1 PIYER 2
2
Ҥini ma iirina u suu teteɗna
1Hinigi huu ma cona ki halaŋ, u kaboyna u mbambara u ŋgiziɗta u ɦay ɦayra cora halaŋ. 2Ko kemba vuɗ wilira na, hal mbira gasira hu Boyna vi Lona. Agi cagira a wulugi u ndaɗu suɗugi tagi kiyo, 3lini agi jukugi jivira vi Bu Suunara wani.
4Ҥuɗugi ay tok eg Bu Suuna, ɦini ma iiri ma suu min zina noyom kina, Lona manam a ma jivi cocona. 5Ҥuɗugi tagi aya, agi may ni ko ɦini ma iirina na, hin a min zira kay Musuk Lonara ni u agiya. Agi hinni a suu teteɗ suu li ɓivunna maŋ Lona, ɓivun ma Lona minimma, nam irim jivira ni u Yesu Kristu. 6Gola ni va ɓiira hu magaara damma,
«An manni ɦini ma dlam ŋgolna,
an tinimmi a ɦini ma gi u zina
hu Siyon kamma,
sa ma tin hurum kamma
ka mbuɗ zoloɗi.»
7Ҥini namma kagi agi suu vina ni dlam ŋgolo, kay suu bay vina ni,
«Ҥini ma suu min zina gam kina,
mbuɗ a ɦini ma gi u zina kamma.»
8Magaara di hu li ma daŋŋa ana,
«Ҥini namma ni ma daɓ sem suuna,
ni ɦini ma hin cukusi gaana.»
Asi daɓ sesi kay asi ka min a hum u boy mammaɗi, kay ndaɗta asi ay ki ŋgaay ni na daŋ may.
9Agi ni njaf ma manam kina, suu li ɓivunna vi mul ŋgolna, deera teteɗta, suu vi Lonna. Managi ay kini a di ki kay sunda jivira vi Lona, taɗagi ay ki hu ndufunda a mbaaragi ki hu kiɗik mamba jivira. 10Ay jew ni agi ka suu vi Lonnaɗi, cecemmi agi mbuɗ suu vi Lonna. Jewni Lona ka wagi hahawagiɗi, cemmi agi mbuɗ ni suu nam wagi hahawagina.
Li ko sa sun Lonna na
11An ka joɓogiya banayan suu an minigina, agi ni ko koyogina u ŋgayagina na kay ndaŋgara tani, gologi tagi jivi ko saara vi mbalatara duu taɗ u iirira. 12Poyogi ɗegee duk suu bay vina, lini asi kaagi boyna egegi ana agi ni suu cona lay ni, asi hin wi sun magira jivira hin geleɗ Lona hu buu ma nam hin mbayna.
13Hoŋogi yagi kaŋga u suu ŋgolona kay sem Bu Suuna, humugi u mul ŋgolna ma ŋgolla kom halaŋŋa. 14U muli suu mul ŋgolna cukusi ay a cuk suu li dla cora daŋgayna, ŋga suu li jivina may. 15Lona minni ana agi seŋ vun suu ka wiɗina u suu giniŋŋa u lalamba, u dlara jivira agi laɗta. 16Poyogi ko suu ki buɗina na, may ni li buɗ magira ko va ma baa yam cora naɗi, lagi ko suu sun Lona na. 17Humugi u suuna halaŋ, minigi gorsegi suu vina, lagi ndaa Lona, hum u mul ŋgolna may.
Las ko Yesu lassa na may
18Suu sunda humugi u maliyagina, u humba gasira hummi u suu boyosi jivina u suu lalamma holɗi, u suu boyosi cona lay. 19Siɓigi dla cora ni agi lini ndaa Lona u las mayra lasagi kay dossa. 20Lini asi lasagiya, cagiya, kay ana agi li coo ni agi ka fi vaɗi. Lini asi lasagi kay ana agi li jivira, agi siɓ las ndaɗta wa ni jivi fok Lona. 21Lona yagi ni kay ndaɗta, Kristu u tamba lay ni wihawra kagiya, nam hinigi ka ana agi li ko nam na may. 22Nam li co kaɗi, sa hum boy ma kaboy ka funum faɗ taa dewɗi. 23Suuna ŋgulum lay ni nam hal dlara a ŋgul may kaɗi, suuna lasamu nam hal dlara sa sugulum kaɗi, nam hin boy namma halaŋŋi ko Lona ma kaɓakŋa u voɗom ɗegeena. 24Kristu u tamba yow cooygira ki kam kolo hu gu ma garakŋa, kay ana ay miɗiygi ki hu cora, lak iiri ɗegee may. Mbil mamma nam famma agi suɗ kini umu. 25Agi li ay ni ko timigii suu ki viɗina na, cecemi wanda agi mba eg sa ma taa yoona jivina a gologi Musuk magira.
Currently Selected:
1 PIYER 2: BMS
Highlight
Copy
Compare
Share
Want to have your highlights saved across all your devices? Sign up or sign in
Bible Moussey © Bible Society of Chad, 2002.
