Roma 4
4
Nɛɛ̀n aa Abraham kùm dú roó
1Kàandə, báan leè baàn kə̀ doo bə́n Abraham gú? Kə̀ yíl oòrə, bɔ̀b níì gú? 2Dáà Vɛnɛ́b bí' Abraham tə́ nɛ́ŋə̀ wɔ̀ɔ̀lə̀ oò númú, kə̀ tù' sɔ̀ɔ̀n oò bəraa mà' rə gə́, Abraham dá kùlə́ kíìn ma'nàá. Zá bán kùlə́ ma'ǹmbə̀ Vɛnɛ́b númú gá. 3Kə̀ aakíin, Núúboòd Gìdń bàà: «Abraham zíg tɛ́m Vɛnɛ́b naú, bít Vɛnɛ́b gárə̀ taà nɛ́ŋə̀ wɔ̀ɔ̀làá, tɛ́mbagké oò bòórú.» 4Nɛ́ŋə̀ aa mà' tù' rə, bɔ̀b sòò ba' oò kúnú. Sòò ba' aarə, gád bə̀ páù kìínmbə̀ in tɛdńní bə̀ kíin gá. Zá aarə, wə̀d oòra. 5Vɛnɛ́b kè' nɛ́ŋə̀ kə̀ tù' oò aa mà' rə gá, zá kə̀ tɛ́mbagké oò aa kə̀ naà roó. Nɛ́ŋə̀ aarə, gàb yàá bəǹ nɛ́d invaksə́ bə̀ ma'ǹná, zá zíg tɛ́m oò gə́, Vɛnɛ́b dá bəǹ kíìn gádǹ kə̀ nɛ́ŋə̀ wɔ̀ɔ̀lə̀ kíin. Bít kə̀ aakíin də, Vɛnɛ́b dáù baàn oò tə́ wɔ̀ɔ̀làá. 6Kə̀ aakíin də, Dauda gámà nwɔŋ, nɛ́ŋə̀ aa Vɛnɛ́b mà'ù pə̀dkè rə yílú. Vɛnɛ́b gárə̀ kìínmbə̀ nɛ́ŋə̀ wɔ̀ɔ̀lə̀ kíin, ɛ̀g tù' oò bəraa mà' rə sé.
7«Nɛ́b bəraa Vɛnɛ́b lɛ́' dàà bə̀ invaksə́ boò ra,
bít yɛ̀l bə̀ invaksə́ boò rə, Vɛnɛ́b zíg bə̀ nɛɛ̀nì yílú.
8Nɛ́ŋə̀ aa Báátììkpɛ̀ŋ gád invaksə́ oò síndə, Vɛnɛ́b zígə̀
nɛɛ̀nì yílú.»
9Nɛɛ̀n zígǹmbə̀ yílə́ aarə, tə́ nɛ́b aa nàà gàb də bə̀ níì? Nɛ́b aa bə̀ nàà gàb síndə bə̀ kɔ̀ géè? Kə̀ aakíin də, bə́n baàn: «Vɛnɛ́b gád Abraham nɛ́ŋə̀ wɔ̀ɔ̀lə̀ oò númú, kə̀ tɛ́mbagké oòra.» 10Vɛnɛ́b gád Abraham nɛ́ŋə̀ wɔ̀ɔ̀lə̀ oò númú rə, sɛŋ déè bə gú? Nàà gàb sínaì, kóó síngə́, bɔ̀b bə́ŋ̀ nàà gàb sínì? Ə́ùwə́, nàà gàb sína gá. Sɛŋ də, bɔ̀b bə́ŋ̀ nàà gàb sé. 11Sɛŋ bùùd sína, Abraham bɔ̀b taà gàb naànmbə̀ kìínmbə̀ bírə́ kíin' bírə́ aarə ì' gə́, Vɛnɛ́b gád Abraham nɛ́ŋə̀ wɔ̀ɔ̀lə̀ kə̀ tɛ́mbagké oòra, bɔ̀b bə́ŋ̀ nàà gàb sé. Abraham kùmsə̀n nɛ́b bəraa bə̀ nàà gàb sé, bə̀ tə́ Vɛnɛ́b bagàá, bít Vɛnɛ́b gád bə̀ kə̀ nɛ́b wɔ̀ɔ̀lə̀ bəd kíin də gə́ kóólé báá boò ra. 12Abraham kùmsə̀n nɛ́b aa nàà gàb də báá boò kɔ̀. Taà kùmsə̀n baànmbə̀, nɛ́b bəraa tɛ́m làm bə̀ kə̀ nɛɛ̀n aa bə̀ nàà gàb dú yérə ní gá, zá nɛ́b bəraa ɛ̀m bə̀ bàg báá bə́n Abraham dun dɛ́l kə̀ tɛ́mbagké oò, bɔ̀b bə́ŋ̀ nàà gàb síndoó.
Abraham bàg Vɛnɛ́b də, bɔ̀b taà in aa Vɛnɛ́b bàà dàà roó
13Vɛnɛ́b bàà dàà Abraham nwɔŋ kə̀ kun oò bəd tá. Bàà bə̀ gə́, nɛ́b aa zɔ̀ŋə yɛ́b bərə kóólé, bə̀ dá kuùm boò bìá, kìínmbə̀ valligə̀ kíin. Abraham ləə indaŋ̀mbə̀ nwɔŋ də, Vɛnɛ́b bàà dààù taà nwɔŋ gá. Zá Vɛnɛ́b gárə̀ nɛ́ŋə̀ wɔ̀ɔ̀lə̀ oò númú, kə̀ tɛ́mbagké oòra. 14Dáà nɛ́b aa bə̀ ləə indaŋ̀mbə̀ nwɔŋ də, ìì dá tə́ sə̀ní in tɛdńní bə̀ aa Vɛnɛ́b bàà dàà kìínmbə̀ valligə̀ kíin yérə bɔbm̀ gə́, tɛ́mbagké dá kùm in tɛdńná. Bít nwɔŋ aa Vɛnɛ́b bàà dàà rə kɔ̀, kə̀ pɛ̀sə́ naà gá. 15Kàandə, indaŋ̀mbə̀ gə́, mà' sí'à Vɛnɛ́b nɔ̀m obə́n yílú. Zá zɔ̀ŋ aa indaŋ̀mbə̀ bə síndə, kɛdǹmbə̀ indaŋ̀mbə̀ kɔ̀ zɔ̀ŋ aarə bə gá.
16Kə̀ aakíin də, Vɛnɛ́b zíg indaŋ̀mbə̀ tɛ́mbagké bòórú, bɔ̀b oò kùm in tɛdńní bə̀ Vɛnɛ́b bə̀ aa bə́n də́ŋ̀ bɔbm̀bə̀ síndoó. Bít oò kùm kə̀ pɛ̀sá, Abraham kun bəd gə́ kóólé bìá. Nɛ́b aa bə̀ tə́ indaŋ̀mbə̀ ləə̀n də bə̀ ní gá, zá nɛ́b aa bə̀ tə́ bagǹ kìínmbə̀ Abraham tə́ Vɛnɛ́b bagǹ də kíin doó. Bə́n kóólé, Abraham kùmsə̀n báá bə́n da. 17Kìínmbə̀ Núúboòd Gìdń bàà rə kíin: «Mə́ mà' n, ǹ kùm nɛ́b kun zùúm bəd báá boò ra.» Oòra kùmsə̀n báá bə́n da, Vɛnɛ́b númú. Vɛnɛ́b aa tə́ val bəd gɔ̀ŋsə́ piìn, bít séé in aa nyàam síndoó. 18Abraham bàg yàá, bít zíg tɛ́m yàá. Zá sɛŋ də, Abraham dòò yàá. Kə̀ taàbìá, zíg taà tɛ́m wàà bə̀ bɔbm̀ sé; bít kə̀ aakíin də, yaà bíl «Nɛ́b kun zùúm bəd báá boò ra.» Kə̀ nɛɛ̀n aa Vɛnɛ́b bààùwà rə kíin: «Kun ń bəd bə̀ dá kuùm zùúm.» 19Abraham zèd mà'ì laa núnà. Zá tɛ́mbagké oò ɔ̀g sé, sɛŋ aa sèl bə̀ si' bəǹ dòò yàá, bəǹ bán wàà lɛbm̀bə̀ gá roó; bít kéèn oò Saratu kɔ̀ bán wàà lɛbm̀bə̀ gá. 20Bɔ̀' tɛ́mbagké oò sé, bít mà' pìrə̀ kə̀ Vɛnɛ́b nwɔŋ aa bàà dààù rə sé. Aa kàn nɛɛ̀n də, tɛ́mbagké oò kpɛŋ̀ dáá kə̀ númú, bít káŋ Vɛnɛ́bá. 21Gàb yàá vɛ́nà, Vɛnɛ́b dákíìn báàn in aa bàà dàà yée ma'ǹmbìá. 22Kə̀ taàbìá, Abraham kə̀ tɛ́mbagké oòra, «Vɛnɛ́b gárə̀ taà kìínmbə̀ nɛ́ŋə̀ wɔ̀ɔ̀lə̀ kíin, oò númú.» 23Zá nwɔŋ bəraa bə̀ bàà: «Vɛnɛ́b gárə̀ taà kìínmbə̀ nɛ́ŋə̀ wɔ̀ɔ̀lə̀ kíin» yérə, bə̀ bád Abraham yílə́ ní gá. 24Nwɔŋ bəraa rə, bə̀ bád obə́n bə̀ kɔ̀, bə́n nɛ́b aa Vɛnɛ́b dá bə́n gádǹ kìínmbə̀ bə́n nɛ́b wɔ̀ɔ̀lə̀ bəd kíin doó. Nɛ́b aa bə́n tə́ən nɛ́ŋə̀ aa díím Báá bə́n Tììkpɛ̀ŋ Yéésù valú, bít piiù gɔ̀ŋsə́ rə bagǹ doó. 25Invaksə́ bə́n bòórú, Vɛnɛ́b pii taà Yéésù ra, bɔ̀b boò lò'ù kúnú. Vɛnɛ́b díímə̀ valú, bɔ̀b báà kuùm wɔ̀ɔ̀lə̀ obəǹ númú.
Nouveau Testament en Samba Leko © Alliance Biblique du Cameroun, 1998.