Ekihsatahs 24
24
Otahshotamaakewin Kii'onahcikaatek
1KaaTipenciketc tahsh okii'inaan Moosihsoon (Moses), “Piahkwaamaciwen cipi naasihkawiyan, kiin, Eran (Aaron) kaye, Netaap (Nadab) kaye, Aapaaihoo (Abihu) kaye. Iki kaye niishwaahsimitana kaaniikaanisiwaatc Isriyalak (Israel). Waahsa tahsh onci anami'ehtawihshik. 2Kiin itahsh ehta mihci peshikon pinaasihkawiyan, kaawiin wiin iki kotak. Kotak tahsh pemaatisiwaatc kaawiin tapi ahkwaamaciwehsiiwak,” okii'inaan.
3Miitahsh Moosihs kaakii ishaatc ekii wiintamawaatc pemaatisinitc kahkina kaakii ihkitonitc kaaTipencikenitc, kahkina kaye kaakii inaahkonikenitc. Miihsh kahkina pemaatisinitc kaaishi maamawi nahkwehtaminitc ekii ihkitonitc, “Ninka ishihcikewaamin hsa kahkina kekoonini kaaTipenciketc kaaihkitotc.” 4Miihsh kaakii oshipii'ank kahkina kaaTipencikenitc kaakii inaahkonikenitc. Wiipa tahsh kikishep kiiwanishkaa, ekii onaapihkinank kaashi pakitinaahsonk i'imaa kaakii ishi maaciiyaamatinaanik. Mitaahshiniishin ahsinii' okiih patahkaapihkinaa' kaakiih tahswewaanakisinitc Isriyala'. 5Oshkiniikiwa' itahsh okii ishinisha'waa' cipakitinaanitc aya'aawihsha' ciankwaahkiswaanitc. Cipakitinaanitc kaye aape pishihkiinhsa' ewii naakohtoowaatc pisaan ewii wiiciiwaawaatc kaaTipencikenitc. 6Miitahsh Moosihs kaakii otaahpinank i'i aapihta omiskwiimini aya'aawihsha' kaakii nihsimintc kihci onaakanink ekii ishi ahtootc. I'i tahsh kotak aapihta miskwiini okii ishi siikiwepinaan i'imaa eshi pakitinaahsowintc. 7Miitahsh kaye kaaishi otaahpinank i'i masina'ikan kaashi tashintenik otahshotamaakewin, kaakii ishi oshipii'ikaatenik kaye kaaTipencikenitc otinaahkonikewinini. Miihsh kaaishi anamihtamawaatc pemaatisinitc. O'o tahsh pemaatisinitc kii‑ihkitowa', “Kahkina kaaTipenciketc kaaihkitotc ninka ishihcikewaamin, ninka na'ihtamowaamin kaye,” kii‑ihkitowa'.
8 #
Mat 26.28; Mrk 14.24; Luk 22.20; 1Co 11.25; Heb 10.29;
Heb 9.19,20. Miitahsh Moosihs kaakii otaahpinank i'i miskwiini kihci onaakanink kaakii ahtoohpan, ekiih sihswepiiki wepinamawaatc pemaatisinitc ekii ihkitotc, “Waapantamok o'o miskwi kaaonci aayiicihsitamawinek otahshotamaakewin kaaTipenciketc kaamiininek, eishihciketc kahkina kaakii ihkitotc.”
9Miitahsh Moosihs, Eran, Netaap, a'a kaye Aapaaihoo, iki kaye niishwaahsimitana kaakii niikaanisiwaatc Isriyalak kaakii ahkwaamaciwewaatc i'i waciw. 10Miitahsh weti kaakii waapamaawaatc weKishemanitoominitc Isriyala'. Kaakii ishi niipawinitc itahsh kiimashkawaani taapishkoo kihci miihkana ekii ishinaakwaninik saahpayar (sapphire) tino ahsin, kiishik kaa‑ahpiihci osaawashkonaakwahk ekii ishinaakwaninik. 11Kaawiin iitok kekoon okiih tootaakohsiiwaan Kishemanitoon iki kaaniikaanisiwaatc Isriyalak. Okii waapamaawaan hsa Kishemanitoon, miihsh kaakii wiihsiniwaatc, ekii minihkwewaatc itahsh kaye.
Moosihs Kii'ayaatc Saainai Waciink
12Miitahsh Moosihs (Moses) kaa'ikotc kaaTipencikenitc, “Ampe piahkwaamaciwen o'o waciw cipi anta waapamiyan. O'omaa tahsh ayaayan kiwii miinin napakaapihkahsiniik eshi oshipii'ikaatek onahshowewin, inaahkonikewinan kaye kaakii oshipii'amowak ekihkino'amawakwaa pemaatisiwaatc,” okii'ikoon. 13Miihsh Moosihs, ini Caahshowaan (Joshua) kaye kaakii wiiciiwikotc kiioshiihtaawak. Miihsh kaaishi ahkwaamaciwewaatc i'i waciw Kishemanitoon kaatipentaminitc kaakihci inentaakwaninik. 14O'ohsh Moosihs okii inaa' kaakii niikaanisinitc Isriyala', “Mii hsa o'omaa tashi pii'ihshinaam piinihsh cipitakohshinaank. Inashke hsa Eran (Aaron) a'a kaye Her (Hur) o'omaa kiwiiciiwikowaak. Kiishpin itahsh awiya kekoonini wiinana'ahtootc, miiwa' hsa 'i keanta waapamaawaatc,” okii inaa'.
15Miihsh Moosihs kaaishi ahkwaamaciwetc i'i waciw Saainai (Sinai) ecikaatenik, wiinke hsa kiiaakawaanahkwanini. 16KaaTipencikenitc okihci inentaakosiwin hsa 'iwe kiishi miishishkaani waciink Saainai ecikaatenik. Ninkotwaahsokiishik itahsh kiiaakawaanahkwan i'i waciw. Niishwaahsokiishik itahsh eishihsenik okii onci antomikoon kaaTipencikenitc i'imaa mekweya'ii wahkwiink. 17Iki tahsh wiin Isriyalak mii 'i kaaishinamowaatc kaaTipencikenitc okihci inentaakosiwinini taapishkoo ishkote ehpiskanenik weti wakitatin. 18#Deu 9.9. Miihsh Moosihs kaakiicehkishkaatc i'i wahkwii eani ahkwaamaciwetc i'i waciw. Niimitana tahso kiishik, niimitana tahso tipihk kaye weti kiiayaa.
Currently Selected:
Ekihsatahs 24: OJBR
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society
