SUNDA 9

Sol hom u Boy Lonana

(Sunda 22.6-16; 26.12-18)

1Fali ndaɗta ni Sol las suu haɗina vi Bu Suuna, casi ki maɗna lay. Nam tuɗ eg mul ŋgol ma li ɓivunna, 2joɓom kay magaara a tuɗ hu Zira Tokka vi suu Juif suu Damasna, kay lini nam fi suuna njufina u boyogina suu vi u voɗta vi Bu Suuna na, nam njunusi ay mbaarasi hu Yerusalem.

3Nam hu voɗta a tuɗ Damassa wanni, tew eg ɦoŋzi ma ŋgolna na tok may ni, gol irim na ni, kiɗikka mbay kolo huulona weleɗ kamma wilik. 4Nam ndi kaŋga na gokŋi hum della dam ana, «Sol, Sol, aŋ lasan na ni kay mege?» 5Nam joɓom ana, «Ni aŋ gege, Bu Suuna?» Del ndaɗta hoŋom dira ana, «Ni an Yesu ma aŋ lasanna. 6Col kolo tuɗ hu ɦoŋzi ma ŋgolna, asi hin daŋ va ma aŋ hin lamma.» 7Suu tuɗ koyra ko tasi u Solna, lak ɦawa na jim, u va ma asi a damma ka irisiɗi, asi hum della may wi sa ka u irisiɗi. 8Sol coli kolo mal irim kiyo ni irim ka wiɗi. Asi vam kom taɗam tuɗum ha Damas. 9Nam li buuna hindi irim ka wiɗi, ti vaɗi lay, ci vaɗi lay.

10Sa ma haɗina dew sem ana Ana nias ka hu ɦoŋzina Damas, Bu Suuna tak tam irim yam ana, «Ana nias,» nam hoŋom dira ana, «An wanni Bu Suuna.» 11Bu Suuna dam ana, «Tuɗ cecemi hu voɗta ɦoŋzina Ɗegee, tuɗ hu zina vi Yudas, joɓ kay sa ma Tarsna sem ana Sol. Cecemi nam ka cena. 12Nam gola ni sana viriw irim sem ana Ana nias kal um tin kom kamu, kay irim mal ki nam mbuɗ wiya.» 13Ana nias hoŋom dira ana, «Bu Suuna, suuna bolowo ɓak kay sana wanni kay cora nam laɗ eg suu maŋ suu Yerusalemma. 14Nam mbay tani u saɓakŋa vi muli suu li ɓivunna a yow suu yaŋ seŋŋa halaŋ.» 15Bu Suuna dam ana, «Tuɗa, an man sa namma ni ko vaan ma sunda na a takan sen ki maŋ njaf suu daŋŋa, maŋ muli masisina u suu Israelna. 16An hin takam wihawra nam hin faɗ kay senda halaŋ u tanda.»

17Ana nias tuɗ tuɗni, tuɗ tew hu zira nam hura, baa kom kam dam ana, «Sol, wayanna, Bu Suuna Yesu ma tak tam ay iriŋ hu voɗta ma gan ay egeŋ a iriŋ mba mal kiyo, a aŋ hoɓ u Musuk Lonara may.» 18Li na ni vana peŋ ay ki ii Sol ko ɓolokŋa na, nam mbuɗ wi ni na gaw. Nam col kolo zow ni asi mbusum batemma gaw. 19Nam gijaŋ tina hoŋ fi saɓakŋa gaw.

Sol di boyna hu zi ma Damasna

Nam li buuna eg suu haɗina hu Damas goy ca. 20Nam gijaŋŋa ni na zak gaw a ɓakasi boyna hu Zira Tokka dasi ana Yesu ni Goŋ Lonna. 21Suu hum boy ma nam damma halaŋŋi viɗ ki ɦawa na viɗ. «Ni sa ma las suuna kay sem Yesu ay Yerusalemmaɗi su? Nam mba tani kay a yow suuna tuɗusi maŋ mul ŋgol ma li ɓivunnaɗi su?»

22Sol ɓak boyna u saɓakŋa cocoo. Hu li ma nam dasi ana Yesu ni Sa Lona Fuurumma ni, suu Juif suu laki Damasna ka wi va ma asi a hoŋom diraɗi.

23Ŋgoo dagan li buuna goy na ca ni suu Juifna tok vunusi dew ana, asi ci Sol kiyo. 24Ni suu daŋŋa dam ki jewe, asi juɓ vun kaana faali lay njeŋge lay a nam kal ay wa ni asi cam kiyo. 25Ni suu vi Solna tlam ay ki njeŋge tani siirim ay ki kay gulumunna ŋguy kay ɦoŋzina kaŋga hu kaalamba.

Sol mba hu Yerusalem

26Sol mba hu Yerusalem mba ni mba taɓ tam u suu haɗina, asi min li ndaana komu, ka saa ana nammi sa ma haɗina naɗi. 27Barnabas tayam um tay ni tuɗum eg suu vovoɗta. Nam vasi u boy ma Sol wi Bu Suuna ay hu voɗtana, u ɓak ma Bu Suuna ɓakam ayna lay. Nam dasi ki kay boy ma Sol ɓakam ay maŋ suuna kay sem Yesu hu Damasna lay. 28Ay hu li namma ni Sol tuɗ u asiya, nam tuɗa hin hoŋ ay Yerusalem ɓak boyna u ɦiŋga kay sem Bu Suuna. 29Nam ɓak boyna ko tam u suu Juif suu hum vun Grekŋa, ni asi halam a cam ki may. 30Hu li ma gorsemma hum na ni asi tuɗ Sol ha ki Sesare a nam jak ha ki hu Tars.

31Hu fali ndaɗta ni suu vina halaŋ hu Yude ni kaki u heɓpa suu Galilena u suu Samarina fi eŋga halaŋ hummi u Bu Suuna dew, Musuk Lonara njun usiya asi wul fok wuli na ɗow ɗow.

Ene garaɗ kiyo

32Piyer poy ki hu mbassa daŋga daŋga halaŋ halaŋ, fali taa dew ni nam kal vo vi suu vina hu ɦoŋzina dew yam ana Lida. 33Nam fi sana dew sem ana Ene, buuri kay layna li basara kalavandi kay nammi sa ma gugufuna ka tuɗɗi. 34Piyer dam ana, «Ene, Yesu Kristu garaɗaŋ ki wa, col kolo tli lay maŋŋa.» Vunum ndi kaŋga may ni, Ene col kolo gaw. 35Suu hu ɦoŋzi ma Lidana u Saronna halaŋ wi na ni vi u Bu Suuna.

Dorkas col ki kolo iiriya

36Cara vira dew ay hu ɦoŋzina Yoppe yaɗ ana Tabita (sem namma ni u vun Grekŋa ana Dorkas mbuɗ ki ni ana Dukka). Ndaɗ ay tew tew li jivira maŋ suuna njun u suu hawra. 37Fali ndaɗta ni ndaɗ ndi tuguɗira, miɗa, asi mbusuɗ taɗ ki mbusni tlaɗ gaɗ hu zira kolo kay ndaraɗtara. 38Suu haɗi suu Yoppena hum ana Piyer ka hu Lida ni, ndaɗ tok eg Yoppe, asi cuk suu vun sunda ha egem mba dam ana, «Ami ceneŋi ceniya aŋ mbay varami na zak vi yaŋ ayɗi.» 39Piyer vi yam kaɗi gi tam usi zak gaw. Nam mba tew egesi tew ɗaŋŋi asi tuɗum hu zira ha kolo kay ndaraɗtara. Boyogi suu donona halaŋ tok ay egem a tiina. Asi takam barawi suu Dorkas li ha cilisi hu li ma ndaɗ ha iiri tuna. 40Piyer cuk suuna ki bunsu halaŋ, goɓ kaŋga u vun givim cen Lona, nam pereɗ irim egeɗ na ni, daɗ ana, «Tabita col koloo.» Ndaɗ mal iriɗ ki na ni wi Piyer, ndaɗ kak ki ha uɗ gaw. 41Piyer tlaɗ koɗ tani njun uɗ coloɗ ki kolo gaw. Nam yi suu vina ay u boyogi suu donona halaŋ takasira ni ndaɗ ki iiri nje. 42Suu hu ɦoŋzi ma ŋgolna Yoppena halaŋ wi boy namma na ni vi u Bu Suuna. 43Piyer kak hu ɦoŋzi ma Yoppena buuna ŋgolo vo vi sa ma li sun ɗikka sem ana Simon.

Currently Selected:

SUNDA 9: BMS

Highlight

Copy