ᐁᑭᓴᑕᔅ 12
12
ᒫᐗᒡ ᐃᑯ ᓂᑕᒻ ᐱᒫᒋᐃᑰᐎ ᐐᑾᑎᐎᓐ ᑮᒫᒋᒋᑳᑌᒃ
1 # Lev 23.5; Num 9.1-5; 28.16; Deu 16.1,2. ᒦᑕᔥ ᐅᐅ ᒨᓯᔅ Moses, ᐊᐊ ᑲᔦ ᐁᕒᐊᓐ Aaron ᑳᐃᑯᐙᒡ ᑳᑎᐯᒋᑫᓂᒡ, 2ᐗᐊ ᓴ ᑮᓯᔅ ᓅᑯᒻ ᑳᐱᒪᑭᓱᒡ, ᒦ ᓴ ᐗᐊ ᓂᑕᒻ ᑮᓯᔅ ᑫᒫᑕᑭᓱᒡ ᒋᒫᒋᓭᒃ ᑫᐅᑭᑭᓅᐎᓂᔦᒃ᙮ 3ᒦ ᓴ ᐅᐌᓂ ᑲᑭᓇ ᐃᔅᕒᐃᔭᓬᐊᒃ Israel ᑳᐹᑏᓄᐙᒡ ᑫᐃᓇᑣ: ᒥᑖᓱ ᓴ ᐃᓇᑭᓱᒡ ᐗᐊ ᑮᓯᔅ ᑳᐱᒪᑭᓱᒡ, ᐁᑕᓱ ᐯᔑᑯᒡ ᓴ ᐃᓂᓂ ᐅᑲ ᐅᑖᐱᓈᓐ ᒫᓇᒑᓂᔐᓴᓐ᙮ 4ᑮᔥᐱᓐ ᐃᑕᔥ ᐐᓐ ᐅᓵᒻ ᐊᑳᓰᓄᐙᒡ ᐁᔮᐙᒡ ᑖᐎᓂᕽ ᒋᑭᑕᒸᐙᐸᓐ ᒥᓯᐌ ᒫᓇᒑᓂᔐᓴᓐ, ᐯᔓ ᓴ ᐌᒋ ᐐᒋᑖᒫᐙᒡ ᐅᑲ ᐐᑑᐸᒥᑯᐙᓐ᙮ ᐅᑲ ᐃᔑ ᐅᓈᐸᒫᐙᓐ ᐃᓴ ᐱᑯ ᒋᓇᐃ ᑭᑕᒸᐙᒡ ᑫᑕᔑᐙᒡ᙮ 5ᑳᐯᔑᑯᐱᐴᓉᒡ ᓴ ᑎᓄ ᒫᓇᒑᓂᔐᔅ ᑭᑲ ᐋᐸᒋᐋᐙ, ᑫᑰᓐ ᑳᔑ ᒫᑭᓯᓯᒃ᙮ ᐱᓵᓐ ᓴ ᑭᑲ ᐋᐸᒋᐋᐙ ᒫᓇᒑᓂᔐᔅ ᑯᒫ ᑲᔦ ᒫᓇᑎᑰᔅ᙮ 6ᑭᑲ ᑲᓇᐌᓂᒫᐙᒃ ᐃᑕᔥ ᐲᓂᔥ ᒥᑖᔑᓃᐎᓐ 14 ᒋᐃᓇᑭᓱᒡ ᐗᐊ ᑮᓯᔅ᙮ ᒦᑕᔥ ᐃᐃ ᐊᐲ ᑲᑭᓇ ᐃᔅᕒᐃᔭᓬᐊᒃ ᑫᓂᓵᐙᒡ ᐃᐃ ᐊᔭᐋᐎᔕᐞ ᑮᐊᓂ ᐅᓈᑯᔑᓂᓂᒃ᙮ 7ᐯᒫᑎᓯᐙᒡ ᐃᑕᔥ ᐅᑲ ᐅᑖᐱᓈᓈᐙ ᒥᔅᑸᓂ ᒋᔑᔔᓇᒧᐙᒡ ᑴᑴᒃ ᐃᔥᒀᑌᒫᑎᑯᕽ᙮ ᐃᐃᒫ ᑲᔦ ᑳᐃᔑ ᐱᒥᑖᑾᑰᒋᓂᓂᒡ ᐃᔥᒀᑌᒫᑎᑰᓐ ᐋᓃᑎ ᐙᑳᐃᑲᓂᕽ ᑫᑕᔑ ᐊᒧᒥᓐᒡ ᒫᓇᒑᓂᔐᓴᐞ᙮ 8ᒦᑕᔥ ᐃᐃ ᐊᐲ ᑎᐱᑲᓂᓂᒃ ᑫᐊᐺᐙᒡ ᒋᒦᒋᐙᒡ ᐃᐃ ᐐᔮᔅ᙮ ᐅᑲ ᑕᑯᓈᓈᐙ ᑕᔥ ᑳᐐᓴᑲᓂᓂᒃ ᐊᓃᐲᔑᐎ ᑕᑯᓯᑲᓐ, ᑲᔦ ᐸᑴᔑᑲᓇᓐ ᑳᐅᐱᓯᑲᓂᐎᓯᓂᒃ᙮ 9ᑫᑯ ᑕᔥ ᐐᓐ ᒦᒋᑫᒃ ᐐᔮᔅ ᒋᑭᑲᔥᑭᒃ, ᑫᑯ ᑲᔦ ᑲᐹᑑᑫᒃ᙮ ᒣᒬᒡ ᐃᓴ ᑯᒋᐊᑆᓱᒡ, ᑭᑭᑎᒀᓐ, ᑭᑭᑳᑦ, ᑲᑭᓇ ᑯ ᑲᔦ ᐅᑎᔑᓈᑯᓯᐎᓇᓐ ᐲᒐᔭᐄ᙮ 10ᑫᑯ ᑕᔥ ᐐᓐ ᑫᑰᓐ ᑕᐃᔥᑾᒋᑳᑌᓯᓅᓐ ᐲᓂᔥ ᒋᐊᓂ ᐙᐸᕽ᙮ ᐌᑯᓀᓐ ᐃᑕᔥ ᐃᑯ ᑫᐃᔥᑯᓭᒃ, ᒦ ᓴ ᐃᐌ ᑫᐊᒀᑭᓯᑳᑌᒃ᙮ 11ᒦᑕᔥ ᐅᐅ ᑫᐃᔑᒋᑫᔦᒃ ᐐᓯᓂᔦᒃ, ᑭᑲ ᐃᑾᐱᑑᒻ ᓴ ᑭᑲᔥᑮᑮᐎᓂᐙᓐ ᑭᑭᒋᐱᓱᓂᐙᕽ, ᑭᑲ ᑭᑲᑭᓯᓀᒻ ᑲᔦ, ᐌᔩᑉ ᐃᑕᔥ ᑭᑲ ᐐᓯᓂᒻ᙮ ᒦ ᐄᑐᒃ ᐃᐃᐌ ᑌᐯᒋᑫᔮᓐ ᓂᐱᒫᒋᐃᑰᐎ ᐐᑾᑎᐎᓐ ᑫᐅᒋᑭᑌᓂᒥᑰᔮᓐ᙮
12ᒦ ᓴ ᐃ ᐊᐲ ᑎᐱᑲᒃ, ᒥᓯᐌ ᑳᐐ ᔖᐳᔥᑳᔮᓐ ᐃᐃᒫ ᐄᒋᐸᑮᕽ Egypt ᐁᐐ ᓂᓴᒀ ᓂᑕᒻ ᓀᑖᐎᑭᐙᒡ ᐁᓂᓃᐎᐙᒡ, ᐊᔭᐋᐎᔕᒃ ᐃᑕᔥ ᑲᔦ᙮ ᓂᐐ ᓇᓇᐊᓵᒃ ᑲᔦ ᒪᓂᑑᑳᓇᒃ ᐁᔮᐙᒡ ᐄᒋᐸᑮᕽ᙮ ᓃᓐ ᐄᑐᒃ ᑳᑎᐯᒋᑫᒡ ᓂᑎᓄᐤ᙮ 13ᐃᐃ ᓴ ᒥᔅᑶ ᑳᑮ ᔑᔔᓇᒣᒃ, ᒦ ᓴ ᐃᐌ ᑫᑭᑭᓇᐙᒋᐃᑯᔦᒃ ᐋᓃᑎ ᐙᑳᐃᑲᓂᕽ ᐁᔑᑖᔦᒃ᙮ ᐊᐲ ᑕᔥ ᐙᐸᑕᒫᓐ ᒥᔅᑶ ᑭᑲ ᐋᓶᔥᑲᐎᓂᓂᒻ, ᑳᐐᓐ ᐃᑕᔥ ᑭᑲ ᐸᑲᒥᔥᑳᑯᓰᒻ ᑫᓂᔑᐗᓈᒋᐃᑯᔦᒃ ᐊᐲ ᐸᑭᑌᐊᒫᓐ ᐄᒋᐸᑭ᙮ 14#Exo 23.15; 34.18; Lev 23.6-8; Num 28.17-25; Deu 16.3-8. ᒦ ᓴ ᐅᐌ ᑳᑮᔑᑲᒃ ᑫᐃᓇᑲᒥᑭᓯᔦᒃ ᒋᐐᑾᑏᐗᑲᒥᑭᓯᔦᒃ᙮ ᑫᓂ ᐊᔮᓂᑫ ᓂᑖᐎᑭᐃᑎᐙᒡ ᓴ ᐃ ᑕᓂ ᐃᓇᑲᒥᑭᓯᐗᒃ ᒋᐐᑾᑏᐗᑲᒥᑭᓯᐙᒡ ᑳᑎᐯᒋᑫᓂᒡ ᐅᒋ, ᒦ ᓴ ᐅᐌ ᓀᐱᒡ ᐃᑯ ᑫᔑ ᐊᓇᒥᐁᒋᑫᕽ᙮
ᑮᐊᒧᓐᒡ ᐸᑴᔑᑲᓐ ᐁᐐᑾᑏᐗᑲᒥᑭᓯᕽ
15ᒦᔥ ᑳᑎᐯᒋᑫᒡ ᐁᓂ ᐃᑭᑐᒡ, ᓃᔣᓱᑮᔑᒃ ᓴ ᒥᓂᒃ ᑭᑲ ᐊᒸᐙ ᐸᑴᔑᑲᓐ ᑳᐅᐱᓯᑲᓂᐎᓯᒃ᙮ ᓂᑕᒻ ᐃᑕᔥ ᑮᔑᑲᒃ ᑭᑲ ᐌᐱᓈᒻ ᓴ ᑲᑭᓇ ᐅᐱᓯᑲᓀᔅ ᐁᔮᒃ ᑭᐙᑳᐃᑲᓂᐙᕽ᙮ ᐊᐌᓀᓐ ᐃᑕᔥ ᐃᑯ ᑫᒦᒋᒡ ᑫᑰᓐ ᑳᐅᐱᓯᑲᓂᐗᓂᓂᒃ ᓂᑕᒻ ᑮᔑᑲᓂᓂᒃ ᐲᓂᔥ ᒋᓃᔣᓱᑮᔑᑲᓂᓂᒃ, ᒦ ᓴ ᐊᐌ ᑫᐃᓇᑭᒥᓐᒡ ᐁᐅᒋ ᑎᐯᑖᑯᓯᓯᒃ ᐃᔅᕒᐃᔭᓬᐃᑳᕽ᙮ 16ᓂᑕᒻ ᑕᔥ ᐃᐃ ᐃᔑ ᑮᔑᑲᒃ ᑭᑲ ᑭᑌᑖᒻ ᐊᓇᒥᐁ ᒫᐗᒋᐃᑎᔦᒃ, ᒦᓇᐙ ᑕᔥ ᓃᔣᓱᑮᔑᑲᒃ᙮ ᑳᐐᓐ ᐃᑕᔥ ᐅᐅ ᐃᔑ ᐊᐲ ᑕᐊᓄᑮᓈᓂᐗᓯᓅᓐ᙮ ᐱᓵᓐ ᓴ ᐐᓐ ᑕᑾᔮᒋᒋᑳᑌ ᒦᒋᒻ, ᒦᑕᔥ ᐁᑕᑯᐃ ᑫᐃᔑᒋᑫᓈᓂᐗᕽ᙮ 17ᒦᑕᔥ ᑲᔦ ᐅᐅ ᑫᐃᔑᒋᑫᔦᒃ ᒋᐊᓂ ᑲᓇᐌᑕᒣᒃ ᐅᐅ ᐐᑾᑏᐗᑲᒥᑭᓯᐎᓐ ᑳᐊᒧᓐᒡ ᐸᑴᔑᑲᓐ ᑳᐅᐱᓯᑲᓂᐎᓯᒃ᙮ ᒦ ᐄᑐᒃ ᐅᐅ ᐊᐲ ᐁᑮᔑᑲᒃ ᑳᑮ ᓵᑭᒋᐎᓂᑰᔦᒃ ᐁᔑ ᐹᐹᑏᓄᔦᒃ ᐃᐃᒫ ᐄᒋᐸᑮᕽ᙮ ᒦᑕᔥ ᐃᑯ ᐃ ᑫᔑ ᐐᑾᑏᐗᑲᒥᑭᓯᔦᒃ ᐅᐅ ᐃᔑ ᑮᔑᑲᒃ ᓀᐱᒡ ᐃᑯ ᑫᓂ ᐊᔮᓂᑫ ᓂᑖᐎᑭᐃᑎᔦᒃ ᒋᑲᓇᐌᑕᒣᒃ ᐅᐅ ᐊᓇᒥᐁᒋᑫᐎᓐ᙮ 18ᓂᑕᒻ ᐃᑕᔥ ᑮᓯᔅ ᐱᒪᑭᓱᒡ ᒥᑖᔑᓃᐎᓐ 14 ᐃᓇᑭᓱᒡ ᐊᓂ ᐅᓈᑯᔑᒃ ᑭᑲ ᐅᒋ ᒫᒋᑖᒻ ᒋᐊᒬᒃ ᐸᑴᔑᑲᓐ ᑳᐅᐱᓯᑲᓂᐎᓯᒃ ᐲᓂᔥ ᒋᐊᓂ ᐅᓈᑯᔑᒃ ᓃᔥᑕᓇᔑᐯᔑᒃ 21 ᒋᐃᓇᑭᓱᒡ᙮ 19ᓃᔣᓱᑮᔑᒃ ᐃᑕᔥ ᒥᓂᒃ ᑳᐐᓐ ᑕᐊᔮᓯᓅᓐ ᐅᐱᓯᑲᓀᔅ ᑭᐙᑳᐃᑲᓂᐙᕽ᙮ ᐊᐌᓀᓐ ᐃᑕᔥ ᐃᑯ ᑫᒦᒋᒡ ᑫᑰᓐ ᐌᐱᓯᑲᓂᐗᓂᓂᒃ, ᒦ ᓴ ᐊᐌ ᑫᐃᓇᑭᒥᓐᒡ ᐁᐅᒋ ᑎᐯᑖᑯᓯᓯᒃ ᐁᔑᐊᔮᓂᒡ ᐃᔅᕒᐃᔭᓬᐊᐞ Israel, ᑯᒫ ᑲᔦ ᐲᐎᑌᐎᑴᓐ, ᑯᒫ ᑲᔦ ᐃᒫ ᑳᑕᔑ ᓂᑖᐎᑭᑴᓐ ᐄᒋᐸᑮᕽ᙮ 20ᑫᑯ ᒦᒋᑫᒃ ᑫᑰᓐ ᐌᐱᓯᑲᓂᐗᕽ᙮ ᐋᑎ ᓴ ᐱᑯ ᐁᔑᑖᔦᒃ, ᒦ ᓴ ᐃ ᐁᔑᓈᑾᒃ ᒋᐊᒬᒃ ᐸᑴᔑᑲᓐ ᑳᐅᐱᓯᑲᓂᐎᓯᒃ, ᐅᑮᐃᑰᓐ᙮
ᓂᑕᒻ ᑮᐊᔮᒃ ᐱᒫᒋᐃᑰᐎ ᐐᑾᑎᐎᓐ
21ᒨᓯᔅ Moses ᑕᔥ ᐅᑮ ᐊᑐᒫᐞ ᑲᑭᓇ ᑳᓃᑳᓂᓯᓂᒡ ᐃᔅᕒᐃᔭᓬᐊᐞ Israel ᐁᑮᐃᓈᒡ, ᒫᒑᒃ ᐅᑖᐱᓇᒫᓱᒃ ᐯᔑᒃ ᒫᓇᒑᓂᔐᔅ ᑲᑭᓇ ᑳᑕᔑᔦᒃ, ᒋᓂᓭᒃ ᒋᐐᑾᑳᑫᔦᒃ ᐅᐅ ᑳᐐ ᐱᒫᒋᐃᑰᐎ ᐐᑾᑎᕽ᙮ 22ᐃᓂ ᓴ ᐃᓴᐹᑎᑰᓴᓐ hyssop ᒋᐋᐸᒋᑑᔭᓐ ᒋᒉᑭᐲᓇᒪᓐ ᐃᐃᒫ ᑭᒋ ᐅᓈᑲᓂᕽ ᒥᔅᑶ ᑳᔑ ᐊᑌᒃ᙮ ᒦᑕᔥ ᐃᐃ ᒥᔅᑶ ᑫᐋᐸᒋᑑᔭᓐ ᒋᐊᑑᔭᓐ ᐃᐃᒫ ᐃᔥᐱᒥᕽ, ᐃᔑ ᑴᑴᒃ ᑲᔦ ᐃᔥᒀᑌᒫᑎᑯᕽ᙮ ᑳᐐᓐ ᑕᔥ ᐊᐎᔭ ᑕᓵᑲᐊᓰ ᐃᐃᒫ ᐙᑳᐃᑲᓂᕽ ᐲᓂᔥ ᒋᐊᓂ ᐙᐸᓂᓂᒃ᙮ 23#Heb 11.28. ᐊᐲ ᑕᔥ ᑳᑎᐯᒋᑫᒡ ᐱᒥ ᐊᔮᒡ ᐅᐅᒫ ᐄᒋᐸᑮᕽ Egypt ᐁᐐ ᓂᓵᒡ ᐄᒋᑉ ᑳᑎᓄᐎᓂᒡ, ᐙᐸᑕᕽ ᑕᔥ ᐃᐃ ᒥᔅᑸᓂ ᐃᐃᒫ ᐃᔥᐱᒥᕽ, ᑴᑴᑲᔭᐄ ᑲᔦ ᐃᔥᒀᑌᒫᑎᑯᕽ, ᒦ ᓴ ᐃ ᒋᐹᔑᒋᔥᑲᕽ ᐃᐃ ᐃᔥᒀᑌᒻ᙮ ᑳᐐᓐ ᑕᔥ ᐅᑲ ᐸᑭᑎᓈᓰᓐ ᑳᓂᔑᐌᓂᒡ ᒋᐲᑎᑫᓂᒡ ᑭᐙᑳᐃᑲᓂᐙᕽ ᒋᓂᓯᒥᓀᒃ᙮ 24ᐃᔑᓈᑾᓐ ᑕᔥ ᐅᓄ ᐊᓇᒥᐁᒋᑫᐎᓇᓐ ᒋᓀᐱᒋ ᑑᑕᒣᒃ, ᑭᓃᒑᓂᓯᐙᒃ ᑲᔦ᙮ 25ᐊᐲ ᑕᔥ ᐲᑎᑫᔥᑳᔦᒃ ᐃᐃ ᐊᑮᓂ ᑳᑎᐯᒋᑫᒡ ᑳᑮ ᐊᔓᑕᒪᐎᓀᒃ ᐁᐐ ᒦᓂᓀᒃ, ᒦ ᓴ ᑕᔥ ᐅᐅ ᓀᐱᒡ ᑫᐃᔑᒋᑫᔦᒃ ᑫᐅᒋ ᒫᒥᑲᐎᔦᒃ ᐅᐅ ᐊᓇᒥᐁᒋᑫᐎᓐ᙮ 26ᐊᐲ ᑕᔥ ᐅᒋᒋᓭᓂᒃ ᑭᓃᒑᓂᓯᐙᒃ ᐅᐅ ᐃᓂᓀᒀ, ᐌᑯᓀᓐ ᑕᔥ ᐅᐅ ᑫᐅᒋ ᐃᔑᒋᑫᔮᕽ ᒋᑲᓇᐌᑕᒫᕽ ᐅᐅ ᐐᑾᑎᐎᓐ? 27ᒦᔥ ᐅᐅ ᑫᔑ ᓇᑴᑕᐌᒀ, ᒦ ᓴ ᐃᐌ ᐱᒫᒋᐃᑰᐎ ᐐᑾᑎᐎᓐ ᑳᑮ ᐸᑭᑎᓈᓲᑕᒪᐎᑎᐸᓐ ᑳᑎᐯᒋᑫᒡ ᑫᐅᒋ ᒫᒥᑲᐎᔦᒃ᙮ ᐋᓃᔥ ᐅᑮ ᐋᓶᔥᑳᓇᓐ ᑭᑖᐎᓂᓈᓂᓐ ᑮᓇᐎᓐᑦ ᐃᔅᕒᐃᔭᓬᐊᒃ ᑳᑎᓄᐎᔭᕽ, ᐊᐲ ᑮᐱᒥ ᐊᔮᑯᐸᓀᓐ ᐅᐅᒫ ᐄᒋᐸᑮᕽ᙮ ᐄᒋᑉ ᑳᑎᓄᐎᓂᒡ ᐄᑐᒃ ᐐᓐ ᑮᓂᓵᑯᐸᓐ, ᑮᓇᐎᓐᑦ ᑕᔥ ᐐᓐ ᑳᐐᓐ ᑭᑮ ᐸᐹᒣᓂᒥᑯᓰᓈᓐ᙮
ᒦᑕᔥ ᐃᔅᕒᐃᔭᓬᐊᒃ ᑳᑮ ᐊᓂᒥᑯᑖᐙᒡ ᐁᑮ ᐊᓇᒥᐁᑕᐙᐙᒡ ᑳᑎᐯᒋᑫᓂᒡ᙮ 28ᒦᑕᔥ ᑲᔦ ᑳᐊᓂ ᐃᔑ ᒫᒑᐙᒡ, ᐁᑮ ᐃᔑᒋᑫᐙᒡ ᑳᑎᐯᒋᑫᓂᒡ ᑳᑮᐃᑯᐙᒡ, ᒨᓯᔅ, ᐁᕒᐊᓐ ᑲᔦ᙮
ᑮᓂᓯᑣ ᑸᐎᓭᓴᒃ ᓂᑕᒻ ᑳᓂᑖᐎᑭᐙᒡ
29 # Exo 4.22-32. ᒦᑕᔥ ᐁᐋᐱᑖ ᑎᐱᑲᓂᓂᒃ ᑳᑎᐯᒋᑫᒡ ᑳᑮ ᓂᓵᒡ ᑲᑭᓇ ᑸᐎᓭᓴᐞ ᓂᑕᒻ ᑳᑮ ᓂᑖᐎᑭᓂᒡ ᐃᐃᒫ ᐄᒋᐸᑮᕽ Egypt᙮ ᑭᒋᐅᑭᒫ ᑕᔥ ᐅᑖᐎᓂᕽ ᑮᐃᔑ ᒫᒋᓭᓂ, ᐅᑯᓯᓴᓐ ᑫᑮ ᐊᓂ ᑭᒋᐅᑭᒫᐎᓂᐸᓐ ᐁᑮ ᓂᐳᓂᒡ, ᐲᓂᔥ ᐊᐊ ᑕᑯᓂᑲᓐ ᐅᑯᓯᓴᓐ ᐊᓈᒪᑲᒥᒃ ᑳᑮ ᑭᐸᐅᓐᒡ᙮ ᑲᑭᓇ ᑲᔦ ᓂᑕᒻ ᑳᑮ ᓂᑖᐎᑭᐙᒡ ᐊᔭᐋᐎᔕᒃ ᑮᓂᐳᐗᒃ᙮ 30ᐁᐋᐱᑖ ᑎᐱᑲᓂᓂᒃ ᑕᔥ ᑭᒋᐅᑭᒫ ᐯᕒᐆ Pharaoh ᑮᐗᓂᔥᑳ, ᐃᑭ ᑲᔦ ᐋᓂᑫᐎᑭᒫᒃ, ᑲᑭᓇ ᓴ ᐄᒋᑉ ᑳᑎᓄᐎᐙᒡ ᑮᐗᓂᔥᑳᐗᒃ᙮ ᐋᐱᒋ ᓴ ᑕᔥ ᑮᑭᒋ ᒪᐎᓈᓂᐗᓐ ᐃᐃᒫ ᐄᒋᐸᑮᕽ, ᐋᓃᔥ ᑳᑕᓯᑭᓐ ᑖᐎᓇᓐ ᐅᒋᑕ ᐱᑯ ᐯᔑᒃ ᐊᐎᔭ ᐁᑮ ᓂᐳᒡ᙮ 31ᒦᑕᔥ ᔐᒫᒃ ᑳᑮ ᐊᑐᒫᒡ ᒨᓯᓲᓐ Moses, ᐁᕒᐊᓅᓐ Aaron ᑲᔦ ᒣᒀ ᐁᑎᐱᑲᓂᓂᒃ ᐁᑮᐃᓈᒡ, ᒫᒑᒃ, ᐃᑯᒋ ᐃᔖᒃ, ᒫᒌᔥ ᑲᔦ ᐃᔅᕒᐃᔭᓬᐊᒃ Israel ᒋᓇᑲᓀᒀ ᑳᑎᐯᓂᒪᒀ ᓂᐱᒫᑎᓰᒪᒃ᙮ ᒫᒑᒃ ᐊᑕ ᐊᓇᒥᐁᑕᐎᒃ ᑳᑎᐯᒋᑫᒡ ᑳᑮ ᐃᑭᑐᔦᒃ ᐁᐐ ᐃᔑᒋᑫᔦᒃ᙮ 32ᒫᒌᓂᑾᒃ ᑭᒫᓇᒑᓂᔑᒥᐙᒃ, ᑭᐱᔑᑮᒥᐙᒃ ᑲᔦ, ᒦ ᐃ ᐃᔑ ᒫᒑᒃ ᑖᐱᔥᑰ ᑳᑮ ᐃᑭᑐᔦᒃ᙮ ᑲᑴᒋᒥᒃ ᓴ ᑲᔦ ᑳᑎᐯᒋᑫᒡ ᓃᓐ ᒋᒥᓄᑑᑕᐎᒡ, ᐅᑮ ᐃᓈᐞ᙮
33ᐄᒋᑉ ᑳᑎᓄᐎᐙᒡ ᓴ ᐱᑯ ᐅᑮ ᑲᑳᓱᒫᐙᐞ ᐃᔅᕒᐃᔭᓬᐊᐞ ᐌᐐᑉ ᐃᑯᒋ ᒋᐅᒋ ᐃᔖᓂᒡ ᐃᐃᒫ ᐅᑕᑮᐙᕽ᙮ ᒦ ᓴ ᐅ ᑳᐃᓈᐙᒡ, ᑲᑭᓇ ᐅᔕ ᓂᑲ ᓂᓯᑰᒥᓐ ᑮᔥᐱᓐ ᒫᒑᓯᐌᒃ᙮ 34ᐃᔅᕒᐃᔭᓬᐊᒃ ᐃᑕᔥ ᐅᑮ ᒨᔥᑭᓇᐋᐙᓐ ᐸᑴᔑᑲᓇᓐ ᐌᐱᓯᑲᓂᐎᓯᓂᒃ ᐃᐃᒫ ᐅᓈᑲᓃᕽ ᑳᑮ ᐃᔑ ᓂᑖ ᑮᔑᔂᐙᒡ᙮ ᒦᑕᔥ ᑳᑮ ᐃᔑ ᑲᔥᑮᑭᓈᐙᒡ ᐅᑭᑭᔥᑭᑲᓂᐙᕽ ᐁᑮ ᐱᒥᐗᓀᐙᒡ ᐅᑎᓂᒫᑲᓂᐙᕽ᙮ 35#Exo 3.21,22. ᑮᐃᔑᒋᑫᐗᒃ ᒨᓯᓲᓐ ᑳᑮᐃᑯᐙᒡ᙮ ᐅᑮ ᐊᑐᑕᒪᐙᐙᐞ ᐄᒋᑉ ᑳᑎᓄᐎᓂᒡ ᑫᑰᓇᓐ ᑳᑮ ᐙᐹᐱᑯ ᔔᓂᔮ ᐙᐱᑯᐗᓂᓂᑭᓐ, ᐃᓂ ᑲᔦ ᐌᓵᐎ ᔔᓂᔮ ᐙᐱᑯᐗᓂᓂᑭᓐ, ᑕᑯᔥ ᑲᔦ ᑭᑭᔥᑭᑲᓇᓐ᙮ 36ᑳᑎᐯᒋᑫᒡ ᓴ ᐅᑮ ᑑᑕᐙᐞ ᐄᒋᑉ ᑳᑎᓄᐎᓂᒡ ᒋᑭᑌᓂᒫᓂᒡ ᐃᔅᕒᐃᔭᓬᐊᐞ, ᒦᔥ ᑳᑮ ᐅᒋ ᒦᓈᓂᒡ ᐌᑯᓀᓐ ᐃᑯ ᑳᑮ ᑲᑴᒋᒥᑯᓂᒡ᙮ ᒦᑕᔥ ᑳᐃᔑ ᒪᔕᔥᑯᓇᒪᐎᑣ ᐄᒋᑉ ᑳᑎᓄᐙᒡ ᐅᑕᔭᐄᒥᐙᓐ᙮
ᐃᔅᕒᐃᔭᓬᐊᒃ ᑮᓇᑲᑕᒧᐙᒡ ᐄᒋᐸᑭ
37ᐃᔅᕒᐃᔭᓬᐊᒃ Israel ᓴ ᑕᔥ ᐃᐃᒫ ᐅᕒᐁᒪᓰᓯᕽ Rameses ᐁᒋᑳᑌᓂᒃ ᑮᐅᒋ ᒫᒑᐗᒃ ᐌᑎ ᓴᑲᑦ Succoth ᐁᑮ ᐃᔖᐙᒡ᙮ ᓂᑯᑣᔂᒃ ᒥᑖᔂᒃ 600,000 ᓴ ᑮᑕᔑᐗᒃ ᐃᓂᓂᐗᒃ᙮ ᑳᐐᓐ ᐄᑐᒃ ᐃᑴᐗᒃ, ᐊᐱᓅᒌᔕᒃ ᑲᔦ ᑮᑕᑾᑭᒫᓰᐗᒃ᙮ 38ᐋᐱᒋ ᑲᔦ ᑮᐹᑏᓄᐗᒃ ᑯᑕᒃ ᐯᒫᑎᓯᐙᒡ ᑳᑮ ᒫᒋᓂᔕᐃᑫᐙᒡ᙮ ᐋᐱᒋ ᑲᔦ ᑮᐹᑏᓄᐗᐞ ᒫᓇᒑᓂᔕᐞ, ᐱᔑᑭᐗᐞ ᑲᔦ ᑳᑮ ᒫᒌᓈᐙᒡ᙮ 39ᐅᑮ ᑮᔑᔂᐙᓐ ᓴ ᐃᓂ ᐸᑴᔑᑲᓇᓐ ᑳᑮ ᐅᐱᓯᑲᓂᐎᓯᓂᒃ ᐄᒋᐸᑮᕽ Egypt ᑳᑮ ᐱᐅᒋ ᒫᒑᐙᒡ᙮ ᒦ ᓴ ᐃ ᑳᐊᐲᒋ ᓭᓴᑰᒡ ᓵᑭᒋᐎᓂᑣ ᐃᐃᒫ ᐄᒋᐸᑮᕽ ᑳᐐᓐ ᑲᓇᑫ ᑮᐃᔑᓭᓰᐗᒃ ᒋᓇᐗᐳᓂᑫᐙᒡ, ᑯᒫ ᑲᔦ ᒋᑮ ᑾᔮᒋᐋᐙᐸᓐ ᐸᑴᔑᑲᓇᓐ ᑳᑮ ᐅᐱᓯᑲᓂᐎᓂᒡ᙮
40 # Gen 15.13; Gal 3.17. ᒦ ᓴ ᐃ ᓃᐙᒃ ᓂᓯᒥᑕᓇ 430 ᑕᓱ ᐱᐴᓐ ᐃᔅᕒᐃᔭᓬᐊᒃ ᐃᐃᒫ ᐄᒋᐸᑮᕽ ᑳᑮ ᑕᔑ ᐱᒫᑎᓯᐙᒡ᙮ 41ᒦ ᓴ ᐃ ᐁᑮᔑᑲᓂᓂᒃ ᒪᔮᑯ ᓃᐙᒃ ᓂᓯᒥᑕᓇ ᐁᑮ ᐃᔑᓭᓂᒃ᙮ ᒦᔥ ᐃᐃ ᐊᐲ ᑳᑎᐯᒋᑫᒡ ᐅᐱᒫᑎᓰᒪᐞ ᑳᑮ ᓇᑲᑕᒥᓂᒡ ᐃᐃ ᐄᒋᐸᑭ᙮ 42ᒦ ᓴ ᐃ ᐊᐲ ᐁᑎᐱᑲᓂᓂᒃ ᑳᑎᐯᒋᑫᒡ ᑳᑮ ᓈᑲᑕᐙᐸᒫᒡ ᐃᔅᕒᐃᔭᓬᐊᐞ ᐁᐐ ᓵᑭᒋᐎᓈᒡ ᐃᐃᒫ ᐄᒋᐸᑮᕽ᙮ ᒦ ᓴ ᐃᐌᓂ ᐁᑎᐱᑲᓂᓂᕽ ᑳᑎᐯᒋᑫᒡ, ᑫᐅᒋ ᑭᑌᓂᒥᑯᒡ ᐃᔅᕒᐃᔭᓬᐊᐞ ᒋᐊᔕᐙᐱᓂᒡ ᒥᓂᒃ ᐃᑯ ᑫᓂ ᐊᔮᓂᑫ ᓂᑖᐎᑭᐃᑎᓂᒡ᙮
ᐁᓈᑯᓂᑫᕽ ᑫᐃᔑᒋᑫᕽ ᐊᐲ ᐱᒫᒋᐃᑰᐎ ᐐᑾᑎᕽ
43ᒦᑕᔥ ᒨᓯᔅ Moses, ᐊᐊ ᐁᕒᐊᓐ Aaron ᑲᔦ ᑳᐃᑯᐙᒡ ᑳᑎᐯᒋᑫᓂᒡ, ᒦ ᓴ ᐅᐌ ᐁᓈᑯᓂᑫᕽ ᑫᐃᔑᒋᑫᓈᓂᐗᕽ ᐊᐲ ᐱᒫᒋᐃᑰᐎ ᐐᑾᑎᕽ, ᑳᐐᓐ ᓴ ᐊᐎᔭ ᒣᔭᑭᓯᒡ ᐃᐃᒫ ᑕᐅᒋ ᐐᓯᓂᓰ ᐊᐲ ᐐᑾᑎᐎᓐᒡ᙮ 44ᐯᒦᑖᑫᒡ ᐃᑕᔥ ᐐᓐ ᑳᑮ ᐊᑖᐌᔦᒃ ᐱᓵᓐ ᐃᐃᒫ ᑕᑕᔑ ᐐᓯᓂ ᑮᔥᐱᓐ ᑯᑕ ᐁᑕ ᐋᔕ ᑳᑭᑭᓇᐙᑕᔕᑫᔣᐎᑗᓐ᙮ 45ᐊᐊ ᑕᔥ ᐐᓐ ᐊᒋᓇ ᐁᑕ ᐃᐃᒫ ᑳᐃᔑᑖᒡ, ᐊᐊ ᑕᔥ ᑲᔦ ᑳᐊᓄᑮᐃᓐᒡ ᑳᐐᓐ ᐃᐃᒫ ᑕᐅᒋ ᐐᓯᓂᓰ᙮ 46#Num 9.12; Jhn 19.36. ᐃᐃᒫ ᓴ ᐙᑳᐃᑲᓂᕽ ᑕᑕᔑ ᐐᓯᓂᓈᓂᐗᓐ ᑳᑮ ᑕᔑ ᑾᔮᒋᒋᑲᓂᐎᒡ ᐊᐊ ᐊᔭᐋᐎᔥ᙮ ᑳᐐᓐ ᐊᑾᒌᕽ ᑕᐃᔑᐎᒋᑳᑌᓯᓅᓐ ᐃᐃ ᐐᔮᔅ᙮ ᑳᐐᓐ ᑲᔦ ᐅᑲᓇᓐ ᑭᑲ ᐲᑯᓇᓰᒻ᙮ 47ᑲᑭᓇ ᓴ ᑯ ᑳᑕᔑᐙᒡ ᐃᔅᕒᐃᔭᓬᐊᒃ ᐅᐅ ᑕᐃᔑᒋᑫᐗᒃ ᒋᐐᑾᑏᐗᑲᒥᑭᓯᐙᒡ᙮ 48ᑳᐐᓐ ᐃᑕᔥ ᐐᓐ ᐊᐎᔭ ᑳᑭᑭᓇᐙᑕᔕᑫᔣᓯᐎᓐᒡ ᐃᐃᒫ ᑕᔑ ᐐᑑᑳᓱᓰ ᐐᓯᓂᐎᓐᒡ᙮ ᑮᔥᐱᓐ ᐃᑕᔥ ᐐᓐ ᑳᒪᔭᑭᓯᒡ ᑮᐃᔑ ᑲᐯᔑᒡ ᐁᔑᐊᔮᔦᒃ, ᐊᑕᐌᑕᕽ ᐃᑕᔥ ᑫᐐᓐ ᐁᐐ ᐃᔑ ᐐᑑᑳᓱᒡ ᐱᒫᒋᐃᑰᐎ ᐐᑾᑎᐎᓐᒡ ᐁᐐ ᑭᑌᓂᒫᒡ ᑳᑎᐯᒋᑫᓂᒡ, ᑕᑲ ᐱᓇᒫ ᑕᑭᑭᓇᐙᑕᔕᑫᔣᐗᐞ ᐃᓂᓂᐗᐞ ᐊᔮᓂᒡ ᐅᑖᐎᓂᓃᕽ᙮ ᒦᑕᔥ ᑫᑑᑕᐎᓐᒡ ᑖᐱᔥᑰ ᐃᐃᒫ ᑫᐐᓐ ᐃᔅᕒᐃᔭᓬᐃᑳᕽ ᐁᐅᒋ ᑎᐯᑖᑯᓯᒡ᙮ 49ᒦ ᓴ ᐅᐌᓂ ᐯᔑᑾᓐ ᐃᓈᑯᓂᑫᐎᓐ ᑫᑎᐯᓂᒥᑯᐙᒡ ᐃᑭ ᐃᔅᕒᐃᔭᓬᐃᑳᕽ ᑳᔑ ᓂᑖᐎᑭᐙᒡ, ᐃᑭ ᑲᔦ ᑳᒪᔭᑭᓯᐙᒡ ᑳᔑ ᑲᐯᔑᐙᒡ ᐁᔑᐊᔮᔦᒃ, ᐅᑮᐃᑯᐙᓐ᙮ 50ᑲᑭᓇ ᓴ ᑯ ᐃᔅᕒᐃᔭᓬᐊᒃ ᑮᓇᐃᑕᒨᒃ ᐁᑮ ᐃᔑᒋᑫᐙᒡ ᑳᑎᐯᒋᑫᓂᒡ ᑳᑮ ᐃᔑ ᐊᓅᓈᓂᒡ ᒨᓯᓲᓐ, ᐁᕒᐊᓅᓐ ᑲᔦ ᒋᐃᔑᒋᑫᐎᓐᒡ᙮ 51ᒦᑕᔥ ᐃᐃ ᑳᐃᔑᓭᓂᒃ ᐃᐃ ᐊᐲ ᐁᑮᔑᑲᓂᓂᒃ ᑳᑎᐯᒋᑫᒡ ᑳᑮ ᓵᑭᓯᐋᒡ ᐃᔅᕒᐃᔭᓬᐊᐞ ᐃᐃᒫ ᐄᒋᐸᑮᕽ ᐁᑮ ᑭᒋ ᐹᑏᓄᓂᒡ᙮
Currently Selected:
ᐁᑭᓴᑕᔅ 12: OJBS
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Syllabic Script) © 2008 Canadian Bible Society
