2 KORINTNA 6
6
1Ami suu li sunda u Lona ami joɓogiya, hinigi oora vi Lona ta agi famba komba ba kiɗi. 2Lona di hu magaa mamba ana,
«An humuŋ vunuŋ hu li ma jivi manda tak kina.
An njunuŋ hu buu ma suɗta.»
Cecemi lina ndak wa kay fi jivira vi Lonara, karamba ni buu ma sana ndak suɗ kina.
3Ami saa ana sa ndak ka a ŋgulumi sun mamiraɗi, ni ami ka hal a ganyam saɗi lini hu megelay. 4Ni na ɗow lini hu megelay ni ami tak ana ami ni suu sunda vi Lona. Wihawra li fami lay ni ami siɓimi u lalamba, lini hu haɗ huna lini hu yoora lay. 5Asi waɗamiya cukumi daŋgayna, duumi delemi a halami u boyna, cukumi hu sunda loɓma, ami ka buu senɗi, fi tiɗi lay. 6Ami takami ni sunda vi Lona u ɗegee mamira, hu viimira hu lalam mamira, hu jivi mamira u Musukka vi Lona, u min mamira gasira. 7A gasira vi boy ma ami damma, u saɓak Lonna, u va ma ami lam komi ko ɓagina u mbarina nana ni ɗegeera, a li sa u ndaɗ lay a doo kay tami lay. 8Asi geleɗemi mbaarami zolona kami lay, di cora kamiya di jivira kami lay. Asi golomi ko suu kaboyna na ni ami di ni gasira. 9Ko sa ka wamiɗina doli suuna wami halaŋ, ko suu miɗina na doli ami iiriya, agi lay ni wi boy namma u irigiya. Asi lasamiya cami ka ki maɗɗi. 10Asi lami dlara yoora egemi ŋgolo ni ami ka furi tew tew, golomi ko suu hawra na ni ami ɦizi u suuna, ami gol ko ka fi vaɗina ni a gasira tlena ka komi halaŋ.
11Ami tin vunumi kaɗi dagi kina was was agi banayami suu Korintna, ami mal hurumi ki egegiya. 12Ami hurumi ka egegi dugiɗi, agi ni suu dug hurugi egemina. 13An dagi ha ni agiya ko agi ni goryon na, lagi hurugi ki egemi jivi ko ami hurumi egegira na may, malagi hurugi ki egemiya.
Gologi tagi jivi ko dlara vi suu bay vina
14Taɓagi u suu bay vinaɗi. Asi ni ka ndarayagi suu dlaagira taɓi dewnaɗi, va ma ɗegeena hin taɓ ko tam u va ma cona ni nanage? Kiɗikka ndak taɓ ko tasi u ndufunda ni nanage? 15Kristu ndak taɓ ko tam u Satanna ni nanage? Sa ma vina ndak taɓ ko tam u sa bay vina ni nanage? 16Ziŋi Lonara ndak taɓ ko taɗ u fulina vi suu bay vina nanage? Ami ni Ziŋ Lona ma iirina ko Lona u tamba dira na,
«An min kak dukusiya,
poy u asi lay.
An hin li a Loosina
asi hin li a suu manna may.»
17Ni kay ndaɗta Bu Suuna di ana,
«Agi hinisiya taɓagi u asiɗi,
taɓagi u tliw ma njenjenaɗi,
an tanda may ni hin vagi egenu.
18An hin li ni a bugiya,
agi hin lini a goryon u gorɓii mansina,
Bu Suuna ma Saɓakŋa Kom Belna
di boy namma ni namu.»
Currently Selected:
2 KORINTNA 6: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
