Maahtiyo 13
13
E'aawehcikaakaaniwitc kihtikewinini
(Mark 4.1-9; Luke 8.4-8)
1Peshikwan tahsh ehkiishikaninik, Ciisahs okii'-nakataan i'i waahkaa'ikanini, miitahsh kaa'ishi naasipiitc, ekii'-onapitc ewiih kihkino'amaaketc. 2#Luk 5.1-3. Ekiih paahtiinonitc itahsh kaakiih pinaasihkaakotc, ciimaanink kiihpoosi ekii'-onapitc ewiionci kihkino'amaaketc. Iki tahsh wiin awiyak ciikipiik kii'niipawiwak. 3Aawehcikanan tahsh okii'-aapacihtoonan niipowa' kekoonan ehtatipaacimohtawaatc.
“Kii'ayaa hsa inini ekiih kihtikaatank kihtikaanenhsan. 4Mekwaa tahsh e'ohswewepinank kihtikaanenhsan, aaninta miihkanaank kii'ishi pankihsininiwan. Pinehshiinshak itahsh okiih kitaanaawaan. 5Aaninta tahsh kihtikaanenhsan, eshi ahsiniihkaak kaa'ishi tapahsahkamikaak kii'ishi pankihsinoon. Wiipa tahsh kii'nihtaawikinoon kihtikaanan. Aaniihsh onsaam kiihtapahsahkamikaa. 6Ahpii tahsh kiisihs eni ishpakoocink kahkina kiihcaakitewan ini kihtikaanan aaniihsh kaawiin waahsa kiihkotaawikihsinoonan. 7Aaninta tahsh kihtikaanenhsan okaawiminakashiihkaank kii'ishi pankihsinoon. Okaawiminakashiin tahsh e'ompikihkin okiih kipishkaanaawaan ini kihtikaanenhsan. 8Aaninta tahsh kihtikaanenhsan, maawac iko eshi minohkamikaak kii'ishi pankihsinoon. Wiinke tahsh kii'minokinoon ini kihtikaanan. Ninkotwaahk (100) tahsin iko aaninta kii'ontinikaatewan ini kihtikaanan, kotak ninkotwaahsimitana (60), kotak nihsimitana (30).”
9Ciisahs tahsh kii'‑ihkito: “Pisintamok kiinawaa kaaohtawakaayek.”
Enwaatekin ini aawehcikanan
(Mark 4.10-12; Luke 8.9-10)
10Ciisahs tahsh okiih pinaasihkaakoo' okihkino'amawaakana' ekii'ishi kakwecimikotc: “Wekonen wenci aapacihtaawatc aawehcikanan kiikanoonatwaa pemaatisiwaatc?” 11Ciisahs tahsh okii'ishi nahkwehtawaa': “Kiinawaa ohsha kipakitinamaakoom cikihkentamek ini kaakiih kihkencikaatehsinokin kekoonan Kishemanitoo oTipencikewin kaatashintekin. Wiinawaa tahsh wiin kaawiin pakitinamawaahsiiwak cinihsitohtamowaatc. 12#Mat 25.29; Mrk 4.25; Luk 8.18; 19.26. A'a hsa kaa‑ayaatc kekoonan tamiinaakaniwi kekoonan aanciko ciwenootisitc. A'a tahsh wiin pankii ehta kekoonini kaa‑ayaatc taotaahpinamawaa kahkina kekoonini kaa‑ayaatc. 13Miitahsh kaaonci aapacihtaawak aawehcikanan kekoonini ekii'-inakwaa: mihsawaa aana inaapiwaatc, kaawiin waapihsiiwak; mihsawaa aana noontamowaatc, kaawiin pisintansiiwak, kaawiin kaye nihsitohtansiiwak. 14#Isa 6.9-10. A'a tahsh Aaiseya (Isaiah) Kishemanitoo otipaacimowininiiman kaakii'-ihkitokopanen mayaa ishihseni:
‘Pishihshik aana naanoontamek, kaawiin itahsh kika nihsitohtansiim.
Pishihshik itahsh aana waapancikeyek kaawiin kika nihsitawinansiim kaawaapantamek.
15Aanciko kakaancihc inentansikwaa cinihsitohtamowaatc,
okiih kipinaanaawaan kaye ohtawakiwaan,
pasankwaapiwak kaye.
Kiishpin o'o ishihcikehsikwaapan taawaapiwak,
taanoontamook kaye,
taanihsitohtamook kaye,
nintaapi kwehkiihtaakook kaye,
ciminoayaa'akwaapan kaye,’
kii'‑ihkitonikopan Kishemanitoon.
16 #
Luk 10.23-24. “Kiinawaa tahsh wiin kishawentaakosim, aaniihsh kishkiinshikowaank e'onci waapantamek ini kaawaapantamek, kihtawakiwaank e'onci noontamek ini kaanoontamek. 17Maamihkawik itahsh o'owe: Aahpici niipowa' Kishemanitoo otipaacimowininiima' kaye okwayahkwaatisiima' kaye, okii'-mihsawentaanaawaa cikii'-waapantamowaahpan kaawaapantamek, cikii'-noontamowaahpan kaye kaanoontamek; kaawiin tahsh okii'-nootansiinaawaa.”
Ciisahs miinawaa otashimaan ini kihtikewininiwan
(Mark 4.13-20; Luke 8.11-15)
18“Weweni tahsh pisintamok cinihsitohtamek a'a inini kaa‑aawehcikaasotc ekiih kihtiketc. 19Awiya kaanoontank ehtipaatotenik Kishemanitoon oTipencikewinini, e'nihsitohtansik itahsh, mii taapishkoo eshinaakositc ini hsa kaakiih pankihsinkin kihtikaanenhsan i'imaa miihkanaank. Maciaya'aa ehpi takohshink e'otaahpinank i'i aasha kaakiih kihtikaatenikin. 20Ini tahsh kaakiih pankihsinkin kihtikaanenhsan kaashi ahsiniihkaak, mii'i eshinaakositc a'a shemaak kaaotaahpinank Kishemanitoo otipaacimowin ahpii e'noontank, aahpici e'minwentank. 21Kaawiin itahsh waahsa kotaawiimakahsinini i'i tipaacimowin ote'ink. Aahpici tahsh acina ehta niipawi. Ahpii tahsh aanamisiwin, kakwaatakihtoowin kaye ehpinaasihkaakotc tipaacimowin onci, mii'i eshi pakiciitc. 22Ini tahsh kaakiih pankihsinkin kihtikaanenhsan kaashi okaawiminakashiihkaak, mii'i eshinaakositc a'a kaanoontank Kishemanitoo otipaacimowin, onsaam itahsh e'ocaanimentank, onsaam kaye ehsaakihtootc wenootisiwin. Miitahsh kaaonci saakiciwepishkikaatek i'i tipaacimowin, kaawiin kaye kekoon oka naakohtoohsiin. 23Ini tahsh kaakiih pankihsinkin kihtikaanenhsan i'imaa kaashi minohkamikaak mii'i eshinaakositc awiya kaanoontank Kishemanitoo otipaacimowin, kaanihsitohtank kaye. Aahpici oka naakohtoonan kekoonini wenishihshininikin. Aaninta awiya ninkotwaahk (100) awahshime ishinaakwanini i'i kaakii'-miinintc, aaninta kaye ninkotwaahsimitana (60) awahshime, aaninta kaye nihsimitana (30).”
E'aawehcikaakaaniwankin ini macikihtikaanan
24Ciisahs tahsh okii'-wiintamawaa' kotak aawehcikanini. “Mii'i keishihnaakwahk ahpii Kishemanitoo pioshihsitootc otOokimaawiwin, taapishkoo inini kaakihtikaatank ini sasekaa kihtikaanenhsan i'imaa otahkiimink. 25Aapitink itahsh ehtipihkaninik, kahkina e'nipaawaatc, awiyan kaashi inkenimikotc kiihpiishaawan ekiih kihtikaataminitc macikihtikaanini i'imaa kaakii'ishi kihtikaanaahpan ini pahkweshikanan. Miitahsh kaa'ani ishi maacaanitc ini ininiwan. 26Ahpii tahsh e'ani saakahkiinikin ini kaakiih kihtikaatankipan, miitahsh ini macikihtikaanan kaye kiihpi saakikinoon. 27A'a tahsh kihtikewinini otanohkii'aakana' okiih pinaasihkaakoo' ekii'-ikotc: ‘Okimaa, ekiih kihtikaataman itahsh ini sasekaa kihtikaanenhsan, aanti tahsh kaaonci ihkin ini macikihtikaanan?’ 28Miitahsh kaa'inaatc: ‘Kaashiinkenimitc kehcinaac a'a kaakiih kihtikaatank ini macikihtikaanan.’ Okii'-inaawaan itahsh otookimaamiwaan: ‘Kinantaweniminaam ina cipapaahkwacipitooyaank ini macikihtikaanan?’ 29O'o tahsh okii'-inaa': ‘Kaawiin. Kiishpin pahkwacipitooyek macikihtikaanan, kika tako pahkwacipitoonaawaan ini pahkweshikani kihtikaanan. 30Maano pahkweshikan, ini kaye macikihtikaanan taishi niishonihtaawikinoon piinihsh ahpii cimanishikenaaniwank. I'i tahsh ahpii ninka inaak otanohkiik: “Ini pinamaa macikihtikaanan mamanipitook, ohkwahpitook cimacohtewepinamek. A'a tahsh pahkweshikan maawantoonihk, cina'inek i'imaa nintahtaahsowikamikonk.” ’ ”
E'aawehcikaakaaniwank i'i kaa‑akaahsink kihtikaanenhs
(Mark 4.30-32; Luke 13.18-19)
31Miinawaa tahsh Ciisahs kii'aawehcike ekii'-ihkitotc: “Kishemanitoo otookimaawiwin miihsa eshinaakwahk taapishkoo inini kaakihtikaatank okihtikewahkamikonk ahpancikanikihtikaanenhs mastart (mustard) kaaishinihkaatenik kihtikaanenhs. 32Miitahsh o'o maawac ekaahsink ahpiihc wiin kotak kihtikaanenhsan. Ahpii tahsh e'ani kiishikihk, nawac kinwaahkwan ahpiihc pahkaan kekoonan kaanihtaawikihkin, taapishkoo mihtikonk e'inikohkwaak. Miitahsh i'imaa eshi pooniiwaatc pinehshiinshak, keshi wasihsonihkewaatc watihkwanihkaank.”
E'aawehcikaakaaniwank i'i ompisikan
(Luke 13.20-21)
33Miinawaa tahsh Ciisahs okiih tipaatotaan kotak aawehcikanini. “Miihsa eshinaakwahk Kishemanitoo oTipencikewin taapishkoo ompisikanenhsink, a'a ihkwe kaaotaahpinank ehtakonank i'imaa peshikoshkimot pahkweshikanink, miitahsh piinihsh misiwe eshi ompishkaanitc opahkweshikanihkaana'.”
Aaniin Ciisahs kaa'inwaatank ini aawehcikanan
34Ciisahs tahsh okii'-aapacihtoonan aawehcikanan kekoonini e'inaatc awiya'. Kaawiin kekoonini kii'‑ihkitohsii kiishpin aawehcikanini e'aapacihtoohsik. 35Miitahsh kaakii'onci ishihciketc, mayaa piko ci‑ishihsenik kaakii'-ihkitonikopanen ini Kishemanitoo otipaacimowininiiman:
“Aawehcikanan ihsa ninka aapacihtoonan ahpii kanoonakwaa,
nika wiintamawaak kekoonan kaakiihpi kihkencikaatehsinokin ahpii kiimaaciiahkiiwank.”
Ciisahs ekii'-nihsitohtamoonaatc macikihtikaanan kaashi aawehcikaakaaniwank
36Ciisahs tahsh okii'-nakanaa' i'i kaapaahtiinonitc, miitahsh kii'ani piintike waahkaa'ikanink. Okihkino'amawaakana' itahsh okiih pinaasihkaakoo' ekii'-ikotc: “Nihsitohtamooshihshinaam i'i aawehcikan, macikihtikaanan kaakiih kihtikaatekin i'imaa kihtikaanahkamikonk.”
37Ciisahs tahsh okii'-wiintamawaa': “A'a hsa inini kaakiih kihtikaatank ini sasekaa kihtikaanenhsan miihsa a'a Inini oKosihsan. 38I'i tahsh kihtikaanahkamik miihsa i'iwe ahki. Ini tahsh sasekaa kihtikaanenhsan mii'i ikiweniwak opimaatisiik Kishemanitoo oTipencikewinink kaaonci tipentaakosiwaatc. Ini tahsh macikihtikaanenhsan, miiwakiki kaamaciaya'aawinitc kaatipenimikowaatc. 39A'a tahsh kaakiih shiinkenimiwetc kaakiih kihtikaatank macikihtikaanenhsan, miihsa a'a maciaya'aa wiiniko. I'i tahsh kaamaawantoonikenaaniwank, miihsa i'i ahpii keishkwaahsekin ono noonkom kaapimihsekin. Iki tahsh encalak miihsa ikiweniwak kaamaawantoonikewaatc. 40Taapishkoo kaawii'ishi ohkonikaatekin ewiih caakisikaatekin ini macikihtikaanenhsan, miihsa keishihwepahk ahpii ishkwaahsekin ono noonkom kaapimihsekin. 41Inini oKosihsan ihsa oka ishinisha'waani otencalimini cionci maamooshakinaanitc i'imaa oTipencikewinink kahkina kaakakwe macitootamo'iwenitc, i'i kaye kotak omacitootamoo'. 42Miitahsh keshi macohtewepinimintc i'imaa kaaishi kishahkwanenik ishkoteni. Miitahsh i'imaa keshi mawinitc, cimatwentaminitc kaye wiipitaani. 43Iki tahsh kwayahk kaapimaatisiwaatc taapishkoo kiisihsonk tashi waahsenaakosiwak ahpii oTetewaan oshihsitoonitc oTipencikewinini.”
E'aawehcikaakaaniwitc shooniyaa kaaninkwa'ontc
44“I'i hsa Kishemanitoo oTipencikewin mii'i eshinaakwahk taapishkoo shooniyaa ekii'-ninkwa'ontc i'imaa kihtikaanahkamikonk. Ahpii tahsh inini ehpihci mihkawaatc, mii'i kaaishi kiiwe ninkwa'waatc. Ehpiihci minwentank tahsh mii'i kaaishi ataawaaketc kahkina kekoonini kaatipentank. Miitahsh kaaishi ataawetc i'iweni kihtikaanahkamikoni.”
E'aawehcikaakaaniwitc a'a kaaonishihshitc miikihs
45“Mii hsa 'i miinawaa Kishemanitoo oTipencikewin eshinaakwaninik taapishkoo ataawewinini kaapapaa nanaanta ataawetc maawac kaaonishihshinitc miikihsa'. 46Ahpii tahsh e'mihkawaatc maawac e'aahkwakinsonitc, miihsh kaa'awi ishi ataawaaketc kahkina kekoonan kaa‑ayaatc, e'ataawetc ini kaaonishihshinitc miikihsan.”
E'aawehcikaakaaniwitc a'a ahsap
47“Mii kaye keishihnaakwahk ahpii Kishemanitoo kiishihsitootc oTipencikewin, taapishkoo ehpahkopii'ontc ahsap saaka'ikaniink, kiikooyak itahsh ehpita'wewaatc. 48Ahpii tahsh e'mooshkinepita'wewaatc kiikooyak, miihsh ininiwak eshi akwaahshimaawaatc ini ahsapiin. Miitahsh pepahkaan eshi ahsaawaatc i'i kiikooya'. Iki tahsh kaaonishihshiwaatc ahkihkonk ishiahsaawak. Iki tahsh kaamaanaatisiwaatc wepinikaniwiwak. 49Miitahsh mayaa keishihnaakwahk ahpii ishkwaahsenikin ono noonkom kaapimihsekin o'omaa ahkiink. Encalak oka maawantoonaawaa' omaci ishiwepisii' pahkaan ciahsaawaatc. Okwayahkwaatisii' itahsh kaye pahkaan ta‑ayaawa'. 50Miitahsh omaci ishiwepisiik keishi ishiwepinintwaa i'imaa kaaishi kishahkwanenik ishkoteni. Tamawiwak tahsh, oka matwentaanaawaan kaye wiipitiwaan.”
Kehtekihkino'ikewin, oshkikihkino'ikewin minciniish taaminwaapatanoon
51Ciisahs tahsh okii'-inaa': “Kinihsitohtaam ina kaaininakook?”
Miitahsh kaa'ikotc: “Kekeht.”
52Miitahsh kaa'inaatc aanciko: “Miitahsh o'owe kaawiintamawinakook: entahshitc a'a kaakihkino'amaaketc Kishemanitoon otOonahshowewinini, ahpii kehkino'amawintc aaniin enentaakwaninik Kishemanitoon oTipencikewinini, mii'iwe eshinaakositc taapishkoo awiya taawin kaatipentank kaaonci saakisihtootc oshkaya'iiwi kekoonan kaye kehteaya'iiwi kekoonan i'imaa otahtaahsowikamikonk.”
Ciisahs ekii'-aanawencikaniwitc Naasaritink
(Mark 6.1-6; Luke 4.16-30)
53Ahpii tahsh Ciisahs kaa'-ishkwaa kihkino'amaaketc ini aawehcikanan, kii'ani maacaa. 54I'iweti tahsh kii'‑ishaa kaakii'-onciitc ootenaank,#13.54 kaakii'-onciitc ootenaank: mii hsa 'oweni ootena kaatashintenink Naasarit (Nazareth) kaakii'-ishinihkaatenik. ekiih tashikihkino'amawaatc kaa‑ayaanitc otanami'ewikamikoniink.#13.54 ekiihtashikihkino'amawaatc otanami'ewikamikoniink: waapantan 4.23. I'i tahsh kaakii'-noontaakotc kii'‑ihkitowa': “Kaanaka aanti kaa'ontinamokwen i'iweni kakiihtaawentamowin, ini kota kaye omaamahkaacihcikewinan? 55Mihtikonaape iitok ini okosihsan, Meri (Mary) iitok ishinihkaasowan ini omaamaan. Ciimis (James), Coosap (Joseph), Saaiman (Simon), Cootahs (Judas) iitok ishinihkaasowa' wiicihkiweya'. 56Shikwa otawemaa' kaye kahkina o'omaa ishitaawa'. Aanti tahsh wiin kaa'ontinamokwen kahkina onoweniwan?” kii'‑ihkitowa'. 57#Jhn 4.44. Miitahsh kaa'ishi aanawenimikotc.
Ciisahs tahsh kii'‑ihkito: “A'a hsa kaakanootamawaatc Kishemanitoon kihci inencikaniwi pahkaan inkoci kii'‑ishaatc, i'imaa tahsh wiin otootenaamink, otaawinink kaye, kaawiin kihci inencikaniwihsii.” 58Kaawiin itahsh aahpici kii'maamahkaacihcikehsii i'imaa, aaniihsh kaawiin okiih tepweyenimikohsii'.
Currently Selected:
Maahtiyo 13: OJBR
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society
