1 MULINA 10
10
Ca mulla hu mbassa Sabara mba gol Salomon
(2 DLAŊ MULINARA 1.14-17; 9.1-28)
1Ca mulla hu mbassa Sabara hum dla Salomon u sem ma tii ha ki cocona kay nam wi Yawe, na ni ndaɗ mbay a golomu. Ndaɗ min a tukum yal mamma u boy ma ganyamba, joɓom joɓpa nek cocora.#Mat. 12.42; Luk 11.31 2Ndaɗ mbay hu Yerusalem u suu sunda ay uɗ bolow cocoo ugi jamballa, yow tlesuu his jivina ay kaɗu, lorra ay ŋgol coco lay u ɦini mayra gus loɓ cocora may. Ndaɗ mba eg Salomon kalani dam dlara ay huruɗta ki halaŋ. 3Salomon hoŋoɗ dira ki kay joɓ maɗta dew dew bel. Joɓpa doo mulna bay nam hoŋ dira ki kaɗ kaɗi. 4Ca mulla ta ay hu mbassa Sabara wi yal ma vi Salomona u zi ma nam minimma, 5ti ma kay tabul mambana, li ma suu sun mamsina buu huna, njaf yoori mam suu vo varamma, baraw ma cuki ta suu mam suu li sundana, ɓivun ma nam lam a ŋgalam hu li ma ŋgal ɓivunna hu Ziŋ Yawerana, dla ndaɗta su ki kaɗ cocoo. 6Ndaɗ di mulna ana, «An humuŋ dlaŋ ha ki hu mbas manda na ni gasi daŋ may, kay boy maŋŋa u yal maŋŋa. 7Hu li ma an hum na ni an vi kaɗi, an ana bay an wi ki u irin may, hum ki u humun mayɗi. Doli ɗini asi njaɗan ay ni nus dla ndaɗta ɦawa tuwa. Aŋ su ki yalna u wira su dlara an humuɗ ay vora lay. 8Furira ka kay suu maŋsina. Furira ka kay suu sun maŋsina. Asi ni suu ka laki fokoŋ hu buuna tew tewna, ka humuŋ yal maŋŋa tew tew. 9Gi deɓ maŋ Yawe Looŋŋa ma min a kakaŋ kay dlamba mulla vi suu Israelna, ni kay ana Yawe min suu Israelna ɦay. Nam kakaŋ a mulna ni a aŋ mba li jivira u ɗegeera.» 10Ca mulla Sabara hin ɦal lorra maŋ mulna Salomonni ii va ma kelew buɓ buɓ hindi u nus, ɦam tlesuu his jivina ugi mbitla ŋgol cocoo u ɦini mayra gus loɓ cocora lay, col ay dayra ni sa bay wi tlesuu his jivi ɦayna hu mbassa Israella ŋgol ko ndaɗta na tuwa.
11Lum kawi ma vi mulla Hiram ma mbaa lorra ay Offirna mbaa gu ma yam ana santalna ay ŋgol coco may u ɦini mayra gus loɓma coco lay. 12U gu ma yam ana santal namma, mulna li gu mbal ma vi Ziŋ Yawera kolo eŋga ni u namu. Li mbalna hu ziŋ mulnara lay. Nam ceɗ gi diŋŋa u dadarina maŋ suu gi soolla may. Hin ŋgoo dagan gu ma yam santal namma ka mba oloɗi, sa ka wam oloɗi lay ta ta cemi.
13Mulna Salomon ɦal tlesuu ca mulla Sabara joɓom kasina. Nam ɦaɗsina halaŋ halaŋ. Ni ndum tlesuu nam ɦaɗsina u hurum ɦawa a puurana ka dukgi. Ndaɗ u suu maɗsina hin hoŋ dagan tuɗ hu mbas maɗta.
Salomon mbuɗ sa ŋgolna ɦizi coco lay
14Hu basara dewra mulna Salomon fi lorra ni kelewna na buɓ buɓ dok-mba' vo hu Yerusalem. 15Ni ndum mayra mbay kolo ko suu paara ay ko muli suu u fiɗiginana u suu ŋgolo suu kaki kay mbassana ka dukgi.
16Mulna Salomon cil mbari ma ŋgolona na kis kis mba', lam tam ki u lor mayra yoorira, mbari ma dewna lorra egemba ni kelew karkiya. 17Mbari ma gorina ni kis kis hindi, lam tam ki u lorra, ma dewna lorra egemba ni kelew dew u nus. Mulna cuk mbari namma ha ni hu zi mayra Gura Libanda. 18Mulna min dlamba mulla ta ŋgolla na dew ni ndalaɗ taɗ ki u sii tlokka, hooroɗ yaɗ ki u lor mayra jivira. 19Dlamba mul ndaɗta liiɗ ma ɗiŋ ha kolo huruɗna na karkiya. Ŋgoroɗ ma gissa ha toki kolo ni na dew. Keŋeɗ jak ni li ma gi kona ka huwa. Ay keŋ na ni foto dlona ka coli keŋeɗ mba' may, mba' may. 20Keŋ liiɗ ma ɗiŋ ha kolona ni foto dlona njaari doogo yam mba', keŋ hiŋŋa karkiya, keŋ hiŋŋa karkiya may. Mulina halaŋŋi dlara ko ndaɗta na li ka vi mul ma ɦoyɗi. 21Koɓii suu ci tlena vi mulna Salomon halaŋ mini ni u lorra. Tlesuu ha u zi mayra Gura Libanda halaŋŋi u lorra. Va ma mini u dono ka huɗi. Hu li ma Salomon a mulnana ni lorra gol ki ni ko va ma ɦawana na. 22Kay mulna Salomon lum kawi mamma kaa. Nam sun tlena hu mbassa daŋga. Suu mamsina taɓi ko tasi u suu vi mulna Hiramma. Hu basara hindi ni lum kawina hoŋ ay vo ni oyra u lorra, donora, sii tlokka, viina u layagina. 23Mulna Salomon mbuɗ ŋgol su muli suu daŋŋa halaŋ halaŋ u ɦizza may u yalna may. 24Suu kay ndaŋgarana halaŋ min a wi Salomon kay a hum boy ma wira ma Lona kalamma hurumma. 25Gegelay ni mbay u puu mamba komu. Tlesuu sunda, gursura, tlesuu yoori u lorrana, barawna kawi ma duuna, kulumina, koro Makkana, tle asina mbay ni hu basara basara halaŋ.
26Salomon tok yam pus pusna u suu jaŋ kulumina, pus pus mam ma kulumina ni 1.400. Suu jaŋ kulumina ni 12.000. Ha hu hoŋzi ma cuk kawina may, ga um vo hu Yerusalem may.#1 Mul. 5.6 27Gursura ko mulna vo hu Yerusalemba zuli ŋgol su gogoyra. Gu sedrena zuli kom a su gu tulumma hu mbassa kaŋgara may. 28Salomon fi kulumi mamsina ay ni hu Egipte u Kuwe. Suu paa suu vi mulnana gususi ay ni hu Kuwe.#Gaɗ. 17.16 29Pus pus ma ay Egiptena dew ni gus gursu kis kis karkiya. Kulumma dew ni gus gursu kis duk dok-vadl may. Muli suu Hitna u suu Sirina gus ni ko ndaɗta na lay.
Currently Selected:
1 MULINA 10: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.