Roma 7
7
Indaŋ̀mbə̀ aa kéèn pa'ǹmbə̀ yílə́ rə, bə̀ də́' tə́ kə̀ wálke nɛ́ŋə̀ bə̀ kə̀ Krístù ra
1Ɔ̀dkudvɛɛ̀l mə́ í'sɛ̀lbə̀ bərá, íí gàb nwɔŋ aa máá ii baàn dəì vɛ́nà. Kàandə, íí gàb indaŋ̀mbə̀ yàá. Indaŋ̀mbə̀ gə́, ləə gààd nɛ́ŋə̀ yílú, sɛŋ aa bə́ŋ̀ nɛ́ŋə̀ tə́ kə̀ gɔ̀ŋsə́ roó. 2Kə̀ baàn də́'ǹmbə̀ kíni, nɛ́ŋ kéèndo váàn yiìl bə̀ gə́, indaŋ̀mbə̀ tab wálə̀ tə́ kə̀ váàn oòra, sɛŋ aa váàn tə́ kə̀ gɔ̀ŋsə́ roó. Zá váàn oò val kò'ùwì gə́, indaŋ̀mbə̀ oò yílə́ sɔ̀ŋ sé. 3Dáà yaà bíl nɛ́ŋ váàndo ɔ̀d nə́ŋ̀ gɔ̀ŋ kéènì, sɛŋ aa bə́ŋ̀ váàn oò tə́ kə̀ gɔ̀ŋsə́ rə gə́, bə̀ dáù dɛdǹ nɛ́d labsə̀ bìá. Zá váàn oò val kò'ùwì gə́, biìn vúgì indaŋ̀mbə̀ aa tab wálə̀ kə̀ váàn oòrə rú. Dákíìn báàn yaàn bíìlǹmbə̀ nɛ́ŋ váàndo ɔ̀dnə́ŋ̀ kéèná. Bə̀ dɛ̀rə̀ nɛ́d labsə̀ bə̀ sɔ̀ŋ gá. 4Ɔ̀dkudvɛɛ̀l mə́ í'sɛ̀lbə̀ bərá, kə̀ aí kɔ̀, tə́ nɛɛ̀n aarə rú. Indaŋ̀mbə̀ bòórú gə́, val kò' ii yàá. Íí kùm wálke Krístù sisú yérə, bɔbm̀ kuùmbə̀ nɛ́ŋə̀ nə́ŋ̀ gɔ̀ŋ bìá. Bə́ŋyée íí kùmì nɛ́ŋə̀ aa Vɛnɛ́b díímə̀wà valə́ rə bìá, bɔ̀b báà ma'ǹ kə̀ tù' sɔ̀ɔ̀nkè Vɛnɛ́b bìá. 5Kə̀ aakíin də, sɛŋ aa bə́ŋ̀ bə́n tə́ən inselké bə́n bəd bagǹ kə̀ yíl obə́n bə̀ rə, í'sɛ̀l vaksə́ bəraa kùm obə́n sisú rə, páá bə́n sə̀n invaksə́ rú. Indaŋ̀mbə̀ zá' sə̀n í'sɛ̀l vaksə́ bəraa roó, bə́n ma'ǹ taà in bəraa àà bə́nnà val loó. 6Zá bə́ŋyée gə́, Vɛnɛ́b bìn lɛ́' bə́nnaì indaŋ̀mbə̀ nɛɛ̀n tɛ́mú. Kàandə, bə́n vaàlǹnì kə̀ in aa kò' və́' bə́n kìínmbə̀ bə́n kɔ̀' kíin doó. Kə̀ aakíin də, báan kíìn báàn Vɛnɛ́b tù' ma'ǹmbə̀ puu ní sɔ̀ŋ, kə̀ kpɛŋsɛ́l Nwul Gìdń bìá, zá kə̀ nɛɛ̀n aa nyàamdoorú, kpɛŋsɛ́l indaŋ̀mbə̀ bád də kíin gá.
Indaŋ̀mbə̀ ì' sə̀n nɛ́ŋə̀, nɛɛ̀n aa invaksə́ kùm dú roó
7Báan leè baanì? Indaŋ̀mbə̀ lɛ́' sə̀n nɛ́ŋə̀ invaksə́ rúì? Ə́ùwə́, kàan gá! Zá indaŋ̀mbə̀ ì' mə́ sùnú, mə́ gàb taà invaksá. Kə̀ aakíin də, mə́ gàb inlɛ'kè vaksə́ tɛ́m bə bə̀ gá, dáà indaŋ̀mbə̀ bàà: «Nɛ́ŋə̀ in oò lɛ' n sí» síngə́ roó. 8Kə̀ aakíin, invaksə́ bɔ̀b taà kpaŋ̀ kə̀ indaŋ̀mbìá, bít zá' taà inlɛ'kè vaksə́ luùm gɔ̀ŋ gɔ̀ŋ máá tɛ́mú. Kàandə, indaŋ̀mbə̀ síngə́, invaksə́ kə̀ kpɛŋsɛ́l naà sé; bíl in val yàá. 9Nyàamdoorú sɛŋ aa indaŋ̀mbə̀ síndə, mə́ kə̀ gɔ̀ŋsá. Zá zɔ̀ŋ aa indaŋ̀mbə̀ yaà wə́ə́ gə́, invaksə́ bíd kùm taà kə̀ gɔ̀ŋsə́ máá tɛ́mú. 10Bít máá kɔ̀ val kò' mə́ yàá. Indaŋ̀mbə̀ aa dáà dá mə́ aàn gɔ̀ŋsə́ rú rə, bə́ŋyée gə́, àà mə́ tə́ valú. 11Kə̀ aakíin, invaksə́ bɔ̀b taà kpaŋ̀á, záálɛ́' mə́ taà kə̀ indaŋ̀mbìá; bít kə̀ indaŋ̀mbə̀ aarə ní, mə́ bɔ̀b taà valá.
12Kə̀ aakíin də, Musa indaŋ̀mbə̀ tə́ gìdńná. Bít indaŋ̀mbə̀ nwɔŋ tə́ gìdńná, wɔ̀ɔ̀làá, bít tə́ sɔ̀ɔ̀nkèá. 13Ogə́ tə́ kàangə́, in aa yée kùm sɔ̀ɔ̀nkè rə, àà mə́ taà val beè? Vɛ́nà, kàan gá! Zá invaksə́ mà' sə̀n sáad aa roó. Kə̀ aakíin, bí' taà invaksə́, oò kùm invaksə́ vɛ́nà. Pà' mà' taà tù' kə̀ insɔ̀ɔ̀n doó, bít lò' mə́ taá. Kàandə, ìì ɛ̀g nɛɛ̀n aa kə̀ indaŋ̀mbə̀ aa yóo, invaksə́ yaà bíl invaksə́ gbà'á roó.
Nɛ́ŋə̀ tə́ nə́gə̀d ma'ǹ oò tɛ́mú kə̀ invaksá
14Bə́ gàb yàá vɛ́nà, indaŋ̀mbə̀ gə́, vúgà Vɛnɛ́b naú. Zá máá gə́, mə́ nɛ́ŋə̀ invaksə́ bə̀ ma'ǹná. Mə́ bíl invaksə́ kɔ̀'váàn yàá. 15Mə́ gàb in aa mə́ tə́ ma'ǹ də sé, kàandə, mə́ mà' in aa mə́ í' ma'ǹmbə̀ rə sé, zá mə́ mà' tə́ in aa mə́ zèè roó. 16Zá in aa mə́ í' síndə, mə́ mà' tə́ taà gə́, mə́ kè' yàá bít mə́ gàb yàá, indaŋ̀mbə̀ insɔ̀ɔ̀ná. 17Bə́ŋyée tə́ kàangə́, máára mə́ mà' sə̀n kàan gá, zá invaksə́ aa ləə máá tɛ́mú rə, mà' sùnú. 18Kə̀ aakíin də, mə́ gàb yàá sɔ̀ɔ̀nkè, insɔ̀ɔ̀n nə́ŋ̀má ləə máá tɛ́mú sé. Kə̀ aakíin də, kóó mə́ tə́ kə̀ tɛ́m sɔ̀ɔ̀n naà máá, mə́ bán sɔ̀ɔ̀nkè aarə ma'ǹmbə̀ gá. 19Sɔ̀ɔ̀nkè aa mə́ í' ma'ǹmbə̀ rə, mə́ mà' sé. Zá invaksə́ aa mə́ zèè rə, bít mə́ tə́ taà ma'nàá. 20Dáà mə́ tə́ invaksə́ aa mə́ í' ma'ǹmbə̀ síndə ma'ǹ gə́, kə̀ aakíin də, máára mə́ mà' sə̀n kàan gá, zá invaksə́ aa ləə máá tɛ́mú rə, mà' sùnú.
21Sàà mə́ bɔ̀b indaŋ̀mbə̀ aa tɛ́m mə́ tə́ bagǹ də yàá. Màìgə́ mə́ í'ì insɔ̀ɔ̀n ma'ǹmbə̀ gə́, mə́ bán invaksə́ ní ma'ǹmbìá. 22Inselké tɛ́mú bə̀ gə́, mə́ kìì tɛ́m làmkè tə́ kə̀ Vɛnɛ́b indaŋ̀mbìá. 23Zá aa mə́ bɔ̀b máá sisú rə, indaŋ̀mbə̀ ɔ̀d nə́ŋ̀ gɔ̀ŋá. Nə́' nə́gə̀d tə́ kə̀ indaŋ̀mbə̀ aa ingabké mə́ í' ke'ǹmbə̀ roó. Invaksə́ aarə, mà' bí' mə́ tə́ nɛ́ŋə̀ wúltígə́lə́ bìá. 24Mə́ nɛ́ŋə̀ búúd bìá! Nɛ́ɛ̀réè dáá mə́ sə̀n ke'ǹ lɛ́'ǹ sisaa dìŋ tə́ mə́ aàn valú yée nɛɛ̀n tɛ́mú gú? 25Mə́ mɔ̀' Vɛnɛ́b aa dìŋ vú' máà invaksə́ rú yée yàá. Vɛnɛ́b mà' in aarə, kə̀ Báá bə́n Tììkpɛ̀ŋ Yéésù Krístù ra.
Kə̀ aakíin də, kə̀ yíl mə́ gə́, mə́ tə́ Vɛnɛ́b indaŋ̀mbə̀ tùsú, kə̀ ingabké mə́ra. Zá in aa tɛ́m mə́ í' ma'ǹmbə̀ rə gə́, invaksə́ tùsá.
Nouveau Testament en Samba Leko © Alliance Biblique du Cameroun, 1998.