ᐁᑭᓴᑕᔅ 33

ᑳᑎᐯᒋᑫᒡ ᑮᑲᓅᓈᒡ ᐃᔅᕒᐃᔭᓬᐊᐞ ᐗᒌᕽ ᓵᐃᓇᐃ ᒋᐅᒋᒫᒑᓂᒡ

1 # Gen 12.7; Gen 26.3; Gen 28.13. ᑳᑎᐯᒋᑫᓂᒡ ᐃᑕᔥ ᒨᓯᔅ ᐅᑮᐃᑰᓐ, ᓂᑯᒋ ᐅᐅᒫ ᐅᒋ ᒫᒑᓐ, ᐃᑭ ᑲᔦ ᐯᒫᑎᓯᐙᒡ ᐄᒋᐸᑮᕽ Egypt ᑳᑮ ᐅᒋ ᓵᑭᒋᐎᓇᑣ᙮ ᐌᑎ ᑕᔥ ᐃᔖᒃ ᐊᑮᕽ ᑳᑮ ᐋᔩᒋ ᐊᔓᑕᒪᐗᒀᐸᓐ ᐁᐸᕒᐊᐋᒻ Abraham, ᐋᐃᓯᒃ Isaac, ᒉᑲᑉ Jacob ᑲᔦ ᐅᐅ ᐁᑮ ᐃᓇᒀᐸᓐ, ᑭᐲᐌᓰᒥᐙᒃ ᓴ ᓂᒦᓈᒃ ᐅᐅ ᐊᑮᓂ᙮ 2ᐁᒐᓬ ᓴ ᓂᑲ ᓃᑳᓂᓂᔕᐙ ᑳᐐ ᐃᔖᔦᒃ ᒋᓃᑳᓃᑕᒪᐎᓀᒃ᙮ ᓂᑲ ᒫᒌᐋᒪᐙᒃ ᑲᔦ ᑫᓇᓐ Canaan ᑳᑎᓄᐎᐙᒡ, ᑲᔦ ᐁᒧᕒᐄ Amorites, ᐁᑦ Hittites, ᐯᕒᐃᓰ Perizzites, ᑭᐲ Hivites, ᒌᐸᔅ Jebusites ᐃᑕᔥ ᑲᔦ ᑳᑎᓄᐎᐙᒡ᙮ 3ᐃᔖᒃ ᐃᐃ ᐊᑭ ᑳᔑ ᐌᓅᒋ ᓂᑖᐎᑭᒃ ᑫᑰᓐ᙮ ᑳᐐᓐ ᐃᑕᔥ ᓃᓐ ᑭᐐ ᐐᒌᐎᓯᓅᓂᓂᒻ ᐅᓵᒻ ᑭᓂᑖ ᔕᔒᐱᑖᒻ, ᒫᑭᔖ ᑭᑖ ᐊᓂ ᒑᑭᐃᓂᓂᒻ ᐊᓂ ᐱᒥ ᐊᔮᔦᒃ, ᐅᑮᐃᑰᓐ᙮

4ᐊᐲ ᑕᔥ ᐯᒫᑎᓯᐙᒡ ᐁᓅᑕᒧᐙᒡ ᐅᐅ ᐁᐃᔑ ᑰᐹᓱᒥᑣ, ᒦ ᓴ ᐃ ᑳᐃᔑ ᒫᒌ ᒪᐎᐙᒡ, ᐁᑮ ᑮᒋᑯᔥᑲᒧᐙᒡ ᑲᑭᓇ ᑳᑮ ᑭᑭᔥᑲᒧᐙᒡ ᐗᐌᔑᐅᐎ ᓈᐱᔥᑭᑲᓇᓐ᙮ 5ᐋᓃᔥ ᒨᓯᔅ ᑮᐃᑯᑯᐸᓐ ᑳᑎᐯᒋᑫᓂᒡ, ᐅᐅ ᓴ ᑭᑲᐃᓈᒃ ᐃᔅᕒᐃᔭᓬᐊᒃ, ᑮᓇᐙ ᓴ ᐁᑕᑕᐌ ᑭᓂᑖ ᔕᔒᐱᑖᒻ᙮ ᑮᔥᐱᓐ ᓴ ᐊᒋᓇ ᐁᑕ ᒫᒌ ᐐᒌᐎᓇᑰᒃ, ᑭᑖ ᒑᑭᐃᓂᓂᒻ᙮ ᓅᑯᒻ ᐃᑕᔥ ᐃᑯ ᑮᒋᑯᔥᑲᒧᒃ ᑳᑭᑭᔥᑲᒣᒃ ᐃᓂ ᐗᐌᔑᐅᐎ ᓈᐱᔥᑭᑲᓇᓐ, ᒋᑭᑫᑕᒫᓐ ᐋᓃᓐ ᑫᑑᑕᐎᓇᑰᒃ, ᑮᐃᑯᑯᐸᓐ᙮ 6ᒦᑕᔥ ᐃᔅᕒᐃᔭᓬᐊᒃ ᑳᐃᔑ ᑮᒋᑯᔥᑲᒧᐙᒡ ᐗᐌᔑᐅᐎ ᓈᐱᔥᑭᑲᓇᓐ, ᐃᐃᒫ ᐗᒌᕽ ᓵᐃᓇᐃ Sinai ᐁᒋᑳᑌᓂᒃ᙮

ᐸᒀᓀᑲᒥᑯᕽ ᑳᑮᐃᔑᐊᔮᒡ ᑳᑎᐯᒋᑫᒡ

7ᒨᓯᔅ ᐃᑕᔥ ᐅᑮ ᓂᑖ ᒫᒌᑑᓐ ᐸᒀᓀᑲᒥᒃ, ᐁᑮ ᐃᔑ ᓂᑖ ᐸᑕᑭᑑᒡ ᐸᑫᔭᐄ ᐙᓴᔩᔥ ᐃᑯ ᑳᑮ ᐃᔑ ᑲᐯᔑᐎᓐᒡ ᐁᑮ ᐃᔑᓂᑳᑕᕽ ᒫᐗᒋᐃᑎᐎ ᐸᒀᓀᑲᒥᒃ᙮ ᐊᐌᓀᓐ ᐃᑕᔥ ᐙᑲᑴᒋᒫᒡ ᑫᑰᓂᓂ ᑳᑎᐯᒋᑫᓂᒡ, ᒦ ᐃᒫ ᐄᓴᓐ ᑳᐃᔖᒡ ᒫᐗᒋᐃᑎᐎ ᐸᒀᓀᑲᒥᑯᕽ᙮ 8ᐊᐲ ᑕᔥ ᐃᑯ ᒨᓯᔅ ᑮᐃᔖᒡ ᐌᑎ ᐸᒀᓀᑲᒥᑯᕽ, ᑲᑭᓇ ᓴ ᐯᒫᑎᓯᓂᒡ ᑮᓃᐸᐎᐗᐞ ᐁᔑ ᐃᔥᒀᑌᒥᐗᓂᓂᒃ ᐅᐸᒀᓀᑲᒥᑯᓂ, ᐁᑮ ᑲᓇᐙᐸᒥᑯᒡ ᐲᓂᔥ ᐁᑮ ᐊᓂ ᐲᑎᑫᒡ ᐃᐃ ᐸᒀᓀᑲᒥᒃ᙮ 9ᒨᓯᔅ ᐃᑕᔥ ᐁᐊᓂ ᐲᑎᑫᒡ ᐃᐃ ᐸᒀᓀᑲᒥᒃ, ᐗᑸᓂ ᓴ ᑳᑮ ᐸᑕᑳᓇᑾᓂᓂᒃ ᑮᐱ ᓈᔑᔥᑳᓂ ᐁᑮ ᐊᔮᓂᒃ ᐃᐃᒫ ᐃᔥᒀᑌᕽ ᒥᓂᒃ ᐃᑯ ᐁᑲᑲᓅᓂᑯᒡ ᑳᑎᐯᒋᑫᓂᒡ᙮ 10ᐊᐲ ᑕᔥ ᑲᑭᓇ ᐯᒫᑎᓯᓂᒡ ᐁᐙᐸᑕᒥᓂᒡ ᐃᐃ ᐗᑶ ᑳᐸᑕᑳᓇᑾᓂᓂᒃ ᐁᑭᒋᐎ ᐊᔮᓂᒃ ᐃᐃᒫ ᐃᔥᒀᑌᕽ ᐸᒀᓀᑲᒥᑯᕽ, ᒦ ᓴ ᐃ ᑲᑭᓇ ᑳᐃᔑ ᐸᓯᑸᓂᒡ ᐁᑮ ᐊᓇᒥᐁᑕᐙᓂᒡ ᑳᑎᐯᒋᑫᓂᒡ᙮ ᐅᐸᒀᓀᑲᒥᑯᓃᕽ ᓴ ᐃ ᑮᑕᔑ ᐃᔑᒋᑫᐗᐞ ᑲᑭᓇ ᑳᑮ ᑕᔑᓂᒡ᙮ 11ᑳᑎᐯᒋᑫᓂᒡ ᓴ ᒨᓯᔅ ᐁᑲᓅᓂᑯᒡ ᑮᐌᐌᑖᓴᒥ ᐊᔮᐗᒃ, ᑖᐱᔥᑰ ᐃᓂᓂ ᐃᓇᑫ ᑳᔑ ᑲᑲᓅᓈᒡ ᐅᓵᑭ ᐐᒌᐙᑲᓇᓐ᙮ ᐊᐲ ᓴ ᒨᓯᔅ ᑳᑮᐌᒡ ᐁᔑ ᑲᐯᔑᐎᓐᒡ, ᐃᓂ ᑕᔥ ᐐᓐ ᑳᑮ ᐐᒌᐎᑯᒡ ᐅᔥᑭᓃᑭᐗᓐ ᒑᔓᐙᓐ ᑳᑮ ᐅᑌᑌᓂᒡ ᓇᓐ Nun ᐁᔑᓂᑳᓱᓂᒡ, ᑳᐐᓐ ᐅᑮ ᓇᑲᑕᓰᓂ ᐃᐃ ᐸᒀᓀᑲᒥᒃ᙮

ᑳᑎᐯᒋᑫᒡ ᑮᐊᔓᑕᒪᐙᒡ ᐅᐱᒫᑎᓰᒪᐞ ᐁᐐᐐᒌᐙᒡ

12ᒦᑕᔥ ᒨᓯᔅ ᑳᐃᓈᒡ ᑳᑎᐯᒋᑫᓂᒡ, ᑌᐺ ᐄᑐᒃ ᑭᑎᔥ ᒋᐃᔑ ᓃᑳᓃᑕᒪᐗᒀ ᐅᑯ ᐯᒫᑎᓯᐙᒡ ᐌᑎ ᐊᑮᕽ᙮ ᑳᐐᓐ ᑕᔥ ᒪᔑ ᑭᐐᑕᒪᐎᓰ ᐊᐌᓀᓇᒃ ᑫᐃᔑᓂᔕᐗᑣ ᑫᐐᒌᐎᐙᒡ᙮ ᒦᑕᔥ ᑲᔦ ᐁᔑᔭᓐ, ᐁᑭᑫᓂᒥᔭᓐ ᓂᑎᔑᓂᑳᓱᐎᓂᕽ, ᐁᒥᓍᐸᒥᔭᓐ ᑲᔦ ᐁᓈᓴᒦᔭᓐ᙮ 13ᓅᑯᒻ ᑕᔥ ᑭᑎᔑ ᑲᑴᒋᒥᓐ ᑮᔥᐱᓐ ᑌᐺ ᒥᓍᐸᒥᔭᓐ, ᐙᐸᑕᐃᔑᓐ ᐋᓃᓐ ᑫᐊᓂ ᐃᔑᒋᑫᔮᓐ, ᒋᑭᑫᓂᒥᓈᓐ ᑲᔦ, ᒋᑭᑫᑕᒫᓐ ᑲᔦ ᐁᒥᓍᐸᒥᔭᓐ ᐁᓈᓴᒦᔭᓐ᙮ ᒦᐗᒃ ᐄᑐᒃ ᐅᑯ ᐯᒫᑎᓯᐙᒡ ᑳᑮ ᐅᓈᐸᒪᑣ ᐁᐐ ᑎᐱᓇᐌᐎᓯᔭᓐ, ᐅᑮᐃᓈᓐ᙮

14ᒦᔥ ᐅᐅ ᑳᑎᐯᒋᑫᓂᒡ ᑳᐃᑯᒡ, ᓃᓐ ᓴ ᐱᑯ ᑭᑲ ᐐᒌᐎᓐ, ᑭᑲ ᐃᔑᐃᓐ ᑲᔦ ᒋᓂᑖ ᔖᑰᒋᑣᔭᓐ᙮ 15ᐅᐅᔥ ᒨᓯᔅ ᑮᐃᔑ ᓇᑴᑕᒻ, ᑮᔥᐱᓐ ᓴ ᐐᐐᒌᐎᓯᐙᕽ, ᑫᑯ ᐸᑭᑎᓂᔑᓈᑳᕽ ᐅᐅᒫ ᒋᐅᒋ ᒫᒑᔮᕽ᙮ 16ᐋᓃᓐ ᐃᑕᔥ ᑫᐅᒋ ᑭᑫᒋᑳᑌᒃ ᐁᒥᓍᐸᒪᑣ ᑭᐱᒫᑎᓰᒪᒃ, ᑫᓃᓐ ᑕᔥ ᐁᒥᓍᐸᒥᔭᓐ? ᐁᐐᒌᐎᔮᕽ ᐄᑐᒃ ᑳᐅᒋ ᐯᑌᓈᑯᓯᔮᕽ ᐁᑎᓄᐎᓯᐙᕽ ᐃᑭ ᑳᑎᓄᐎᐙᒡ ᑯᑕᒃ ᐯᒫᑎᓯᐙᒡ ᐅᐅᒫ ᐊᑮᕽ, ᐅᑮᐃᓈᓐ᙮ 17ᒦᔥ ᑳᑎᐯᒋᑫᓂᒡ ᑳᐃᑯᒡ, ᒦ ᓴ ᐃ ᑫᐃᔑᒋᑫᔮᓐ ᐃᐃ ᑳᐃᑭᑐᔭᓐ ᐋᓃᔥ ᑮᓐ ᑭᒥᓍᐸᒥᓐ, ᐐᑫ ᑲᔦ ᑭᑭᑫᓂᒥᓐ᙮

18ᒦᑕᔥ ᐅᐅ ᒨᓯᔅ ᑳᐃᑭᑐᒡ, ᑭᑲᑴᒋᒥᓐ, ᑕᑲ ᐙᐸᑕᐃᔑᓐ ᑭᑭᒋ ᐃᓀᑖᑯᓯᐎᓐ᙮ 19#Rom 9.15. ᒦᔥ ᐅᐅ ᑳᑎᐯᒋᑫᓂᒡ ᑳᐃᔑ ᓇᑴᑖᑯᒡ, ᓃᓐ ᓴ ᐱᑯ ᓂᑭᒋ ᐃᓀᑖᑯᓯᐎᓐ ᐯᔓ ᑭᑲ ᓈᓯᑳᑯᓐ᙮ ᓂᑲ ᐐᑖᓐ ᑕᔥ ᑲᔦ ᐃᐃ ᓂᐐᓱᐎᓐ ᑳᑭᑌᑖᑾᒃ ᑳᑎᐯᒋᑫᒡ ᑳᐃᔑᓂᑳᓱᔮᓐ᙮ ᓂᑲ ᒥᓄᑑᑕᐙ ᑲᔦ ᐊᐌᓀᓐ ᐃᑯ ᑳᐅᓈᐸᒪᒃ ᐁᐐ ᑭᑎᒫᑭᓇᐗᒃ᙮ 20ᑳᐐᓐ ᓴ ᑭᑲ ᐸᑭᑎᓂᓯᓅᓐ ᒋᐙᐸᑕᒪᓐ ᓂᐗᑌᕽ᙮ ᐊᐎᔭ ᐅᔕ ᐙᐸᒥᒡ ᑳᐐᓐ ᑕᐱᒫᑎᓯᓰ᙮ 21ᐃᓇᔥᑫ, ᐊᔮ ᐅᔕ ᐅᐅᒫ ᐊᓯᓐ ᐁᔑᐊᔮᔮᓐ ᑫᔑ ᓃᐸᐎᔭᓐ᙮ 22ᒣᒀ ᑕᔥ ᓂᑭᒋ ᐃᓀᑖᑯᓯᐎᓐ ᐱᒥ ᐊᔮᒪᑲᒃ ᑳᔑ ᐊᔮᔭᓐ, ᐃᐃᒫ ᑳᔑ ᑖᔥᑳᐱᑳᒃ ᑭᑲ ᐃᔑ ᐊᓯᓐ ᑭᑲ ᑭᐲᑴᓂᓐ ᐃᑕᔥ ᑲᔦ᙮ ᐹᓂᒫ ᑮᐃᔥᒀ ᐱᒥ ᐊᔮᔮᓐ, 23ᒦᑕᔥ ᓂᑯᒋ ᒋᐃᔑ ᓂᒌᓂᔮᓐ, ᓂᐱᑾᓐ ᐃᑕᔥ ᐁᑕ ᑭᑲ ᐙᐸᑖᓐ᙮ ᑳᐐᓐ ᐐᓐ ᓂᐗᑌᕽ ᑭᑲ ᐙᐸᑕᓰᓐ, ᐅᑮᐃᑰᓐ᙮

Currently Selected:

ᐁᑭᓴᑕᔅ 33: OJBS

Highlight

Copy