ᐋᐸᑲᒃ 3
3
ᐋᐸᑲᒃ ᑳᑮᐃᔑᐊᓇᒥᐁᑕᐙᒡ ᑭᔐᒪᓂᑑᓐ
1ᒦ ᓴ ᐅᐅᐌᓂ ᐋᐸᑲᒃ Habakkuk ᑳᑲᓅᑕᒪᐙᒡ ᑭᔐᒪᓂᑑᓐ ᑮᒥᒋ ᐃᓇᐊᒻ ᑳᑮ ᐃᔑ ᐊᓇᒥᐋᑯᐸᓀᓐ᙮
2ᑮᓐ ᑌᐯᒋᑫᔭᓐ, ᓂᑮ ᓅᑖᓐ ᓴ ᐋᓃᓐ ᑳᑮ ᐲᔑ ᑭᒋ ᐃᔑᒋᑫᔭᓐ,
ᐐᑫ ᑕᔥ ᓂᒫᒪᑳᑌᑕᒻ!
ᑕᑲ ᓴ ᒦᓇᐙ ᓅᑯᒻ ᐅᐅ ᐃᔑ ᐊᐲ ᐃᔑᒋᑫᓐ ᑳᑮ ᓂᑖ ᐃᔑᒋᑫᔭᐸᓐ᙮
ᑰᐹᑌᓂᒥᐌᓐ ᒥᓴᐙ ᑯ ᒫᓈᐸᑕᒪᓐ᙮
3ᑭᔐᒪᓂᑑ ᑳᑭᑌᑖᑯᓯᒡ ᑏᒪᓂᕽ ᐊᑮᕽ ᐃᓇᑫ,
ᐯᕒᐊᓐ ᐗᒌᕽ ᑲᔦ ᑕᐱᐅᒋ ᓈᑯᓯ᙮
ᐅᑭᒋ ᐃᓀᑖᑯᓯᐎᓐ ᓴ ᐐᑫ ᒥᓯᐌ ᓈᑾᓂᓂ ᐃᔥᐱᒥᕽ ᑮᔑᑯᕽ᙮
ᐅᒦᑴᒋᐌᑖᑯᓯᐎᓐ ᑲᔦ ᒥᓯᐌ ᐊᑮᕽ ᒨᔥᑭᓀᔦᑖᑾᓂᓂ᙮
4ᐅᐙᓭᓈᑯᓯᐎᓐ ᓴ ᒦ ᐃ ᐁᔑᓈᑾᓂᓂᒃ ᑖᐱᔥᑰ ᑳᐙᑌᓭᒃ;
ᐅᓂᒌᕽ ᐁᐅᒋ ᓵᑳᑌᓂᒃ᙮
ᒦᐞ ᐄᑐᒃ ᐃᐃᒫ ᐅᒪᔥᑲᐎᓰᐎᓐ ᐁᔑ ᑳᒋ ᐊᔮᓂᒃ᙮
5ᐋᑯᓯᐎᓐ ᑳᓂᔑᐌᒪᑲᒃ ᐅᓃᑳᓂᓂᔕᐋᓐ,
ᑲᒀᑕᑭ ᐃᔑᐌᐱᓯᐎᓐ ᑕᔥ ᐯᔓ ᐅᑑᑖᓈᒥᕽ ᐱᒥ ᐊᔮᓂ᙮
6ᐃᓇᔥᑫ ᑮᑭᐱᒌᑳᐸᐎᒡ ᒦ ᐃ ᐁᔑ ᑯᔥᑯᓭᓂᒃ ᐊᑭ,
ᑮᐃᓈᐱᒡ ᑲᔦ ᒦ ᐃ ᐁᔑ ᓂᓂᑳᓂᒥᓯᓂᒡ ᑳᐯᐸᑳᓉᐙᓇᑭᓯᓂᒡ ᐯᒫᑎᓯᓂᒡ᙮
ᒦᔥ ᐃᓂ ᑭᒋ ᐗᒌᓐ ᐋᓇ ᑯ ᑫᑌᔭᐄᐗᑭᓐ ᑕᐱᑭᔥᑭᓭᓂᐗᓐ,
ᐃᓂᔥ ᑲᔦ ᑫᑌ ᐱᑾᑎᓈᓐ ᑕᓂ ᐅᒋᔥᑳᓂᐗᓐ᙮
ᔑᒀᔥ ᐐᓐ ᑭᔐᒪᓂᑑ ᐅᑎᔑᑣᐎᓐ ᑳᐐᓐ ᐐᑳ ᑕᐴᓂ ᐊᔮᓯᓂᓂ!
7ᓂᑮ ᐙᐸᒫᒃ ᓴ ᐃᑭ ᐯᒫᑎᓯᐙᒡ
ᑯᔕᓐ ᑳᐅᑕᑳᓀᓯᐙᒡ ᐁᓭᑭᓯᐙᒡ,
ᐃᑭ ᑲᔦ ᐯᒫᑎᓯᐙᒡ
ᒥᑎᔭᓐ ᐁᓂᓂᑭᔥᑳᐙᒡ᙮
8ᑌᐯᒋᑫᔭᓐ, ᑭᒋᑲᒦᓐ, ᓰᐲᓐ ᐃᓇ ᑲᔦ ᑳᑮ ᓂᔥᑭᐃᑯᔭᓐ?
ᑭᒋᑲᒦᓐ ᐃᓇ ᑳᑮ ᑭᒋ ᓂᔥᑭᐃᑯᔭᓐ?
ᐗᑶ ᑳᑮ ᐱᒥᐎᓂᑯᔭᓐ ᑖᐱᔥᑰ ᑭᒥᑕᑎᒨᒦᕽ ᑳᐱᒥᐗᓈᓱᔭᓐ
ᐃᐃᒫ ᑲᔦ ᑭᒦᑳᓱᐎ ᐅᑖᐹᓈᑯᕽ ᑮᐱᒥ ᐊᔮᔭᓐ ᑮᔖᑰᒋᑣᔮᓐ᙮
9ᒦᔥ ᑳᑮ ᐁᐯᒦᓇᒡ ᑭᒥᑎᒀᐲᒻ, ᐁᐊᔓ ᐱᒧᒋᑳᑫᔭᓐ ᑭᐱᑾᑰᓐ᙮
ᑳᒨᔥᑲᐊᑭᓐ ᓰᐲᓐ ᓴ ᑭᑖᐸᒋᑑᓇᓐ ᐁᓀᓈᐎᓇᒪᓐ ᐊᑭ᙮
10ᑭᒋ ᐗᒌᓐ ᓴ ᐁᐙᐸᒥᑯᔭᓐ, ᒦ ᐃ ᑳᐃᔑ ᓂᓂᑭᔥᑳᑭᓐ,
ᐃᔥᐱᒥᕽ ᒥᓯᐌ ᑮᐅᒋ ᓰᑭᓂᑳᑌ ᓂᐱ᙮
ᐃᐃᔥ ᓂᐱ ᑳᔑ ᑭᔥᑳᔭᐙᒃ ᐐᑫ ᑮᑭᒋ ᐃᓂᑖᑾᓐ,
ᐐᑫ ᐁᑮ ᑭᒋ ᐊᔨᔥᐹᔥᑳᒃ᙮
11ᑳᐊᐲᒋ ᑭᔒᓭᑭᓐ ᑕᔥ ᐃᐃ ᑭᐱᑾᑰᓐ,
ᐁᑮ ᓵᑳᑌᔮᐱᑭᔥᑳᒃ ᑲᔦ ᐃᐃ ᑭᒌᐳᐌᐱᓂᑲᓐ,
ᒦ ᐃ ᑮᓯᔅ, ᑎᐱᑭᑮᓯᔅ ᑲᔦ ᑮᑯᔥᒀᐙᑕᑰᒋᓄᐙᒡ᙮
12ᐁᓂᔥᑳᑎᓯᔭᓐ ᓴ ᒥᓯᐌ ᐊᑮᕽ ᑭᑮ ᐸᐹ ᐃᔖ,
ᐁᓂᔥᑭᐃᒀ ᑕᔥ ᑯᑕᒃ ᐃᑭ ᑳᐯᐸᑳᓉᐙᓇᑭᓯᐙᒡ
ᑳᑮ ᐅᒋ ᑕᑕᑯᑳᓇᑣ᙮
13ᒦᑕᔥ ᑳᑮ ᐅᒋ ᐱᔖᔭᓐ ᐁᐐ ᓈᑕᒪᐗᑣ ᑭᐱᒫᑎᓰᒪᒃ,
ᐁᐐ ᐱᒫᒋᐊᒡ ᑳᑮ ᐅᓈᐸᒪᒡ ᑭᒋᐅᑭᒫ᙮
ᑭᑮ ᔖᑰᒋᐋ ᓴ ᐊᐊ ᑳᓃᑳᓃᑕᒪᐙᒡ ᒣᒑᑎᓯᓂᒡ,
ᐐᑫ ᑲᔦ ᑭᑮ ᒑᑭᐃᒫᐞ ᑳᑮ ᐱᒥᓂᔕᐅᑯᒡ᙮
14ᐅᒌᐳᐌᐱᓂᑲᓐ ᓴ ᑭᑮ ᐋᐸᒋᑖᐙᓐ ᐁᐸᔑᐸᐊᒧᐗᒡ ᐅᑎᒀᓐ
ᐊᐲ ᐅᔑᒫᑲᓂᔒᒪᐞ ᐁᐲᔖᓂᐸᓐ
ᐁᐱ ᐊᑕ ᐅᓶᔮᒪᐅᓇᑭᑣ ᓅᑎᓄᕽ ᑮᐃᓀᑖᑯᓯᓂᒡ,
ᐁᑮᐅᒋ ᑭᒋ ᐃᓀᓂᑎᓱᐙᒡ
ᐁᐎ ᑮᒨᒋ ᐌᓵᓂᐋᐙᒡ ᑫᑎᒫᑭᓯᓂᒡ᙮
15ᑭᒥᑕᑎᒨᒪᒃ ᓴ ᑕᔥ ᐅᑮ ᐅᒻᐺᐌᔮᑲᒥ ᐌᐱᔥᑳᓈᐙ ᐃᐃ ᑭᒋᑲᒦᓂ,
ᒦᔥ ᑳᐃᔑ ᐅᒑᓂᒫᔥᑳᓂᒃ᙮
16ᐅᐅ ᑕᔥ ᐁᓅᑕᒫᓐ, ᐐᑫ ᓂᑑᒑᓂᒥᑌᐁᔮᓂᒥᔅ,
ᐐᑫ ᑲᔦ ᓂᓂᑭᑑᓀᔮᓂᒥᔅ᙮
ᑳᐐᓐ ᓂᓵᐸᒪᒋᐅᓰ ᓂᐐᔭᐎᕽ, ᓂᑳᑕᓐ ᑲᔦ ᐐᑫ ᓂᓂᑭᔥᑳᐗᓐ᙮
ᔖᑰᒡ ᐃᑕᔥ ᓂᑲ ᔕᔒᐱ ᐲᑑᓐ ᐃᐃ ᐊᐲ ᒋᐅᒋᒋᓭᒃ
ᑳᐐ ᓇᓇᐊᓯᑣ ᐯᒫᑎᓯᐙᒡ ᑳᓂᑖ ᒦᑳᓂᔭᒥᑣ᙮
17ᒥᓴᐙ ᓴ ᑯ ᑫᑰᓐ ᓂᑖᐎᑭᓯᓄᒃ ᑳᒦᒋᓈᑳᑌᒃ
ᐃᐃᒫ ᐱᒃ ᑎᓄᐙᑎᑯᕽ,
ᔔᒥᓇᒃ ᑲᔦ ᓂᑖᐎᑭᓯᒀ,
ᐋᓬᐃᑉ ᑲᔦ ᑎᓄᐎᒥᓇᓐ,
ᐸᑴᔑᑲᓂᒥᓐ ᑲᔦ ᓂᑖᐎᑭᓯᓄᒃ ᑳᔑ ᑭᑎᑫᕽ,
ᒫᓇᒑᓂᔕᒃ ᑲᔦ ᐊᔮᓯᒀ ᑳᔑ ᐲᑎᑲᓂᑣ,
ᐱᔑᑮᐎᑲᒥᑰᓐ ᑲᔦ ᐱᔑᔑᒀᑭᓐ,
18ᔖᑰᒡ ᓴ ᓂᑲ ᒥᓉᑕᒻ,
ᓂᑲ ᐅᒋ ᒌᑫᑕᒻ ᑲᔦ ᐋᓃᔥ ᑳᑎᐯᒋᑫᒡ ᓂᑭᔐᒪᓂᑑᒻ
ᒦ ᐊᐌ ᓂᒻᐱᒫᒋᐃᐌᒻ᙮
19 # 2Sa 22.34; Psa 18.33. ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ ᓴ ᓂᒦᓂᒃ ᑫᐅᒋ ᒪᔥᑲᐎᓰᐗᒃ᙮
ᓂᑾᔭᑯᓴᐃᒃ ᑖᐱᔥᑰ ᐙᐙᔥᑫᔑ ᑳᔑ ᓇᐄᒡ,
ᒥᓴᐙ ᑯ ᐃᒀᒪᒋᐌᔮᓐ ᒋᐱᔑᑯ ᑕᑯᑮᓯᐙᓐ᙮
ᑳᓃᑳᓃᑕᕽ ᓂᑲᒧᐎᓇᓐ ᒦᓈᑲᓂᐎ ᐅᐅᐌᓂ,
ᒋᓂᑲᒧᒡ ᒣᒀ ᑳᑭᑐᒋᑫᓈᓂᐗᓂᓂᒃ᙮
Currently Selected:
ᐋᐸᑲᒃ 3: OJBS
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Syllabic Script) © 2008 Canadian Bible Society
