ESTER 1
1
Luu ma vi mulna Zersesna
1Ni hu cokira vi Zersessa. Zerses namma ti mulla kay mbassa bagira ni 127, col ha kay Ind day ta ta tew ki hu Etiyopi.#Ezd. 4.6 2Hu coki ndaɗta hu li ma mulna Zerses mbay tli lina kak kay dlam mamba mulla hu Suz ɦoŋzi ma saɓakŋa. 3Hu basaɗam ta hindira mulla, nam tin luuna maŋ suu mam suu ŋgolo suu sunda u suu mam suu li sunda. Asgaa suu Pers u Medina, suu begera u suu ŋgolo suu sunda suu ay hu zi ma bagina mbay fokomu. 4Luuna li buuna na kis duk dok-kalavandi. Nam tak ɦiz mamba hu mullara u jivi mamba ŋgolla kiyo. 5Hu coki ndaɗta ŋgoo dagan kay suu hu Suz ɦoŋzi ma saɓakŋa, suu ŋgolona u suu gi yasi kaŋga cocona mulna tinisi luuna buuna kiɗisiya hu taraŋga vi mulnara. 6Ay fun baraw ma vunum ŋgaɗi tus tus haɓ may, wara may na njuni u zewna haɓ may, tlaw may, fun walak doonora u mbal ma ɦinira. Va ma kak ma fiyeki ma mini u lorra u doonora kay li ma mbuyna mini u ɦinira zeɗ zeɗta, haɓi, tlawi, u guyvun guyvunna may. 7Asi ci hu koɓ ma lorra baɗam zeɗ zeɗ, sum veŋ ma mulna ɓaɗ ki kaŋga ko mbona na, ni mulna daŋ may. 8Gaɗta ki tini ana ci ni u huruŋu, kay ana mulna ɦal voɗta ki maŋ suu li sunda hu zira vi koyogina ana asi li ni u minda vi gegelay ma hurum minna. 9Ca mulla, Vasti, tin luuna maŋ boyogii suu hu taraŋga vi mulna, Zersessa may.
Ca mulla, Vasti, viɗ jivira kiyo
10Hu buu ma kiɗisiyana ni mulna hurum oy ki u furira ko sum veŋŋa. Nam di Mehuman, Bizta, Harbona, Bigta u Abagta, Zetar u Karkas suu ŋgolo suu sunda vi mulna Zersesna ana, 11Asi mbaam ca mulla, Vasti, ay fokom u jum maɗta mulla a takaɗ ki maŋ suuna u jiv maɗna maŋ suu ŋgolo suu sunda vi mulnana. Kay ana ndaɗ jivi a goloɗ u iriŋga ɦay. 12Na may ca mulla, Vasti, min ka mbay ko mulna di vun sunda ha fun suu mam suu sundara naɗi. Na ɗaŋŋi mulna mbuɗ ki yara ŋgol coco vi ki ko kura na. 13Doli ɗi ni dlara vi mulinara halaŋŋi tuɗ ni fok suu malayaŋ gaɗtana halaŋ u suu kaɓakŋa. 14Suu ay kaki eg mulna tokŋa ni Karsena, Setar, Admata, Tarsis, Meres, Marsena, Memukan u suu ŋgolo suu kiɗisiya suu Pers u Medi suu voɗta ki kasi buɗi a kak hu li ma fokŋa hu taraŋga vi mulnana. 15Na ɗaŋŋi mulna di suu wi gaɗta ana, «Ko gaɗta dira na ni va ma hin lam eg Vasti, ca mullana, ni me ko ndaɗ li ka u boy ma mulna Zerses dam ha fun suu mamsinanaɗi ni ge?»
16Memukan gijaŋ boyna dira fok mulna u suu mam suu ŋgolo suu sunda ana, «Ca mulla, Vasti, pan ka ni mulna holɗi may ni suu mam suu ŋgolo suu sunda halaŋ, suuna halaŋ, ɦoŋzi ma bagi ma vi mulnana Zersesna halaŋ halaŋ. 17Kay ana dlara ca mulla laɗta hin tew ha ki eg boyogiina halaŋ halaŋ hin zuɗusi a asi pan njufuyusi hin di ana, Mulna di ana mbaam ca mulla, Vasti, aya may ndaɗ hin mba kaɗi. 18Karam gaw ni boyogii suu vi suu ŋgolo suu sunda hu Pers u Medi suu hum ki kay dlara ca mulla laɗtana hin gijaŋŋa hoŋ dira maŋ suu ŋgolo suu sunda vi mulnana. Suu vun namma hin ŋgaf fun tammi u yara. 19Ko mulna vi kam kay ni ɦal gaɗta ɓiiriɗ ki kaŋga hu magaara gaɗta Pers u Medi sa hin ka mbuɗuɗ kiɗi, sa hin ka ɦal voɗta maŋ Vasti a ndaɗ hin mbay fok mulna Zersesɗi lay, nam hin ŋgol maɗta ca mulla ki maŋ ndaraɗta suuɗta. 20Gaɗ mayra mulna hin ɦaɗta suuna hin humuɗ ki hu li ma nam ti mulla kamma halaŋ halaŋ. Nam ŋgolo. Na ɗaŋŋi boyogiina hin gol njufuyusi irisi jiviya, col ha kay suu ŋgolona day tew ha kay suu gorina.» 21Dla ndaɗta furi huu mulna u suu mam suu ŋgolo suu sunda. Mulna hin li ni u boy ma Memukan damma na lay. 22Nam hin sun magaara ki hu ɦoŋzi ma bagi ma nam ti mulla kamma halaŋ halaŋ ki hu ɦoŋzi maanagelay u ɓii mamba, ki maŋ suuragelay u vun ma asi ɓakamma kay a gegelay li a ŋgolla kay ziimu ɓak u vun ma vi suu mamsinana.
Bible Moussey © Bible Society of Chad, 2002.