ᐊᑭᑖᓱᓇᓐ 22
22
ᒨᐗᑉ ᑭᒋᐅᑭᒫ ᑮᐊᑐᒫᒡ ᐯᓬᐊᒨᓐ
1ᐃᔅᕒᐃᔭᓬᐊᒃ Israel ᐃᑕᔥ ᑮᐱᒥ ᐊᔮᐗᒃ᙮ ᐃᐃᒫ ᑕᔥ ᐁᔑ ᐸᔥᒀᓂᒃ ᒨᐗᑉ Moab ᐊᑮᕽ ᑮᐃᔑ ᑲᐯᔑᐗᒃ ᐙᐸᓄᕽ ᐃᓇᑫ ᒞᕒᑕᓐ Jordan ᓰᐱᕽ, ᐊᑳᒥᓰᐱ ᒉᕒᐊᑯ Jericho ᐁᑮ ᐊᔮᓂᒃ᙮
2ᐊᐊ ᑕᔥ ᐯᓬᐊᒃ Balak ᐅᑌᑌᓐ ᓯᐳᕒ Zippor ᐁᔑᓂᑳᓱᓂᒡ ᑮᓅᑕᒻ ᐋᓃᓐ ᐃᔅᕒᐃᔭᓬᐊᐞ ᑳᑑᑕᐙᓂᒡ ᐁᒧᕒᐄ Amorite ᑳᑎᓄᐎᓂᒡ᙮ 3ᐃᑭ ᑕᔥ ᒨᐗᑉ ᐊᑮᕽ ᐁᔮᐙᒡ ᐐᑫ ᑮᓭᑭᓯᐗᒃ, ᐋᓃᔥ ᐃᔅᕒᐃᔭᓬᐊᐞ ᐐᑫ ᑮᐹᑏᓄᐗᐞ᙮ ᐃᑭ ᑕᔥ ᒨᐗᑉ ᐁᔮᐙᒡ ᐐᑫ ᐅᑮ ᑯᓵᐙᐞ ᐃᔅᕒᐃᔭᓬᐊᐞ᙮ 4ᒨᐗᑉ ᐃᑕᔥ ᐁᔮᐙᒡ ᐅᐅ ᐅᑮᐃᓈᐙᐞ ᑳᓃᑳᓂᓯᓂᒡ ᒥᑎᔭᓐ Midian ᐊᑮᕽ ᐌᒌᓂᒡ, ᐃᓇᔥᑫ ᓴ ᐃᑭ ᑳᐹᑏᓄᐙᒡ ᑲᑭᓇ ᑫᑰᓐ ᐅᑲ ᐊᔪᑖᐱᓈᓈᐙ ᒥᓯᐌ ᐙᑳᔭᐄ ᐁᔮᓂᒃ, ᑖᐱᔥᑰ ᐱᔑᑭ ᑳᑭᑖᒡ ᒪᔥᑯᓰᓐ ᐙᑳᔭᐄ ᐁᔑᐊᔮᒡ ᒥᔕᐗᑲᒥᒃ, ᐅᑮᐃᓈᐙᐞ᙮ ᐊᐊ ᓴ ᐯᓬᐊᒃ ᑳᑮ ᐅᑌᑌᒡ ᓯᐳᕒᐊᓐ ᑮᑭᒋ ᐅᑭᒫᐎ ᐃᐃᒫ ᒨᐗᑉ ᐊᑮᕽ᙮ 5#Num 31.8; 2Pe 2.15,16. ᒦᔥ ᑳᑮ ᐃᔑᓂᔕᐙᒡ ᐃᓂᓂᐗᐞ ᒋᐊᑕ ᐙᐸᒫᓂᒡ ᐯᓬᐊᒨᓐ Balaam ᐌᑌᑌᓂᒡ ᐲᐅᕒ Beor ᑳᑮ ᐊᔮᓂᒡ ᐲᑕᕒ Pethor ᐁᒋᑳᑌᓂᒃ ᐆᑌᓇ ᒌᑭ ᓰᐱᕽ ᐄᔫᐸᕒᐁᑏᔅ Euphrates ᐁᒋᑳᑌᓂᒃ᙮ ᒦ ᐄᑐᒃ ᐌᑎ ᐃᓇᑫ ᐊᑮᕽ ᑳᐅᒋ ᑎᐯᑖᑯᓯᓂᒡ᙮ ᒦᑕᔥ ᑳᐃᓈᒡ, ᐁᑕᑕᐌ ᓴᓈ ᐅᓵᒦᓄᐗᒃ ᐯᒫᑎᓯᐙᒡ ᐄᒋᐸᑮᕽ Egypt ᑳᑮ ᐱᐅᒋ ᓵᑲᐊᒧᐙᒡ᙮ ᐐᑫ ᓴ ᑯ ᐅᑖ ᑲᐎᔥᑳᓈᐙ ᐊᑭ ᐁᐲᒋ ᐹᑏᓄᐙᒡ, ᒌᑲᔭᐄ ᓴ ᑯ ᐅᐅᒫ ᐱᐃᔑ ᑲᐯᔑᐗᒃ᙮ 6ᐁᑕᑕᐌ ᐅᔕ ᐹᑏᓄᐗᒃ, ᑳᐐᓐ ᑫᒋᓈᒡ ᓂᑖ ᔖᑰᒋᐋᓰᒃ ᓂᑯᒋ ᒋᐅᒋ ᐃᓈᒧᑮᔮᐹᓐ ᐅᐅᒫ ᐊᑮᕽ᙮ ᑕᑲ ᑕᔥ ᐲᔖᓐ ᒋᐱ ᒪᒐᑭᒪᑣ, ᐅᓵᒻ ᐋᓃᔥ ᐅᓵᒦᓄᐗᒃ᙮ ᓂᑭᑫᑖᓐ ᓴ ᐊᐌᓀᓐ ᐃᑯ ᐁᓇᒡ ᒋᒥᓄᓭᒡ ᐁᒥᓄᓭᒡ, ᐊᐎᔭ ᑲᔦ ᑯ ᑮᒪᒐᑭᒪᒡ᙮ ᒦ ᑯᐃ ᐁᔑ ᒪᒋᓭᒡ, ᐅᑮᐃᓈᓐ᙮
7ᐅᓃᑳᓂᓰᒃ ᐃᑕᔥ ᒨᐗᑉ ᐊᑮᕽ ᐌᒌᐙᒡ, ᐅᓃᑳᓂᓰᒃ ᑲᔦ ᒥᑎᔭᓐ ᐌᒌᐙᒡ ᐅᑮ ᒫᒌᑑᓈᐙᓐ ᐙᑎᐸᐃᑳᑫᐙᒡ ᐊᐲ ᒪᒫᑖᐎ ᐊᑕ ᑭᑫᒋᑫᓈᓂᐗᓂᓂᒃ ᑳᑮ ᐃᔑ ᐊᓅᑮᐙᒡ᙮ ᐊᐲ ᓴ ᐁᐅᑎᓵᐙᒡ ᐯᓬᐊᒨᓐ, ᐅᑮ ᐐᑕᒪᐙᐙᓐ ᐋᓃᓐ ᐯᓬᐊᑰᓐ ᑳᐃᑭᑐᓂᒡ᙮ 8ᒦᔥ ᑳᐃᑯᐙᒡ ᐯᓬᐊᒨᓐ, ᒦ ᓴ ᐅᐅᒫ ᐊᔮᒃ ᑲᐯᑎᐱᒃ, ᑭᑲ ᐐᑕᒪᐎᓂᓂᒻ ᐃᑕᔥ ᐋᓃᓐ ᑳᑎᐯᒋᑫᒡ ᑫᐃᔑᑴᓐ, ᐅᑮᐃᑯᐙᓐ᙮ ᒦᑕᔥ ᐃᐃᒫ ᑳᐊᔮᐙᒡ ᐃᐃ ᐁᑎᐱᑲᓂᓂᒃ ᐃᑭ ᐅᓃᑳᓂᓰᒃ ᒨᐗᑉ ᐌᒌᐙᒡ᙮ 9ᒦᑕᔥ ᐯᓬᐊᒻ ᑳᑮ ᐱ ᓈᓯᑳᑯᒡ ᑭᔐᒪᓂᑑᓐ ᐁᑮᐃᑯᒡ, ᐊᐌᓀᓇᒃ ᐃᑭ ᑎᓄ ᐃᓂᓂᐗᒃ ᑳᐐᒌᐎᒀ? ᐅᑮᐃᑰᓐ᙮
10ᐅᐅᔥ ᐅᑮ ᐃᔑ ᓇᑴᑕᐙᓐ ᑭᔐᒪᓂᑑᓐ, ᐯᓬᐊᒃ ᑳᑭᒋ ᐅᑭᒫᐎᒡ ᒨᐗᑉ ᐊᑮᕽ ᐌᑌᑌᒡ ᓯᐳᕒᐊᓐ ᐅᔕ ᐅᑮ ᐲᒋᓂᔕᐙᐞ ᐅᐅ ᒋᐱ ᐐᑕᒪᐎᒥᒡ᙮ ᒦᔥ ᐅᐅ ᑳᐃᔑᒥᒡ, 11ᐃᓇᔥᑫ ᓴᓈ ᐁᑕᑕᐌ ᐅᓵᒦᓄᐗᒃ ᐯᒫᑎᓯᐙᒡ ᐄᒋᐸᑮᕽ ᑳᑮ ᐱᐅᒋ ᓵᑲᐊᒧᐙᒡ, ᐅᑖᑲᐎᔥᑳᓈᐙ ᓴ ᐊᑮᓂ ᐁᐲᒋ ᐹᑏᓄᐙᒡ᙮ ᑕᑲ ᑕᔥ ᐲᔖᓐ ᒋᒪᒐᑭᒪᑣ ᓃᓐ ᐅᒋ; ᒫᑭᔖ ᑕᔥ ᒦ ᐃ ᒋᔖᑰᒋᐊᒀ, ᓂᑯᒋ ᑕᔥ ᒋᐃᓈᒧᑮᔮᓐ, ᐅᑮᐃᓈᓐ᙮
12ᒦᑕᔥ ᐅᐅ ᑳᐃᑯᒡ ᑭᔐᒪᓂᑑᓐ, ᑫᑯ ᒫᒌ ᐐᒌᐙᑫᓐ ᐅᑯ ᐃᓂᓂᐗᒃ, ᑳᐐᓐ ᓴ ᑭᑲ ᒪᒐᑭᒫᓰᒃ ᐃᔅᕒᐃᔭᓬᐊᒃ, ᐋᓃᔥ ᐋᔕ ᓂᑮᐃᓈᒃ ᒋᒥᓄᓭᐙᒡ, ᐅᑮᐃᑰᓐ᙮
13ᐁᐊᓂ ᐙᐸᓂᓂᒃ ᐃᑕᔥ ᐯᓬᐊᒻ ᐅᑮ ᐊᑕ ᐙᐸᒫᐞ ᐯᓬᐊᑰᓐ ᐅᑑᔥᑭᓃᑮᒥᓂ ᐁᑮᐃᓈᒡ, ᒫᒑᒃ ᑭᑕᑮᐙᕽ ᐊᓂᔑ ᑮᐌᒃ, ᑳᑎᐯᒋᑫᒡ ᐅᔕ ᑳᐐᓐ ᐃᓀᑕᓰ ᒋᐊᓂ ᐐᒌᐎᓇᑰᒃ, ᐅᑮ ᐃᓈᐞ᙮ 14ᒦᑕᔥ ᐃᐃ ᐅᓃᑳᓂᓰᐞ ᒨᐗᑉ ᐌᒌᓂᒡ ᑳᐊᓃᔑ ᑮᐌᓂᒡ ᐁᑮ ᐊᑕ ᐙᐸᒫᓂᒡ ᐯᓬᐊᑰᓐ ᐅᐅ ᐁᑮᐃᓈᓂᒡ, ᐯᓬᐊᒻ ᑳᐐᓐ ᑌᐺᑕᓰ ᒋᐱ ᐐᒌᐎᔭᒥᓐᒡ, ᐅᑮᐃᓈᐙᓐ᙮
15ᒦᓇᐙ ᑕᔥ ᐯᓬᐊᒃ ᐅᑮ ᐃᔑᓂᔕᐙᐞ ᐅᓃᑳᓂᓰᐞ ᓇᐗᒡ ᐁᑮ ᐹᑏᓄᓂᒡ, ᓇᐗᒡ ᑫᒋ ᐃᓀᑖᑯᓯᓂᒡ ᐊᐲᒡ ᐐᓐ ᐃᐃ ᓂᑕᒻ ᑳᑮ ᐃᔑᓂᔕᐙᐸᓐ᙮ 16ᐊᐲ ᑕᔥ ᐌᑎᓵᓂᒡ ᐁᔑᐊᔮᓂᒡ ᐯᓬᐊᒨᓐ ᐅᐅ ᐅᑮᐃᓈᓂ, ᐅᐅ ᓴ ᑭᑎᒃ ᐯᓬᐊᒃ ᐌᑌᑌᒡ ᓯᐳᕒᐊᓐ, ᑕᑲ ᑫᑯ ᑫᑰᓐ ᑭᑲ ᐅᑕᒦᐃᑯᓰᓐ ᒋᐱᐊᑕ ᐙᐸᒥᔭᓐ; 17ᐌᐌᓂ ᐄᑐᒃ ᑭᐐ ᑭᒋ ᑎᐸᐊᒪᐎᓐ, ᓂᑲ ᐃᔑᒋᑫ ᑲᔦ ᐋᓃᓐ ᐃᑯ ᑫᐃᔑᔭᓐ᙮ ᑕᑲ ᓴ ᐲᔖᑲᓐ, ᒋᒪᒐᑭᒪᑣ ᐃᑭ ᐯᒫᑎᓯᐙᒡ ᐃᔅᕒᐃᔭᓬᐊᒃ ᓃᓐ ᐅᒋ, ᑭᑎᑰ ᐅᑮᐃᓈᓂ᙮
18ᒦᔥ ᐅᐅ ᐯᓬᐊᒻ ᑳᐃᔑ ᓇᑴᑕᕽ, ᒥᓴᐙ ᑯ ᐯᓬᐊᒃ ᒦᔑᒡ ᐅᓵᐎ ᔔᓂᔮ ᐙᐱᑰᓐ, ᐙᐹᐱᑯ ᔔᓂᔮ ᐙᐱᑰᓐ ᑲᔦ ᒥᓂᒃ ᒋᑌᐸᔥᑭᓀᓂᐸᓐ ᐅᐙᑳᐃᑲᓂᕽ, ᑳᐐᓐ ᓴ ᑫᑰᓐ ᓂᑖ ᐃᔑᒋᑫᐙᓰᓐ, ᒥᓴᐙ ᑯ ᐁᑳᓯᓂᓂᒃ, ᑯᒫ ᑭᒋ ᑫᑰᓐ᙮ ᑳᐐᓐ ᓴ ᓂᑖ ᐃᔑᒋᑫᐙᓰᓐ ᓇᐹᒡ ᐁᓈᑯᓂᑫᒡ ᑳᑎᐯᒋᑫᒡ ᓂᑭᔐᒪᓂᑑᒻ᙮ 19ᑕᑲ ᑕᔥ ᐅᐅᒫ ᐊᔮᑫᒃ ᓅᑯᒻ ᑳᑎᐱᑲᒃ, ᓂᑲ ᐊᑕ ᑭᑫᑕᒧᐙᓐ ᐃᑕᔥ ᑳᑎᐯᒋᑫᒡ ᐋᓃᓐ ᒦᓇᐙ ᑫᐃᔑᑴᓐ, ᐅᑮ ᐃᓈᐞ᙮ 20ᒦᔥ ᐁᑎᐱᑲᓂᓂᒃ ᐯᓬᐊᒻ ᑳᑮ ᐱᐊᑕ ᐙᐸᒥᑯᒡ ᑭᔐᒪᓂᑑᓐ ᐁᑮᐃᑯᒡ, ᑮᔥᐱᓐ ᓴ ᐃᑭ ᐃᓂᓂᐗᒃ ᑳᐱ ᓈᓯᑲᐎᒀ ᑲᑴᒋᒥᒀ ᒋᐐᒌᐗᑣ, ᐱᓵᓐ ᓴ ᐸᓯᑸᓐ ᒋᐐᒌᐗᑣ; ᑫᐃᓂᓈᓐ ᐃᑕᔥ ᐁᑕ ᑭᑲ ᐃᔑᒋᑫ, ᐅᑮᐃᑰᓐ᙮ 21ᐁᐊᓂ ᐙᐸᓂᓂᒃ ᐃᑕᔥ ᐯᓬᐊᒻ ᑮᐗᓂᔥᑳ ᐁᑮ ᐅᓇᐱᓈᒡ ᐅᒫᔑ ᒥᑕᑎᒨᒪᓐ᙮ ᒦᔥ ᑳᐃᔑ ᒫᒌ ᐐᒌᐙᒡ ᐅᓃᑳᓂᓰᐞ ᒨᐗᑉ ᐊᑮᕽ ᐌᒌᓂᒡ᙮
ᐯᓬᐊᒻ ᑮᑲᓅᓂᑯᒡ ᐅᒫᔑᒥᑕᑎᒨᒪᓐ
22ᑭᔐᒪᓂᑑᓐ ᐅᑮ ᓂᔥᑭᐋᓐ ᐃᐃ ᐁᑮ ᒫᒋᓂᔕᐃᑫᒡ᙮ ᑳᑎᐯᒋᑫᓂᒡ ᐃᑕᔥ ᐅᑌᒐᓬᐃᒥᓂ ᑮᑭᐱᑳᐸᐎᐗᓐ ᒦᑲᓈᕽ ᐁᐐ ᓇᑳᔥᑳᑯᒡ᙮ ᐯᓬᐊᒻ Balaam ᑮᐱᒥᐗᓈᓱ ᐅᒫᔑᒥᑕᑎᒨᒥᕽ, ᓃᔑᓐ ᐃᑕᔥ ᐯᒦᑖᑯᒡ ᐅᑮ ᑕᑯ ᐐᒌᐙᐞ᙮ 23ᐊᐲ ᑕᔥ ᐊᐊ ᒫᔑᒥᑕᑎᒻ ᐁᐙᐸᒫᒡ ᐁᒐᓬᐊᓐ ᐁᑭᐱᑳᐸᐎᓂᒡ ᐙᐊᓂ ᐃᔖᒡ, ᐸᔑᐸᐃᑫᐎᑯᒫᓐ ᑲᔦ ᐁᑕᑯᓇᒥᓂᒡ, ᒦ ᓴ ᑳᐃᔑ ᐸᑫᒡ ᐁᔑ ᐸᔥᒀᓂᒃ ᐃᓇᑫ ᐁᑮ ᐃᔖᒡ᙮ ᒦᔥ ᐯᓬᐊᒻ ᑳᑮ ᐸᑭᑌᐙᒡ ᐅᒫᔑᒥᑕᑎᒨᒪᓐ, ᒦᑲᓈᕽ ᐁᑮ ᐃᔑᓂᔕᐙᒡ᙮ 24ᐃᓂ ᑕᔥ ᐁᒐᓬᐊᓐ ᑮᐃᔑ ᓃᐸᐎᐗᓐ ᐁᔑ ᐊᑳᓴᑌᒧᓂᓂᒃ ᒦᑲᓇ ᐁᔑᐊᔮᓂᑭᓐ ᑴᑴᒃ ᐁᔑ ᑭᑎᑳᓱᓂᒡ ᔔᒥᓇᐞ, ᑴᑴᒃ ᐃᑕᔥ ᑲᔦ ᑮᐊᔮᓴᒥ ᐊᔮᓂ᙮ 25ᐊᐲ ᑕᔥ ᐅᒫᔑᒥᑕᑎᒨᒪᓐ ᐁᐙᐸᒫᓂᒡ ᐃᓂ ᐁᒐᓬᐊᓐ, ᒦ ᓴ ᐃ ᐁᔑ ᐋᓴᒥᐊᔮᓂᒃ ᑳᐃᔑ ᐊᔑᒋᑖᓂᒡ᙮ ᒦᔥ ᐯᓬᐊᒻ ᑳᑮ ᒫᑯᓯᑌᔥᑳᑯᒡ ᐅᒫᔑᒥᑕᑎᒨᒪᓐ ᐋᓴᒪᔭᐄ᙮ ᒦᑕᔥ ᒦᓇᐙ ᑳᐃᔑ ᐸᐸᑭᑌᐙᒡ᙮ 26ᒦᓇᐙ ᐃᑕᔥ ᐃᓂ ᐁᒐᓬᐊᓐ ᑮᐊᓂ ᐃᔖᐗᓐ ᐋᒌᑫ ᐁᔑ ᐊᑳᓴᑌᔮᓂᒃ, ᑳᐐᓐ ᐃᑯᒋ ᑮᑕᐙᓯᓂᓂ ᒋᑴᑮᓈᓂᐗᓂᓂᕽ᙮ ᑴᑴᒃ ᐃᑕᔥ ᑮᐃᔑᐊᔮᓴᒥ ᐊᔮᓂ, ᑳᐐᓐ ᐃᑯᒋ ᒋᔑ ᐌᒫᔥᑳᕽ᙮ 27ᐊᐲ ᑕᔥ ᐅᒫᔑᒥᑕᑎᒨᒪᓐ ᐁᐙᐸᒫᓂᒡ ᑳᑎᐯᒋᑫᓂᒡ ᐅᑌᒐᓬᐃᒥᓂ, ᒦ ᓴ ᐃ ᑳᐃᔑ ᐅᔑᔑᓂᓂᒡ ᒣᒀ ᐯᓬᐊᒻ ᐁᐱᒥᐗᓈᓱᒡ᙮ ᐁᓂᔥᑭᐃᑯᒡ ᐃᑕᔥ, ᒦ ᐃ ᑳᐃᔑ ᐸᐸᑭᑌᐙᒡ ᒥᑎᒃ ᐁᑮ ᐋᐸᒋᑑᒡ᙮ 28ᒦᑕᔥ ᑳᑎᐯᒋᑫᓂᒡ ᑳᑮ ᐃᔑᐃᑯᓂᒡ ᐅᒫᔑᒥᑕᑎᒨᒪᓐ ᒋᑮᑭᑐᓂᒡ᙮ ᒦᑕᔥ ᐅᐅ ᑳᐃᑯᒡ, ᐋᓃᓐ ᐃᑕᔥ ᑳᑑᑕᐎᓈᓐ, ᐅᐅ ᐋᔕ ᓂᓯᕽ ᑳᐸᐸᑭᑌᐅᔭᓐ? ᐅᑮᐃᑰᓐ᙮
29ᒦᔥ ᐯᓬᐊᒻ ᑳᐃᓈᒡ ᐅᒫᔑᒥᑕᑎᒨᒪᓐ, ᐅᓵᒻ ᐋᓃᔥ ᑭᑲᑮᐹᓯᓈᑯᐃᔥ! ᑮᔥᐱᓐ ᓴ ᐸᔑᐸᐃᑫᐎᑯᒫᓐ ᐁᔮᔮᐹᓐ, ᐋᔕ ᑭᑖᑮ ᓂᓯᓐ, ᐅᑮᐃᓈᓐ᙮
30ᐅᐅ ᑕᔥ ᐅᑮᐃᑰᓐ, ᑳᐐᓐ ᐃᓇ ᓃᓐ ᐊᐊ ᐯᔑᑾᓐ ᑭᒫᔑᒥᑕᑎᒨᒻ ᒥᓂᒃ ᑳᐱ ᐱᒫᑎᓯᔭᓐ ᑳᐱᐱᒥᐗᓈᓂᓈᓐ? ᐐᑳ ᓇ ᐅᐅ ᑭᐱ ᑑᑕᐎᓐ ᐅᑖᓈᕽ? ᐅᑮᐃᑰᓐ᙮ ᑳᐐᓐ, ᐃᑕᔥ ᐅᑮᐃᓈᓐ᙮
31ᒦᑕᔥ ᐯᓬᐊᒻ ᑳᐃᔑ ᐃᔑᐃᑯᒡ ᑳᑎᐯᒋᑫᓂᒡ ᒋᐙᐱᒡ, ᒦᔥ ᑳᑮ ᐙᐸᒫᒡ ᑳᑎᐯᒋᑫᓂᒡ ᐅᑌᒐᓬᐃᒥᓂ ᐁᓃᐸᐎᓂᒡ ᒦᑲᓈᕽ ᐁᑕᑯᓇᒥᓂᒡ ᐸᔑᐸᐃᑫᐎᑯᒫᓐ᙮ ᒦᑕᔥ ᑳᐃᔑ ᐊᓂᒥᑯᑖᒡ ᒥᑕᑲᒥᒃ᙮ 32ᒦᑕᔥ ᑳᐃᑯᒡ ᐃᓂ ᐁᒐᓬᐊᓐ, ᐌᑯᓀᓂᓂ ᑕᔥ ᓃᔣ ᑳᐅᒋ ᐸᑭᑌᐗᒡ ᑭᒫᔑᒥᑕᑎᒨᒻ᙮ ᒦ ᐅᔕᐃ ᐌᒋ ᐲᔖᔮᓐ ᐁᐐ ᓇᑳᔥᑲᐎᓈᓐ, ᐋᓃᔥ ᑳᐐᓐ ᓭᓯᒃ ᑭᑎᔖᓰ ᐅᐅ ᑳᐱᒥ ᐊᔮᔭᓐ᙮ 33ᐊᐊ ᓴ ᒫᔑᒥᑕᑎᒻ ᓂᑮ ᐙᐸᒥᒃ, ᓂᓯᕽ ᐃᑕᔥ ᓂᑮ ᒦᑖᑴᓄᑖᒃ᙮ ᑮᔥᐱᓐ ᐃᑕᔥ ᐃᐃ ᐃᔑᒋᑫᓯᑭᐸᓐ, ᑫᒋᓈᒡ ᒫᐐᓐ ᐋᔕ ᓅᑯᒻ ᑭᑖᑮ ᓂᓯᓐ, ᑭᒫᔑᒥᑕᑎᒨᒻ ᐃᑕᔥ ᐐᓐ ᐱᓵᓐ ᓂᑖᑮ ᐸᑭᑎᓈ ᒋᐱᒫᑎᓯᐸᓐ, ᐅᑮᐃᑰᓐ᙮
34ᒦᔥ ᐅᐅ ᐯᓬᐊᒻ ᑳᐃᑭᑐᒡ, ᒦ ᓴ ᐃ ᑮᒪᒋᑑᑕᒫᓐ᙮ ᑳᐐᓐ ᓴ ᓂᑮ ᑭᑫᑕᓰᓐ ᐁᑮ ᑭᐱᑳᐸᐎᔭᓐ ᐙᐃᔖᔮᓐ ᒋᓇᑳᔥᑲᐎᔭᓐ᙮ ᑮᔥᐱᓐ ᐃᑕᔥ ᓅᑯᒻ ᒥᓍᐸᑕᓯᐗᓐ ᐅᐅ, ᐃᑕᐙ ᓴ ᓂᑲ ᑮᐌ, ᐅᑮᐃᓈᓐ᙮
35ᑳᑎᐯᒋᑫᓂᒡ ᐃᑕᔥ ᐅᑌᒐᓬᐃᒥᓂ ᐅᑮᐃᑰᓐ, ᒫᒑᓐ ᐱᓵᓐ ᐊᓂ ᐐᒋᐤ ᐃᑭ ᐃᓂᓂᐗᒃ, ᑫᐃᓂᓈᓐ ᐃᑕᔥ ᐁᑕ ᑭᑲᐃᑭᑦ, ᐅᑮᐃᑰᓐ᙮ ᒦᔥ ᐯᓬᐊᒻ ᑳᑮ ᐊᓂ ᐐᒌᐙᒡ ᐅᓃᑳᓂᓰᐞ ᐯᓬᐊᑰᓐ ᑳᑮ ᐲᒋᓂᔕᐙᓂᒡ᙮
ᐯᓬᐊᒻ ᑮᓇᑭᔥᑲᐙᒡ ᐯᓬᐊᑰᓐ
36ᐯᓬᐊᑰᓐ Balak ᐃᑕᔥ ᐁᓅᑕᒥᓂᒡ ᐯᓬᐊᒻ Balaam ᐁᐱ ᑕᑯᔑᕽ, ᐅᑮ ᐱᐊᑕ ᓇᑭᔥᑳᑰᓐ ᐃᐃᒫ ᐁᔑᐊᔮᓂᒃ ᒨᐗᑉ ᐆᑌᓇ᙮ ᒦ ᓴ ᐃᐃᒫ ᑳᑮ ᐊᑯᓭᓂᒃ ᐁᕒᓇᓐ Arnon ᑎᐸᐊᑳᓐ, ᐁᑯ ᐙᑳᓭᓂᒃ ᐃᐃ ᐊᑮᓂ᙮ 37ᒦᔥ ᐅᐅ ᑳᐃᑯᒡ ᐯᓬᐊᑰᓐ, ᑳᐐᓐ ᐃᓇ ᑭᒋ ᐌᐌᓂ ᑭᑖᓇᑮ ᐊᑐᒥᓯᓅᓐ? ᐌᑯᓀᓐ ᐃᑕᔥ ᑳᐅᒋ ᐲᔖᓯᐗᓐ᙮ ᑳᐐᓐ ᐃᓇ ᓂᑖ ᑲᔥᑭᑑᓰᓐ ᒋᑎᐸᐊᒪᐎᓈᓐ, ᐅᑮᐃᑰᓐ᙮ 38ᒦᑕᔥ ᐅᐅ ᐯᓬᐊᒻ ᑳᐃᔑ ᓇᑴᑕᕽ, ᐃᓇᔥᑫ ᓴ ᓂᑮ ᐲᔖ! ᐙᐃᑭᑐᔮᓐ ᐃᑕᔥ ᐃᑯ ᓇ ᓂᑲᐃᑭᑦ? ᑭᔐᒪᓂᑑ ᓴ ᐁᑕ ᑯ ᑳᔑ ᒦᔑᒡ ᓂᑑᓂᕽ ᓂᑲ ᐃᑭᑐᐙᓐ, ᐅᑮᐃᓈᓐ᙮ 39ᐅᑮ ᐃᔑ ᐐᒌᐙᓐ ᐃᓴ ᑕᔥ ᐯᓬᐊᑰᓐ ᐌᑎ ᐆᑌᓈᕽ ᑭᕒᐃᐊᑦ ᐃᔫᓴᑦ Kiriath Huzoth ᐁᒋᑳᑌᓂᒃ᙮ 40ᒦᑕᔥ ᐃᐃᒫ ᐯᓬᐊᑰᓐ ᑳᑮ ᐃᔑ ᐸᑭᑎᓈᔂᑫᓂᒡ ᐱᔑᑭᐗᐞ, ᒫᓇᒑᓂᔕᐞ ᑲᔦ᙮ ᒦᔥ ᐯᓬᐊᒻ ᑳᐃᔑ ᐊᔕᒥᑯᒡ, ᐅᑮ ᐊᔕᒫᓂ ᑲᔦ ᑳᓃᑳᓂᓯᓂᒡ ᑳᑮ ᐐᒌᐎᑯᒡ᙮
ᐯᓬᐊᒻ ᓂᑕᒻ ᑳᑮᐃᑭᑐᒡ
41ᐁᐊᓂ ᐙᐸᓂᓂᒃ ᐃᑕᔥ ᐯᓬᐊᑰᓐ Balak ᐅᑮ ᐃᔑᐎᓂᑰᓐ ᐌᑎ ᑳᑕᔑ ᓂᑖ ᐊᓇᒥᐁᑕᐎᒥᓐᒡ ᒪᓂᑑᑳᓇᓐ ᐯᔭᓬ Bamoth Baal ᑳᐃᔑᓂᑳᒋᑲᓂᐎᓂᒡ, ᒦᑕᔥ ᑳᐃᔑ ᐙᐸᒫᒡ ᐋᓂᑕ ᐁᑕᔑᓂᒡ ᐃᔅᕒᐃᔭᓬᐊᐞ᙮
Currently Selected:
ᐊᑭᑖᓱᓇᓐ 22: OJBS
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Syllabic Script) © 2008 Canadian Bible Society
