Roma 14
14
Nɛ́ŋə̀ oò fág ɔ̀dkudvɛɛ̀l sí
1Ìì kè' màn aa tə́ tɛ́mbagké ɔ̀gke rú rə kúnú. Ìì álə̀ in aa sèl oò tɛ́m bərə bòórú sí. 2Kìínmbə̀ baàn də́'ǹmbə̀ kíin, nɛ́ŋə̀ nə́ŋ̀ gə́, tɛ́mbagké oò bàà, oò líí in gə́ kóólé. Kamgə́ nɛ́ŋə̀ nə́ŋ̀ gə́, tɛ́mbagké oò tə́ ɔ̀gkeá, dá nwɔgə̀ yɛsə̀ bəd ní líínàá. 3Nɛ́ŋə̀ aa líí in bəd kóólé rə, oò lòò nɛ́ŋə̀ aa líí in kambəd síndə sí. Nɛ́ŋə̀ aa líí in kambəd síndə kɔ̀, oò ál nɛ́ŋə̀ aa líí in kóólé rə sí. Kə̀ aakíin də, Vɛnɛ́b kè' màn aa líí in gə́ kóólé rə yàá. 4Ámgə́ ń nɛ́ɛ̀réè, ń dá taà nɛ́ŋə̀ nə́ŋ̀ nɛ́d tù' bə̀ ma'ǹ fágǹ gú? Kóó oò dìì lɛgú, sínkɔ̀ oò yi' yɛ́b ba, nwɔŋ ámbə̀ gá, nɛ̀n oò bìá. Zá zá' dìì lɛgə́ kə̀ aakíin də, Báátììkpɛ̀ŋ Vɛnɛ́b dáù sə̀n ko'ǹ və́'nàá.
5Nɛ́ŋə̀ nə́ŋ̀ gə́, sèl gə́ nyàm kambəd túrú, kànsə̀n kə̀ pɛ̀sá. Bít nɛ́ŋə̀ nə́ŋ̀ ɔ̀d kɔ̀ sèl gə́, nyàm bəd gə́ kóólé, də́ŋ tə́ nə́ŋ̀ní. Aa dá sɔɔ̀n də gə́, kóó nɛ́ɛ̀réè, oò bàg aa sèl oò tɛ́m bərə ní. 6Màn aa bàà nyàm nə́ŋ̀ kàn sə̀n kə̀ pɛ̀sə́ rə, oò kɔ̀ mɔ̀' Báátììkpɛ̀ŋá. Màn aa líí in bəd kóólé rə, oò kɔ̀ mɔ̀' Vɛnɛ́bá. Kə̀ aakíin, mɔ̀' Vɛnɛ́b inlíìnmbə̀ aa líí rə bòórú. Nɛ́ŋə̀ aa líí in bəd kóólé gá rə kɔ̀, kə̀ aakíin də, káŋ Báátììkpɛ̀ŋá, bít mɔ̀' Vɛnɛ́bá. 7Kàandə, nɛ́ŋə̀ nə́ŋ̀má kùm kə̀ gɔ̀ŋsə́ kə̀ yíl oò bə̀ní sé, bít kóó nɛ́ŋə̀ nə́ŋ̀má val oò ɛ̀g yíl oò bə̀ ní sé. 8Bə́n kuùmmì kə̀ gɔ̀ŋsə́ gə́, bə́n kuùmmì Báátììkpɛ̀ŋ bìá. Bít kóó val oò kò' bə́n kúnú, val kò' bə́n Báátììkpɛ̀ŋ bìá. Kə̀ aakíin də, kóó dáà báà kuùm kə̀ gɔ̀ŋsá, sínkɔ̀ val oò kò' bə́n kúnú, bə́n Báátììkpɛ̀ŋ nɛ́b bərá. 9Kàandə, Krístù val kò'ù yàá, bít díímì valú, bɔbm̀ kuùmbə̀ val bəd kə̀ nɛ́b galə̀ bəd tá Báá boò Tììkpɛ̀ŋá. 10Zá ám gə́, kə̀ níìbə̀ ń tə́ taà ɔ̀dnə́ŋ̀ ń fágǹ gú? Bít ám kɔ̀, kə̀ níìbə̀ ɛ̀g ń tə́ taà ɔ̀dkudvɛɛ̀l ń gɔɔ̀n gú? Kàandə, bə́n kóólé, báan dáàn diìn Vɛnɛ́b númú, oòra dáá bə́n sə̀n fágàá. 11Kàandə, Báátììkpɛ̀ŋ bàà Núúboòd Gìdńnú:
«Kóó nɛ́ɛ̀réè, yaà dá kuùm kə̀ dunlígə̀d máá númú, bɔ̀b máá bə̀ káŋ̀mbìá.
Bít kóó nɛ́ɛ̀réè, bàà dá vú'ǹ kə̀ yíl oò bìá, máára mə́ kùmsə̀n Vɛnɛ́bá.»
12Kə̀ aakíin də, kóó nɛ́ɛ̀réè obə́n tə́ŋú, bàà dá in aa mà' rə Vɛnɛ́b i'ǹ kə̀ yíl oò bə̀ ní.
Báà gú'ǹ ɔ̀dkudvɛɛ̀l sudǹ lɛ́'ǹmbə̀ invaksə́ rú
13Kə̀ taàbìá, báà daàn kíìn ɔ̀dnə́ŋ̀ bəd fágǹmbə̀ obə́n bòdba. Báà seèl ma'ǹmbə̀ kə̀ aakíin' Báà ma'ǹ in nə́ŋ̀má, bɔ̀b oò àà ɔ̀dkudvɛɛ̀l bə́n dunwà yíl ta'ǹmbə̀ sí, sínkɔ̀ oò bə̀ lɛ́'ǹmbə̀ invaksə́ rú sí. 14Mə́ gàb yàá vɛ́nà, bít kə̀ wálke kə̀ Báátììkpɛ̀ŋ Yéésù ra, inlíìnmbə̀ nə́ŋ̀má kùm in diíŋ kə̀ yíl oò ní gá. Zá dáà nɛ́ŋə̀ nə́ŋ̀ sèl bé' yàá, inlíìnmbə̀ aarə tə́ in diíŋ gə́, dá kuùm in diíŋ oò naú. 15Dáà kə̀ inlíìnmbìá, ń tə́ taà ɔ̀dkudvɛɛ̀l ń tɛ́m pigǹ gə́, ń mà' nɛɛ̀n aa í'sɛ̀l kùm dú rə sé. Ǹ gú' màn aa val kò' Krístù oò bòórú rə ma'ǹ bɔ̀'ǹmbə̀ inlíìnmbə̀ bòórú. 16In aa tə́ insɔ̀ɔ̀n ám naà rə, oò bíl in aa dá ɔ̀dkudvɛɛ̀l ń kpaŋ̀ piìn, dá kə̀ nwɔŋ vaksə́ gáàm də sí. 17Kə̀ aakíin də, gààd ləə̀nmbə̀ Vɛnɛ́b bə̀ gə́, inlíìnmbə̀ kə̀ in aa nɛ́ŋə̀ dá nyəə̀n də tə́ ní gá. In aa rú wərə̀ rə, kuùmbə̀ wɔ̀ɔ̀làá, kuùmbə̀ kə̀ tɛbàá, bít kə̀ tɛ́m làmkè aa Nwul Gìdń pii roó. 18Kóó nɛ́ɛ̀réè, mà' Yéésù Krístù tùsì kə̀ nɛɛ̀n aa yée rú kíin gə́, dákíìn sɔɔ̀n Vɛnɛ́b númú, bít nɛ́b bəd kɔ̀ bə̀ dáù kíìn ke'nàá.
19Kə̀ aakíin də, nɔ̀ŋ báà saàn sɛŋ gə́ kóólé kə̀ í'sɛ̀lá, in aa dá bə́n tɛbə̀ piìn doó, bít in aa láŋ dá bə́n tɛ́mbagké və́'ǹ ɔ̀dbə roó. 20Ǹ yɛ̀l Vɛnɛ́b tù' inlíìnmbə̀ bòórú sí. Vɛ́nà, inlíìnmbə̀ bəd gə́ kóólé, nɛ́b bəd dákíìn báàn líìnmbìá. Zá sɔ̀ɔ̀n in kambəd líìnmbə̀ sé, ń dá ɔ̀dkudvɛɛ̀l ń kíìn lɛ́'ǹ invaksə́ rú gə́ roó. 21Aa dá sɔɔ̀n də, nɛ́ŋə̀ oò fùg gɔ̀g sí, sínkɔ̀ oò nyəə badn sí, sínkɔ̀ oò mà' in kam bəraa dá ɔ̀dkudvɛɛ̀l oò lɛ́'ǹ invaksə́ rú rə sí. 22In aa ń sèl kə̀ yíl ámbə̀ rə, ǹ zígə̀ ám tɛ́m ba, kə̀ tɛ́mbagké Vɛnɛ́b númú. Làmkè tə́ nɛ́ŋə̀ aa fág yíl oò kə̀ nɛɛ̀n oò síndə naú, sɛŋ aa zíg in aarə ma'ǹmbə̀ kə̀ tɛ́mbagké oò roó. 23Zá màn aa mà' pìrə̀ oò tɛ́mú inlíìnmbə̀ nwɔŋ bòórú rə, dáà líì gə́, Vɛnɛ́b fágə̀ yàá. Kàandə, mà' in aarə tɛ́mbagké kpaŋə́ sé. Bít in aa nɛ́ŋə̀ mà' rə gə́ kóólé, vúgà tɛ́mbagké kpaŋə́ síngə́, aarə invaksá.
Nouveau Testament en Samba Leko © Alliance Biblique du Cameroun, 1998.