ESTER 6
6
Ҥeɓ Haman a ɦal ŋgara maŋ Mardose
1Njeŋge ndaɗta ni mulna buu sen kaɗi. Nam di ɗaŋŋi ana tli magaara ŋgolla dlara ɓiiri huruɗ halaŋ halaŋga ay mbay ndumuɗ ki fok mulna. 2Asi fi boy ma Mardose ɓakam kay suu li sunda vi mulna suu mbana, Bigtan u Teres, suu gol u vun grek mulna suu hal a vi mulna Zersesna.#Est. 2.21-22 3Mulna di ana ni li u me nage, ni ŋga me asi laɗ eg Mardose hu dla ndaɗta nage? Suu li sunda hu taraŋ mambana hoŋ dira ana, asi lam va ka egem na ndeɗi.
4Mulna di ɗaŋŋi ana, «Sa ka hu taraŋgana ni gege?» Doli ɗini Haman mbay hu taraŋga kurufu vi mulna a di mulna ana ɓal Mardose ki hu gu ma nam halam ay kamma. 5Suu li sunda hu taraŋga vi mulnana dam ana, «Haman ka coli hu taraŋga ni namu.» Mulna di ana, «Nam kal aya.»
6Haman hin kal haa. Mulna dam ana, «Va ma hin lam eg sa ma mulna min a lam umma ni mege?» Haman joɓ tam ana, «Sa ma mulna hin min a lam um suunna ni gege? Ni anɗi su?» 7Haman hoŋ dira maŋ mulna ɗaŋŋi ana, «Sa ma mulna min a lam umma 8asi hin mba baraw ma vi mulna ma nam cukum egemma aya, kulum ma mulna ful kamma, ma cukum ŋgarra vi mulnara kamma aya. 9Asi hin ɦal baraw namma u kulumma ɗaŋŋi maŋ sa ŋgol ma sunda ma vi mulna ma dew ma dlam ŋgolna. Asi hin cuk baraw namma ta sa ma mulna min a lam umma. Asi hin tlam kolo kay kulumma hin poy ki u nam hu voɗta hu hoŋzina, asi hin yi ha kolo fokom ana, sa ma mulna min a lam umma hin lammi ko wanda na.»
10Na ɗaŋŋi mulna di Haman ana, «Yow barawna zak, vi kulumma ko aŋ dira na, li Mardose na may, sa Juif ma ka kaki fun grek ma vi mulnana, aŋ hin va ki dew hu dlara aŋ min a laɗtaɗi.»
11Haman yow barawna, vi kulumma may, nam cuk barawna ta Mardose, tlam kolo kay kulumma, poy u nam hu voɗta hu ɦoŋzinara yi ha kolo fokom ana, «Sa ma mulna min a lam umma hin lammi ko wanda na.» 12Mardose hin hoŋ ay fun grek ma vi mulnana olo hu li ma Haman ka ɓaɗ tam a kal vo varam ki mbuɗi zolona yam kaŋga cokina.
13Haman ɓak dlara li ay egemba ki maŋ caamba, Zerses, u banayamma halaŋ. Suu wi dlara asina u caamba dam ana, «Li ni Mardose ma aŋ gijaŋ hom ay kaŋga fokom wanna ni hu njaf ma Juifna ni, aŋ hin ka ndak a lam va egem oloɗi. Aŋ hin tuɗ fok u homba hom umba ni na gak.» 14Asi ka ɓak u nam tu may ni, suu mba suu mulna tinisi fokomma mbay egem hin ɓaɗ tasi a mbay u Haman hu luu ma Ester tinimma.
Bible Moussey © Bible Society of Chad, 2002.