Maahtiyo 24

Ciisahs ekiih tashintank aaniin keshi nihshiwanaacihcikaatenik Kihcianami'ewikamikoni

(Mark 13.1-2; Luke 21.5-6)

1Ciisahs tahsh ekii'anionci maacaatc i'imaa Kihcianami'ewikamikonk okihkino'amawaakana' okiihpi antawaapamikoo' ewii'-waapanta'ikotc aaniin kaa⁠ishihcikaatenikin Kihcianami'ewikamikonk kaakii'onci tipentaakwaninikin ishimaaciiwinan. 2Okii'-inaa' itahsh: “Pisaan iko waapantamohk ono ishimaaciiwinan. Kiwiintamawininim tahsh, iki hsa ahsiniik kaa⁠waapamekwaa i'imaa kaaishi apiwaatc kaawiin ta‑apihsiiwak, aaniihsh kahkina ta⁠naaniihsiwepinikaasowak.”

Kaawii'-ocaanimaanimisink, kaawiih kakwaatakihtoonk kaye

(Mark 13.3-13; Luke 21.7-19)

3E'⁠namatapitc itahsh i'imaa pihkwatinaank Aalip (Olive) Kihtikaanaahtikohkaank e'⁠ishinihkaatenik, okihkino'amawaakana' okiih pinaasihkaakoo' ekiih kiimooci kakwecimikotc: “Wiintamawihshinaam aaniin ahpii ke⁠ishihsek i'iwe kaa'⁠ihkitoyan. Aaniin keonci nihsitawinaakwahk wiihpi takohshinan, wii'‑ishkwaahsekin ono kekoonan mekwaa kaa⁠waapantamank.”

4Ciisahs hsa kii'‑ihkito: “Ayaankwaamisik, ci⁠waniwinihsinowinek awiya. 5Aaniihsh ta⁠paahtiinowak cipi takohshinowaatc i'imaa nintishinihkaasowinink ci‑ihkitowaatc: ‘Niin hsa Kishemanitoo otOonaapamaakanan.’ Niipowa' itahsh oka waniwinaawaa' pemaatisinitc. 6Kika tepihtaam hsa 'i miikaatiwin, kika naanoontaam kaye e'⁠maamiikaatinaaniwank. Keko tahsh sekisihkek. Pinamaa hsa o'o ta⁠ishihse cipwaa ishkwaahsekin ono kekoonan mekwaa kaa⁠waapantamank. 7Takihci miikaatiwak hsa pepahkaan kaa⁠tahswewaanakisiwaatc o'omaa ahkiink, kaye kaa⁠tahsinkin okimaawiwinan. Pepahkaan misiwe miicim ta⁠naanoontehse, pepahkaan kaye ahkiink taishi kohkoshkohse. 8Ono tahsh kaa⁠wiintamaan mii keshinaakwahkin taapishkoo ihkwe kaa⁠maaciaahkositc ewii'-waapamaawahsotc.

9 # Mat 10.22. “Kika tahkonikoom, kika miikiwaaniwim kaye ci⁠kakwaataki'ikooyek, miitahsh keshi nihsikooyek. Kahkina awiya entahswewaanakisitc kika shiinkenimikowaa niin onci. 10Ta⁠paahtiinowak kaye ke⁠aanawencikewaatc i'i ahpii. Ta⁠mamishintiwak kaye, ta⁠shiinkenintiwak kaye. 11Miitahsh aahpici ta⁠paahtiinowak ke⁠inwaanitisowaatc kaa⁠kanootamawaawaatc Kishemanitoon. Miitahsh niipowa' keshi wanihshimaawaatc pemaatisinitc. 12Keni ahpiihci paahtiinatihk itahsh macitootamowin, i'i hsa niipowa' pemaatisiwaatc kaaishi saaki'itiwaatc, piinihsh kaawiin tani saaki'itihsiiwak. 13#Mat 10.22. Awiya hsa ke⁠shashiipentank piinihsh weti ishiahpii kaawii'-ishkwaahsek kekoonan noonkom kaa⁠waapancikaatek, mii hsa a'a ke⁠pimaaci'intc. 14Pinamaa hsa o'o kaashi minwaatotek o'o Kishemanitoo oTipencikewin ta⁠papaatipaatote misiwe ahkiink kahkina pemaatisiwaatc ci⁠noontamowaatc. Miitahsh i'i payesh kahkina kekoon ci‑ishkwaahsek.”

Maawac iko kaa⁠wihkihcikakwaatakihtoonk eh⁠tashintek

(Mark 13.14-23; Luke 21.20-24)

15 # Dan 9.27; 11.31; 12.11. “Kika waapantamowaam ihsa i'iweni kaawiih kakwaanihsakinaakwaninik kaa⁠nihshiwanaacihcikemakaninik Taaniyoo (Daniel) kaakiih tashintank kaakiih kiikitohtamawaatc Kishemanitoon. I'imaa hsa Kihcianami'ewikamikonk taishi niipawiimakanini.” Kiinawaa ke⁠anamihtooyek o'o, nihsitohtamohk! 16“Miihsh i'iwe ahpii, iki hsa kaataawaatc i'imaa Cootiiyaahkaank (Judea) weti hsa ta‑ahpa'iwewak kaashi papiihkwatinaanik. 17Awiya kaye kaashi napakaanik wakiciwaahkaa'ikan kaa‑ayaatc, kaawiin ta⁠ishihsehsii aniniihsaantawetc cini maaciitoohpan otaya'iiman i'imaa owaahkaa'ikanink. 18Awiya kaye kaa‑anohkiitc weti okihtikaanink kaawiin oka pikiiwenotansiin ci⁠pinaasihkank i'i kaakiih kiihcikoshkank okashkiikiiwin. 19I'iwe tahsh ahpii kiishikahk, aahpici ta⁠ocaanimisiwak iki ihkwewak kaa⁠kikishkawaawahsowaatc, iki kaye omaamaamaak kaa⁠nooni'aawaatc oniicaanihsiwaa'. 20Anami'ehtawihk tahsh Kishemanitoo, ci⁠pipoonsinok, ci⁠Anwepiiwi kiishikahsinok kaye i'i ahpii maaciipa'iweyek.#24.20 ciAnwepiiwi kiishikahsinok ahpii maaciipa'iweyek: Anwepiiwi kiishikani Onahshowewin hsa kii'‑ishihsin awiya aapihta tipa'ikan ehta ci⁠kii ishaahpan e'⁠Anwepiiwi kiishikaninik. 21#Dan 12.1; Rev 7.14. I'iwe hsa maawac kaawiih kihci'ocaanimahkamikahk, kaawiin wiihkaa pimi‑ishiwepahsinoon ahpane kaaonci maaciahkiiwank piinihsh noonkom kaa⁠kiishikahk. Kaawiin kaye miinawaa wiihkaa tani‑ishiwepahsinoon. 22Kishemanitoo aasha okiih tahkwakintaan aaniin tahsokiishik kekihci ishikiishikaninik. Kiishpin tahsh i'i ishihcikehsikipan, kaawiin awiya taa⁠pimatisihsii. I'i tahsh aasha kaakii'-onaapamaatc ewiih pimaaci'aatc pemaatisinitc, miitahsh keonci tahkwakintank tahsokiishik kekihci ishikiishikaninik.

23“Kiishpin tahsh awiya ininek: ‘Ina onoweniwan Kishemanitoo otOonaapamaakanan!’ komaa kaye: ‘A'aweti hsa kaa⁠matweayaatc!’ keko awaac pankii tepwehtankek. 24Ta⁠paahtiinowak ihsa ke⁠inwaanitisowaatc Kishemanitoon otOonaapamaakanini, iki kaye ke⁠inwaanitisowaatc eh⁠kiikitohtamawaatc Kishemanitoon. Mii hsa iki kaa⁠waniwishiwewaatc. Aahpici hsa ta⁠mamaantawihcikewak, miitahsh keonci maamahkaacihcikewaatc, ci⁠waniwinaawaatc pooshke aasha Kishemanitoon kaakii'-onaapamaanitc pemaatisinitc, kiishpin kashkihtoowaatc. 25Pisintawihshik! Kikiishaaci wiintamawininim hsa waa'⁠ishiwepahk.

26 # Luk 17.23-24. “Kiishpin tahsh awiya ininek: ‘Weti hsa pikwatahkamik ayaa,’ keko tahsh kiinawaa ishaahkek. Komaa kaye kika ikowaak: ‘Inashke kiimooci ayaa ihsa piintik i'imaa.’ Keko tahsh tepwehtankek. 27Taapishkoo hsa waapanonk e'onci waahtehsek, ninkaapii'anonk itahsh e'⁠inaahsahkwanehsek, mii hsa ke⁠ishinaakwaninik ahpii pi⁠takohshink a'a Inini oKosihsan.

28 # Luk 17.37. “Aanti hsa kaashi ahtek kaa⁠nipoomakahk wiiyawimaa, mii hsa i'imaa keshi ohkopiicihsewaatc iki mihtashkihtikwaanaankek.”

Ahpii takohshink Inini oKosihsan

(Mark 13.24-27; Luke 21.25-28)

29 # Joel 2.10; 3.4; Rev 6.12,13. “Shemaak itahsh kii‑ishkwaahsekin ini kaawii'-ocaanimikiishikahkin, kiisihs ihsa ta⁠kashkiitipihkisi, tipihkikiisihs kaye kaawiin ta⁠saakaahsikehsii, wanankohshak kaye ishpimink taonci pankihshinook, kaa⁠mashkawentaakwahkin ishpimink ta⁠pepahkaanihsewan. 30#Dan 7.13; Rev 1.7. Kekoon hsa ta⁠naakwan keonci nihsitawinikaatenik ewiih takohshink a'a Inini oKosihsan i'imaa kiishikonk. Entahswewaanakisiwaatc pemaatisiwaatc o'omaa ahkiink hsa ta⁠mawiwak ahpii waapamaawaatc ini Kishemanitoon Okashki'ewisiimini pimi‑ishi takohshininitc i'imaa wahkwiink ishpimink kaa‑akootenikin, eshi mashkawisiinitc kaye eshi kihciokimaawentaakosinitc. 31Kihcipootaacikan ihsa ta⁠noontaakwan, miitahsh a'a ke⁠pitakohshink keshi‑ishinisha'waatc i'i otencalima' niiwink inahke kaa⁠ontaanimaninik, misiwe ahkiink cionci maamooshakinaanitc i'i aasha kaakii'-onaapamaatc pemaatisinitc ewiih pimaaci'aatc.”

E'⁠aawehcikaakaaniwitc a'a kihtikaanaahtik

(Mark 13.28-31; Luke 21.29-33)

32“Kekoon tahsh onci kihkentamohk a'a kaa‑aawehcikaasotc kihtikaanaahtik, pik (fig) kaa⁠tinwaahtikowitc. Kiishpin hsa i'i watihkwan kiiani noohkahk, e'ani saakipakihk, mii hsa 'i aasha ewii'-niipink. 33Kekiinawaa tahsh waapantamek i'i kahkina kekoonan, mii hsa ci⁠kihkentamek aasha e'⁠ocihcihsek ci⁠maacihsekin ini kaa⁠ininakook. 34Maamihkawik tahsh o'o! Kaawiin hsa ta⁠caakinipohsiiwak oko kaa⁠pimaatisiwaatc, mii 'i aasha kahkina ci‑ishiwepahkin ono kaa⁠wiintamawinakook. 35Mihsawaa ko kiishik, ahki kaye ishkwaahsekin, nintihkitowinan tahsh wiin kaawiin wiihkaa ta⁠ishkwaahsehsinoonan kaashi tepwemakahkin.”

Kaawiin awiya okihkentansiin ahpii ke⁠takohshininitc Inini oKosihsan

(Mark 13.32-37; Luke 17.26-30, 34-36)

36“Kaawiin hsa awiya okihkentansiin ahpii kiishikaninik, aaniin kaye ke⁠tahsotipa'ikaneyaanik i'i ahpii ocihcihsenik. Encalak kihcikiishikonk kaa‑ayaawaatc kaawiin okihkentansiinaawaa, kaye niin oKosihsimaa kaawiin ninkihkentansiin. Mii ehta a'a Weyoohsimintc kehkentank. 37#Gen 6.5-8. I'i hsa kaakii'-ishiwepahk mewisha ahpii Noowa (Noah) kii⁠pimaatisitc, mii hsa ke⁠ishiwepahk ahpii Kishemanitoo oKashki'ewisiman pitakohshininitc. 38Ahpii tahsh cipwaa nihkipiik i'i ahki mewisha pemaatisiwaatc kii'⁠waawiihsiniwak, kii'⁠minihkwewak kaye, kii'⁠wiitikentiwak kaye, piinihsh ahpane eh⁠kiishikaninik Noowa kii⁠poositc i'imaa kihciciimaanink. 39#Gen 7.6-24. Kaawiin tahsh okiih kihkentansiinaawaa aaniin kaa⁠inahkamikaninik, paanimaa hsa nipiini ekii'-nihkipanikowaatc ekii'-maaciiyaapokowaatc kahkina. Miitahsh peshikwan ke⁠ishiwepahk ahpii Inini oKosihsan pitakohshininitc. 40Niishin (2) hsa ininiwak anohkiiwaatc kihtikaanink, peshik hsa ta⁠maaciicikaniwi, kotak tahsh ta⁠nakacikaniwi. 41Niishin (2) ihkwewak pahkweshikanan kaa⁠pikishkataawanka'waawaatc, peshik hsa ta⁠maaciicikaniwi, kotak tahsh ta⁠nakacikaniwi. 42Ahshawaapik itahsh, aaniihsh kaawiin kikihkenimaahsiwaawaa ahpii kiishikaninik ke⁠takoshink kiTipencikemiwaa. 43#Luk 12.39-40. Maamihkawik tahsh o'o, kiishpin inini kaa⁠tipentank waahkaa'ikanini kihkenimaatc ahpii waah⁠pitakohshininitc okiimoocishkan, kaawiin taa⁠nipaahsii, kaawiin kaye otaa pakitinaahsiin ini okiimoocishkan ci⁠piikwa'aminitc ci⁠pipiintikenitc owaahkaa'ikanink. 44Miitahsh peshikwan kekiinawaa keshi oshiihtaayekipan mooshak, aaniihsh Inini oKosihsan ta⁠takohshinoon ahpii tipa'ikanink ke⁠pii'imaahsiwek.”

Kwayahk anohkii'aakan komaa kaye macianohkii'aakan

(Luke 12.41-48)

45“Awenen hsa 'a kwayahk kaa⁠kakiihtaawentank anohkii'aakan? Mii hsa a'awe kaa⁠miinikotc otookimaaman kaa⁠maacaanitc, ci⁠tipenimaatc kotak anohkii'aakana' ci⁠ahshamaatc ahpii ocihcihsenik ci⁠wiihsininaaniwaninik. 46Aahpici hsa ta⁠minohse a'a anohkii'aakan ahpii takohshininitc otookimaaman e'⁠waapamikotc e'⁠ishihciketc kaakii'ishi anoonikohpan. 47Kekeht hsa kitinininim, a'a anohkii'aakan oka miinikoon otookimaaman kahkina otaya'iimini ci⁠naanaakacihtootc. 48Kiishpin tahsh wiin macianohkii'aakan tinowihpan taa⁠inentam: ‘Kaawiin hsa wiipa ta⁠takohshinsii nintookimaam.’ 49Miitahsh keshi maaciipahpahkihte'waatc owiitanohkiimaakana', ci⁠wiiciwiihsiniimaatc ci⁠wiiciminihkwemaatc kaye i'i ominihkwe'. 50A'a tahsh tino anohkii'aakan ta⁠takohshinoon otookimaaman ninkotink kiishikaninik ahpii eh⁠pii'aahsik, eh⁠kihkenimaahsik aaniin ahpii tahsotipa'ikaneyaanik ke⁠takohshininitc. 51Wiinke oka kakwaataki'ikoon otookimaaman, miitahsh kaye ke⁠tootaakotc taapishkoo kaa⁠tootawimintc ominwaatisiihshihtoo'. Miitahsh weti ke⁠tashimawitc, mii kaye weti ke⁠tashimatweyaapitehsetc ke⁠ahpiihcimincinawesitc.”

Currently Selected:

Maahtiyo 24: OJBR

Highlight

Copy