ᒫᑎᔪ 18

ᐊᐌᓀᓐ ᐊᐊ ᑳᑭᒋ ᐃᓀᑖᑯᓯᒡ

(Mark 9.33-37; Luke 9.46-48)

1 # Luke 22.14. ᒦᐃ ᑕᔥ ᐊᐲ ᑭᑭᓄᐊᒪᐙᑲᓇᒃ ᐅᑮᓈᓯᑲᐙᐙᓐ ᒋᓴᓲᓐ ᐁᑮ ᑲᑴᒋᒫᐙᒡ: ᐊᐌᓀᓐ ᒫᐗᒡ ᑫᑭᒋ ᐃᓀᑖᑯᓯᒡ ᐃᐃᒫ ᑭᔐᒪᓂᑑ ᐅᑎᐯᒋᑫᐎᓂᕽ?

2ᒋᓴᔅ ᑕᔥ ᐅᑮᐊᑐᒫᓐ ᐊᐱᓅᒌᔕᓐ, ᐁᑮᓃᐸᐎᐋᒡ ᐁᓈᓴᒥᑳᐸᐎᓂᒡ, 3#Mark 10.15; Luke 18.17. ᐁᑮᐃᓈᒡ: ᑌᐺ ᑭᑎᓂᓂᓂᒻ, ᑮᔥᐱᓐ ᑴᑳᑎᓯᓯᐌᒃ, ᐃᔑ ᐊᔮᓯᐌᒃ ᑲᔦ ᑳᐃᔑ ᐊᔮᐙᒡ ᐊᐱᓅᒌᔕᒃ, ᑳᐐᓐ ᐐᑳ ᑭᑲᐅᒋ ᑎᐯᑖᑯᓯᓰᒻ ᑭᔐᒪᓂᑑ ᐅᑎᐯᒋᑫᐎᓂᕽ᙮ 4ᐊᐊ ᓴ ᑳᑕᐸᓭᓂᒧᐃᑎᓱᒡ ᑖᐱᔥᑰ ᐗᐊ ᐊᐱᓅᒌᔥ ᑳᔑ ᑕᐸᓭᓂᒧᒡ, ᒦᓴ ᐊᐊ ᒫᐗᒡ ᑳᑭᒋ ᐃᓀᑖᑯᓯᒡ ᐃᐃᒫ ᑭᔐᒪᓂᑑ ᐅᑎᐯᒋᑫᐎᓂᕽ᙮ 5ᐊᐌᓀᓐ ᐃᓴ ᑳᐅᑖᐱᓈᒡ ᐅᓄ ᑎᓄ ᐊᐱᓅᒌᔕᓐ ᓂᑎᔑᓂᑳᓱᐎᓂᕽ, ᓃᓐ ᐅᔕ ᑳᐅᑖᐱᓂᒡ᙮

ᐁᑯᒋᐃᓐᒡ ᐊᐎᔭ ᒋᒪᒋᑑᑕᕽ

(Mark 9.42-48; Luke 17.1-2)

6ᐊᐎᔭ ᓴ ᑳᐗᓂᔥᑴᐋᒡ ᐯᔑᒃ ᐅᓄ ᑳᐊᑳᔒᔑᓂᒡ ᑳᑌᐺᔦᓂᒥᓂᒡ ᒋᐴᓂᒋᑫᓂᒡ, ᓇᐗᒡ ᑖᐅᓂᔑᔑᓂᓂ ᑳᒥᒑᐱᑭᓯᓂᒡ ᐲᓯᐴᒋᑲᓇᓯᓃᓐ ᒋᑕᑯ ᐱᒋᑲᓂᐎᓂᐸᓐ ᐅᑴᑲᓂᕽ ᒋᓂᓵᐹᐗᒋᑲᓂᐎᐸᓐ ᐃᐃᒫ ᑳᔑ ᑮᔥᑳᔭᐙᓂᒃ ᑭᒋᑲᒦᕽ, ᐊᐲᒡ ᐐᓐ ᒋᐸᑭᔑᒫᐸᓐ ᐃᓂ ᑳᑌᐺᔦᓂᒥᓂᒡ᙮ 7ᑰᐹᓯᓈᑾᓐ ᐃᓴ ᐅᐅᒫ ᐊᑮᕽ, ᐁᐊᔮᑭᓐ ᐃᓂ ᑳᐅᒋ ᒪᒋᑑᑕᒥᕽ! ᐃᔑᓈᑾᓐ ᑲᔦ ᐅᒋᑕ ᐱᑯ ᒋᑕᑯᔑᓅᒪᑲᑭᓐ᙮ ᐋᐱᒋ ᑕᔥ ᑕᑰᐹᓯᓈᑯᓯ ᐊᐊ ᐊᐎᔭ ᐐᓐ ᑳᐅᒋ ᐅᑎᔑᐌᒪᑲᓂᓂᑭᓐ᙮

8 # Mat 5.30. ᑮᔥᐱᓐ ᑭᓂᒌᕽ ᑯᒫ ᑲᔦ ᑭᓯᑎᕽ ᐅᒋ ᒪᒋᑑᑕᒪᓐ, ᒦᓴ ᐃᔑ ᑮᔥᑭᔕᓐ, ᐌᐱᓇᓐ ᑲᔦ᙮ ᓇᐗᒡ ᑖᐅᓂᔑᔑᓐ ᒋᐲᑎᑫᔥᑳᔭᐸᓐ ᐃᐃᒫ ᐱᒫᑎᓯᐎᓂᕽ ᒋᑮᔥᑭᓂᒌᔭᓐ, ᒋᑮᔥᑭᓯᑌᔭᓐ ᑲᔦ, ᐊᐲᒡ ᐐᓐ ᒋᑭᑭ ᒪᒍᑌᐌᐱᓂᑰᔭᓐ ᐃᐃ ᑭᓂᓐᒡ ᑯᒫ ᑲᔦ ᑭᓯᑦ ᐃᐃᒫ ᒪᒋ ᐃᔥᑯᑌᕽ ᐐᑳ ᑫᐋᑕᐌᓯᓄᒃ᙮ 9#Mat 5.29. ᑮᔥᐱᓐ ᑲᔦ ᑭᔥᑮᔑᑯᕽ ᐅᒋᒪᒋᑑᑕᒪᓐ ᐅᑖᐱᓇᓐ, ᐃᑯᒋ ᑲᔦ ᐊᐸᑭᑑᓐ᙮ ᓇᐗᒡ ᑖᐅᓂᔑᔑᓐ ᒋᐲᑎᑫᔥᑳᔭᐸᓐ ᐃᐃᒫ ᐱᒫᑎᓯᐎᓂᕽ ᒋᒥᒋᐯᔑᑯᔥᑮᔑᑴᔭᓐ, ᐊᐲᒡ ᐐᓐ ᒋᑭᑭ ᒪᒍᑌᐌᐱᓂᑰᔭᓐ ᐃᓂ ᒥᒋᓃᔥ ᑭᔥᑮᔑᑰᓐ ᐃᐃᒫ ᒪᒋ ᐃᔥᑯᑌᕽ ᑳᓀᐱᒋ ᐱᔅᑲᓀᓂᒃ᙮

ᐁᐋᐌᒋᑳᑳᓂᐎᒡ ᐊᐊ ᑳᑮᐗᓂᔑᕽ ᒫᓇᒑᓂᔐᔅ

(Luke 15.3-7)

10ᐊᔮᒀᒥᓯᒃ ᐃᑕᔥ ᒋᑕᐸᓭᓂᒫᓯᐌᒃ ᐗᐊ ᐯᔑᒃ ᐅᑯ ᑎᓄ ᑳᐊᑳᔒᔑᐙᒡ᙮ ᑭᑎᔑᐐᑕᒪᐎᓂᓂᒻ ᐃᑕᔥ, ᐅᑌᒐᓬᐃᒥᐙᐞ ᒨᔕᒃ ᐌᑎ ᐊᔮᐗᐞ ᑳᔑ ᐊᔮᓂᒡ ᓂᑌᑌᓐ ᑭᒋᑮᔑᑯᕽ᙮ 11#Luke 19.10. [ᐃᓂᓂ ᐅᑯᓯᓴᓐ ᑮᐲᔖᐗᓐ ᒋᐱ ᒫᒋᐋᓂᒡ ᐃᐃ ᑳᐗᓂᔑᓂᓂᒡ᙮]#18.11 ᐅᐅᐌ ᑳᐃᔑ ᑭᑭᓇᐙᒋᐲᐃᑳᑌᒃ [ ] 11 ᐅᔑᐲᐃᑲᓀᔅ, ᑳᐐᓐ ᑮᑕᑯᐲᐃᑳᑌᓯᓅᓐ ᐋᓂᑕ ᑫᑌᐅᔑᐲᐃᑫᐎᓂᕽ᙮

12ᐋᓃᓐ ᐁᓀᑕᒣᒃ? ᑮᔥᐱᓐ ᐃᓂᓂ ᐊᔮᐙᒡ ᓂᑯᑣᒃ 100 ᒫᓇᒑᓂᔕᐞ, ᐯᔑᒃ ᑕᔥ ᐗᓂᔑᓂᓂᒡ, ᐋᓃᓐ ᑫᐃᔑᒋᑫᐸᓐ? ᐅᑖᓇᑲᓈᐞ ᒫᐐᓐ ᐃᐃ ᔖᑲᓯᒥᑕᓇᔑᔖᑲᓱ 99 ᒫᓇᒑᓂᔕᐞ ᐃᐃᒫ ᐋᓴᒪᑎᓈᕽ ᒋᐊᑐᓀᐙᐸᓐ ᐃᓂ ᐯᔑᒃ ᑳᐗᓂᔑᓂᓂᒡ᙮ 13ᑭᐐᑕᒪᐎᓂᓂᒻ ᐃᑕᔥ ᐊᐲ ᒥᑲᐙᒡ, ᓇᐗᒡ ᐃᓂ ᑕᐅᒋ ᒌᑫᑕᒻ ᐊᐲᒡ ᐐᓐ ᐃᐃ ᔖᑲᓯᒥᑕᓇᔑᔖᑲᓱ ᑳᑮᐗᓂᔑᓯᓂᒃ᙮ 14ᒦᑕᔥ ᐯᔑᑾᓐ ᑭᑌᑌᐙ ᑭᒋᑮᔑᑯᕽ ᑳᐊᔮᒡ ᑳᐐᓐ ᐅᓇᑕᐌᓂᒫᓰᐞ ᐅᐅ ᑳᐊᑳᔒᔑᓂᒡ ᒋᐗᓂᔑᓂᓂᒡ᙮

ᑮᑕᓇᒥᐋ ᑳᒪᒋᑑᑕᐎᒃ

15 # Luke 17.3. ᑮᔥᐱᓐ ᑮᑕᓇᒥᐋ ᒪᒋᑑᑕᐎᒃ, ᓈᓯᑲᐤ ᒋᐙᐸᑕᐊᒡ ᐋᓃᓐ ᑳᑮᐃᔑ ᒪᒋᑑᑕᐎᒃ, ᑮᒨᒡ ᐃᑕᔥ ᑮᓀᑕᐙ ᒋᑲᑲᓅᓂᑎᔦᒃ᙮ ᑮᔥᐱᓐ ᑕᔥ ᐱᓯᑕᐎᒃ, ᒦᓴ ᐃ ᑮᑲᔥᑭᐊᒡ ᒦᓇᐙ ᒋᒥᓄ ᐐᒌᐎᒃ᙮ 16#Deut 19.15. ᑮᔥᐱᓐ ᑕᔥ ᐱᓯᑕᐎᓯᓄᒃ, ᐯᔑᒃ ᒫᒌᔥ ᑯᒫ ᑲᔦ ᑯᑕᒃ ᓃᔑᓐ ᒋᐊᑕᐙᐸᒣᒃ, ᐋᓃᔥ ᐃᔑᐲᐃᑳᑌ ᑭᒋᒪᓯᓇᐃᑲᓂᕽ, ᑮᔥᐱᓐ ᓃᔑᐙᒡ ᑯᒫ ᑲᔦ ᓂᓯᐙᒡ ᐊᐎᔭᒃ, ᐅᑎᑭᑐᐎᓂᐙ ᓴ ᑕᒥᒋᒣᒋᑳᑌᓂ᙮ 17ᑮᔥᐱᓐ ᑕᔥ ᐱᓯᑕᐙᓯᒃ, ᑎᐹᑐᑕᒧᐙᒃ ᑕᔥ ᐅᐅ ᐃᐃᒫ ᐅᑌᐺᑕᒨᒃ ᑳᐃᔑ ᒫᐗᒋᐃᑎᐙᒡ᙮ ᑮᔥᐱᓐ ᑕᔥ ᑫᔮᐱ ᐱᓯᑕᓯᒃ, ᑖᐱᔥᑰ ᓴ ᐊᐎᔭ ᑳᑭᑫᓂᒫᓯᒃ ᑭᔐᒪᓂᑑᓐ ᑯᒫ ᑲᔦ ᑳᒫᐗᑑᓈᒡ ᑖᑭᔅ ᔔᓂᔮᓐ ᑭᑲ ᐃᓇᑭᒫᐙ᙮

ᑫᑰᓐ ᑭᐱᑎᓇᒣᒃ ᑯᒫ ᑲᔦ ᐸᑭᑎᓇᒣᒃ

18 # Mat 16.19; John 20.23. ᐅᐅᐌ ᓴ ᑌᐺ ᑭᐐᑕᒪᐎᓂᓂᒻ: ᐌᑯᓀᓐ ᑫᑭᐱᑎᓇᒣᒃ ᐅᐅᒫ ᐊᑮᕽ ᑕᑭᐱᑎᓂᑳᑌ ᑭᒋᑮᔑᑯᕽ᙮ ᐌᑯᓀᓐ ᑲᔦ ᑫᐸᑭᑎᓇᒣᒃ ᐅᐅᒫ ᐊᑮᕽ, ᑕᐸᑭᑎᓂᑳᑌ ᑭᒋᑮᔑᑯᕽ᙮

19ᑫᔮᐱ ᑕᔥ ᑭᑎᓂᓂᓂᒻ: ᑮᔥᐱᓐ ᓃᔑᔦᒃ ᑫᑰᓐ ᐯᔑᑾᓐ ᐃᓀᑕᒣᒃ ᐁᐐ ᐊᓇᒥᐋᔦᒃ, ᓂᑌᑌ ᑭᒋᑮᔑᑯᕽ ᑳᐋᔮᒡ ᐅᑲ ᑑᑖᓐ ᑳᐃᔑ ᒥᓴᐌᑕᒣᒃ᙮ 20ᐋᑎ ᐱᑯ ᓃᔑᓐ ᑯᒫ ᑲᔦ ᓂᓯᓐ ᐁᔑ ᒫᐗᒋᐃᑎᐙᒡ ᓂᑎᔑᓂᑳᓱᐎᓂᕽ, ᒦᐃᒫ ᑫᓃᓐ ᐁᔮᐗᒃ ᐁᔑ ᐊᔮᐙᒡ᙮

ᐁᐋᐌᒋᑳᑳᓂᐎᒡ ᐊᐊ ᑳᑮ ᐴᓀᑕᒫᑫᓯᒃ

21 # Luke 17.3-4. ᐅᑮ ᐱᓈᓯᑳᑰᓐ ᑕᔥ ᐲᑕᕒᐆᓐ Peter ᐁᑮᐃᑯᒡ: ᐋᓃᓐ ᑕᔂ ᑫᐴᓀᑕᒪᐗᒃ ᓃᒋᑭᐌ ᑮᔥᐱᓐ ᒪᒋᑑᑕᐎᒡ? ᓃᔣᒋᕽ ᐃᓇ?

22ᒋᓴᔅ ᑕᔥ ᐅᑮᐃᓈᓐ: ᑳᐐᓐ ᐐᓐ ᓃᔣᒋᕽ ᐁᑕ, ᓃᔣᓯᒥᑕᓇ ᑕᓯᕽ ᓃᔣᒋᕽ ᐅᔕ᙮ 23ᒦᑕᔥ ᐅᐅ ᐁᔑᓈᑾᓂᓂᒃ ᑭᔐᒪᓂᑑ ᐅᑎᐯᒋᑫᐎᓐ, ᑖᐱᔥᑰ ᑭᒋᐅᑭᒫ ᐁᐐ ᓴᑲᑲᑭᑕᕽ ᐅᑕᓄᑮᐎᓂᓂ ᐃᐃ ᐅᑕᓄᑮᐋᑲᓇᐞ᙮ 24ᐋᔕ ᑕᔥ ᐁᑮᒫᒌ ᓴᑲᑲᑭᒋᑫᒡ, ᑮᐲᑕᒪᐙ ᓴ ᐯᔑᒃ ᐃᓂ ᑳᑮ ᑲᔦᔑᒥᑯᒡ ᒫᐗᒡ ᐃᑯ ᓃᐳᐗᐞ ᑕᔂᐱᒃ ᔔᓂᔮᓐ᙮ 25ᐁᑮᐊᔮᐙᓯᓂᒃ ᑕᔥ ᐃᓂ ᔔᓂᔮᓐ ᒋᑎᐸᐊᒫᑯᒡ, ᑭᒋᐅᑭᒫ ᑕᔥ ᑮᐃᑭᑐ ᒋᐊᑖᐙᑳᓂᐎᓂᒡ ᐃᓂ ᐅᑕᓄᑮᐋᑲᓇᓐ, ᔑᑾ ᐅᐐᑎᑫᒫᑲᓂᓂ, ᔑᑾ ᐅᓃᒑᓂᓯᓂ, ᑲᑭᓇ ᑫᑰᓂᓂ ᑲᔦ ᑳᑮ ᑎᐯᑕᒥᓂᒡ, ᒦᓴ ᐃᒫ ᒋᐅᒋ ᑎᐸᐊᒥᓂᒡ ᑳᑮ ᑲᔦᔑᒥᑯᒡ᙮ 26ᐊᐊ ᑕᔥ ᐊᓄᑮᐋᑲᓐ ᑮᐅᒋᒌᑾᓂᐸᓂᐅ ᐁᓈᓴᒪᐱᓂᒡ ᐃᓂ ᐅᑑᑭᒫᒪᓐ ᐁᑮᐃᓈᒡ: ᑕᑲ ᔕᔒᐯᓂᒥᔑᓐ, ᑭᑲ ᑎᐸᐊᒪᐎᓐ ᐃᓴ ᑲᑭᓇ ᑫᑰᓐ ᑳᒪᓯᓇᐊᒪᐎᓈᓐ! 27ᑭᒋᐅᑭᒫ ᑕᔥ ᐅᑮ ᑯᐹᑌᓂᒫᓐ, ᒦᑕᔥ ᑳᐃᔑ ᐸᑭᑎᓈᒡ, ᐁᑮ ᐴᓀᑕᒪᐙᒡ ᑲᔦ ᐃᐃᐌᓂ ᑳᑮᒪᓯᓇᐊᒫᑯᒡ᙮

28ᒦᑕᔥ ᑳᐃᔑ ᒫᒑᒡ ᐊᐊ ᐊᓄᑮᐋᑲᓐ ᐁᑮᓇᑭᔥᑲᐙᒡ ᐃᓂ ᐅᐐᑕᓄᑮᒫᑲᓇᓐ ᑳᑮᒪᓯᓇᐊᒫᑯᒡ ᐸᑮ ᐁᑕ ᑕᔂᐱᒃ᙮ ᒦᑕᔥ ᑳᐃᔑ ᓴᑳᑭᑲᓀᓈᒡ ᐁᑮ ᑭᐱᓀᐌᓈᒡ ᐁᑮᐃᓈᒡ ᑲᔦ: ᑎᐸᐊᒪᐎᔑᓐ ᑲᑭᓇ ᑳᒪᓯᓇᐊᒪᐎᔭᓐ! 29ᐅᐐᑕᓄᑮᒫᑲᓇᓐ ᑕᔥ ᑮᐅᒋᒌᑾᓇᐱᐸᓂᐅᐗᓐ ᐁᑮᐃᑯᒡ: ᔒᐱᐲᐃᔑᓐ ᑭᑲ ᑮᐌᑎᐸᐊᒪᐎᓐ ᐃᓴ᙮ 30ᑳᐐᓐ ᑕᔥ ᑮᐃᓀᑕᓰ᙮ ᒦᑕᔥ ᑳᐃᔑ ᐊᓅᑮᒡ ᒋᐲᑎᑫᑰᑯᐌᐱᓂᒥᓐᒡ ᐃᐃᒫ ᑭᐹᑾᐅᑏᐎᑲᒥᑯᕽ, ᐹᒫ ᓴ ᑎᐸᐃᑫᓂᒡ ᒋᐴᓂ ᑭᐸᐅᒥᓐᒡ᙮ 31ᐃᑭ ᑕᔥ ᑯᑕᒃ ᐊᓄᑮᐋᑲᓇᒃ ᐁᑮᐙᐸᑫᐙᒡ ᐋᓃᓐ ᐁᓇᑲᒥᑲᓂᓂᒃ, ᐐᑫ ᑮᒫᓀᑕᒨᒃ᙮ ᒦᑕᔥ ᑳᐃᔑ ᐐᑕᒪᐙᐙᒡ ᐃᓂ ᑭᒋᐅᑭᒫᓐ ᑲᑭᓇ ᑫᑰᓂᓂ ᑳᑮᐙᐸᑕᒧᐙᒡ᙮ 32ᑭᒋᐅᑭᒫ ᑕᔥ ᐅᑮᐊᑐᒫᓐ ᐃᓂ ᐅᑕᓄᑮᐋᑲᓇᓐ ᐁᑮᐃᓈᒡ: ᐁᑕᑕᐌ ᐊᓅᒋᑯ ᐊᓄᑮᐋᑲᓐ ᑭᑎᓄᐤ! ᑭᑮ ᐴᓀᑕᒪᐎᓐ ᓴ ᒥᓂᒃ ᑳᑮ ᑲᔦᔑᒥᔭᓐ, ᐋᓃᔥ ᑭᑮ ᑲᑴᒋᒻ᙮ 33ᒦᑕᔥ ᐯᔑᑾᓐ ᑫᑮᐃᔑ ᑰᐹᑌᓂᒪᑎᐸᓐ ᐊᐊ ᑭᐐᑕᓄᑮᒫᑲᓐ ᑖᐱᔥᑰ ᑳᑮᐃᔑ ᑰᐹᑌᓂᒥᓈᓐ᙮ 34ᐐᑫ ᑕᔥ ᑮᓂᔥᑳᑎᓯ ᐊᐊ ᑭᒋᐅᑭᒫ᙮ ᒦᑕᔥ ᑳᐃᓈᑯᓂᑫᒡ ᒋᑭᐸᐅᒥᓐᒡ ᐃᓂ ᒪᒋᐊᓄᑮᐋᑲᓇᓐ, ᒋᑲᒀᑕᑭᐃᒥᓐᒡ ᐹᓂᒫ ᓴ ᑮᒥᓯᐌ ᑎᐸᐊᒪᐎᓐᒡ ᒥᓂᒃ ᑳᑮ ᑲᔦᔑᒥᑎᐸᓐ᙮

35ᒦᓴ ᐯᔑᑾᓐ ᑳᑕᔑᔦᒃ ᑫᑑᑕᐎᓀᒃ ᓂᑌᑌ ᑭᒋᑮᔑᑯᕽ ᑳᐊᔮᒡ ᑮᔥᐱᓐ ᐊᐎᔭ ᐅᑌᐃᕽ ᑌᐺ ᐅᒋ ᐴᓀᑕᒪᐙᓯᒃ ᐃᓂ ᐐᑕᓇᒥᐋᓐ᙮

Currently Selected:

ᒫᑎᔪ 18: OJBS

Highlight

Copy