Gbantumsə̀ bəd Tùsá 8
8
1Sol kɔ̀ kè' yàá, boò lò' Etiyɛn kúnú.
Sol sɔ̀d Eklisiya bəd búúd í'ǹmbìá
Nyàm də bəní, Yahudu bəd sɔ̀d Eklisiya bəraa Urusalima bìlə́ rə búúd í'ǹmbìá. Nɛ́b bagké bəd nùù ìì sa' yɛ́b kam bəraa kàrú rə ba, nyɛ́d Yéésù gbantumsə̀ bəd ní. Sa' bə̀ ɛ̀m Yahudiya yɛ́b ba, kə̀ Samariya yɛ́b ba. 2Nɛ́b Vɛnɛ́b bə̀ bagǹ sɔ̀ɔ̀n bəd pà' ìì lə̀ə̀ Etiyɛn kúnú, bít ìì kpə̀ə̀ val oòrə sɔ̀ɔ̀n.
3Zá Sol gə́, dìì Eklisiya bəd sagə̀dǹ dúŋ̀mbìá. Pìì ligə̀ kə̀ ligàá, kòd nɛ́b vɔ̀ɔ̀m bəd kə̀ nɛ́b kɛ́ɛ̀m bəd tá, bít dáá páál bə̀ wúltígə́l bə̀ rú.
Filip ùd Vɛnɛ́b nwɔŋ Samariya bìlú
4Zá nɛ́b bagké bəraa nùù ìì sa' rə, bə̀ ɛ̀m zɔ̀ŋ bəd kóólé, Nwɔŋ Puu Sɔ̀ɔ̀nkè dáàn baànmbə̀ Yéésù yílú. 5Filip zá' ɛ̀m Samariya bìlú, sɔ̀d nɛ́b bəd nwɔŋ dáàn baànmbə̀ Krístù yílú. 6Nɛ́b zùúm bəd zɛ̀ŋ bə̀ kùd sə̀n nwɔŋ bəraa Filip tə́ bə̀ baàn doó, zɔ̀ŋ aa bə̀ kìì bít bə̀ bé'ù tə́ inkɔrə bəd ma'ǹ gə́ roó. 7Nɛ́b bəd zùúm kə̀ nwul vaksə́ bəd naà boò sisú. Zá Filip nìŋ vúŋ sə̀n nwul vaksə́ bəraa rə boò sisú. Sɛŋ aa nwul vaksə́ bəd tə́ vúgǹ nɛ́b bəraa rə sisə́ rə, bə̀ páál kpə̀ə́ǹ gbàád bərá. Zɔ̀ŋ aarə bərə, nɛ́b dun val bəd zùúm kə̀ nɛ́b dun tə́ŋke bəd tá, bə̀ kùm wərà. Filip gáŋ bə̀ì kɔ̀. 8Kə̀ aakíin, tɛ́m làmkè gbà'á kùm taà Samariya bìlú wərà.
9Bìl aarə rú rə, nɛ́ŋ váàndo nə́ŋ̀ ləə wərà, nə́gə́l oò Simon. Zíg yíl oò bə̀ bəǹ nɛ́ŋ gbàároá, mà' sáá ganá, bít gan aarə, kò' nɛ́b bəd yíl Samariya bìlə́ wərə̀ sɔ̀ɔ̀n. 10Nɛ́b bəd kóólé, sɔ̀d nɛ́b gbàád ba, yaà wə́ə́ yɛ́b bɛ̀ŋ́sə̀ bəd ba, bə̀ zɛ̀ŋ nwɔŋ oò kə̀ tɛ́m nə́ŋ̀ní, bít ìì bàà: «Màn aa yée kùmsə̀n Vɛnɛ́b kpɛŋsɛ́l nə́ŋ̀ aa bə̀ dɛ̀d: ‹Kpɛŋsɛ́l gbà'á› roó» 11Zɛ̀ŋ bə̀ kùrə̀ kíìn sɔ̀ɔ̀nkè. Nyàam kpɔ̀ɔ̀m də, lɛɛ̀m bə̀ì yíl ko'ǹmbə̀ kə̀ gan tù' oò bərá. 12Zá zɔ̀ŋ aa Filip bàà bə̀ nwɔŋ Vɛnɛ́b Gààd Nwɔŋ Puu Sɔ̀ɔ̀nkè yílú, bít kə̀ Yéésù Krístù nə́gə́l yílə́ yée ní, nɛ́b vɔ̀ɔ̀m kə̀ nɛ́b kɛ́ɛ̀m tá, bə̀ bàg yàá, bít bə̀ pii bə̀ baptisma yàá. 13Simon kə̀ yíl oò bə̀ máá, bàg Yéésù Krístù yàá, bít bə̀ piiù baptisma yàá. Kùm Filip kàrú ní, pɛd kə̀ oò sé. Inkɔrə gbàád bəraa Filip tə́ ma'ǹ kə̀ in də́dǹ bə̀ tó'ǹ gbàád bəd tə́ rə, kò'ù yílì gbàákù.
14Zɔ̀ŋ aa Yéésù gbantumsə̀ bəraa Urusalima bìlə́ rə bə̀ kììà bə̀ bàà nɛ́b Samariya bə̀ kè' Vɛnɛ́b nwɔŋ yàá gə́, bə̀ tùmà Piyɛr kə̀ Yohana tá, wərà. 15Zɔ̀ŋ aa Piyɛr kə̀ Yohana tá, ɛ̀m dá bə̀ wə́ə́ Samariya bìlə́ gə́, bə̀ nyɛ̀m Vɛnɛ́b nɛ́b bagké bəd yílú, bɔ̀b boò bɔ̀b Nwul Gìdńná. 16Kə̀ aakíin də, sɛŋ də, bɔ̀b bə́ŋ̀ Nwul Gìdń símà boò yílə́ sé. Bə̀ pii bə̀ baptisma Báátììkpɛ̀ŋ Yéésù nə́gə́lú, kàaní. 17Kàanyée gə́, Piyɛr kə̀ Yohana tá, ìì zíg bə̀ nɛɛ̀n yílú, bít bə̀ bɔ̀b taà Nwul Gìdńná.
18Zá Simon bé' gə́, nɛ́ŋə̀ dá Nwul Gìdń bɔbm̀ gə́, Yéésù gbantumsə̀ dáù sína nɛɛ̀n zígǹ yílú. Kàanyée gə́, ɛ̀mà kə̀ ba' naú, yaà bɔ̀b Piyɛr kə̀ Yohana tá, 19bàà bə̀: «Ìì pii mə́ kpɛŋsɛ́l aarə kɔ̀, bɔ̀b màn aa máù nɛɛ̀n zígǹ yílə́ rə, oò bɔ̀b Nwul Gìdńná.»
20Zá Piyɛr bààù: «Ń dá bɔ̀bm̀ kə̀ ba' ń də tá, sèl ḿ bàà gə́, in tɛdńní bə̀ aa Vɛnɛ́b pii rə, oò lɛ́bmíìn kə̀ ba' yéroó! 21Tɛ́m ámbə̀ wɔ̀ɔ̀lə̀ Vɛnɛ́b númú sé; kə̀ taàbìá, ḿ bán yíl ḿ páànmbə̀ tùsaa rə rú wərə̀ gá. 22Bə́ŋyée gə́, ǹ sɔ̀g kíìn kə̀ inselké vaksə́ ń da, bít ǹ nyɛ̀m Báátììkpɛ̀ŋ lò' oò dàà inselké vaksə́ aa ám tɛ́mú yérə kúnú, dáà dákíìn ma'míìn gə́ roó. 23Kàandə, mə́ bé' rə, ń tə́ kə̀ kisɛ̀l vaksə́ tɛ́mú, bít ń kó'ì invaksə́ zàŋú.»
24Bít Simon bàà Piyɛr kə̀ Yohana tá: «Aíra kə̀ yíl aí bìá, ìì nyɛ̀m mə́ Báátììkpɛ̀ŋá, bɔ̀b in aa íí bàà rə, kóó nə́ŋ̀má oò wə́ə́ mə́ sí.»
25Bòórú bə̀ mà' sedako in aa bə̀ gàb Yéésù yílə́ rə bə kóólé, bít bə̀ bàà Báátììkpɛ̀ŋ nwɔŋ gə́, Yéésù gbantumsə̀ bəraa iirə yée kid ìì bíd kíìn Urusalima bìlú. Bə̀ wə́ə́ kpaŋ́ gə́, gəə̀l bə̀ bàà Nwɔŋ Puu Sɔ̀ɔ̀nkè Yéésù yílú, bìl zùúm bəraa Samariya yɛ́b bərə rú.
Filip kə̀ Nɛ́ŋ gbàáro nə́ŋ̀ Etiopiya bə̀ tá
26Báátììkpɛ̀ŋ malaika nə́ŋ̀ yaà bàà Filip: «Ǹ zá' lɛgú, ɛ̀m m̀ bìd pɛ́rə̀ gúu bə̀ rú, kpaŋ̀ aa zá'à Urusalima bìlú, símà Gaza bìlə́ rə ba. Kpaŋ̀ aarə, tə́ fɔ̀gú.» 27Filip zá' ɛ̀m kə̀ báŋ, dáá wə́ə́ kpaŋ́ wərə̀ gə́, bé' nɛ́ŋ váàndo nə́ŋ̀ Etiopiya bìá. Nɛ́ŋ váàndo rə, nɛ́ŋə̀ beènná. Oòrə, nɛ́d gbàáro Kandake tù'sú bìá. Kandake rə, nɛ́ŋ kéèndoá; nyàam də, oòra kùmsə̀n gààd gbà'á Etiopiya yɛ́b ba. Nɛ́ŋ váàndo aarə, nwán sáá sə̀n gààd gbà'á aarə basá; dáà Urusalima bìlú, Vɛnɛ́b pɔ̀bm̀bìá, 28bít tə́ kíìn kidǹbídǹ oò yiilú. Kùm mótà aa yaa tə́ diŋ̀ də rú, tə́ Vɛnɛ́b gbantumsə̀ aa nə́gə́l oò Esaya rə núúboòd gáràá. 29Nwul Gìdń bàà Filip: «Ɛ̀m ǹ dáá númú, bít gbad dáá ǹ dìì mótà aa yaa tə́ diŋ̀ yérə kàd ba.»
30Filip nùù dáá wə́ə́ bít zɛ̀ŋ gə́, kìì nɛ́d Etiopiya bə̀ rə tə́ Vɛnɛ́b gbantumsə̀ aa bə̀ dɛ̀rə̀ Esaya rə núúboòd gáràá. Filip dɛ̀rə̀: «Ń kìì nwɔŋ aa ń tə́ gádǹ yérə tə́ kíìn vɛ́nà wa?»
31Kè' í' bàà: «Ééleè má taà báàn kiìnmbə̀ gú, nɛ́ŋə̀ nə́ŋ̀ bàà ì' mə́ síngə́ roó?» Bít bàà Filip na' oò pììà mótà aa yaa tə́ diŋ̀ də rú, bít yaà oò kùm kə̀ obəǹ tá.
32Zɔ̀ŋ aa gád Núúboòd Gìdńnú rə, nwɔŋ oòrə kə̀ aakíin:
«Oòrə, tə́ kìínmbə̀ bɛ̀rə̀ aa gùb ìì tə́ aàn zɔ̀ŋ wéènmbə̀ bərə kíin,
kìínmbə̀ bɛ̀rə̀ aa dìì nɛ́ŋə̀ aa tə́ù gí' vəə̀l lə númú, tò' gú' kpə̀ə̀ gá rə
kíin. Kə̀ aarə kíin, gám nwɔŋ nə́ŋ̀má sé.
33Nɛ́b kambəd dààù sə́ə́mnúùá, bít bə̀ mà'ù fágə́n wɔ̀ɔ̀lə̀ sé. Bít
nɛ́ɛ̀réè dá sə̀n yɛb kàá oò bəd nwɔŋ gáàm gú? Kə̀ aakíin də, bə̀ lò'ùwì
zɔ̀ŋə yɛ́b ba.»
34Nɛ́d gbàáro aarə, dɛ̀d Filip: «M̀ bàà mə́ kúnú, mə́ tə́ən kíìn nyɛmàá, Vɛnɛ́b gbantumsə̀ gám nwɔŋ aarə tə́ nɛ́ɛ̀réè yílə́ gú? Gám nwɔŋ aarə tə́ oò yílíì, sínkɔ̀ nɛ́ŋə̀ nə́ŋ̀ gɔ̀ŋ yílíì?» 35Bít Filip kè' í' taá, sɔ̀d kə̀ Vɛnɛ́b nwɔŋ aa yóo, bààù Nwɔŋ Puu Sɔ̀ɔ̀nkè Yéésù yílú.
36Zɔ̀ŋ aa ìì tə́ ɛ̀m kpaŋ́ yée gə́, yaà bə̀ wə́ə́ wəl kàd ba. Nɛ́ŋ gbàáro rə dɛ̀d Filip gə́, bàà: «Wəl aa yóo. Níì dá sə̀n báàn máá bə̀ daŋ̀mbə̀ baptisma ke'ǹmbə̀ gú?» [ 37Filip bààù: «Dáà ḿ bagì kə̀ tɛ́m ń tə́ kóólé gə́, ń dákíìn báàn baptisma ke'ǹmbìá.» Kè' í' bàà: «Mə́ kè' yàá, Yéésù Krístù kùmsə̀n Vɛnɛ́b Wàá.»] 38Kò' dí' mɔ̀tà aa yaa tə́ diŋ̀ də bée, bít Filip kə̀ nɛ́ŋə̀ gbàáro rə tá, bə̀ sím wəlú, bít Filip piiù baptisma. 39Zɔ̀ŋ aa ìì vúgə́là wələ́ yée ní, kə̀ nwɔŋ aa nuù yée kíin, Báátììkpɛ̀ŋ Nwul Gìdń yaà tád pà' àà Filip zɔ̀ŋ nə́ŋ̀ gɔ̀ŋ ba, bít nɛ́ŋ gbàáro rə bé'ù sɔ̀ŋ sé. Kàanyée gə́, zá' və̀d kpaŋ̀ oòra, ɛ̀m kíìn kə̀ tɛ́m làmkèá. 40Filip ɛ̀g núù gə́, bé' yíl oò tə́ Azod bìlú. Zá' wərə̀ gə́, ɛ̀m Kaisara bìlú, nɛ́b bəd Vɛnɛ́b Nwɔŋ Puu Sɔ̀ɔ̀nkè gəə̀l dáàn baànmbə̀ bìl bəraa taà rə rú kóólé.
Nouveau Testament en Samba Leko © Alliance Biblique du Cameroun, 1998.