Ekihsatahs 17

Nipi Kii'onciciwank Aahsamaapihk

1 # Num 20.2-13. Kahkina tahsh iko entahshiwaatc Isriyalak (Israel) okii nakataanaawaa Sin (Zin) eshinihkaatenik pikwatahkamik, ekiih papaamikosiwaatc ekii ishihcikewaatc kaakii'ikowaatc kaaTipencikenitc. Weti tahsh Orehpitimink (Rephidim) kii‑ishi kapehshiwak, kaawiin tahsh nipi okii ayaahsiinaawaa. 2Okiih kihci kakanoonaawaan tahsh Moosihsoon (Moses) ekii'inaawaatc, “Mina'ihshinaam nipi ke⁠minihkweyaank,” ekii'inaawaatc. Miihsh o'o Moosihs kaa⁠ishi nahkwehtank, “Wekonen wenci kihci kaakiikitoyek? Wekonen wenci kakweci'ek kaaTipenciketc?”

3Isriyalak hsa wiinke kii⁠noonteyaapaakwewak, kaawiin kiih⁠kipihciihsiiwak ekiih kihci kakanoonaawaatc Moosihsoon. Miihsh o'o kaa'inaawaatc, “Wekonen tahsh kaa⁠onci saakiciwihshiyaank weti Iicipahkiink? Ci⁠kawaapaakweyaank ina, niniicaanihsinaanik, iki kaye nintawahkaaninaanik?” kii‑ihkitowak.

4Aahpici hsa weweni Moosihs okii anami'ehtawaan kaaTipencikenitc ekii'inaatc, “Aaniin itahsh ke⁠tootawakwaa oko pemaatisiwaatc, aasha ohsha kiishiiwak ewiih papiimwahsina'iwaatc.”

5Miitahsh kaaTipencikenitc kaa'ikotc, “Iki hsa kaa⁠niikaanisiwaatc Isriyalak aniwishaam ci⁠kapihkawatwaa pemaatisiwaatc. Maaciitoon tahsh i'i kaye kisahka'onaahk kaakii aapacihtooyan kii⁠pahkihte'aman i'i Naayal (Nile) siipi. 6Niin hsa ko kika wiicikaapawihtawin weti ahsin kaashi ayaatc kihci waciink Saainaink (Sinai). Kika pahkihte'waa hsa a'a ahsin, miihsh i'imaa ke⁠onciciwank nipi ke⁠minihkwewaatc pemaatisiwaatc,” okii'ikoon. Mii hsa 'i Moosihs kaa⁠ishihciketc eshi'ayaanitc kaakii niikaanisinitc Isriyala'.

7Miitahsh kaa⁠ishinihkaatenik i'imaa eshi'ayaawaatc Kakweci'itiwi kihci kaakitowinink, #17.7 Kakweci'itiwi kihci kaakitowinink: Mii 'owe Hiiparoo ishikiishwewin enihtaakwahk Maasa shikwa Meripa ehkitoonk. aaniihsh mii 'imaa Isriyalak kaakii ishi kihci kaakiikitowaatc. Mii kaye imaa kaakii ishi anta kihkenimaawaatc kaaTipencikenitc ahpii kii‑ihkitowaatc, “Konike tepwe kiwiiciiwikonaatok kaaTipenciketc komaa kaye kaawiin,” kii‑ihkitowak.

Kiimiikaanikowaatc Amalehk Kaatinowinitc

8Isriyalak itahsh Orehpitim (Rephidim) eh⁠kapehshiwaatc, Amalehk kaatinowinitc (Amalekites) kiih⁠piishaawa' ekii miikaanikowaatc. 9Miitahsh Moosihs kaa'inaatc Caahshowaan (Joshua), “Kakiikin aaninta ininiwak ci⁠awi miikaanekwaa Amalehk kaatinowiwaatc. Waapank itahsh ninka niipaw wakitatin ci⁠tahkonamowak Kishemanitoo osahka'onaahk,” okii'inaan. 10Miihsh kaa⁠ishihcikenitc Caahshowaan kaakii'inaatc ekii miikaanaanitc Amalehk kaatinowinitc. Miihsh Moosihs, Eran (Aaron) kaye, a'a kaye Her (Hur) kaakii ahkwaamaciwewatc. 11Minihk itahsh iko Moosihs kaa⁠ishpinihkenitc Isriyala' kiih⁠shaakoocihtwaawa'. Ahpii tahsh iko e⁠niisinihkenitc Amalehk kaatinowinitc hsa kii⁠ani shaakoocihtwaawa'. 12Wiinke hsa ko Moosihs kii⁠ayehkonihke. Miihsh kaa⁠ishi ahsimintc ahsiniin keshi namatapitc. Eranoon itahsh, ini kaye Heroon okii aahsonihkenikoo' kwehkwehk inahke ekii ishi niipawinitc. Miitahsh kaakii koshkwaawaaci ayaanikin onihkan piinihsh ekii ani pankihshimonitc kiisihsoon. 13Miitahsh Caahshowaa kaakiih shaakooci'aatc Amalehk kaatinowinitc pashipa'ikewihkomaan ekii aapacihtootc.

14 # 1Sa 15.2-9. KaaTipencikenitc itahsh Moosihs okii'ikoon, “Oshipii'an o'o shaakoocihtwaawin keni mamaamihkawinotek. Wiintamaw ihsa Caahshowaa, wawiinke piko ewii nihshiwanaaci'imak Amalehk kaatinowinitc ci⁠maamihkawinotawaahsiwimintc o'omaa shiipaakiishik.” 15Miihsh Moosihs i'imaa kaakii onaapihkiniketc. Miihsh o'o kaa⁠ishinihkaatank, “KaaTipenciketc hsa nintokahkiiwe'onim nintinenimaa.” 16Miihsh o'o kaa⁠ihkitotc, “Ishpinamowaahk kaaTipenciketc okahkiiwe'on otookimaawapiwinink inahke. KaaTipenciketc hsa oka nehpici miikaanaa' i'i Amalehk kaatinowinitc!” kii‑ihkito.

Currently Selected:

Ekihsatahs 17: OJBR

Highlight

Copy