1 MULINA 7
7
Min zi ma vi mulnana
1Salomon min ziimba kay tamba may. Li basara ni doogo yam hindi a miniɗta. 2Salomon min zira, tiniɗ seɗ ana Gura Libanda. Fiyekeɗ ni meter dok-vadl, hayaɗ ni meter dok-mba' yam vadl, wuluɗ ma tuɗ kolona ni meter doogo yam vadl may. Nam tiniɗ seɗ na ni kay gu sedrena, zaraam gira duk na fiɗi mbal ma ci yam zira egemma cuki ni kamu, halaŋŋi mini ni u gu sedrena. 3Gu ma njaay kolo a yam zira namma, njaayra ni kay mbalna na dok-fiɗi yam vadl, daraam cukira ni hindi, guna kayammi doogo yam vadl vadl. Njaay kolo kay gu mbalna. 4Keŋ zira halaŋ ii zira ha cooyra zaari vok taɗ na hindi ii zira cooy ha ni vok taɗ na ɗegee ɗegee daraɗ giira na hindi. 5Vunna halaŋ ki mini u guumu. Nam ki kolo fiyekiya. Nam kaay vok tammi zeɗ zeɗ hu lina hindi may. 6Nam min gi ma fun zirana fiyekem meter dok-mba yam vadl, hayam meter doogo yam vadl may. Nam minim vunum ma kalla may, mini vok tam u zira yaɗ ana Ŋgoo Bagira Libanda na gay. 7Nam hin min zira tin dlamba mulla yaɗ ana Zira Kaɓakŋa kay Salomon kaɓakŋa ni hu zi ndaɗta, taɗ ki ŋguffi u gu sedrena, col ha ga day ta ta koloo. 8Zira Salomon buu huruɗta ha ki mini ni hu li ma daŋŋa, ha ki day ew eg zira Gura Libanda. Ndaɗ mini ni ko ndal ta wanda na may. Zi mayra miniɗ maŋ goŋ Faraw ta Salomon ɗumuɗta mini ni ko ndal zi ndaɗta na may, ko zira yaɗ ana Gura Libanda na.#1 Mul. 3.1
9Zigini asina halaŋ mini ni u gogoyra, ni goy mayra varaɗ ki varira sak sak. Gogoy ndaɗta ni fun taɗ na dew dew, keŋeɗ jakŋi asi ŋgaɗam ki ni u siina. Asi miniɗ ni col ha u ga day faɗ ha ki kolo kay yamba ni u ndaɗu, ki hu ii ma kiɗikŋa huu taraŋ ŋgolla ni na lay. 10Kay a gi u ziginina gara halaŋŋi asi vaa ni ɦini mayra eŋ cocora, gasi usi ki ŋgolo cocoo ni meter fiɗi ɗowba vadl. 11Asi hin tin ɦinira ceɗira ha ni kaɗ koloo u mbal sedrena may. 12Ay ki ŋguy kay taraŋ ŋgolla na ni u gulumunna cuki huu tammi fiɗi, suu hindi jewna ni u ɦinira ceɗira, ma fiɗina ŋgufum ki ni u gu sedrena, ni ko ndal li ha kay Ziŋ Yawera wandara na may. Ko vun Ziŋ Yawera na may.
Sunda ɦaɗ maŋ Hiramba
13Mulna Salomon sun hu mbassa Tirra ana i yam Hiram#7.13 Hiram Hiram namma ni zeɗ u Hiram ma ti mulla kay Tir. aya. 14Hirammi goŋ cara donora. Ndaɗ ni hu njaf ma vi Neftalina. Bummi sa ma Tirna may. Nam li sun kawi ma tlawna. Nam wi dla coco lay, yal coco lay, mbeleŋ ɦay lay. Nam yoo ndal tlena zeɗ zeɗ halaŋ. Nam mbay eg Salomon a li sunda nam ɦambara halaŋ. 15Nam yoo mbal kawina na mba', fiyekemba tuɗ kolora ni meter dleeŋe, ŋguyumba gara ni meter karkiya may. 16Nam yoo jumba kuluɓuɗ ay kolo fun mbal nammara may. Yoo ni kawi ma tlawna lay ma dewna ŋga meter mba' u nus. 17Nam yoo ma daŋŋa ndalasi tasi ki ko ndal galina na, dlaŋaɗi eg jumba ay kuluɓi kolo kayam ndaɗta, cilira ko ndal bayna na. Kay ma fokŋa kiɗisiya may, kay ma daganna kiɗisiya may. 18Nam ndal tlesuu daŋŋa pay ko ndal vuɗ grenadinna na may, cukum zaraam duk na mba' kay bay ma cili kay jum ndaɗtana. 19Kay mbal namma kolo na ni jumba mbara ka kuluɓi huwa, wuluɗ ma kolona ni meter mba'. Taɗ ni ko ndal ɓo pafna na. 20Jumba ka kuluɓii kay mbal ma kolo namma jakka. Li ma daŋŋa ka mini kolo kayam huwa. Foto grenadinna ka kolo kay jumba na kis kis mba'. Zaraɗam gi kay jumba. 21Asi min mbal namma ni kolo fun Ziŋ Yawera na gay. Ma hiniŋŋa kolo bik njuf na asi yam ana Yakin ni ana, Lona so u sana. Ma hiniŋŋa bik gulu may. Asi yam ana Boaz, ni ana, saɓakŋa ka ni huu Lona. 22Hiram daɓ sun yoo tlegeyem suu kay mbalnana ni ko ndaɗta na.
Tassa ŋgol ma mbus zozoɗta kina
23Hiram yoo tassa ma ŋgol ma mbus zozoɗta kina. Hurummi meter vadl, wulum ma kolona ni meter mba' u nus, ŋguyumba ŋguf ki nara ni meter doogo yam vadl may. 24Vun tassana ma daɓ kolona ki ŋguy ndalla u foto vuɗ kusina na cutl. Meter dew ni fotoom hu dok-mba', zaraam gi kay tam na mba'. Yoo ndal ndaɗta ni ko taɗ u tassa ŋgol namma dew. 25Tassa ŋgol namma tini kolo ni kay mbutlugi kawi ma tlawna na doogo yam mba'. Suu hindi irisi pereɗi mbayawi, suu hindi irisi pereɗi daliya, suu hindi irisi pereɗi u maɗiina, suu hindi irisi pereɗi u fiɗigina may. Ŋgolosi halaŋ ni duk gayra. 26Doɓolok tassa namma ni ŋga kona dew. Vunum ki ɦarira ko ndal vun doyogina na. Ni ko ndal ɓo pafna a mun ay kira na. Huu tassa namma vo yona va ma litir buɓ buɓ dok-kalavandi.
Pus pus kawi ma tlawna
27Hiram hin yoo puspus kawi ma tlawna na doogo olo. Ma dewna fiyekem meter mba'. Hayammi meter mba' lay. Wulumba kolora ni meter dew u nus may. 28Nam ay minira ni ko ndal wanda na. Yoo kawi ma fiyekina a guumba yoo ma daŋŋa ko namma na a njaam dukka may. 29Tam ki ndalira ko ndal dlona na may, ko bolo mbutlna na may, ko ndal Serubimma na may. Kolo kay foto dlona u mbutlna na vuɗ tlena ka njari ndalla kolo kayam hu may. 30Puspusna dew ni sem um fiɗi fiɗi, njuni kolo eg tammi u lakas kawina may. Lakassa taɓi eg taɗ ni ko ndal semma na may, keŋeɗ kaayra ni fiɗi. Tle asina yoorosi ni ko tasi u guumba ŋgolora dew. Nam ka su kay girnadinnaɗi lay. 31Kolo hu puspusna nam co ii lina duk huwa. Hayaɗ ŋga kona dew. Ii a tin tassa kawi ma ŋgolna, hayaɗ ma hiniŋŋa ŋga kona dew u nus may. Hayamba jak ki kolora fiyekeɗ halaŋŋi fun taɗ dew. Vunuɗ ta kolora ki ndalira na nduɓuk nduɓuk. 32Sem ma fiɗina ay kali ga um may. Lakassa jak ki duk ɦoŋ puspusna na may, duk ɦoŋ sem puspusna ŋga kona dew u nus. 33Sem namma lammi ko ndal li sem puspusnara na olo. Sem ma gunina, kawi ma dlaŋaɗi hurumma, koppa yam kawina halaŋ taɓ ay egeɗta, yoori halaŋŋi u kawi ma tlawna. 34Sem ma fiɗi namma ay njari ki hu keŋem dew dew fiɗi bel, tuɗ taɓ ki kolo ni u puspusna dew.
35Huu puspusna ma ha fok na ni ki ndali u jumba mulla, fiyekeɗ ni nus bikŋa may. Ki ŋguy kay iirimba cooy ndaɗta halaŋ. Kolo hu li namma ni foto kona u kawi ma tlawna ki ndali kolo huwa. Taɓi eg tam u puspusna halaŋ. 36Asi ndal Serubimma u dlona u manawra ki kolo huwa. Li foto kona ka hu li nammaɗi. Ŋguyum yam ki halaŋŋi u foto grenadinna. 37Puspus ma doogona halaŋ mini ni fun tam na dew. Kawi ma minim u namma fiyekem u wulum u beɗemmi fun tasi halaŋ halaŋ.
38Hiram yoo tassa ŋgolona u kawi ma tlawna hu na doogo olo, a tinim hu puspus ma doogonara may. Tassana dew ni fiyekem meter mba' kay wulum ma tuɗ kolona, ma dewna hurum vo yona litirna buɓ duk kis kis karkiya.#Kal. 30.17-21 39Keŋ ma njufna kalafi hu Ziŋ Yawera asi cuk puspusna u tassa ŋgolona hurumma vadl, cuk keŋ ma bik guluna vadl may. Tassa ma ŋgolna asi tinimmi bik njuf kalafi hu Ziŋ Yawera tok eg keŋ ma ii dali u maɗina nana. 40Hu li ma Hiram daɓ sun tassana u gi pelna u ŋgal ma yam busuna ki yoora daɓmi, nam li sunda mulna Salomon dam ana laɗ hu Ziŋ Yawera ki halaŋ.#2 Dlaŋ 4.11—5.1
Ndum tlesuu yoorosi u kawinana
41Mbalna ha ki cuki kay yamba daɓ ha kolora mba', cil vana ko bayna na mba' a baa yam jumba kuluɓi kolo kay mbal ma mba' nammara may. 42Grenadna kis kis fiɗi njaɓi kolo eg bayna, darɗam cuki eg bayna ni mba' mba'. Ni a baa yam jumba kuluɓii kolo kay mbal ma mba' namma kira. 43Puspus ma doogo namma tassa ŋgolo ma doogona njari ni hurum may. 44Tassa ma ŋgol coco ma mbus zozoɗta kina ni dew, tini kolo kay bolo mbutlugi suu doogo yam mbana. 45Va ma yow buɗna kina, ŋgal ma yam busuna, u pelna, halaŋ ca ni tlesuu Hiram yoorosi a cukusi hu Ziŋ Yawera ko ndal mulna Salomon damba na may. Asi halaŋŋi yoori ni u kawi ma tlawna ma tam gol jivina.
46Asi yoo tle asina ay ni hu ɦuɗugumba fun lum ma Yordanna duk ɦoŋ ɦoŋzi ma Sukotna u ma Sartanna, hu li ma luɓuna. 47Salomon tin tle asina ki hu liisi dew dew bel. Sa ndak ka a ŋgaasi nekesiɗi kay asi bolow cocoo.
48Salomon li tlesuu a cuk hu Ziŋ Yawera halaŋ lay, givin ma togolla mini u lorra, taɓul mayra cuk fu ma ɦam maŋ Lonana kayamba mini ni u lorra.#Kal. 25.23-30; 30.1-3 49Li ma tin pindilla huna vadl bik njuf may, vadl bik gulu may. Njari ni fun zi mayra teteɗta na gay. Mini ni u lorra, foto ɓo tlena, pindilla, dew ma mbotta, halaŋ yoori ni u lorra.#Kal. 25.31-40 50Zek ma vo busuna, ŋgewegina ŋgal ma yam busuna kolona, tasi suu ci tlena, ganunna halaŋ yoori ni u lorra jivira. Vun ma ha kay Li ma Saɓaki Teteɗna nana, vun ma mba ma mal ha kay huu zira ŋgolla nana yoo ni lorra lay. 51Hu li ma mulna Salomon daɓ sun min Ziŋ Yawera ki daɓmi, nam mba tlesuu bum David hinisi ka maŋ Yawe Lonana ay ki hu Ziŋ Yawera. Gursuna, lorra u tlesuu daŋŋa zeɗ zeɗ. Nam mba cukusi ki hu zira ŋgay begera hu Ziŋ Yawera.#2 Sam. 8.11; 2 Dlaŋ 18.11
Currently Selected:
1 MULINA 7: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.