Ekihsatahs 10
10
Pahpahkinek Kii'ayaawaatc
1KaaTipencikenitc itahsh Moosihs (Moses) okii'ikoon, “Maacaan, anta waapam Peroo (Pharaoh), ninkiih tootawaa ohsha cishashiipihtank, i'i kaye otaanihkewikimaama', ewiih tootamowak nimaamahkaaci kihkinawaacihcikewinan mekweya'ii eshi'ayaawaatc. 2Miitahsh i'iweni keani waawiintamawekwaa kiniicaanihsiwaak, kooshihsiwaak itahsh kaye aaniin kaakii ishi manaaci'aahsiwakwaa Iicip (Egypt) kaatinowiwaatc, aaniin kaakii ishi naakohtamawakwaa nimaamahkaaci kihkinawaacihcikanan eshi'ayaawaatc, cikihkentamek hsa niin kaaTipencikeyaan ehtinowiyaan,” okii'ikoon.
3Miitahsh Moosihs, a'a kaye Eran (Aaron) kaakii anta waapamaawaatc Peroon ekii'inaawaatc, “O'o hsa ihkito kaaTipenciketc, Hiiparoowak (Hebrews) oKishemanitoomiwaan, ‘Aaniin itahsh minihk waahshashiipihtawiyan einentansiwan citapahsenimoyan enaahsamiiyaan? Taka pakitin nimpimaatisiimak cimaacaawaatc, ciawi anami'ehtawiwaatc. 4Kiishpin aaniihsh inentansiwan cipakitinatwaa nimpimaatisiimak cimaacaawaatc, mii hsa 'i waapaninik ci‑ishihcikeyaan cipahpahkinehkaak kitahkiimink. 5Keahpiihci paahtiinowaatc hsa, oka aakawishkaanaawaa misiwe ahkiini, kaawiin tahsh awiya oka waapantansiin mihtahkamik. Oka kitaanaawaa hsa kahkina kaakiih pani nihshiwanaataninik ahpii kiihsehsekaninik. Oka kitamwaawaa' hsa kahkina mihtikoo' kenihtaawikinitc kaashi kihtikewek. 6Kiwaahkaa'ikanihkaank hsa tamamooshkinewak, owaahkaa'ikaniniink kaye kitaanihkewikimaama', kahkina hsa owaahkaa'ikaniniink Iicip kaatinowinitc tashi mamooshkinewak. Kaawiin hsa wiihkaa o'o tino okiih pi waapantansiinaawaa kaakii oteteyek, kaakii omihshoomihsiyek kaye ahkonaak kaakiih pi ayaawaatc o'omaa ahkiink piinihsh o'o ishi ahpii,’ ” okii'inaawaan. Miitahsh Moosihs kaaishi saaka'ank eshi'ayaanitc Peroon ekii nakanaatc.
7Peroo tahsh otaanihkewikimaama' okii'ikoo', “Aaniin itahsh minihk wa'a inini waamaanshipininank? Inashke pisaan pakitin Isriyalak (Israel) cimaacaawaatc, ciawi anami'ehtawaawaatc kaaTipencikenitc oKishemanitoomiwaan. Kaawiin ina kikihkentansiin Iicipahki enihshiwanaacihcikaatek?” okii'ikoo'.
8Miitahsh Moosihs, a'a kaye Eran kaakii ishiwinintwaa eshi'ayaanitc Peroon o'o ekii'ikowaatc, “Maacaak, awi anta anami'ehtawihk kaaTipenciketc kiKishemanitoomiwaa! Awenenak itahsh mayaa kaawii maacaawaatc?” okii'ikowaan.
9Miihsh o'o Moosihs kaaishi nahkwehtank, “Kahkina hsa niwii ishaamin, ewii wiiciiwankitwaa weshkaatisiwaatc, kihci aya'aak kaye. Ninkosihsinaanik kaye, nintaanihsinaanik itahsh iko kaye. Maanahcaanihshak, maanatihkwak, pishihkiwak kaye niwii maaciinaanaanik, aaniihsh niwii awi wiihkwantiiwahkamikisimin onci kaaTipenciketc,” okii'inaan.
10Miihsh o'o Peroon kaa'ikotc, “KaaTipenciketc hsa nintahpim o'o kaawii'ininakook, kaawiin wiihkaa kitaa pakitinihsinooninim maacaayek citakwiiwaahpan kitihkwemiwaak, kiniicaanihsiwaak kaye! Kehcinaac maawiin macikekoon kinaanaakatawentaamiwaatok. 11Kaawiin i'i taishihsehsinoon! Kaaininiiwiyek ehta ishaak ciawi anami'ehtawek kaaTipenciketc, mii iitok i'i kaa‑antawentamek,” okii'ikowaan. Miitahsh kaaishi saakicinisha'ontwaa eshi'ayaanitc Peroon.
12Miitahsh Moosihs kaakii'ikotc kaaTipencikenitc, “Iicipahkiink inahke misiwe ishi niiminihkenin pahpahkinek cipakami ayaawaatc. Oka kitaanaawaa tahsh kahkina kekoon nehtaawikininik kihtikewahkamikonk, kahkina kekoon kaakiih pani nihshiwanaacihcikaatenik kiihsehsekaninik,” okii'ikoon. 13Moosihs hsa tahsh okii ishi niimaahkonaan osahka'onaahk i'imaa Iicipahkiink. KaaTipencikenitc itahsh kii‑ishihcikewan ciwaapaninoowenik i'imaa misiwe ahkiink kapekiishik, kapetipihk kaye. Miitahsh ehkishepaawakaninik kaakiih pakami wepaahshinitc pahpahkine'. 14#Rev 9.2,3. Misiwe hsa ko pahpahkine' kiiayaawa' Iicipahkiink. Misiwe hsa piko kii‑ishi'ayaawa' eshi pepahkaanentaakwaninik i'imaa Iicipahkiink. Kaawiin hsa wiihkaa otaanaank i'i kiihpi tashihsiiwa', kaawiin miina wiihkaa i'i taishiwepahsinoon. 15Misiwe hsa ko kiiayaawa' i'imaa ahkiink, taapishkoo emahkatewaak kii‑ishinaakwan. I'i tahsh pahpahkine' okiih kitaani kahkina kekoon kaakii nihtaawikininik i'imaa ahkiink. Kahkina kaye kekoon nehtaawikininik mihtikohkaank shiiwimiicim okiih kitaani kaakiih panihsenik kiihsehsekaninik. Kaawiin itahsh kanake kekoon ciosaawashkonaakwahk mihtikohkaank, komaa kaye kekoonan nehtaawikinkin mohshehkamik misiwe Iicipahkiink.
16Miitahsh Moosihs, a'a Eran kaye weyiip kaakii antomikowaatc Peroon ekii'ikowaatc, “Mii hsa 'i kiimacitootawak kaaTipenciketc kiKishemanitoomiwaa, kekiinawaa tahsh ekii macitootawinakook. 17Taka hsa noonkom poonentamawihshik kaashi macitootamaan keyaapi aapitink, kakwecimihk kaye kaaTipenciketc kiKishemanitoomiwaa ci‑ishihciketc o'o kekwaanihsakentaakwaninik cinihsikowaahsiwak,” okii'ikowaan. 18Miihsh Moosihs kaakii nakanaatc Peroon ekii anami'ehtawaatc kaaTipencikenitc. 19KaaTipencikenitc hsa kii‑ishihcikewan cikwehkaanimaninik, wiinke hsa tahsh kiikihci ninkaapii'anini. Miitahsh i'imaa kaaishi maacii wepaahshinitc pahpahkine' kihci miskokamiink inahke ekii ishi wepaahshinitc; kaawiin hsa kanake peshik pahpahkine cikiih kihkentaakositc i'imaa misiwe Iicipahkiink. 20Miitahsh kaaTipenciketc kaakiih tootawaatc Peroon cishashiipihtaminitc, kaawiin itahsh okiih pakitinaahsiini cimaacaanitc Isriyala' (Israel).
Kiikashkiitipihkahk Iicipahkiink
21Miitahsh Moosihs kaa'ikotc kaaTipencikenitc, “Ishpimink inahke ishi niiminihkenin, cikashkiitipihkahk misiwe Iicipahkiink (Egypt). Keahpiihci kashkiitipihkahk hsa tatoohkishkikemakan,” okii'ikoon. 22#Rev 16.10. Moosihs hsa tahsh ishpimink inahke kii‑ishi niiminihkeni, wiinke tahsh kiikihpaki kashkiitipihkan i'imaa misiwe ahkiink nihsokiishik minihk. 23Kaawiin hsa awaac kiiwaapantihsiiwa', kaawiin kaye okii onci nakatansiini otaawinini nihsokiishik minihk. Kaakii ishitaanitc itahsh wiin Isriyala' (Israel) wiinke kiiwaahseyaani.
24Miitahsh Moosihs kaakii antomikotc Peroon ekii'ikotc, “Maacaak awi anami'ehtawihk kaaTipenciketc. Pisaan hsa kitihkwemiwaak, kitapinoonciishimiwaak kaye kika wiiciiwikowaak. Nakanihkwahk itahsh wiin kimaanahcaanihshimiwaak, kimanatihkomiwaak, kipishihkimiwaak kaye,” okii'ikoon.
25Miihsh o'o Moosihs kaaishi nahkwehtank, “Mii hsa kaye eshinaakwahk ciontinamawiyaank aya'aawihshak kepakitinaahswaakeyaank, keankwaahkisamaank kaye pakitinaahsoyaank, kemiinankitc kaaTipenciketc ninKishemanitoominaan. 26Mii hsa 'i eshinaakwahk cimaaciinankitwaa nintaya'aawihshiminaanik, kaawiin awaac peshik aya'aawihsh tanakanaahsii. Miiwak hsa iki aaninta keaapaci'ankitwaa anami'ehtawankitc kaaTipenciketc ninKishemanitoominaan. Paanimaa tahsh weti kiihtakohshinaank, mii 'i payesh cikihkentamaank wekonen keaapacihtaawankitc anami'ehtawankitc kaaTipenciketc,” okii'inaan.
27Mii hsa 'i kaaTipenciketc kaakiih tootawaatc Peroon cishashiipihtaminitc ekii inentansinik cipakitinaanitc Isriyala' cimaacaanitc. 28Miihsh Moosihs kaakii'ikotc Peroon, “Ninkoci 'omaa onci ishaan! Kehcinaac keko miinawaa naakosihken enaahsamiiyaan. Ahpii kiishikahk kewaapaminaan, mii hsa 'i cinipoyan!” okii'ikoon.
29Miihsh o'o kaa'inaatc, “Mii hsa 'i kwayahk eihkitoyan; kaawiin hsa miinawaa wiihkaa kika waapamihsii,” okii'inaan.
Currently Selected:
Ekihsatahs 10: OJBR
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society
