ᐁᑭᓴᑕᔅ 15

ᒨᓯᔅ ᐅᑎᓇᐊᒧᐎᓐ

1 # Rev 15.3. ᒨᓯᔅ ᐃᑕᔥ ᐃᑭ ᑲᔦ ᐃᔅᕒᐃᔭᓬᐊᒃ ᑮᓂᑲᒧᐗᒃ ᐅᐅ ᐁᑮ ᐃᓇᐊᒧᑕᐙᐙᒡ ᑳᑎᐯᒋᑫᓂᒡ:

ᓂᑲ ᓂᑲᒨᑕᐙ ᓴ ᑳᑎᐯᒋᑫᒡ,

ᐐᓐ ᓴ ᐋᐱᒋ ᑮᑭᒋ ᔖᑰᒋᑣ;

ᒥᑕᑎᒨᐞ ᓴ ᐃᐃ ᑲᔦ ᐯᒥᐗᓀᐸᐃᑯᓂᒡ

ᑭᒋᑲᒦᕽ ᐅᑎᔑ ᐸᑯᐲ ᐌᐱᓈᐞ᙮

2 # Psa 118.14; Isa 12.2. ᑳᑎᐯᒋᑫᒡ ᓴ ᑳᒪᔥᑲᐎ ᓈᑕᒪᐎᒡ,

ᐐᓐ ᑲᔦ ᑳᔖᐾᐃᒡ,

ᒦ ᓴ ᐗᐊ ᓂᑭᔐᒪᓂᑑᒻ,

ᐐᓐ ᓴ ᓂᑲ ᒦᑴᒋᐌᓂᒫ;

ᓂᑌᑌ ᓴ ᐃᓂ ᐅᑭᔐᒪᓂᑑᒪᓐ,

ᓂᑲ ᑭᒋ ᐃᓀᓂᒥᒫᓐ ᓴ᙮

3ᑳᑎᐯᒋᑫᒡ ᓴ ᓂᒦᑳᓱᐎᓂᓃᒻ,

ᑳᑎᐯᒋᑫᒡ ᐅᔕ ᐃᔑᓂᑳᓱ᙮

4ᐯᕒᐆᓐ ᓴ ᐅᒦᑳᓱᐎ ᐅᑖᐹᓈᑯᓂ,

ᐅᔑᒫᑲᓂᔒᒥᓂ ᑲᔦ,

ᑭᒋᑲᒦᕽ ᐅᑮ ᐃᔑ ᐌᐱᓈᐞ,

ᒫᐗᒡ ᐃᑯ ᐅᓴᓭᑳ ᔑᒫᑲᓂᔒᒥᓂ,

ᒥᔅᑯ ᑭᒋᑲᒦᕽ ᐅᑮ ᐃᔑ ᓂᓵᐹᐗᓈᐞ᙮

5ᑳᔑ ᑮᔥᑳᔭᐙᓂᒃ ᓴ

ᑭᒋᑲᒦᕽ ᑮᐃᔑ ᓂᑭᐲᓭᐗᒃ,

ᐋᓈᒦᑎᒻ ᐁᑮ ᐃᔑ ᑯᓵᐲᓂᒡ

ᑖᐱᔥᑰ ᐊᓯᓐ ᐃᓇᑫ ᑳᐃᔑ ᑯᓵᐲᒡ᙮

6ᑌᐯᒋᑫᔭᓐ,

ᑭᑭᒋᓂᒃ ᓴ ᐁᑕᑕᐌ ᒪᔥᑲᐌᑖᑾᓐ,

ᒦ ᓴ ᐃᐃᒫ ᑭᑭᒋᓂᑭᕽ ᑌᐯᒋᑫᔭᓐ

ᐌᒋ ᐲᓯᐱᓇᑣ ᑳᔒᑫᓂᒥᒀ᙮

7ᐁᔑ ᑭᒋ ᐃᓀᑖᑾᒃ ᐃᑕᔥ ᑭᑑᑭᒫᐌᑖᑯᓯᐎᓐ,

ᑭᑑᒋ ᔖᑰᒋᐋᒃ ᐃᑭ ᑳᔒᑫᓂᒥᒀ,

ᑭᓂᔥᑳᑎᓯᐎᓐ ᓴ ᐃᔥᑯᑌᕽ ᐃᓀᑖᑾᓐ,

ᒦᔥ ᐃᐃᐌᓂ ᑳᐊᒀᑭᓱᑯᐙᒡ ᑖᐱᔥᑰ ᒪᔥᑯᓰᕽ᙮

8ᐁᑮ ᐴᑖᑕᒪᓐ ᐃᑕᔥ ᑭᒋᑲᒻ,

ᒦ ᐃ ᑳᑮ ᐊᓂ ᐃᔥᐱᐲᔮᒃ᙮

ᐯᒥᒋᐗᕽ ᓴ ᓂᐱ ᑮᑭᐱᒋᔥᑳ ᐁᑮ ᐸᑕᑭᐲᔮᒃ,

ᑖᐱᔥᑰ ᐋᓴᒫᑎᒃ ᐁᑮ ᐃᔑᓈᑾᒃ,

ᒫᐗᒡ ᐃᑕᔥ ᐁᔑ ᑮᔥᑳᔭᐙᒃ ᐃᐃ ᑭᒋᑲᒻ

ᑮᐊᓂ ᒪᔥᑲᐎᔥᑳ᙮

9ᔐᑫᓂᒥᐌᒡ ᓴ ᑮᐃᑭᑐ,

ᓂᑲ ᐱᒥᓂᔕᐙᒃ, ᓂᑲ ᐊᑎᒫᒃ,

ᒦᔥ ᑫᔑ ᓀᓈᐎᓇᒧᐗᒃ ᐅᐌᓅᑎᓯᐎᓂᐙᓐ,

ᒋᐅᑖᐱᓇᒧᐗᒃ ᐌᑯᓀᓐ ᐃᑯ ᒣᓴᐌᑕᒧᐗᒃ᙮

ᓂᐸᔑᐸᐃᑫᐎᑯᒫᓐ ᓴ ᓂᑲ ᒪᓂᐱᑑᓐ

ᒦᔥ ᑫᔑ ᒑᑭᐊᒀ᙮

10ᑌᐯᒋᑫᔭᓐ, ᐋᐱᑎᕽ ᓴ ᑯ ᐁᐸᑭᑕᓈᒧᔭᓐ,

ᒦ ᐃ ᐄᒋᑉ ᑳᑎᓄᐎᐙᒡ ᐁᔑ ᓂᓵᐹᐌᐙᒡ;

ᒦ ᐃ ᐁᔑ ᑯᓵᐲᐙᒡ

ᑖᐱᔥᑰ ᐊᔥᑭᑾᒃ ᑳᐃᔑ ᑯᓵᐲᒃ

ᐃᐃᒫ ᑳᔑ ᑯᑖᓀᑖᐗᒃ ᓂᐱ᙮

11ᑮᓐ ᑌᐯᒋᑫᔭᓐ,

ᐊᐌᓀᓇᒃ ᐃᑕᔥ ᐁᔑᐊᔮᒡ ᒪᓂᑑᒃ ᐁᓀᑖᑯᓯᐗᒡ?

ᐊᐌᓀᓐ ᐃᑕᔥ ᐁᔑᐊᔮᑴᓐ ᐁᓀᑖᑯᓯᐗᒡ,

ᐁᒫᒪᑳᑌᑖᑯᓯᔭᓐ ᐁᐯᑳᑎᓯᔭᓐ,

ᐁᑯᑖᓀᑖᑯᓯᔭᓐ ᑲᔦ ᑭᑭᒋ ᐃᓀᑖᑯᓯᐎᓂᕽ,

ᑭᑎᔑᒋᑫᐎᓇᓐ ᑲᔦ ᐁᒫᒪᑳᑌᑖᑾᑭᓐ?

12ᑭᑭᒋᓂᒃ ᓴ ᑭᑖᐸᒋᑑᓐ ᐁᓃᒥᓂᑫᓂᔭᓐ,

ᒦᔥ ᐊᑮᓂ ᐁᔑ ᑯᓂᑯᐙᒡ ᑳᔒᑫᓂᒥᔭᒥᑣ᙮

13ᑭᓵᑭᐃᐌᐎᓂᕽ ᐃᑕᔥ

ᑭᑎᔑ ᓃᑳᓃᑕᒪᐙᒃ ᐯᒫᑎᓯᐙᒡ

ᑳᑮ ᔖᐾᐊᑣ,

ᑭᒪᔥᑲᐎᓰᐎᓂᕽ ᐃᓴ

ᑭᑑᒋ ᑭᑭᓄᐎᓈᒃ ᒋᐃᔖᐙᒡ ᐊᑮᕽ

ᑫᒋ ᐃᓀᑖᑾᓂᓂᒃ᙮

14ᑳᐯᐸᑳᓉᐙᓇᑭᓯᐙᒡ ᓴ

ᐯᒫᑎᓯᐙᒡ ᑮᓅᑕᒧᒃ,

ᒦᔥ ᐐᑫ ᐁᔑ ᓂᓂᑳᓂᒥᓯᐙᒡ,

ᐱᓬᐃᔅᑎᔭ ᐌᒌᐙᒡ

ᐐᑫ ᑭᒋ ᑯᑖᒋᐗᒃ᙮

15ᐌᑭᒫᐎᐙᒡ ᓴ ᐃᐃᒫ ᐄᑕᒻ ᐊᑮᕽ

ᐗᐙᓀᑕᒧᒃ;

ᐌᑭᒫᐎᐙᒡ ᑲᔦ ᒨᐗᑉ ᐊᑮᕽ

ᓂᓂᑳᓂᒥᓯᐗᒃ;

ᑲᑭᓇ ᑫᓇᓐ ᐊᑮᕽ ᐁᔮᐙᒡ

ᑕᓂᓂᑭᔥᑳᐗᒃ ᑫᐊᐲᑖᓂᒥᓯᐙᒡ᙮

16ᐐᑫ ᑲᒀᓂᓴᑳᓂᒥᓯᐗᒃ,

ᑮᑭᒋ ᓭᑭᓯᐗᒃ ᑲᔦ᙮

ᑌᐯᒋᑫᔭᓐ, ᐅᐙᐸᑖᓈᐙ ᓴ ᑭᒪᔥᑲᐎᓰᐎᓐ,

ᒦᔥ ᑳᐅᒋ ᑲᔥᑭᑑᓯᒀ

ᑫᑰᓐ ᒋᐃᔑᒋᑫᐙᒡ ᐁᐲᑖᓂᒥᓯᐙᒡ,

ᐹᓂᒫ ᓴ ᑮᐃᔥᒀ ᐱᒥᐊᔮᓂᒡ

ᑭᐱᒫᑎᓰᒪᐞ ᑳᑮ ᔖᐾᐃᒪᒡ

ᑳᑮ ᐃᔑ ᑲᒀᑕᑲᓄᑮᐃᒥᑎᐸᓐ,

17ᑮᓐ ᓴ ᐱᑯ ᑭᑲ ᐲᓈᒃ

ᒌᔑ ᐊᓴᑣ ᐗᒌᕽ ᑳᑎᐯᑕᒧᐗᒡ,

ᑮᓐ ᑳᑮ ᐃᔑ ᐅᓈᐸᑕᒧᐗᒡ

ᐁᐐ ᐃᔑ ᑲᐯᔑᐊᑣ,

ᐊᓇᒥᐁᐎᑲᒥᑯᕽ ᑮᓐ ᐃᑯ

ᑳᑮ ᐅᔑᑕᒫᓱᔭᓐ᙮

18ᑮᓐ ᓴ ᑌᐯᒋᑫᔭᓐ

ᑭᑲ ᓀᐱᒋ ᐅᑭᒫᐤ, ᑮᐃᓇᐊᒨᒃ᙮

ᒥᕒᐃᔭᒻ ᐅᓂᑲᒧᓐ

19ᐊᐲ ᑕᔥ ᐯᕒᐆ Pharaoh ᐅᒥᑕᑎᒨᒪᐞ, ᐅᒦᑳᓱᐎ ᐅᑖᐹᓈᑾᐞ, ᐃᐃ ᑲᔦ ᑳᐅᑖᐸᐃᐌᓂᒡ ᑮᐃᔖᓂᒡ ᑭᒋᑲᒦᕽ, ᑳᑎᐯᒋᑫᒡ ᓴ ᑮᐃᔑᒋᑫ ᑭᒋᑲᒻ ᒋᑮᐌᔮᑲᒥᓭᓂᒃ᙮ ᐃᔅᕒᐃᔭᓬᐊᒃ ᐃᑕᔥ ᐐᓐ ᑮᐹᑾᑲᒥᑳᓂ ᑳᑮ ᐃᔑ ᐱᒧᓭᐙᒡ ᐁᐋᔕᐎᔥᑳᐙᒡ᙮

20ᒦᑕᔥ ᒥᕒᐃᔭᒻ Miriam ᑳᑲᓅᑕᒪᐙᒡ ᑭᔐᒪᓂᑑᓐ ᐁᕒᐊᓅᓐ Aaron ᐌᑕᐌᒫᒡ, ᐅᑮ ᐅᑖᐱᓈᓐ ᔑᓇᐎᓯᒋᑲᓐ᙮ ᑲᑭᓇ ᑕᔥ ᐃᑴᐗᐞ ᐅᑮ ᐱᒥᓂᔕᐅᑰᐞ ᐁᑕᑯᓇᒥᓂᒡ ᔑᓇᐎᓯᒋᑲᓇᓐ ᐁᑮ ᓃᒥᐙᒡ᙮ 21ᒦᔥ ᐅᐅ ᒥᕒᐃᔭᒻ ᑳᐃᓇᐊᕽ,

ᓂᑲᒨᑕᐎᒃ ᑳᑎᐯᒋᑫᒡ,

ᐐᓐ ᓴ ᒫᐗᒡ ᐃᔥᐯᑖᑯᓯ;

ᑭᒋᑲᒦᕽ ᓴ ᐅᑮ ᐃᔑ ᐌᐱᓈᓐ ᒥᑕᑎᒨᓐ,

ᐃᓂ ᑲᔦ ᐯᒥᐗᓀᐸᐃᑯᓂᒡ, ᑮᐃᓇᐊᒻ᙮

ᓂᐱ ᑳᐐᓴᑳᑲᒥᒃ ᐁᑕᔑᑌᒃ

22ᒨᓯᔅ Moses ᐃᑕᔥ ᒥᔅᑯ ᑭᒋᑲᒦᕽ ᐅᑮ ᐅᒋ ᒫᒌ ᓃᑳᓃᑕᒪᐙᐞ ᐃᔅᕒᐃᔭᓬᐊᐞ ᐁᑮ ᐃᔑᐎᓈᒡ ᐌᑎ ᐱᑾᑕᑲᒥᒃ ᔔᕒ Shur ᐁᒋᑳᑌᓂᒃ᙮ ᓂᓱᑮᔑᒃ ᐃᑕᔥ ᑮᐱᒥᐊᔮᐗᒃ ᐱᑾᑕᑲᒥᒃ, ᑳᐐᓐ ᐃᑕᔥ ᐅᑮ ᒥᑲᓰᓈᐙ ᓂᐱ᙮ 23ᐊᐲ ᑕᔥ ᑳᑕᑯᔑᓄᐙᒡ ᒣᕒᐊ#15.23 ᒣᕒᐊ: ᐄᐸᕒᐆᐎ ᑮᔗᐎᓂᕽ ᒣᕒᐊ ᐃᑭᑑᒪᑲᓐ ᓂᐱ ᑳᐐᓴᑳᑲᒥᒃ᙮ Marah ᐁᒋᑳᑌᓂᒃ, ᑳᐐᓐ ᐅᑮ ᑲᔥᑭᑑᓰᓈᐙ ᒋᒥᓂᑴᐙᒡ ᓂᐱ, ᐋᓃᔥ ᐐᑫ ᑮᐐᓴᑳᑲᒥᓂᓂ᙮ ᒦᑕᔥ ᑳᑮ ᐅᒋ ᐃᔑᓂᑳᑌᓂᒃ ᒣᕒᐊ᙮ 24ᒦᑕᔥ ᐯᒫᑎᓯᓂᒡ ᒨᓯᔅ ᑳᑮ ᒫᔑ ᑲᓅᓂᑯᒡ ᐁᑮᐃᑯᒡ, ᐌᑯᓀᓐ ᐃᑕᔥ ᑫᒥᓂᑴᔮᕽ? 25ᒦᔥ ᒨᓯᔅ ᑳᑮ ᐊᓇᒥᐁᑕᐙᒡ ᑳᑎᐯᒋᑫᓂᒡ᙮ ᒦᑕᔥ ᑳᑮ ᐙᐸᑕᐃᑯᒡ ᒥᑎᒃ᙮ ᒦᑕᔥ ᑳᐃᔑ ᐊᐸᑭᑑᒡ ᐃᐃ ᒥᑎᒃ ᐃᐃᒫ ᓂᐲᕽ᙮ ᒦ ᓴ ᐃ ᑳᐃᔑ ᒥᓍᑲᒥᓂᓂᒃ᙮

ᒦᑕᔥ ᐌᑎ ᑳᑎᐯᒋᑫᓂᒡ ᑳᑮ ᐅᓇᑕᒫᑯᐙᒡ ᐃᓈᑯᓂᑫᐎᓇᓐ ᐋᓃᓐ ᑫᐃᔑᒋᑫᐙᒡ, ᒦᑕᔥ ᐌᑎ ᑲᔦ ᑳᑮ ᐃᔑ ᐊᑕ ᑭᑫᓂᒥᑯᐙᒡ᙮ 26ᐅᐅ ᓴ ᐅᑮᐃᑯᐙᓐ, ᑮᔥᐱᓐ ᑕᔥ ᐌᐌᓂ ᐱᓯᑕᐎᔦᒃ, ᓃᓐ ᑳᑎᐯᒋᑫᔮᓐ ᐁᐅᑭᔐᒪᓂᑑᒥᒥᔦᒃ, ᑾᔭᒃ ᐃᔑᒋᑫᔦᒃ ᐁᓈᓴᒦᔮᓐ, ᐱᓯᑕᒣᒃ ᑲᔦ ᓂᑎᓈᑯᓂᑫᐎᓇᓐ, ᑳᐐᓐ ᓴ ᑭᑲ ᑑᑕᐎᓯᓅᓂᓂᒻ ᒌᓈᐱᓀᔦᒃ ᐋᑯᓯᐎᓐ ᑳᑮ ᐃᓈᐱᓀᐊᒀ ᐄᒋᑉ ᑳᑎᓄᐎᐙᒡ᙮ ᓃᓐ ᐅᔕ ᑳᑎᐯᒋᑫᔮᓐ ᑳᐊᑕᐎᐃᓀᒃ, ᐅᑮᐃᑯᐙᓐ᙮

27ᐃᐃᒫ ᓴ ᐄᓬᐊᒻ Elim ᐁᒋᑳᑌᓂᒃ ᑮᐃᔑ ᑕᑯᔑᓅᒃ, ᐁᔑᐊᔮᓂᑭᓐ ᒥᑖᔑᓃᔑᓐ 12 ᒨᑭᒋᐗᓂᐲᓐ, ᓃᔣᓯᒥᑕᓇ 70 ᑲᔦ ᑳᑮ ᐃᔑ ᑕᔑᓂᒡ ᐹᒻ#15.27 ᐹᒻ: ᑳᑭᓍᑯᓯᒡ ᒥᑎᒃ ᐗᓇᑯᕽ ᑳᔑ ᑲᑳᓄᐸᑮᒡ᙮ ᑎᓄᐙᑎᑰᐞ᙮ ᒦᑕᔥ ᐃᐃᒫ ᒌᑭ ᓂᐱ ᑳᐃᔑ ᑲᐯᔑᐙᒡ᙮

Currently Selected:

ᐁᑭᓴᑕᔅ 15: OJBS

Highlight

Copy