2 Tesalonika 2
2
Nɛ́ŋə̀ Vaksá
1Báá bə́n Tììkpɛ̀ŋ Yéésù Krístù bíràì gə́, báan dáàn wáàl oò sunú. Kàanyée gə́, mə́ tə́ ii kíìn nyɛmàá, ɔ̀dkudvɛɛ̀l bərá, 2tɛ́m oò nyágə́li bít də́dǹ oò mà' ii kə̀ nwɔŋ aa nɛ́b bəd bə̀ bàà yaaké Báátììkpɛ̀ŋ bə̀ wə́ə́ì gbòód də sí. Kamgə́, bə̀ dá bə̀ baàn gə́, nwɔŋ aarə vúgà Nwul Gìdń naú, sínkɔ̀ nɛ́ŋə̀ nə́ŋ̀ naú, sínkɔ̀ nwɔŋ aarə vúgà núúboòd bəraa bə́ bád də nə́ŋ̀ú. 3Ìì dàà nɛ́ŋə̀ nə́ŋ̀má oò záá ii kə̀ kpaŋ̀ nə́ŋ̀ gɔ̀ŋ sí. In aa ɛ̀g Báátììkpɛ̀ŋ sɛŋ də gə́, in kambəd dá sína wə́ə́nàá. Sɛŋ aa nɛ́b zùúm bəd nùù bə̀ dá kə̀ Vɛnɛ́b daàn də éèn dá sína wə́ə́nàá, bít nɛ́ŋə̀ aa bə̀ dɛ̀rə̀ Nɛ́ŋə̀ Vaksə́ rə, dá taà wə́ə́nàá. Oò gə́, nɛ́ŋə̀ laarú bìá. 4Oò gə́, məə dá in aa nɛ́b bəd tə́ pɔ̀bm̀ də kíìn daàn kóólé, bít məə dá in aa nɛ́b bəd ɛ̀g kə̀ Vɛnɛ́b kíin də kíìn daàn kóólé. Dá nə́gə̀d ma'ǹ kə̀ in bəraa rə gə́ kóólé, ɛ̀m dááráàn piìn kuùm Vɛnɛ́b láŋsə́ wúu, bít dá yíl oò zígǹ bəǹ Vɛnɛ́bá.
5Mə́ bààiyà nwɔŋ aarə, sɛŋ aa mə́ kùmà kə̀ aí tə́ roó. Sèl íí zá' sínì? 6In nə́ŋ̀ kò' díí Nɛ́ŋə̀ Vaksə́ aarə tə́ kíìn bə́ŋyóo, dá taà yaàn vúgǹ sɛŋ sɔ̀ɔ̀nú. Bít íí gàb in aa kò' tə́ù dí'ǹ də yàá. 7Inmə́'ke aa ɛ̀g gɔ̀n Vɛnɛ́b kpaŋ̀ bagǹmbə̀ nwɔŋ də, kpɛŋsɛ́l oò tə́ tùsú. Nwɔŋ oò dá báàn wə́ə̀nmbə̀ gə́, Vɛnɛ́b pà' dá sína nɛ́ŋə̀ aa dàŋ̀ rə zá'nàá. 8Kàanyée gə́, Nɛ́ŋə̀ Vaksə́ yaà dá yíl oò i'nàá, bít Báátììkpɛ̀ŋ Yéésù dáù lo'ǹ kə̀ nwul oò gú' bə bìá, bít dáù kíìn yɛlàá, kə̀ yaaké káŋke oò bìá. 9Nɛ́ŋə̀ Vaksə́ dáà yaanà kə̀ Satan kpɛŋsɛ́lá. Dá inwulubə̀ luùm gɔ̀ŋ gɔ̀ŋ ma'nàá, in də́dǹ bə̀ tó'ǹ bəd kə̀ inkɔrə bəd tá. 10Dá nɛ́b aa bɔ̀b də zá'ǹ pa'ǹ kóólé kə̀ inwulubə̀ vaksə́ oòra. Bə̀ dákíìn bɔ̀bə́làá. Kàandə, bə̀ kè' bít bə̀ í' vɛ́nà aa dá bə̀ súùn də sé. 11Kə̀ taàbìá, Vɛnɛ́b tùm pii bà taà kpɛŋsɛ́l aa bə̀ dá bɔ̀bm̀ kə̀ kùrú roó, gúsuúm nwɔŋ aa bə̀ tə́ ke'ǹ də bòórú. 12Kə̀ aakíin də, nɛ́b aa bə̀ kè' nwɔŋ sɔ̀ɔ̀n sé, zá bə̀ í' invaksə́ rə gə́ kóólé, Vɛnɛ́b fág dá bə̀ kíìn ko'nàá.
Nɛ́b aa Vɛnɛ́b sààvúŋà, bɔ̀b boò súú kíìn doó
13Obə́ gə́, ɔ̀dkudvɛɛ̀l mə́ bərá, aa dá sɔɔ̀n də, báà dìì Vɛnɛ́b mɔ̀'ǹmbə̀ aí yílú, íí nɛ́b aa Báátììkpɛ̀ŋ í' roó. Kàandə, Vɛnɛ́b sààvúŋ ii, bɔ̀b ìì kùm nɛ́b éèn də̀gə̀ də̀gə̀ bə̀ bərá. Ìì súú kúnú, kə̀ Nwul Gìdń aa tə́ tù' ma'ǹ aí rú roó, bɔ̀b oò bí' ii gìdńná, kə̀ tɛ́mbagké íí vɛ́nà rú bìá. 14Vɛnɛ́b dɛ̀riyà kə̀ Nwɔŋ Puu Sɔ̀ɔ̀nkè bəraa bə́ bààiyà roó. Dɛ̀riyà bɔ̀b yaaì kè' kaŋsɛ́l laa nyɛdkè aí bìá, kaŋsɛ́l laa nyɛdkè aa Báá bə́n Tììkpɛ̀ŋ Yéésù Krístù rú roó. 15Kə̀ aakíin də, ɔ̀dkudvɛɛ̀l mə́ bərá, ìì kùm və̀'kèá. Kò' ìì kùd in aa bə́ sániyà kə̀ gú', sínkɔ̀ kə̀ núúboòd bə́ bəd doó.
16Mə́ nyɛ̀m Báá bə́n Tììkpɛ̀ŋ Yéésù Krístù kə̀ yíl oò bìá, kə̀ Báá bə́n Vɛnɛ́b aa í' bə́n, bít mà' bə́nnà pə̀dkè tɛ́m tɛbə̀ bə̀ zèd kə̀ zèd bìá, kə̀ tɛ́m zígǹmbə̀ sɔ̀ɔ̀n də, 17boò tɛ́' ii tɛ́má, boò nyíí ii tɛ́m kə̀ váàndoá, bít boò pii ii kpɛŋsɛ́l in aa tə́ sɔ̀ɔ̀n də gə́ kóólé ma'ǹmbìá, nwɔŋ aa íí tə́ gáàm gú' bəroó, kə̀ tùsaa íí tə́ ma'ǹ doó.
Nouveau Testament en Samba Leko © Alliance Biblique du Cameroun, 1998.