Gbantumsə̀ bəd Tùsá 10
10
Piyɛr kə̀ Korneliyus tá
1Sɛŋ də, nɛ́ŋ váàndo nə́ŋ̀ kàani, Kaisara bìlú, nə́gə́l oò Korneliyus. Oòra kùmsə̀n sóózè bəd gààd gə̀b bɛ̀ŋ́sə̀wà aa bə̀ dɛ̀d: «Sóózè gə̀b Italiya yɛ́b bə bə̀ roó.» 2Nɛ́ŋ váàndo aarə, nɛ́d Vɛnɛ́b bə̀ nuùnná, bít kə̀ ligə̀ oò tə́ kóólé, wál dáá sáá Vɛnɛ́b pɔ̀bm̀bə̀ kɔ̀. Pii nɛ́b búúd bə̀ bəd in bərá, lɛ́' dàà Vɛnɛ́b nyɛɛ̀mbə̀ gá. 3Nyàm nə́ŋ̀ kàani, ba' toora, nyàm nyɛ́gkeá, Vɛnɛ́b kèrə̀ núùá, bít bé' malaika nə́ŋ̀á. Malaika rə, yaà oò sunú, bít dɛ̀rə̀: «Korneliyus!»
4Zá' núù ɛ̀g malaika gə́, də́dǹ mà'ùwì gbàákù, bít dɛ̀rə̀: «Ń í' níì gú, gbàároá?» Malaika kè' í'ù: «Vɛnɛ́b kè' nyɛmsɛ́l ámbə̀ yàá, kə̀ in bəraa ḿ pii nɛ́b búúd bə̀ bəd də tá. Vɛnɛ́b gə́, yid bɔ̀' n sé. 5Bə́ŋyée gə́, ǹ tùm nɛ́b vɔ̀ɔ̀m bəd Yope bìlú, dɛ̀d dá boò pà'nnà nɛ́ŋ váàndo nə́ŋ̀ tə́ kàani, nə́gə́l oò Simon, nə́gə́l ɔ̀d oò kɔ̀ Piyɛr. 6Ləə tə́ nɛ́d kúl bə̀ wéèn aa nə́gə́l oò Simon də kàrú, ligə̀ oò tə́ nwuu gbà'á kàd ba.»
7Zɔ̀ŋ aa malaika aa yaà bààù nwɔŋ də zá' ɛ̀m gə́, Korneliyus dɛ̀rà kɔ̀'vɔ̀ɔ̀m oò bəd iira, kə̀ sóózè aa tə́ù tù' ma'ǹ də tá. Sóózè aarə, nɛ́d Vɛnɛ́b bə̀ nuùnná. 8Bàà yaà bí' bə̀ in aa taà rə kóólé, bít tùm bə̀ Yope bìlú.
9Nwúndù oòrə, nɛ́b vɔ̀ɔ̀m bəraa ɛ̀m gbad yaà bə̀ wə́ə́ Yope bìl dùú; ìì tə́ kpaŋ̀ tɛ́mú, bít ɛ̀m bə̀ gbarà Yope bìl kàd bə gə́, Piyɛr na' wúl pɛgə́l yílú, nyàm yíl tə́ŋú, Vɛnɛ́b nyɛɛ̀mbìá. 10Piyɛr kìì gulùm yée gə́, bít í' inlíìnmbìá. Sɛŋ aa bə̀ tə́ù inlíìnmbə̀ ma'ǹ dú rə, Vɛnɛ́b kèrə̀ núùá. 11Piyɛr bé' lɛg keèd kúnú, bít bé' in nə́ŋ̀ símà lɛgú, lúŋ gɔ̀' gbà'á. Kàd bəd naara, bə̀ tabà lɛgú, sím tóò yaànà yɛ́b ba. 12In bəraa gɔ̀saa rú wərə̀ rə, ingalə̀ luùm bəraa kə̀ dun naarə roó, aa bəraa gùb kə̀ bàgə̀l loó, bít kə̀ núú lɛgə́ paà bə̀ bərá. 13Vɛnɛ́b pə̀gə̀lib nwɔŋ bààù: «Ǹ zá' lɛgú, Piyɛr, lòd ǹ fù' bə̀ kúnú!»
14Zá Piyɛr kè' í' bàà: «Ə́ùwə́! Kàan gá Báátììkpɛ̀ŋá. Kàandə, fù' mə́ bèd in aa bə̀ dàŋ də kóó nə́ŋ̀má sé, bít in aa ń ɛ̀g kə̀ in nyìb bə̀ kíin də kɔ̀, nə́ŋ̀má pìì bèd máá nuù sé.»
15Kìì pə̀gə̀lib nwɔŋ puu ní sɔ̀ŋ: «In aa Vɛnɛ́b mà'à in nyɛdkè rə, ǹ dɛ̀d in nyìb bə̀ sí.»
16Vɛnɛ́b líb mà' in aarə kàani dun toora, bít dáà yaànà kə̀ númú gə́, in aarə na' bíd kíìn lɛgə́ poú.
17Piyɛr kùm sèl bàà gə́, Vɛnɛ́b í' bəǹ níì baànmbə̀ kə̀ núù aa kèd bəǹ yérə gú. Sɛŋ də bərə kɔ̀, nɛ́b aa Korneliyus tùmà rə, ɛ̀m yaà bə̀ wə́ə́ yàá. Bə̀ dìì ligə̀ walú, bə̀ dɛ̀d Simon ligàá. 18Bə̀ dɛ̀d nwɔŋá, bə̀ bàà: «Simon aa bə̀ dɛ̀rə̀ Piyɛr rə, ləə tə́ zɔ̀ŋə ligə̀ aa rúì?»
19Sɛŋ aa Piyɛr bə́ŋ̀ tə́ núù aa Vɛnɛ́b kèrə̀ rə nwɔŋ oò seèl lə, Nwul Gìdń yaà bààù: «Ǹ zɛ̀ŋ kúnú, nɛ́b bəd tə́ toora, bə̀ tə́ ám saanàá. 20Ǹ zá' lɛgú, bə́ŋyée ní, sím ǹ yaà kúnú, bít ǹ ɛ̀m kə̀ boò tá, ǹ zìb pìrə̀ sí. Aarə, máára mə́ tùm bà sùnú.»
21Kàanyée gə́, sím yaà taà nɛ́b vɔ̀ɔ̀m bəraa rə sunú, bít yaà bàà bə̀: «Máára mə́ kùmsə̀n màn aa íí tə́ saàn doó. Kə̀ níìbə̀ íí yaà taà zɔ̀ŋə máá səǹ gú?»
22Kè' bə̀ í'ù: «Korneliyus, sóózè bəd gààd gbà'á tùm báà sə̀n ám sunú. Oòrə, nɛ́ŋə̀ wɔ̀ɔ̀làá, bít nùù Vɛnɛ́b sɔ̀ɔ̀n. Yahudu bəd kóólé, bə̀ ləəù kúnú. Malaika gìdń nə́ŋ̀ yaà bààù sùnú, yaà oò pà' n kúnú, oò àà n oò yiilú, bít oò kìì nwɔŋ aa ń dáù baàn doó.» 23Piyɛr dɛ̀d bə̀ boò pììà yiilú, bít dáá sí' bə̀ kúnú.
Nwúndù oòrə, zá' ɛ̀m kə̀ boò tá. Nɛ́b bagké kam bəraa Yope bìlə́ rə, láŋ ìì ààù ba. 24Nyàm aa zəg də, zá' ɛ̀m yaà Kaisara bìlú. Korneliyus kɔ̀ tə́ bə̀ nwánàá, bít dɛ̀rà kun oò bərá, kə̀ ɔ̀dzéd í'sɛ̀lbə̀ oò bəd tá. 25Zɔ̀ŋ aa Piyɛr yaà tə́ piìn yiìl yée ní, Korneliyus ɛ̀m yaà və̀rə̀ kpaŋú, dɔ̀mə̀ kúnú, yaà əb pí' yɛ́b bə oò númú, bít káŋ̀ kúnú. 26Zá Piyɛr láŋ pà' zá'ù lɛgú, bààù: «Ǹ zá' lɛgú; kàandə, máá kɔ̀ mə́ nɛ́ŋàá.»
27Gám nwɔŋ kə̀ Korneliyus da, bít pìì yiilú. Zɔ̀ŋ aa dááráàn wə́ə̀n gə́, bɔ̀b nɛ́b zùúm wál yàá. 28Bàà bə̀: «Íí gàb yàá, bə́n Yahudu bəd gə́, indaŋ̀mbə̀ bə́n dàŋ kíìn obə́n bə̀ wáàlǹmbə̀ kə̀ nɛ́b aa bə̀ bàg Vɛnɛ́b síndə tá, sínkɔ̀ piìnmbə̀ boò yiilú. Zá Vɛnɛ́b ì' mə́ gə́, máà ɛ̀g kóó nɛ́ŋə̀ nə́ŋ̀má kìínmbə̀ nɛ́ŋə̀ nyìb bə̀ kíin, obəǹ númú sí. 29Kə̀ taàbìá, zɔ̀ŋ aa íí dɛ̀d máà rə, mə́ məəà taà yaànmbə̀ sé. Mə́ í' gabm̀bìá, kə̀ níìbə̀ íí dɛ̀d máà taà gú?»
30Korneliyus kè' í': «Bə́ŋyée mà'ì sɛŋ toora, nyàm nyɛ́g wə́ə́ì ba' toorə gə́ kóólé, mə́ tə́ Vɛnɛ́b nyɛɛ̀m máá kàrú. Kə̀ nwɔŋ aa nuù yée kíinní, nɛ́ŋ váàndo nə́ŋ̀ páà gɔ̀' biíd táltál sisú, yaà dìì máá númú. 31Nɛ́ŋ váàndo rə, bàà mə́: ‹Korneliyus, Vɛnɛ́b kìì nyɛmsɛ́l ń yàá, bít sèl zá' in bəraa ḿ pii nɛ́b búúd bə̀ bəd də yàá. 32Ǹ tùm nɛ́b bəd Yope bìlú, ɛ̀m dá boò dɛ̀rà Simon aa bə̀ dɛ̀rə̀ Piyɛr roó, oò yaà ám sunú. Sím tə́ Simon nɛ́d kúl bə̀ wéèn kàrú, nwuu gbà'á kàd ba.› 33Kàanyée gə́, mə́ tùm taà nɛ́b bəd ám sunú, kə̀ báŋ, zá ń wə́ə́ì yée gə́, sɔ̀ɔ̀n yàá. Bə́ŋyée gə́, bə́ kóólé, bə́ kùm tə́ Vɛnɛ́b númú, bɔbm̀ kiìnmbə̀ nwɔŋ aa Báátììkpɛ̀ŋ bàànnà m̀ bàà bə́ rə gə́ kóólé.»
Nwɔŋ aa Piyɛr gám Korneliyus kàrú roó
34Kàanyée gə́, Piyɛr kèd gú', bàà kə̀ aakíin: «Vɛ́nà, nwɔŋ sɔ̀ɔ̀ná, sèl mə́ gàb yàá, Vɛnɛ́b gə́, pɛ̀d nɛ́ŋə̀ kun kɔ̀ gá. 35Zá kóó nɛ́b déè gə́ kóólé, kóó kun déè gə́ kóólé, màn aa nùù Vɛnɛ́b yàá, bít mà' tɛ́m wɔ̀ɔ̀lə̀ tùsì rə, Vɛnɛ́b dáù kíìn ke'nàá. 36Íí gàb yàá, Vɛnɛ́b tùm piià nwɔŋ oò nɛ́b Israila bə̀ bərá. Nwɔŋ aarə, kùmsə̀n Nwɔŋ Puu Sɔ̀ɔ̀nkè tɛbə̀ bə̀ aa vúgà Vɛnɛ́b naà roó. Yéésù àà sə̀n Nwɔŋ Puu Sɔ̀ɔ̀nkè tɛbə̀ bə̀ aa roó. Yéésù rə, oòra kùmsə̀n nɛ́b bəd kóólé Báátììkpɛ̀ŋá. 37Íí gàb in aa taà Yahudiya yɛ́b bərəì kóólé. Íí gàb in aa taà Galili yɛ́b ba, bòórú sɛŋ aa Yohana ùd kə̀ baptisma piìnmbə̀ nwɔŋ də yàá. 38Íí gàb nɛɛ̀n aa Vɛnɛ́b tùmà Nwul Gìdń oò, Yéésù Nazaratu bìlə́ bə̀ yílú, kə̀ kpɛŋsɛ́l tə́ rə yàá. Yéésù ɛ̀m gəə̀l zɔ̀ŋ kə̀ zɔ̀ŋá, mà' sɔ̀ɔ̀nkèá, gáŋ nɛ́b aa Sámbàŋyɛ́rə̀ tə́ bə̀ vɔgə̀l lə gə́ kóólé. Kə̀ aakíin də, Vɛnɛ́b tə́ kə̀ oò tá.
39«Obə́ra bə́ kùmsə̀n sedako in bəraa Yéésù mà'à Yahudu bəd yɛ́b ba, bít kə̀ Urusalima bìlə́ rə bìá. Kò' bə̀ lò' Yéésù kə̀ oò bə̀ bágǹmbə̀ téélɛŋké ba. 40Zá sɛŋ toorúb bə gə́, Vɛnɛ́b díímə̀wà kíìn valú, bít mà', bɔ̀b nɛ́b bəd boò bé'ù kúnú. 41Yaà vúŋ ì'ù nɛ́b zùúm núùrú gá, zá obə́ núùrú, bə́ nɛ́b aa nyàam Vɛnɛ́b sààvúŋ báà, kìínmbə̀ sedako bəd kíin doó. Bòórú Vɛnɛ́b díímə̀wà valú, bít bí'ùwà gɔ̀ŋsə́ gə́, bə́ líí in kə̀ oò tá, bít bə́ nyəə wəl kə̀ oò tá. 42Yéésù bàà bə́, báà ùd nɛ́b bəd nwɔŋ bəǹ da, bít báà mà' sedako, báà bàà gə́, obəǹ da bəǹ kùmsə̀n màn aa Vɛnɛ́b sàà zígà yaà dá nɛ́b galə̀ bəd fágǹ kə̀ val bəd tə́ roó. 43Vɛnɛ́b gbantumsə̀ bəd gə́ kóólé, ìì mà' sedakoì oò yílú. Ìì bàà gə́, nɛ́ŋə̀ aa bàg Yéésù rə gə́ kóólé, Vɛnɛ́b dáù invaksə́ oò kíìn lo'ǹ daàn Yéésù nə́gə́lú.»
Nɛ́b aa bàg Vɛnɛ́b síndə, ìì bɔ̀b Nwul Gìdń yàá
44Zɔ̀ŋ aa Piyɛr tə́ nwɔŋ gáàm sɔ̀ŋ yée ní, Nwul Gìdń símà nɛ́b bəraa tə́ nwɔŋ oò bəd zɛŋ̀ də yílə́ kóólé. 45Nɛ́b bagké bəraa bə̀ Yahudu bərá, bə̀ ɛ̀mà kə̀ Piyɛr tə́ rə, bə̀ bé' nɛɛ̀n aa Vɛnɛ́b tùm piià nɛ́b aa bàgə̀ síndə Nwul Gìdńnì kɔ̀ yée gə́, kò' bə̀ yíl yàá. 46Bə̀ kìì bə̀, ìì tə́ mɛ́l nwɔŋ ɔ̀d kambəd gámàá, bít ìì tə́ Vɛnɛ́b káŋàá.
Kàanyée gə́, Piyɛr bàà: 47«Nɛ́ɛ̀réè dá sə̀n báàn daŋ̀mbə̀ nɛ́b aa baptisma piìnmbə̀ gú? Nɛ́ŋə̀ nə́ŋ̀má sé. Bə́ŋyée bə̀ bɔ̀b Nwul Gìdń yàá, kìínmbə̀ obə́n kíin.» 48Bít Piyɛr pii bə̀ kpaŋ̀, boò kè' baptisma Yéésù Krístù nə́gə́lú. Bít bə̀ dɛ̀rə̀ oò kùm kə̀ obəní tá, sɛŋ zɔ̀gɔ̀.
Nouveau Testament en Samba Leko © Alliance Biblique du Cameroun, 1998.