Akintaahsonan 9
9
Wahkwi Kaakii'ishkotewaanahkwahk
15Ahpii tahsh ehkiishikahk kiionahkitek kihci anami'e pakwaanekamik, wahkwi hsa kiiaakawaanahkwan eshi'ayaak i'i kihci anami'ewikamik. Kiionaakohshink itahsh piinihsh eani waapank taapishkoo ishkotenk kii‑ishinaakwan i'i wahkwi kaakii ayaak i'imaa ishpimink kihci anami'e pakwaanekamikonk. 16Miitahsh iko 'i mooshak kaaishi aakawi wahkwiiwank ehkiishikahk, ehtipihkahk itahsh ishkotenk kii‑ishinaakwan. 17Ahpii tahsh iko wahkwiini eonci ompishkaanik i'imaa kihci anami'e pakwaanekamikonk, mii hsa 'i Isriyalak (Israel) kaaishi maacii kosiwaatc. Aaniinti tahsh iko eshi kipihciimakaninik i'i wahkwiini, mii hsa imaa Isriyalak kaaishi kapehshiwaatc. 18Isriyalak itahsh eanoonikowaatc kaaTipencikenitc cimaacaawaatc, mii hsa ko 'i kaaishihcikewaatc. Eanoonikowaatc kaye cikapehshiwaatc, mii hsa ko 'i kaaishihcikewaatc. Minihk itahsh iko kaakipihcishkaanik i'i wahkwi i'imaa kihci anami'e pakwaanekamikonk, mii hsa ko imaa kaa‑ayaawaatc. 19Mihsawaa hsa ko kinwesh kiiayaanik i'i wahkwi i'imaa kihci anami'e pakwaanekamikonk, Isriyalak hsa okiih kanawentaanaawaa kaaTipencikenitc kaakii'ikowaatc, kaawiin itahsh kiimaacii kosihsiiwak. 20Ninkotink itahsh niipiwa'iish tahso kiishik i'i wahkwi kiiayaa i'imaa kihci anami'e pakwaanekamikonk; e'ikowaatc itahsh iko kaaTipencikenitc cikapehshiwaatc, mii 'i kaaishihcikewaatc. E'ikowaatc itahsh iko cimaacaawaatc, mii 'i kaaishihcikewaatc. 21Ninkotink itahsh peshiko tipihk ehta kiihkipihciimakan i'i wahkwi, ehkishepaawakahk itahsh kiiompishkaa, miihsh kaaishi maacaawaatc. Mihsawaa ko ehkiishikaninik, komaa kaye ehtipihkaninik eompishkaanik i'i wahkwiini, mii hsa ko 'i kaaishi maacaawaatc. 22Minihk hsa kaakii ayaanik i'i wahkwi i'imaa kihci anami'e pakwaanekamikonk, niishokiishihk, komaa kaye peshiko kiisihs, komaa kaye peshikopipoon Isriyalak hsa kaawiin kiimaacii kosihsiiwak, kaakii ishi kapehshiwaatc hsa kiiayaawak. Ahpii tahsh eompishkaanik i'i wahkwi, mii hsa 'i kaaishi maacii kosiwaatc. 23Ekii'ikowaatc itahsh kaaTipencikenitc cikapehshiwaatc, mii hsa ko 'i kaaishihcikewaatc. Ehkanoonikowaatc itahsh kaye cimaacii kosiwaatc, mii hsa ko 'i kaaishihcikewaatc. Okii na'ihtawaawaan hsa kaaTipencikenitc kaakii inaahkonikenitc. Kii‑ishihcikewak kaakii ishi anoonaanitc Moosihsoon ci‑inaahkonikowaatc.
Currently Selected:
Akintaahsonan 9: OJBR
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society
