SUNDA 28

Pol kay daara Malt

1Ami suɗumi ki suɗ ɗaŋŋi, humumi ana sem daara ami kaɗta ana Malt. 2Suu ɦoŋzi nammana vami u furira ɦay, hu li namma lona gijaŋ sira, lina semeɗ cocoo, asi ŋgal kura ŋgola na ɦik ɦik, ami tok halaŋ a hol tamira. 3Pol yow njem guna kom a cukum kay kura, magira ay duk kura cuk ay ki ca ni mba ɗuɗ del ko Pol. 4Suu hu ɦoŋzina kay daa ndaɗtana wi magira ɗuɗ ko Pol na ni, asi di tasi ana, «Sa namma ni sa ma ci maɗna, suɗ ay ki mam duk mbo lumma lay ni ɗegeera vi Lonara ka hinim a nam kak iiriɗi.» 5Pol kisik magira ha ki duk kura na ni, va ma lam ka dagan na ndeɗi. 6Suu daŋŋa lak a juɓ ana hin balam kala, ɗowba hin ndi ga miɗ kalage. Asi juɓ dagan gak gak va ma co li ka egembi ni, asi mbuɗ saa masira ana nammi ta lona gaw.

7Eg li namma na tokŋi sa ŋgolna dew ka kay daara huwa sem ana Publiyus, sa namma vami u furira ŋgolo, ami buu varam hindi. 8Bu Publiyus u tuguɗira tam gi kura, sot ma bubusuna lam lay. Pol tuɗ a golomba, baa kom kamu cen Lona nam garaɗ ki gaw. 9Ŋgoo dagan wanni suu tuguɗira kay daa ndaɗta mbay eg Pol. Nam garaɗasi kiyo. 10Asi ŋgaami cocoo, ami a ful hu lumma a tuɗta wanni, asi ɦami tlesuu njun umi hu koy mamira ŋgolo.

Pol mba hu Rom

11Hu daɓpa vi til ma hindina wanni ami tuɗumi u lum kawi ma Aleksandrina, asi yam sem ana lo ma ŋgonira kay nam basa ni kay daa ndaɗta. 12Ami mba hu ɦoŋzi ma ŋgolna Sirakusna mba ni, li buuna hu hindi. 13Ay hu li namma wanni ami tuɗumi u gun yona a tew ki Regiyo. Vin maɗiira wanni semeɗ ma mbayawna col ay siira, ami tewemi ni li buuna mba, hu ɦoŋzina Puzzol. 14Hu ɦoŋzi ma ŋgol namma ni ami fi gorsemina huwa, asi min ana ami kak varasi li buuna goy kiɗisiya tuwa. Ni ami hin tuɗumi Rommi na. 15Gorsemi suu ha Romma humumi dlami ha hummi, asi mba ŋgafami vokomi u Sukŋa Appiusna u mbutluɓ ma hindina. Pol wasi na ni tam diŋitl gaw, nam gi deɓ Lona. 16Ami mbaami Rom mba ni, asi ɦal li ma Pol kak huna kay tam dew u sa ma asgaana um a golomba may.

Pol di Boy Lonana hu Rom

17Li buuna hindi ŋgoo dagan wanni Pol yi muli suu vi suu Juifna suu Romma ay egemu. Asi tok ay tokŋi nam dasi ana, «Gorsenna an li va ma co ka eg suu maysinaɗi, li va ma co ka eg dlara vi somoyogiraɗi lay, asi van ay Yerusalem vini ɦan maŋ suu Romma. 18Asi joɓon joɓmi, min a gan koloo kay asi fi dla mayra ndaki a can ki ka kaɗi. 19Ni asi suu Juifna ka minɗi, kay ndaɗta an joɓ Sesar. An wi va ma co ma ana an lam eg suu manna na kaɗi. 20Agi gola an yagi ay ni agi wiya an dagi ni na, ni kay juɓpa suu Israelna ka juɓa an ka njuni kaŋga u galina ni kayami.» 21Asi dam ana, «Ami fi magaa ay ka ko suu Yudena kay boy maŋŋaɗi. Wayami ma col ay tana dami boy ma co ka kaŋgi lay. 22Ami min a hum boy ma aŋ saaramma, ami wi ana suuna ka ŋgolo, min li gonokka u vira aŋ tin huruŋ kaɗ wanda.»

23Asi ŋga buuna duk tasi u Pol dew, hu buu namma wanni suuna mba bolow cocoo, fi Pol hu li ma nam buu huna. Col ay maɗii day gak gak fiɗigiya, Pol dasi boyna kiyo, nam dasi boyna kay Mul Lonara, hal a mbuɗusi hurusi u Yesu, li sunda u gaɗta vi Moizza u magaara vi suu jok vun Lona. 24Su ɦiw vi u va ma nam damma, suu ɦiw ka min viɗi may. 25Asi cuk tasi ɦawa bay vunusi taɓ duk tasiya. Pol dasi ɦawa ana, «Musuk Lonara di gasini u voɗoɗu, hu li ma ndaɗ di somoyogi u vun sa ma jok vun Lona Ezayi. 26Nam dasi ana,

Tuɗ eg suuna wanni dasiya,

a humba agi hum jiviya

ka vagi boy namma hurugiɗi,

agi gologi jiviya

ka wagi va ma agi golommaɗi.

27Kay suu asina

hurusi mbuɗ ki giniŋi,

asi ŋgel humusi kiyo,

dug irisi ki lay.

A irisi wiɗi, a humusi humbi lay.

A hurusi humbi lay.

Lona di ana asi mbuɗ irisi ay egen

a an garaɗasi kiɗi lay.»

28Pol dasi hu ɗaŋ ana, «Boy ma suɗta vi Lona sunum ay ni maŋ suu ka njaf suu Juifnaɗina, asi hin hum umu.» [29Pol di boy namma na ni suu Juifna tuɗ ni ciwayra duk tasi ɦay.]

30Pol li basara hu zira nam warak kaɗta mba', suu mba golom huna halaŋ nam vasi u furira. 31Nam dasi boyna kay Mul Lonara, haɗasi boyna kay Bu Suuna Yesu Kristu, bay ndaana sa doorom kaɗi.

Currently Selected:

SUNDA 28: BMS

Highlight

Copy