SUNDA 19
19
Pol hu Efes
1Hu buu ma Apollos ka hu Korint ni Pol tuɗ hu ndaŋgara kolora, tew hu Efes. Nam jak ay ni fi suu haɗina huwa. 2Nam joɓosi ana, «Agi vagi hu Boy Lonana na ni, fagi Musuk Lonara su?» Asi ana, «Ami bay hum boy kay Musuk Lonara tuwa.» 3Nam Pol hin joɓosi ana, «Mbusugi ni u batem manage?» Asi hoŋom dira ana, «Mbusumi ni u batem Jaŋŋa.» 4Pol dasi ana, «Jaŋ mbus batemma ni maŋ suu jok hurusi ki zeɗna, nam di suu Israelna ana tin hurusi kay sa ma ka mbay ŋgorom daganna, ni di ana Yesu.» 5Asi hum boy namma na ni vi kasi ana mbususi batemma kay sem Bu Suuna Yesu. 6Pol baa kom kasi na ni Musuk Lonara mba kasi gaw, asi gijaŋ ɓak boyna u vun ma daŋŋa daŋŋa, di ki kay dlara Lona ɦasira lay. 7Suu asina ay halaŋi doogo yam mba'.
8Pol haɗ suuna hu Zira Tokka, li tilna hindi u asi dasi boyna u ɦiŋga. Nam di boyna kay Mul Lonara, mal hu suu humum boy mamma kiyo. 9Suu daŋŋa dukusi ɦiw ni min vi boy nammaɗi, duk suu tokina ni asi ŋgul voɗta vi Bu Suuna. Pol hinisi yi suu haɗina umu, haɗasi boyna hu buuna tew tew hu zira haɗta vi Tiranussa. 10Nam li basara mba' u dla ndaɗta, kay ndaɗta suu kaki hu ndaŋgara Azira halaŋ, suu Juifna u njaf suu daŋŋa hum boyna vi Bu Suuna.
Dlara li u goryoŋ Skevena
11Lona li dlara mbuɗ mbuɗta ŋgol u Pol. 12Baraw ma ay cuki ta Polna u baraw mamba va zamalla asi yowosi ay mba ŋgenesi eg suu tuguɗira. Tuguɗira hinisiya asi mbuɗ ki jiviya, fulina kal ki hu suuna. 13Suu Juif suu poy a gol suu tuguɗira dik fuli suu cona ki kay suu tuguɗira, a dikisi ki kay suunara ni asi ana, «An gaɗagi a kal ki hurumu ni u sem Yesu ma Pol di kamma.» 14Suu li boy nammana ni goryoŋ mul ŋgol ma li ɓivunna, asi kiɗisiya. Sem busi ana Skeve. 15Ful ma cona hoŋosi dira ana, «An wi Yesu, Pol an wam lay, agi ni suurage?» 16Sa ma ful ma cora kamma ndi liŋŋa bowosi kaŋga fokom halaŋ, kay nam saɓak suusiya. Nam lasasiya, asi yow liŋŋa cuki hinim ziimma ni tasi siliya, fi mbilna egesi coco lay. 17Suu hu ndaŋgara Efesna halaŋ suu Juifna u njaf suu daŋŋa tasi mbuɗ ndaana halaŋ. Suuna halaŋ mbuɗ ŋga ni Bu Suuna Yesu. 18Suu vina cocoo di ki kay dlaasira asi laɗta duk suuna u vunusiya. 19Suu kumuna kosina ay bolowo, yow magaa masira ŋgalaɗ ki fok suuna halaŋ. Asi ndum magaa masi ndaɗta. Asi faɗ gusuɗ ii gursu doonora bup bup dok vadl. 20Ni boyna vi Bu Suuna njay ki u saɓakŋa cocora ni na.
Honira hu Efessa
21Ŋgoo dla ndaɗta dagan wanni Pol tin hurum a tuɗ Masedoin, jak ha Akay kay a tuɗ Yerusalem. Nam di ana, «An col a tuɗa wanni an min wi Rom ki u irin lay.» 22Nam sun suu njunum hu sunda ha fokom mba', Timote u Erast, nam hin ka dagan a jok hu ndaŋgara Azira tuwa.
23Hu fali ndaɗta ni honira ŋgola col kolo kay voɗta vi Bu Suuna. 24Sa ma yoo walakka dew sem ana Demetrius, nam yoo goo zira fi lo tamara, Artemis, u doonora. Ko nam fi begena ŋgolo u suu sunda umba lay. 25Nam tok suuna u ndarayam suu umma egemu dasi ana, «Gorna agi wi ana, aygi faygi begena u sun ndaɗta. 26Agi wi u irigi lay hum u humugi lay, dlara sa ma yam ana Polna laɗta. Nam di ana lo ma suuna lam u kosina ni ka loɗi, nam mbuɗ huu suuna a vi ki umba cocoo, ni ka hu Efes tani holɗi, kini kay yam ndaŋgara hu Azira halaŋ. 27Dlara ndaɗta ni ka ɓalakaygi ni sun maygira holɗi, a bulum kini zira ŋgola vi looygina Artemis. Ŋgolla vi looygina lay ka oloɗi, looygi ndaɗta suu hu ndaŋgara Azina u suu kay yam mbassa halaŋŋa vi uɗ halaŋ halaŋ.»
28Suu hum boy namma halaŋŋi, hurusi ɓeŋ ki ni na gaw. Gijaŋ sawalla kolo ana, «Artemis ta ŋgolla vi suu Efesna.» 29Ҥoŋzi ma ŋgol namma halaŋŋi vunna njay ha ki hu ni na bel bel. Suuna yow Gayus u Aristark taɗasi usi hu li ma tokka ma ŋgolna kay asi mba' ni suu tuɗ u Pol hu koy mamba. Suuna tok tasi ay ŋgolla na ndul ndul ki kasiya. 30Pol min a tuɗ ha duk suu molina ni asi suu vina dooromu. 31Suu ŋgolo suu kay ndaŋgara Azina, suu banayamma gi sunda ha egem ana nam tuɗ duk suuna hu tokkaɗi. 32Hu tok ndaɗta wanni suuna ki viɗi cocoo, suu ɦiw sawalla kolo kay boyna, ndarayasina hin di ni zeɗ gaw may, suu daŋŋa dukusi ni ka wi boy ma asi tok kammaɗi. 33Suu duk suu tokina di boy namma maŋ Aleksandre, ni suu Juifna colom fokosiya. Nam Aleksandre ko kom daŋŋa ana nam min suuna seŋŋa, nam di boyna, kay a vasi kini u dlara. 34Hu li ma suuna wi ana nammi sa ma Juifna ni tum soora halaŋ halaŋ fun tasi dew, gak gak kal lina ki na ɦayaŋ ana, «Artemis ta ŋgolla vi suu Efesna!»
35Sa ŋgol ma ɦoŋzina ma ɓiirisi dlaasirana seŋ suuna di ana, «Agi suu Efesna suuna hu ndaŋgara halaŋ wi ana ɦoŋzi ma Efesna ni li ma ŋgolna vi zira vi Artemis ta ŋgolla ni tani. Va ma tli tam ko ndaɗ nana ndi ay kaŋga col ay ni kolo huulona day. 36Sa ma tin vunum kaɗ kaɗi. Agi seŋegi vunna, lagi va ma bay saara naɗi. 37Suu agi yowosi ay ca ni ɓeŋ zira ŋgolla kaɗi, di va ma co ka kay looygiraɗi lay. 38Lini boy ma vi Demetrius u ndarayamma ka kay sa mari ni, suu ŋgolona kaa, buu ma kaɓakŋa huna ka lay, ni asi ndak a sek kay sa namma. 39Lini dlaagira daŋ ka a diya ni gi ii boy namma hu tokka u voɗoɗu. 40Aygi hin mbuɗ ni ko suu honira na, kay dlara li karam wanda. Boy ma a mbuɗ dlaaygira ki kay tokka wandara kaɗi, ka hin ndak a vi u boy namma ki gasagiɗi lay.»
41Nam di boy namma na ni suuna mbee ni na gaw.
Currently Selected:
SUNDA 19: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
