ᐁᑭᓴᑕᔅ 5

ᒨᓯᔅ, ᐁᕒᐊᓐ ᑲᔦ ᑮᐊᑕᐙᐸᒫᐙᒡ ᑭᒋᐅᑭᒫᓐ

1ᓈᓈᑫ ᑕᔥ ᐁᐊᓂ ᐃᔑᓭᓂᒃ ᒨᓯᔅ Moses, ᐁᕒᐊᓐ Aaron ᑲᔦ ᐅᑮ ᐊᑕ ᐙᐸᒫᐙᓐ ᑭᒋᐅᑭᒫᓐ ᐯᕒᐆᓐ Pharaoh ᐅᐅ ᐁᑮᐃᓈᐙᒡ, ᐅᐅ ᓴ ᐃᑭᑐ ᑳᑎᐯᒋᑫᒡ, ᐃᔅᕒᐃᔭᓬᐊᒃ Israel ᐅᑭᔐᒪᓂᑑᒥᐙᓐ, ᑕᑲ ᐸᑭᑎᓐ ᓂᐱᒫᑎᓰᒪᒃ ᒋᒫᒑᐙᒡ, ᒋᐐᑾᑏᐗᑲᒥᑭᓯᐙᒡ ᐌᑎ ᐱᑾᑕᑲᒥᒃ ᒋᑭᑌᓂᒥᐙᒡ, ᐅᑮᐃᓈᐙᓐ᙮

2ᒦᔥ ᐅᐅ ᐯᕒᐆᓐ ᑳᐃᑯᐙᒡ, ᐊᐌᓀᓐ ᑕᔥ ᐊᐊ ᑳᑎᐯᒋᑫᒡ ᑫᓇᐃᑕᐗᑭᐸᓐ ᒋᐸᑭᑎᓂᒪᒃ ᐃᔅᕒᐃᔭᓬᐊᐞ ᒋᒫᒑᓂᒡ? ᑳᐐᓐ ᐄᑐᒃ ᓂᑭᑫᓂᒫᓰ ᑳᑎᐯᒋᑫᒡ, ᑳᐐᓐ ᑲᔦ ᓂᐐ ᐸᑭᑎᓈᓰᒃ ᐃᔅᕒᐃᔭᓬᐊᒃ ᒋᒫᒑᐙᒡ, ᐅᑮᐃᑯᐙᓐ᙮

3ᒦᑕᔥ ᐅᐅ ᑳᐃᓈᐙᒡ, ᐄᐸᕒᐆᐗᒃ Hebrews ᐅᑭᔐᒪᓂᑑᒥᐙᓐ ᐅᔕ ᓂᑮ ᓈᑯᓰᑖᑯᓈᓐ᙮ ᑕᑲ ᓴ ᐸᑭᑎᓂᔑᓈᒻ ᓂᓱᑮᔑᒃ ᒥᓂᒃ ᒋᐱᒥ ᐊᔮᔮᕽ ᐁᐐ ᐃᔖᔮᕽ ᐱᑾᑕᑲᒥᒃ ᒋᐊᐎ ᐸᑭᑎᓈᓲᑕᒪᐗᑭᒡ ᑳᑎᐯᒋᑫᒡ ᓂᑭᔐᒪᓂᑑᒥᓈᓐ᙮ ᑮᔥᐱᓐ ᐃᐃ ᐃᔑᒋᑫᓯᐙᕽ, ᒫᑭᔖ ᓂᑲ ᓂᓯᑯᓈᓐ ᒋᐋᐸᒋᑑᒡ ᐋᑯᓯᐎᓐ, ᑯᒫ ᑲᔦ ᒦᑳᓱᐎᓂᕽ ᓂᑲ ᐅᒋ ᓂᓯᑯᓈᓐ᙮

4ᒦᔥ ᐅᐅ ᑭᒋᐅᑭᒫᓐ ᐯᕒᐆᓐ ᑳᐃᑯᐙᒡ, ᒨᓯᔅ, ᑫᑮᓐ ᐃᑕᔥ ᐁᕒᐊᓐ, ᐌᑯᓀᓐ ᐃᑕᔥ ᐌᒋ ᐅᑕᒦᐁᒀ ᐯᒫᑎᓯᐙᒡ ᐁᐊᓄᑮᐙᒡ? ᒫᒑᒃ ᑮᐌᓄᑕᒧᒃ ᑭᑕᓄᑮᐎᓂᐙᓐ, ᐅᑮᐃᑯᐙᓐ᙮ 5ᐅᐅᔥ ᑲᔦ ᐅᑮ ᐊᓂᐃᑯᐙᓐ, ᐃᓇᔥᑫ, ᐯᒫᑎᓯᐙᒡ ᐃᐃᒫ ᐊᑮᕽ ᐐᑫ ᐹᑏᓄᐗᒃ, ᑮᓇᐙ ᑕᔥ ᑭᑑᑕᒦᐋᐙᒃ ᑳᐅᒋ ᐊᓄᑮᓯᒀ! ᐅᑮᐃᑯᐙᓐ᙮

6ᐃᐃ ᑕᔥ ᐯᔑᑾᓐ ᐁᑮᔑᑲᓂᓂᒃ ᐯᕒᐆ ᐅᑮ ᐊᓅᓈᐞ ᑳᑮ ᑲᒀᑕᑲᓄᑮᐋᓂᒡ ᐯᒫᑎᓯᓂᒡ, ᐃᐃ ᑲᔦ ᐃᔅᕒᐃᔭᓬᐊᐞ ᑳᑮ ᐋᓂᑫ ᐊᓄᑮᐎᑭᒫᐎᓂᒡ, ᐅᐅ ᐁᑮᐃᓈᒡ, 7ᑫᑯ ᒦᓈᑫᒀᓂᒃ ᐯᒫᑎᓯᐙᒡ ᒪᔥᑯᓰᓐ ᑫᐋᐸᒋᑑᐙᒡ ᐅᔑᐋᐙᒡ ᑲᑲᑫᔮᐱᑲᓯᓃᐞ; ᐐᓇᐙ ᓴ ᑯ ᑕᐃᔖᐗᒃ ᒋᒨᔕᑭᓇᒫᓱᐙᒡ ᒪᔥᑯᓰᓐ᙮ 8ᔖᑰᒡ ᐃᑕᔥ ᐃᓂᑾᒃ ᐁᐊᑕᐌᑖᑯᓯᐙᒡ ᐯᔑᑾᓐ ᒥᓂᒃ ᒋᐅᔑᐋᐙᒡ ᑲᑲᑫᔮᐱᑲᓯᓃᐞ ᑳᑮ ᓂᑖ ᐅᔑᐋᐙᐸᓐ᙮ ᑫᑯ ᐸᑭᑎᓈᑫᒀᓂᒃ ᓇᐗᒡ ᐸᑮ ᓅᑕᐞ ᒋᐅᔑᐋᐙᒡ᙮ ᐁᑭᑎᒥᐙᒡ ᐅᔕ ᐃ ᑳᐅᒋ ᐃᔑ ᔖᑯᐌᐙᒡ, ᑕᑲ ᐸᑭᑎᓂᔑᓈᒻ ᒋᐊᐎ ᐸᑭᑎᓈᓲᑕᒪᐗᑭᒡ ᓂᑭᔐᒪᓂᑑᒥᓈᓐ᙮ 9ᑑᑕᐎᑾᒃ ᐃᑭ ᐃᓂᓂᐗᒃ ᓇᐗᒡ ᒋᑭᒋ ᐊᓄᑮᐙᒡ, ᒋᐅᑕᒪᓄᑮᐙᒡ ᒋᐸᐹᒥᑕᓯᒀ ᐃᓂ ᐁᔑ ᑮᐗᓂᒧᓈᓂᐗᓂᓂᒃ, ᑮᐃᑭᑐ᙮

10ᒦᑕᔥ ᐃᑭ ᐅᑲᒀᑕᑲᓄᑮᐃᐌᒃ, ᐃᑭ ᑲᔦ ᐃᔅᕒᐃᔭᓬᐊᒃ ᐋᓂᑫ ᐊᓄᑮᐎᑭᒫᒃ ᑮᐃᔖᐗᒃ ᐁᑮᐃᓈᐙᒡ ᐃᔅᕒᐃᔭᓬᐊᐞ ᐯᒫᑎᓯᓂᒡ, ᒦ ᐅᔕ ᐅ ᐯᕒᐆ ᐁᑭᑐᒡ, ᑳᐐᓐ ᓴ ᐊᐗᔑᒣ ᑭᑲ ᐅᑎᓇᒫᑰᓰᒻ ᒪᔥᑯᓰᓐ᙮ 11ᑮᓇᐙ ᓴ ᑯ ᑭᑲ ᐃᔖᒻ ᒋᐅᑎᓇᒫᓱᔦᒃ ᒪᔥᑯᓰᓐ ᐋᑎ ᐱᑯ ᑫᔑ ᒥᑲᒣᒃ; ᑳᐐᓐ ᐃᑕᔥ ᓅᑕᐞ ᒥᓂᒃ ᑭᑲ ᐃᓇᓄᑮᓰᒻ, ᑭᑎᑰᒻ, ᑮᐃᑭᑐᐗᒃ᙮ 12ᒥᓯᐌ ᓴ ᑕᔥ ᐃᔅᕒᐃᔭᓬᐊᐞ ᑮᐃᔖᐗᐞ ᐄᒋᐸᑮᕽ Egypt ᐁᑮ ᓇᓈᑐᓀᐊᒥᓂᒡ ᑳᑮ ᐃᔥᑯᔑᑳᑌᓂᑭᓐ, ᐁᐐ ᐅᒪᔥᑯᓰᒥᓂᒡ᙮ 13ᒦᑕᔥ ᐅᑲᒀᑕᑲᓄᑮᐃᐌᒃ ᒫᓄ ᐅᑮ ᑲᑳᒋᐋᐙᐞ ᐁᑮᐃᓈᐙᒡ, ᐐᑫ ᓴ ᑮᔑᑑᒃ ᐯᔑᑯ ᑮᔑᒃ ᑭᑕᓄᑮᐎᓂᐙ, ᒥᓂᒃ ᐃᑯ ᑳᑮ ᓂᑖ ᐃᔑ ᒫᒌᔦᑭᐸᓐ ᒣᒀ ᑮᐅᑎᓇᒫᑰᔦᒃ ᒪᔥᑯᓰᓐ, ᑮᐃᑭᑐᐗᒃ᙮ 14ᒦᑕᔥ ᐃᑭ ᑲᒀᑕᑲᓄᑮᐎᑭᒫᒃ ᐁᑮ ᐸᐸᑭᑌᐙᐙᒡ ᐃᐃ ᐃᔅᕒᐃᔭᓬᐊᐞ ᐋᓂᑫ ᐊᓄᑮᐎᑭᒫᐞ ᑳᑮ ᐅᓈᐸᒫᐙᐸᓐ ᒋᑲᓇᐙᐸᑕᒥᓂᒡ ᐊᓄᑮᐎᓐ᙮ ᐅᐅ ᓴ ᐁᑮᐃᓈᐙᒡ, ᐌᑯᓀᓐ ᐃᑕᔥ ᑳᐅᒋ ᑌ ᑮᔑᑑᓯᐌᒃ ᑭᑕᓄᑮᐎᓂᐙ? ᑳᐐᓐ ᑌᒥᓂᒃ ᑭᑮ ᐅᔑᐋᓯᐙᐙᒃ ᑲᑲᑫᔮᐱᑲᓯᓃᒃ ᐱᒌᓈᑯ, ᓅᑯᒻ ᑲᔦ ᑳᑮᔑᑲᒃ, ᒥᓂᒃ ᑫᑮ ᐅᔑᐁᒀᐸᓐ ᑳᑮ ᓂᑖ ᐃᔑ ᒫᒌᔦᑭᐸᓐ, ᑮᐃᓈᐗᐞ᙮

15ᒦᑕᔥ ᐃᔅᕒᐃᔭᓬᐊᒃ ᐋᓂᑫ ᐊᓄᑮᐎᑭᒫᒃ ᑳᑮ ᐊᑕ ᐙᐸᒫᐙᒡ ᐯᕒᐆᓐ ᐁᑮ ᐊᐎ ᑭᒋ ᑲᑮᑭᑐᐙᒡ, ᐌᑯᓀᓐ ᐃᑕᔥ ᐅᐅᓇᑫ ᐌᒋ ᑑᑕᐎᔮᕽ? 16ᑳᐐᓐ ᐄᑐᒃ ᓂᒦᓂᑰᓰᒥᓐ ᒪᔥᑯᓰᓐ ᑫᐋᐸᒋᑑᔮᕽ, ᔖᑰᒡ ᐃᑕᔥ ᓂᑎᑰᒥᓐ, ᐅᔑᐃᑾᒃ ᑲᑲᑫᔮᐱᑲᓯᓃᒃ! ᐃᓇᔥᑫ ᓴ ᓃᓇᐎᓐᑦ, ᓂᐸᐸᑭᑌᐅᑰᒥᓐ, ᑮᓐ ᑕᔥ ᑭᐱᒫᑎᓰᒪᒃ ᐃᐃ ᐅᑎᔑᒋᑫᐎᓂᐙ ᐅᐅ ᑳᐅᒋ ᐃᔑᓭᔮᕽ, ᐅᑮᐃᓈᐙᓐ᙮

17ᐅᐅᔥ ᐯᕒᐆᓐ ᐅᑮ ᐃᔑ ᓇᑴᑖᑯᐙᓐ, ᐐᑫ ᐅᔕ ᑭᑭᑎᒥᔥᑭᒻ, ᐁᐐ ᐊᓄᑮᓯᐌᒃ; ᒦ ᓴ ᐃ ᐌᒋ ᐃᑭᑐᔦᒃ, ᑕᑲ ᐸᑭᑎᓂᔑᓈᒻ ᒋᐊᐎ ᐸᑭᑎᓈᓲᑕᒪᐗᑭᒡ ᑳᑎᐯᒋᑫᒡ᙮ 18ᒫᒑᒃ, ᐃᑕᔥ ᐊᑕᐗᓄᑮᒃ᙮ ᑳᐐᓐ ᓴ ᑭᑲ ᒦᓂᑰᓰᒻ ᒪᔥᑯᓰᓐ, ᔖᑰᒡ ᐃᑕᔥ ᐃᔑᓈᑾᓐ ᒋᐅᔑᐁᒀ ᑲᑲᑫᔮᐱᑲᓯᓃᒃ ᒥᓂᒃ ᑳᔑ ᐊᑕᐌᑖᑯᓯᔦᒃ, ᐅᑮᐃᑯᐙᓐ᙮ 19ᒦᔥ ᐃᑭ ᐃᔅᕒᐃᔭᓬᐊᒃ ᐋᓂᑫ ᐊᓄᑮᐎᑭᒫᒃ ᑳᑮ ᑭᑫᑕᒧᐙᒡ ᒋᐗᓯᑖᐎᓭᐙᒡ ᐅᐅ ᐁᑮᐃᓂᑣ, ᑳᐐᓐ ᓴ ᓅᑕᐞ ᒥᓂᒃ ᑭᑲ ᐅᔑᐋᓯᐙᐙᒃ ᑲᑲᑫᔮᐱᑲᓯᓃᒃ ᐁᑕᓱ ᑮᔑᒃ ᐁᔑ ᐊᑕᐌᓂᒥᑰᔦᒃ᙮

20ᐁᐊᓂ ᐅᒋ ᒫᒑᐙᒡ ᐃᑕᔥ ᐁᔑᐊᔮᓂᒡ ᐯᕒᐆᓐ, ᐅᑮ ᓇᑭᔥᑲᐙᐙᓐ ᒨᓯᓲᓐ, ᐁᕒᐊᓅᓐ ᑲᔦ ᐁᐲᐃᑯᐙᒡ᙮ 21ᒦᑕᔥ ᑳᐃᓈᐙᒡ, ᑕᑲ ᑳᑎᐯᒋᑫᒡ ᑭᑲ ᑲᓇᐙᐸᒥᑯᐙ, ᑭᑲ ᐅᓈᑯᓂᑯᐙ ᑲᔦ! ᑮᓇᐙ ᐄᑐᒃ ᑳᑑᑕᐌᒃ ᐯᕒᐆ, ᐃᐃ ᑲᔦ ᐅᑕᓄᑮᐋᑲᓇᐞ ᒋᔒᑫᓂᒥᔭᒥᑣ, ᐁᐃᓀᑖᑾᒃ ᑲᔦ ᑖᐱᔥᑰ ᐁᑮ ᒦᓀᒀ ᐸᔑᐸᐃᑫᐎᑯᒫᓇᓐ ᑫᐅᒋ ᓂᔑᔭᒥᑣ, ᐅᑮᐃᓈᐙᐞ᙮

ᒨᓯᔅ ᑮᒫᔑᑲᑲᓅᓈᒡ ᑳᑎᐯᒋᑫᓂᒡ

22ᒨᓯᔅ Moses ᑕᔥ ᐅᑮ ᑮᐌ ᓈᓯᑲᐙᓐ ᑳᑎᐯᒋᑫᓂᒡ ᐁᑮᐃᓈᒡ, ᑮᓐ ᑌᐯᒋᑫᔭᓐ, ᐌᑯᓀᓐ ᐃᑕᔥ ᐌᒋ ᐃᔑᒋᑫᐊᑣ ᐯᒫᑎᓯᐙᒡ ᒋᒫᔑᓭᐙᒡ? ᒦ ᓇ ᐃ ᑳᑮ ᐅᒋ ᐲᒋᓂᔕᐅᔭᓐ ᐅᐅᒫ? 23ᐃᓇᔥᑫ ᐊᑯᓈᒃ ᑳᑮ ᐊᑕ ᐙᐸᒪᒃ ᐯᕒᐆ Pharaoh ᑮᐊᐎ ᑮᑭᑑᑕᒪᐎᓈᓐ, ᐋᒌᑫ ᓴ ᐅᑭᒋ ᒫᔑᓭᐋᐞ, ᑳᐐᓐ ᐃᑕᔥ ᑲᓇᑫ ᑭᓈᑕᒪᐙᓰᒃ ᑭᐱᒫᑎᓰᒪᒃ, ᐅᑮᐃᓈᓐ᙮

Currently Selected:

ᐁᑭᓴᑕᔅ 5: OJBS

Highlight

Copy