ESTER 9
9
Suu Juifna sa sugulusiya
1Hu til ma doogo yam mba' ma yam ana Adarna, buuna doogo yam hindi ni hu li ma li u gaɗta vi mulnara, hu li ma suu babali suu vi suu Juifnana saa gin ana asi hin su kasiyana. Dlara iriɗ pereɗ ni na gaw. Suu Juifna mbuɗ kay suu li lasasina ni asiya. 2Suu Juifna tok tasi ki hu hoŋzina, ki hu ɦoŋzi ma bagi ma vi mulna Zersesna a yow suu hal gin a lasi dla cora egesina. Sa dew lay ni ka col fokosiɗi kay suuna halaŋ mbuɗ ki ndaana kosiya. 3Suu ŋgolo suu sun suu hu ɦoŋzi ma bagina halaŋ, suu fok suu hu ɦoŋzi ma baginana, muli suu ŋgolona, suu ŋgolo suu sun suu vi mulnana njunni u suu Juifna kay ana asi mbuɗ ki ndaana ko Mardose. 4Gasi daŋ may hu taraŋga vi mulna ni ŋgolo, sem tii ki hu ɦoŋzi ma bagina halaŋ halaŋ. Gasi daŋ may sa namma Mardose dlaamba tuɗ ni fok na ɗow ɗow.
5Suu Juifna ci suu babali masisina ki u ŋgewna, casi kiyo, bulumusi kiyo. Asi li dlara eg suu ka minisiɗina ko hurusi minda na. 6Hu Suz ɦoŋzi ma saɓakŋa suu Juifna ci suuna ki na kis kis vadl, bulumusi kiyo. 7Parsandata, Dalfon u Aspata, 8Porata, Adaliya u Aridata, 9Parmasta, Arisay, Ariday u Vayzata, 10Goryoŋ Haman suu doogona, goryoŋ Hamedata ma las suu Juifna asi casi kiyo. Na may asi hal ka a yow tlesuu hin ki hu jonanaɗi.
11Hu buu namma gaw ni ndum suu asi casi hu ɦoŋzi ma Suz ma saɓakŋa halaŋ tew ki eg mulna. 12Mulna di ca mulla, Ester, ana, «Suu Juifna ci suuna ki kis kis vadl hu Suz ɦoŋzi ma saɓakŋa u goryoŋ Haman suu doogona. Hu ɦoŋzi ma bagi ma vi mulna ma hinna asi hin li ni ana me ɗaŋge? Na may ni joɓ makka ni ana mege? Va ndak joɓ kamma hin ɦakŋa. Ndak tii takŋi kay me ologe? Dla ndaɗta hin li kiyo.»
13Ester hoŋ dira ana, «Lini mulna hurum minna ni ko suu Juif suu hu Suzna fi voɗta a li dlara u gaɗta u saɓakŋa karami, ko ɓal goryoŋ Haman suu doogona ki kolo hu guna.»
14Mulna di ana, «Dla ndaɗta hin liya.» Gaɗ ndaɗta asi hin ɓakaɗ ki hu Suz. Asi hin ɓal goryoŋ Hamanna ki koloo. 15Suu Juif suu hu Suzna tok tasi ɗaŋŋi hu buuna doogo yam fiɗi hu til ma Adarna. Asi ci suuna hu Suz ni kis kis hindi. Na may asi hal ka a yow tlesuu hin ki hu jonanaɗi.
16Suu Juif suu hu ɦoŋzi ma bagi ma vi mulnana tok tasi hin kakira jejegee, fi koɗ tara ko suu masi suu babalira ci suuna ki 75,000 duk suu ka minisi gin ɗina, na may asi hal ka a yow tlesuu hin ki hu jonanaɗi. 17Ni hu buu ma doogo yam hindina hu til ma Adarna, hu buu ma doogo yam fiɗina asi koɗ tasi hin ti tina u furira. 18Hu li ma suu Juif suu hu Suzna tok tasi hu buu ma doogo yam hindina u ma doogo yam fiɗina, hin koɗ tasi hu buu ma doogo yam vadl ma asi ti tina u furirana. 19Ni kay ndaɗta suu Juif suu cuki hu ɦoŋzinana u suu cuki hu zigini suu hu ɦoŋzinana mbuɗ buu ma doogo yam fiɗi ma hu til ma Adarna ki a buu ma furira, ma ti ti ma luuna, sunum ki fun tasi na nde ndena.
Luu ma tinim a fafaɗtana
20Mardose ɓii dla ndaɗta ki kaŋga halaŋ ɓii ni hin sun magaara ki hu ɦoŋzi ma bagi ma vi mulna Zerses ma ha ki day dayna u ma tok tokŋa lay halaŋ. 21A tin luu ma vun basara hu buu ma doogo yam fiɗina hu til ma Adarna, hu buu ma doogo yam vadlna may, 22ko ndal buu ma suu Juifna fi koɗ tara ko suu masi suu babalira, til ma dlaasira iriɗ pereɗ ki asi ɗiŋ lum ma ɓaɗ ɦayna ki u furira, yoo tara mbuɗ ki furira may. Asi tin buu ma luuna u furira, sun nus tlena duk tasi lay, ɦal tlena ki ɦawa maŋ suu hawra lay. 23Suu Juifna vi dlara basira asi li laɗta u dlara Mardose ɓiirisira ayra.
24Haman, ma goŋ Hamedata ma Agag, ma las suu Juifna vi vunum ki kay suu Juifna a bulumusi kina, nam tuɗ gol tam aya, ni ana nam tuɗ tin garira ay a mba dla cora ay hin a bulumusi kira.#Est. 3.7 25May hu li ma dla ndaɗta mbay ki fok mulnana nam ɓak dla ndaɗta ki hin ɓii dla cora Haman laɗ vi vunum kay suu Juifnara ki ana dla ndaɗta hin ndi ni kay yamu, asi hin ɓalam ki kolo eg guna, nam u goryomu. 26Ni kay ndaɗta asi yi buu namma ana ni buu ma ki «ŋgaɓina» col ay u sem ŋgaɓpa.
Ni kay ndaɗta dlara lasasi u ndaɗta halaŋ ta asi waɗ u irisira u dlara li egesira halaŋ. 27Suu Juifna tin gaɗta kaɗ hin vaɗ ki kasiya, kay njafasi lay kay suu taɓ u asina lay, asi ka hin bay li u buu ma mba' namma hu basara tew tew ko asi tin gaɗta ki kamba na hu buu ma ŋgaamma. 28Hu buu namma ni asi li um lay, li luuna lay, hu njafasi tew tew hu taraŋ gegelay hu ɦoŋzi ma bagi maanagelay, hu ɦoŋzi maanagelay. Buu ma ŋgaɓam ki namma hin ka bulum ki duk suu Juifnaɗi, luu ma hin lamma ka daɓ ki duk dee suu Juifnaɗi.
29Ca mulla, Ester, ta goŋ Abihailla u Mardose ma Juifna ɓii magaara toŋgo na zak a hoŋ dira kay buu ma ŋgaɓam kina. 30Asi hin sun magaara ki maŋ suu Juifna halaŋ halaŋ ki maŋ mbassa bagi ta 127 vi mulna Zersesna. Asi ɓakasi u heɓpa u ɗegeera. 31Man buu ma ŋgaɓam kina ko Mardose ŋgaɓam ki kay suu Juifna u ca mulla Esterra na. Asi ŋgaɓ buu namma ki ni maŋ tasira lay, maŋ suu hu njafasina lay, ɦal voɗta maŋ suuna a li laara u tii tara. 32Boy ma vi Esterna tin gaɗta kay buu ma ŋgaɓam kina. Dla ndaɗta hin ɓiiriɗ ki kaŋga hu magaara ŋgolla.
Bible Moussey © Bible Society of Chad, 2002.