Ekihsatahs 15

Moosihs Otina'amowin

1 # Rev 15.3. Moosihs itahsh iki kaye Isriyalak kii⁠nikamowak o'o ekii ina'amohtawaawaatc kaaTipencikenitc:

“Ninka nikamoohtawaa hsa kaaTipenciketc,

wiin hsa aahpici kii⁠kihci shaakoocihtwaa;

Mihtatimoo' hsa i'i kaye pemiwanepa'ikonitc

kihcikamiink otishi pahkopii wepinaa'.

2KaaTipenciketc hsa kaa⁠mashkawi naatamawitc,

wiin kaye kaa⁠shaapwii'itc,

Mii hsa wa'a ninKishemanitoom,

wiin hsa ninka miikwehciwenimaa;

Nintete hsa ini oKishemanitooman,

ninka kihci inenimimaan hsa.

3KaaTipenciketc hsa nimiikaasowininiim,

kaaTipenciketc ohsha ishinihkaaso.

4Peroon hsa omiikaasowi otaapaanaahkoni,

oshimaakanihshiimini kaye,

kihcikamiink okii ishi wepinaa',

Maawac iko osasekaa shimaakanihshiimini,

Misko kihcikamiink okii ishi nihsaapaawanaa'.

5Kaashi kiishkaayawaanik hsa

kihcikamiink kii‑ishi nihkipiihsewak,

Aanaamiintim ekii ishi konsaapiinitc

taapishkoo ahsin inahke kaa⁠ishi kosaapiitc.

6Tepencikeyan,

kikihcinihk hsa etatawe mashkawentaakwan,

Mii hsa i'imaa kikihcinihkink Tepencikeyan

wenci piihsipinatwaa kaa⁠shiinkenimihkwaa.

7Eshi kihci inentaakwahk itahsh kitookimaawentaakosiwin,

kitoonci shaakooci'aak iki kaa⁠shiinkenimihkwaa,

Kinishkaatisiwin hsa ishkotenk inentaakwan,

miihsh i'iweni kaa‑ankwaahkisokowaatc taapishkoo mashkohsiink.

8Ekiih pootaataman itahsh kihcikam,

mii 'i kaakii ani ishpipiiyaak.

Pemiciwank hsa nipi kiih⁠kipihcishkaa ekiih patahkipiiyaak,

taapishkoo aahsamaahtik ekii ishinaakwahk,

Maawac itahsh eshi kiishkaayawaak i'i kihcikam

kii⁠ani mashkawishkaa.

9Shenkenimiwetc hsa kii‑ihkito,

‘Ninka piminisha'waak, ninka atimaak,

miihsh keshi nenaawinamowak owenootisiwiniwaan,

ci⁠otaahpinamowak wekonen iko mehsawentamowak.

Nimpashipa'ikewihkomaan hsa ninka manipitoon

miihsh keshi caaki'akwaa.’

10Tepencikeyan, aapitink hsa ko eh⁠pakitanaamoyan,

mii 'i Iicip kaatinowiwaatc eshi nihsaapaawewaatc;

Mii 'i eshi konsaapiiwaatc

taapishkoo ashkikwak kaa⁠ishi kosaapiik

i'imaa kaashi kohtaanentaawahk nipi.

11Kiin Tepencikeyan,

awenenak itahsh eshi'ayaatc manitook enentaakosiwatc?

Awenen itahsh eshi'ayaakwen enentaakosiwatc,

e⁠maamahkaatentaakosiyan eh⁠pehkaatisiyan,

Eh⁠kohtaanentaakosiyan kaye kikihci inentaakosiwinink,

kitishihcikewinan kaye e⁠maamahkaatentaakwahkin?

12Kikihcinihk hsa kitaapacihtoon e⁠niiminihkeniyan,

miihsh ahkiini eshi konikowaatc kaa⁠shiinkenimiyamintwaa.

13Kisaaki'iwewinink itahsh

kitishi niikaaniihtamawaak pemaatisiwaatc

kaakiih shaapwii'atwaa,

Kimashkawisiiwinink ihsa

kitoonci kihkinowinaak ci‑ishaawaatc ahkiink

kehci inentaakwaninik.

14Kaa⁠pepahkaanwewaanakisiwaatc hsa

pemaatisiwaatc kii⁠noontamok,

miihsh wiinke eshi nininkaanimisiwaatc,

Pilistiya wenciiwaatc

wiinke kihci kohtaaciwak.

15Wekimaawiwaatc hsa i'imaa Iitam ahkiink

wawaanentamok;

Wekimaawiwaatc kaye Moowap ahkiink

nininkaanimisiwak;

Kahkina Kenan ahkiink eyaawaatc

ta⁠nininkishkaawak ke⁠ahpiihtaanimisiwaatc.

16Wiinke kakwaanihsakaanimisiwak,

kii⁠kihci sekisiwak kaye.

Tepencikeyan, owaapantaanaawaa hsa kimashkawisiiwin,

miihsh kaa⁠onci kashkihtoohsikwaa

kekoon ci‑ishihcikewaatc eh⁠piihtaanimisiwaatc,

Paanimaa hsa kii‑ishkwaa pimi'ayaanitc

kipimaatisiima' kaakiih shaapwii'imatc

kaakii ishi kakwaatakanohkii'imintipan,

17Kiin hsa piko kika piinaak

ci‑ishi ahsatwaa waciink kaa⁠tipentamowatc,

Kiin kaakii ishi onaapantamowatc

ewii ishi kapehshi'atwaa,

Anami'ewikamikonk kiin iko

kaakii oshihtamaahsoyan.

18Kiin hsa Tepencikeyan

kika nehpici okimaaw,” kii‑ina'amook.

Miriyam Onikamon

19Ahpii tahsh Peroo (Pharaoh) omihtatimooma', omiikaasowi otaapaanaahkwa', i'i kaye kaa⁠otaapa'iwenitc kii‑ishaanitc kihcikamiink, kaaTipenciketc hsa kii‑ishihcike kihcikam ci⁠kiiweyaakamihsenik. Isriyalak itahsh wiin kiih⁠paankwahkamikaani kaakii ishi pimohsewaatc e⁠aashawishkaawaatc.

20Miitahsh Miriyam (Miriam) kaa⁠kanootamawaatc Kishemanitoon Eranoon (Aaron) wetawemaatc, okii otaahpinaan shinawihsicikan. Kahkina tahsh ihkwewa' okiih piminisha'okoo' eh⁠tahkonaminitc shinawihsicikanan ekii niimiwaatc. 21Miihsh o'o Miriyam kaa⁠ina'ank,

“Nikamoohtawihk kaaTipenciketc,

wiin hsa maawac ishpentaakosi;

kihcikamiink hsa okii ishi wepinaan mihtatimoon,

ini kaye pemiwanepa'ikonitc,” kii‑ina'am.

Nipi Kaawiihsakaakamik Ehtashintek

22Moosihs (Moses) itahsh Misko kihcikamiink okii onci maacii niikaaniihtamawaa' Isriyala' ekii ishiwinaatc weti pikwatahkamik Shoor (Shur) ecikaatenik. Nihsokiishik itahsh kiih⁠pimi'ayaawak pikwatahkamik, kaawiin itahsh okii mihkansiinaawaa nipi. 23Ahpii tahsh kaah⁠takohshinowaatc Mera#15.23 Mera: Hiiparoowi kiishwewinink ‘Mera’ ihkitoomakan ‘nipi kaa⁠wiihsakaakamik.’ (Marah) ecikaatenik, kaawiin okii kashkihtoohsiinaawaa ci⁠minihkwewaatc nipi, aaniihsh wiinke kii⁠wiihsakaakaminini. Miitahsh kaakii onci ishinihkaatenik Mera. 24Miitahsh pemaatisinitc Moosihs kaakii maanshi kanoonikotc ekii'ikotc, “Wekonen itahsh ke⁠minihkweyaank?” 25Miihsh Moosihs kaakii anami'ehtawaatc kaaTipencikenitc. Miitahsh kaakii waapanta'ikotc mihtik. Miitahsh kaa⁠ishi ahpakitootc i'i mihtik i'imaa nipiink. Mii hsa 'i kaa⁠ishi minwaakamininik.

Miitahsh weti kaaTipencikenitc kaakii onahtamaakowaatc inaahkonikewinan aaniin ke⁠ishihcikewaatc, miitahsh weti kaye kaakii ishi anta kihkenimikowaatc. 26O'o hsa okii'ikowaan, “Kiishpin tahsh weweni pisintawiyek, Niin kaaTipencikeyaan e⁠oKishemanitoomimiyek, kwayahk ishihcikeyek enaahsamiiyaan, pisintamek kaye nintinaahkonikewinan, kaawiin hsa kika tootawihsinooninim ci‑inaahpineyek aahkosiwin kaakii inaahpine'akwaa Iicip kaatinowiwaatc. Niin ohsha kaaTipencikeyaan kaa‑antawi'inek,” okii'ikowaan.

27I'imaa hsa Iilam (Elim) ecikaatenik kii‑ishi takohshinook, eshi'ayaanikin mitaahshiniishin (12) moohkiciwanipiin, niishwaahsimitana (70) kaye kaakii ishi tahshinitc paam #15.27 Paam: Kaa⁠kinwaahkositc mihtik wanahkonk kaashi kakaanopakiitc. tinowaahtikoo'. Miitahsh i'imaa ciiki nipi kaa⁠ishi kapehshiwaatc.

Currently Selected:

Ekihsatahs 15: OJBR

Highlight

Copy