ana hinimi ami sun suu Egiptena, jivira ni ami sun suu Egiptena su mayra ami miɗ ki ŋgoo tani wanda.» 13Moiz di suuna ana, «Lagi ndaaɗi, lakagi jiviya, gologi suɗta Yawe hin suɗugi ki karamba. Suu Egipte suu agi wasi karam wanna, agi hin ka wasi oloɗi. 14Yawe hin duu kagi ni namu. Agi may ni lakagi na en.»
Lona mal voɗta duk mbo lumma
15Yawe di Moiz ana, «Aŋ tii egenni kay mege? di suu Israelna asi cuk tasi hu voɗta. 16Aŋ may ni tli tokolo maŋga, maɗ koŋ kolo kay mbo lumma ɓorowom irim kiyo a suu Israelna tuɗ duk mbo lumma ni sesi laɓbi. 17An may ni hin so huu suu Egiptena a asi cuk ha u suu Israelna dagan may, an hin ŋga tan kay Faraw u kulumi suu duu mamsina u suu mam suu duuna halaŋ, suu kulumina lay. 18Suu Egiptena hin wi ki gasi ana anni Yawe, ni hu li ma an hin ŋga tan kay kulumi suu pus pusna vi Faraw u suu mam suu duunana.»
19Sa sunda huulona ma tuɗ fok suu Israelna jak a tuɗ ha fok suu Israelna gi tam ha kay ceresiya ɗugulla tuɗ ha fokosi may, hin col ŋgoorosi hu may. 20Ɗugulla kal ki duk ɦoŋ suu Israelna u suu Egiptena. Ɗugulla ka may, ndufunda li cocoo kay suu Egiptena. Njeŋge ni ndaɗ li kiɗikka kay suu Israelna, may ni asi jakŋi sa ka ɦuɗ eg tam tokgi.
21Moiz maɗ kom ki kay mbona, Yawe hu njeŋge ndaɗta ni tok mbona ki keŋ u babaana ŋgol cocoo, nam so mbo lumma ki halaŋ, mbona wak ki duku, 22Suu Israelna calaɗ mbo lumma kini sesi laɓ kaɗi, mbona col ki keŋesi ko ndal gulumunna na, ki bik njuf may, bik gulu may.#1 Kor. 10.1-2; Heb. 11.29 23Suu Egiptena cuɗusi usi ay cuk usi duk mbona may. Ni kulumi suu pus pus suu vi Farawna u suu duuna halaŋ, mba tew ki duk lummara gay gayra.
24Col ay njeŋge day u kura ka vi kasi hu ɗugullara, Yawe ka gol suu Egiptena may. Nam gasi dlara da damba dukusiya. 25Nam ɓalakasi sem pus pus masisina kiyo, tuɗ masira tuɗ u suu Israelna mbuɗ loɓ cocoo. Suu Egiptena di ana, «Piiriygi ki day eg suu Israelna, kay Yawe ka njun kasi ni namu.» 26Yawe di Moiz ana, «Maɗ koŋ kolo kay mbona, mbona hoŋ ay ga kay suu Egiptena, kay pus pus masisina u suu kulumina.» 27Moiz maɗ kom kay mbo lumma, ni lina hin tok a fo kira may, mbona hoŋ ay hu balamam ma jewna halaŋ. Suu Egiptena pii ni hoŋ hani dukum na ɗow. Yawe yow kom ki kay suu Egiptena duk mbo lumma. 28Mbona hoŋ ay tluɓ kulumina u pus pusna u suu kulumina u suu duuna vi Faraw halaŋ, suu may suu cuk ay duk mbona u suu Israelna bel bel sa maa hin ka ki dewɗi. 29Na may suu Israelna jak ay duk mbo lumma ni sesi lay laɓ kaɗi. Mbona col ay ki keŋesi kolo ni ko ndal gulumunna na, kay bikisi njuf may, gulu may.
30Hu buu namma Yawe suɗ suu Israelna ki ko suu Egiptena. Suu Israelna wi suu Egiptena miɗi ɗoŋ lumma cocoo. 31Suu Israelna wi dlara eŋga Yawe laɗ eg suu Egiptenara ki u irisiya. Suu Israelna li ndaa Yawe cocoo, asi tin hurusi kay Yawe kay Moiz saam ma sunda lay.
Currently Selected:
KALKIRA 14: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
