Ishihcikewinan 3

Kaamaahkisitc kiiminoayaa'intc

1Aapintink ehkiishikaninik Piitar (Peter), a'a kaye Cwaan (John) kii'ishaawak kihcianami'ewikamikonk e'ishkwaa naawahkwenik ahpii kaakii nihtaa anami'aaniwaninik enihso tipa'ikaneyaanik. 2Peshik tahsh inini kaakiih kashkihtoohsik cipimohsetc ekii'-maahkinihtaawikitc kii'nihtaa piicikaniwi i'imaa wenci piintikenk kihcianami'ewikamikonk “Wenishihshink” ecikaatenik. Mii 'imaa kaa'ishi nihtaa pakohsenimotc cimiinikotc iniweniwa' kihcianami'ewikamikonk kaapiintikenitc. 3A'a tahsh inini ewaapamaatc Piitaroon, Cwaanan kaye e'ani piintikenitc kihcianami'ewikamikonk okiih kakwecimaa' ciimiinikotc shooniyaan. 4Piitar ewiiciiwikotc Cwaanan okiih kanawaapamaawaan ini ininiwan ekii'inaawaatc: “Kanawaapamihshinaam!” 5Okiih kanawaapamikowaan itahsh, kekoon ninka miinikook e'inentaminitc. 6Piitar tahsh okii'inaan: “Kaawiin nintayaawaahsii waapaapihko shooniyaa, osaawaapihko shooniyaa kaye cimiininaampan. Kaa'ayaayaan tahsh wiin kekoon kika miinin. Ciisahs Christ otishinihkaasowinink Naasaritink (Nazareth) kaaonciitc kitishikanoonin: Pasikwiin cipimohseyan!” 7Okiih tepinaan itahsh okihcinihkiniink ekiih pasikoncipinaatc. Shemaak tahsh ositini, onaanini kaye ini ininiwan kiimashkawi ayaamakaniniwan. 8Shemaak itahsh a'a inini kiihpasikocihse ekii'-ayishpikwaashkwanitc, miihsh kaa'ishi pimohsetc ekii'ani piintikewiiciicwaatc i'imaa kihcianami'ewikamikonk. Wiinke kiihkihci ayishpikwaashkwani ekii'-miikwehciwenimaatc Kishemanitoon. 9Kahkina tahsh awiyak ewaapamawaatc ehpimohsenitc, enanaahkomaanitc kaye Kishemanitoon, 10okii'-nihsitawinawaawaan eyaawinitc kaakii'-nihtaa namatapinitc ehpakohsenimiwenitc i'imaa “Wenishihshink Ishkwaantem” eicikaatenik kihcianami'ewikamikonk. Wiinke tahsh kii'wawaanentamook, kiimaamahkaatentamook kaye aaniin i'i kaakii'-ishihsenitc.

Piitar kiiwiintamaaketc wekonen o'o wenci'ishihsenik

11Mekwaa tahsh a'a inini kaakii minoayaa'intc ekihciwinaatc Piitaroon, Cwaanan kaye, kahkina awiya' kiimaamawi piicipa'itiwa' i'imaa kaakii'ishi ayaawaatc eshi patahkitenik Swaalaman (Solomon) otaanihkawihcikan ecikaatenik ekiikihci maamahkaatentaminitc. 12Ahpii tahsh Piitar ewaapamaatc okiih kanoonaa' o'o ekii'inaatc: “Kiinawaa Isriyalak, wekonen wenci maamahkaatentamek o'o, wekonen kaye wenci kihci kanawaapamiyaank taapishkoo e'inentamek niinawint iko nimashkawisiiwininaaniink, komaa kaye eshi kwayahko anami'aayaank e'onci kashkihtootc cipimohsetc. 13#Exo 3.15. OKishemanitoomiwaan ohsha Eparahaam (Abraham), Aaisik (Isaac), Cekap (Jacob), iki kaye oKishemanitoomiwaan kikehteya'aaminaapaniik, mii ohsha 'awe Kishemanitoo kaawaapanta'iwetc aaniin ehpiici kihci'-inentaakosinitc ini otAnohkii'aakanan#3.13 Kishemanitoo...otAnohkii'aakanan: mii 'iwe peshik kaaishinihkaasonitc Kehte masina'ikanink Kishemanitoo kaakii ahshotamaaketc cipimaaci'iwenitc. Ciisahsoon. Kiinawaa iitok kaakiih pakitinimek ci'onahshowaasonitc, ekii'-aanawenimimek kaye enaahsamiinitc onahshowewikimaan Paailatoon (Pilate) aanakii'-inentaminitc cipakitinimintc. 14#Mat 27.15-23; Mrk 15.6-14; Luk 23.13-23; Jhn 19.12-15. Shaakooc itahsh kiinawaa kikii'-aanawenimaawaa a'a kehtentaakositc, kweyahkwaatisinitc kaye, meshkwac ekii'-antotamaakeyek cimiinikooyek onihshiwe. 15Kikii'-nihsaawaa tahsh a'a Tepentank pimaatisiwin, Kishemanitoon itahsh okiihkiiwe pimaatisii'ikoon. Niinawint ohsha o'o ninkiihpi waapantaamin. 16Inashke kiwaapamaawaa wa'a inini, kikihkenimaawaa kaye. Ekiih tepweyentank owiinsowinini Ciisahsoon, mii 'i wenci minoayaatc. Ekiih tepweyenimaatc Ciisahsoon, mii 'i wa'a inini wiinke wenci minoayaatc kahkina awiyan kaawaapamikotc. 17Nintinawemaakanak, ninkihkentaan ohsha ekii'-nihsitohtansiwek i'i kaakii'-ishihcikeyek. Miitahsh peshikwan kaa'ishihcikewaatc kiniikaanisiimiwak. 18Miitahsh i'i nahke Kishemanitoo kaa'ishi mooshkinehsenik kaakii'-ihkitokopanen kiiaapaci'aatc kahkina kenootamaakotc. Ekiihpi'-ihkitonitc cikakwaatakihtoonitc ini kaakii'-onaapamaatc. 19Kwehki pimaatisik itahsh, pikiiwe naasihkawihk kaye Kishemanitoo cipoonencikaatekin kimacitootamowiniwaan. Miitahsh ci'ishihsenik kaaTipenciketc cimiininek anwehshinowin i'imaa kitahcaahkowaank, 20ekiih piicinisha'waatc Ciisahsoon. Miiwan iitok ini Kishemanitoo kaakiih kiishaaci onaapantamawinek. 21Miitahsh weti Ciisahs keayaatc kihcikiishikonk piinihsh ahpii ocihcihsenik Kishemanitoon kaawiih kiiwe oshihtootc kahkina kekoon. Mii 'i iitok kaa'ishi ahshotamaakekopanen mewisha kiiaapaci'aatc kehtentaakosinitc okanootamaake'. 22#Deu 18.15,18. Moosihs (Moses) iitok kii'ihkito: ‘KaaTipenciketc kiKishemanitoomiwaa kika'-ishinisha'amaakowaa okanootamaaken taapishkoo niin tino ci'ontinaatc mekweya'ii kipimaatisiimiwank. Miiwan tahsh ini kepisintawimek kahkina kekoon eshi wiintamawinimek. 23#Deu 18.19. Awenen tahsh iko kepisintawaahsik ini okanootamaaken tatootawaa ciwiiciiwaahsik Kishemanitoon opimaatisiimini.’ 24Saamiyoo (Samuel) kaakiih pi'ihkitotc, iki kaye kahkina okanootamaakek kaakiih pi'aawaatc kii'ishkwaa'-ayaanitc, okiih tashintaanaawaa o'o noonkom kaa'ishihsenik. 25#Gen 22.18. Kiinawaa tahsh kimiinikoom iniweniwan Kishemanitoo otahshotamaakewinan kenootamaakotc kaakii'-ihkitonitc. Miitahsh kaye kaa'onci tipentaakosiyek Kishemanitoo kaakii'ishi ahshotamawaatc kikehteya'aaminaapanii' ekii'-inaakopanen Eparahaaman (Abraham): Kiin hsa kipiiwesiimak onci, kahkina kaapepahkaanwewaanakisiwaatc pemaatisiwaatc ta'onci shawentaakosiwak. 26Miitahsh Kishemanitoo kaakii'-onaapamaatc otAnohkii'aakanan. Ekii'-ishinisha'amawinek kiinawaa nihtam aaniihsh kikiih shawenimikowaa entahso peshikoyek, cinakatamowek kimaci'-ishiwepisiwiniwaan,” kii'ihkito Piitar (Peter).

Currently Selected:

Ishihcikewinan 3: OJBR

Highlight

Copy