ᐁᑭᓴᑕᔅ 10

ᐸᐸᑭᓀᒃ ᑮᐊᔮᐙᒡ

1ᑳᑎᐯᒋᑫᓂᒡ ᐃᑕᔥ ᒨᓯᔅ Moses ᐅᑮᐃᑰᓐ, ᒫᒑᓐ, ᐊᑕ ᐙᐸᒻ ᐯᕒᐆ Pharaoh, ᓂᑮ ᑑᑕᐙ ᐅᔕ ᒋᔕᔒᐱᑕᕽ, ᐃᐃ ᑲᔦ ᐅᑖᓂᑫᐎᑭᒫᒪᐞ, ᐁᐐ ᑑᑕᒧᐗᒃ ᓂᒫᒪᑳᒋ ᑭᑭᓇᐙᒋᒋᑫᐎᓇᓐ ᒣᑴᔭᐄ ᐁᔑᐊᔮᐙᒡ᙮ 2ᒦᑕᔥ ᐃᐃᐌᓂ ᑫᐊᓂ ᐙᐐᑕᒪᐌᒀ ᑭᓃᒑᓂᓯᐙᒃ, ᑰᔑᓯᐙᒃ ᐃᑕᔥ ᑲᔦ ᐋᓃᓐ ᑳᑮ ᐃᔑ ᒪᓈᒋᐋᓯᐗᒀ ᐄᒋᑉ Egypt ᑳᑎᓄᐎᐙᒡ, ᐋᓃᓐ ᑳᑮ ᐃᔑ ᓈᑯᑕᒪᐗᒀ ᓂᒫᒪᑳᒋ ᑭᑭᓇᐙᒋᒋᑲᓇᓐ ᐁᔑᐊᔮᐙᒡ, ᒋᑭᑫᑕᒣᒃ ᓴ ᓃᓐ ᑳᑎᐯᒋᑫᔮᓐ ᐁᑎᓄᐎᔮᓐ, ᐅᑮᐃᑰᓐ᙮

3ᒦᑕᔥ ᒨᓯᔅ, ᐊᐊ ᑲᔦ ᐁᕒᐊᓐ Aaron ᑳᑮ ᐊᑕ ᐙᐸᒫᐙᒡ ᐯᕒᐆᓐ ᐁᑮᐃᓈᐙᒡ, ᐅᐅ ᓴ ᐃᑭᑐ ᑳᑎᐯᒋᑫᒡ, ᐄᐸᕒᐆᐗᒃ Hebrews ᐅᑭᔐᒪᓂᑑᒥᐙᓐ, ᐋᓃᓐ ᐃᑕᔥ ᒥᓂᒃ ᐙᔕᔒᐱᑕᐎᔭᓐ ᐁᐃᓀᑕᓯᐗᓐ ᒋᑕᐸᓭᓂᒧᔭᓐ ᐁᓈᓴᒦᔮᓐ? ᑕᑲ ᐸᑭᑎᓐ ᓂᐱᒫᑎᓰᒪᒃ ᒋᒫᒑᐙᒡ, ᒋᐊᐎ ᐊᓇᒥᐁᑕᐎᐙᒡ᙮ 4ᑮᔥᐱᓐ ᐋᓃᔥ ᐃᓀᑕᓯᐗᓐ ᒋᐸᑭᑎᓇᑣ ᓂᐱᒫᑎᓰᒪᒃ ᒋᒫᒑᐙᒡ, ᒦ ᓴ ᐃ ᐙᐸᓂᓂᒃ ᒋᐃᔑᒋᑫᔮᓐ ᒋᐸᐸᑭᓀᑳᒃ ᑭᑕᑮᒥᕽ᙮ 5ᑫᐊᐲᒋ ᐹᑏᓄᐙᒡ ᓴ, ᐅᑲ ᐋᑲᐎᔥᑳᓈᐙ ᒥᓯᐌ ᐊᑮᓂ, ᑳᐐᓐ ᑕᔥ ᐊᐎᔭ ᐅᑲ ᐙᐸᑕᓰᓐ ᒥᑕᑲᒥᒃ᙮ ᐅᑲ ᑭᑖᓈᐙ ᓴ ᑲᑭᓇ ᑳᑮ ᐸᓂ ᓂᔑᐗᓈᑕᓂᓂᒃ ᐊᐲ ᑮᓭᓭᑲᓂᓂᒃ᙮ ᐅᑲ ᑭᑕᒸᐙᐞ ᓴ ᑲᑭᓇ ᒥᑎᑰᐞ ᑫᓂᑖᐎᑭᓂᒡ ᑳᔑ ᑭᑎᑫᐌᒃ᙮ 6ᑭᐙᑳᐃᑲᓂᑳᕽ ᓴ ᑕᒪᒨᔥᑭᓀᐗᒃ, ᐅᐙᑳᐃᑲᓂᓃᕽ ᑲᔦ ᑭᑖᓂᑫᐎᑭᒫᒪᐞ, ᑲᑭᓇ ᓴ ᐅᐙᑳᐃᑲᓂᓃᕽ ᐄᒋᑉ ᑳᑎᓄᐎᓂᒡ ᑕᔑ ᒪᒨᔥᑭᓀᐗᒃ᙮ ᑳᐐᓐ ᓴ ᐐᑳ ᐅᐅ ᑎᓄ ᐅᑮ ᐱ ᐙᐸᑕᓰᓈᐙ ᑳᑮ ᐅᑌᑌᔦᒃ, ᑳᑮ ᐅᒥᔔᒥᓯᔦᒃ ᑲᔦ ᐊᑯᓈᒃ ᑳᑮ ᐱ ᐊᔮᐙᒡ ᐅᐅᒫ ᐊᑮᕽ ᐲᓂᔥ ᐅᐅ ᐃᔑ ᐊᐲ, ᐅᑮᐃᓈᐙᓐ᙮ ᒦᑕᔥ ᒨᓯᔅ ᑳᐃᔑ ᓵᑲᐊᕽ ᐁᔑᐊᔮᓂᒡ ᐯᕒᐆᓐ ᐁᑮ ᓇᑲᓈᒡ᙮

7ᐯᕒᐆ ᑕᔥ ᐅᑖᓂᑫᐎᑭᒫᒪᐞ ᐅᑮᐃᑰᐞ, ᐋᓃᓐ ᐃᑕᔥ ᒥᓂᒃ ᐗᐊ ᐃᓂᓂ ᐙᒫᔑᐱᓂᓇᕽ? ᐃᓇᔥᑫ ᐱᓵᓐ ᐸᑭᑎᓐ ᐃᔅᕒᐃᔭᓬᐊᒃ Israel ᒋᒫᒑᐙᒡ, ᒋᐊᐎ ᐊᓇᒥᐁᑕᐙᐙᒡ ᑳᑎᐯᒋᑫᓂᒡ ᐅᑭᔐᒪᓂᑑᒥᐙᓐ᙮ ᑳᐐᓐ ᐃᓇ ᑭᑭᑫᑕᓰᓐ ᐄᒋᐸᑭ ᐁᓂᔑᐗᓈᒋᒋᑳᑌᒃ? ᐅᑮᐃᑰᐞ᙮

8ᒦᑕᔥ ᒨᓯᔅ, ᐊᐊ ᑲᔦ ᐁᕒᐊᓐ ᑳᑮ ᐃᔑᐎᓂᑣ ᐁᔑᐊᔮᓂᒡ ᐯᕒᐆᓐ ᐅᐅ ᐁᑮᐃᑯᐙᒡ, ᒫᒑᒃ, ᐊᐎ ᐊᑕ ᐊᓇᒥᐁᑕᐎᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ! ᐊᐌᓀᓇᒃ ᐃᑕᔥ ᒪᔮ ᑳᐐ ᒫᒑᐙᒡ? ᐅᑮᐃᑯᐙᓐ᙮

9ᒦᔥ ᐅᐅ ᒨᓯᔅ ᑳᐃᔑ ᓇᑴᑕᕽ, ᑲᑭᓇ ᓴ ᓂᐐ ᐃᔖᒥᓐ, ᐁᐐ ᐐᒌᐗᑭᑣ ᐌᔥᑳᑎᓯᐙᒡ, ᑭᒋ ᐊᔭᐋᒃ ᑲᔦ᙮ ᓂᑯᓯᓯᓈᓂᒃ ᑲᔦ, ᓂᑖᓂᓯᓈᓂᒃ ᐃᑕᔥ ᐃᑯ ᑲᔦ᙮ ᒫᓇᒑᓂᔕᒃ, ᒫᓇᑎᑾᒃ, ᐱᔑᑭᐗᒃ ᑲᔦ ᓂᐐ ᒫᒌᓈᓈᓂᒃ, ᐋᓃᔥ ᓂᐐ ᐊᐎ ᐐᑾᑏᐗᑲᒥᑭᓯᒥᓐ ᐅᒋ ᑳᑎᐯᒋᑫᒡ, ᐅᑮᐃᓈᓐ᙮

10ᒦᔥ ᐅᐅ ᐯᕒᐆᓐ ᑳᐃᑯᒡ, ᑳᑎᐯᒋᑫᒡ ᓴ ᓂᑕᐱᒻ ᐅᐅ ᑳᐐᐃᓂᓇᑰᒃ, ᑳᐐᓐ ᐐᑳ ᑭᑖ ᐸᑭᑎᓂᓯᓅᓂᓂᒻ ᒫᒑᔦᒃ ᒋᑕᑸᐙᐸᓐ ᑭᑎᑴᒥᐙᒃ, ᑭᓃᒑᓂᓯᐙᒃ ᑲᔦ! ᑫᒋᓈᒡ ᒫᐐᓐ ᒪᒋᑫᑰᓐ ᑭᓈᓈᑲᑕᐌᑖᒥᐙᑐᒃ᙮ 11ᑳᐐᓐ ᐃᐃ ᑕᐃᔑᓭᓯᓅᓐ! ᑳᐃᓂᓃᐎᔦᒃ ᐁᑕ ᐃᔖᒃ ᒋᐊᐎ ᐊᓇᒥᐁᑕᐌᒃ ᑳᑎᐯᒋᑫᒡ, ᒦ ᐄᑐᒃ ᐃᐃ ᑳᐊᑕᐌᑕᒣᒃ, ᐅᑮᐃᑯᐙᓐ᙮ ᒦᑕᔥ ᑳᐃᔑ ᓵᑭᒋᓂᔕᐅᑣ ᐁᔑᐊᔮᓂᒡ ᐯᕒᐆᓐ᙮

12ᒦᑕᔥ ᒨᓯᔅ ᑳᑮᐃᑯᒡ ᑳᑎᐯᒋᑫᓂᒡ, ᐄᒋᐸᑮᕽ ᐃᓇᑫ ᒥᓯᐌ ᐃᔑ ᓃᒥᓂᑫᓂᓐ ᐸᐸᑭᓀᒃ ᒋᐸᑲᒥ ᐊᔮᐙᒡ᙮ ᐅᑲ ᑭᑖᓈᐙ ᑕᔥ ᑲᑭᓇ ᑫᑰᓐ ᓀᑖᐎᑭᓂᓂᒃ ᑭᑎᑫᐗᑲᒥᑯᕽ, ᑲᑭᓇ ᑫᑰᓐ ᑳᑮ ᐸᓂ ᓂᔑᐗᓈᒋᒋᑳᑌᓂᒃ ᑮᓭᓭᑲᓂᓂᒃ, ᐅᑮᐃᑰᓐ᙮ 13ᒨᓯᔅ ᓴ ᑕᔥ ᐅᑮ ᐃᔑ ᓃᒫᑯᓈᓐ ᐅᓴᑲᐅᓈᒃ ᐃᐃᒫ ᐄᒋᐸᑮᕽ᙮ ᑳᑎᐯᒋᑫᓂᒡ ᐃᑕᔥ ᑮᐃᔑᒋᑫᐗᓐ ᒋᐙᐸᓂᓅᐌᓂᒃ ᐃᐃᒫ ᒥᓯᐌ ᐊᑮᕽ ᑲᐯᑮᔑᒃ, ᑲᐯᑎᐱᒃ ᑲᔦ᙮ ᒦᑕᔥ ᐁᑭᔐᐹᐗᑲᓂᓂᒃ ᑳᑮ ᐸᑲᒥ ᐌᐹᔑᓂᒡ ᐸᐸᑭᓀᐞ᙮ 14#Rev 9.2,3. ᒥᓯᐌ ᓴ ᑯ ᐸᐸᑭᓀᐞ ᑮᐊᔮᐗᐞ ᐄᒋᐸᑮᕽ᙮ ᒥᓯᐌ ᓴ ᐱᑯ ᑮᐃᔑᐊᔮᐗᐞ ᐁᔑ ᐯᐸᑳᓀᑖᑾᓂᓂᒃ ᐃᐃᒫ ᐄᒋᐸᑮᕽ᙮ ᑳᐐᓐ ᓴ ᐐᑳ ᐅᑖᓈᕽ ᐃᐃ ᑮᐱ ᑕᔑᓰᐗᐞ, ᑳᐐᓐ ᒦᓇ ᐐᑳ ᐃᐃ ᑕᐃᔑᐌᐸᓯᓅᓐ᙮ 15ᒥᓯᐌ ᓴ ᑯ ᑮᐊᔮᐗᐞ ᐃᐃᒫ ᐊᑮᕽ, ᑖᐱᔥᑰ ᐁᒪᑲᑌᐙᒃ ᑮᐃᔑᓈᑾᓐ᙮ ᐃᐃ ᑕᔥ ᐸᐸᑭᓀᐞ ᐅᑮ ᑭᑖᓂ ᑲᑭᓇ ᑫᑰᓐ ᑳᑮ ᓂᑖᐎᑭᓂᓂᒃ ᐃᐃᒫ ᐊᑮᕽ᙮ ᑲᑭᓇ ᑲᔦ ᑫᑰᓐ ᓀᑖᐎᑭᓂᓂᒃ ᒥᑎᑯᑳᕽ ᔒᐎᒦᒋᒻ ᐅᑮ ᑭᑖᓂ ᑳᑮ ᐸᓂᓭᓂᒃ ᑮᓭᓭᑲᓂᓂᒃ᙮ ᑳᐐᓐ ᐃᑕᔥ ᑲᓇᑫ ᑫᑰᓐ ᒋᐅᓵᐗᔥᑯᓈᑾᒃ ᒥᑎᑯᑳᕽ, ᑯᒫ ᑲᔦ ᑫᑰᓇᓐ ᓀᑖᐎᑭᑭᓐ ᒧᔐᑲᒥᒃ ᒥᓯᐌ ᐄᒋᐸᑮᕽ᙮

16ᒦᑕᔥ ᒨᓯᔅ, ᐊᐊ ᐁᕒᐊᓐ ᑲᔦ ᐌᔩᑉ ᑳᑮ ᐊᑐᒥᑯᐙᒡ ᐯᕒᐆᓐ ᐁᑮᐃᑯᐙᒡ, ᒦ ᓴ ᐃ ᑮᒪᒋᑑᑕᐗᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ, ᑫᑮᓇᐙ ᑕᔥ ᐁᑮ ᒪᒋᑑᑕᐎᓇᑰᒃ᙮ 17ᑕᑲ ᓴ ᓅᑯᒻ ᐴᓀᑕᒪᐎᔑᒃ ᑳᔑ ᒪᒋᑑᑕᒫᓐ ᑫᔮᐱ ᐋᐱᑎᕽ, ᑲᑴᒋᒥᒃ ᑲᔦ ᑳᑎᐯᒋᑫᒡ ᑭᑭᔐᒪᓂᑑᒥᐙ ᒋᐃᔑᒋᑫᒡ ᐅᐅ ᑫᒀᓂᓴᑫᑖᑾᓂᓂᒃ ᒋᓂᓯᑯᐙᓯᐗᒃ, ᐅᑮᐃᑯᐙᓐ᙮ 18ᒦᔥ ᒨᓯᔅ ᑳᑮ ᓇᑲᓈᒡ ᐯᕒᐆᓐ ᐁᑮ ᐊᓇᒥᐁᑕᐙᒡ ᑳᑎᐯᒋᑫᓂᒡ᙮ 19ᑳᑎᐯᒋᑫᓂᒡ ᓴ ᑮᐃᔑᒋᑫᐗᓐ ᒋᑴᑳᓂᒪᓂᓂᒃ, ᐐᑫ ᓴ ᑕᔥ ᑮᑭᒋ ᓂᑳᐲᐊᓂᓂ᙮ ᒦᑕᔥ ᐃᐃᒫ ᑳᐃᔑ ᒫᒌ ᐌᐹᔑᓂᒡ ᐸᐸᑭᓀᐞ ᑭᒋ ᒥᔅᑯᑲᒦᕽ ᐃᓇᑫ ᐁᑮ ᐃᔑ ᐌᐹᔑᓂᒡ; ᑳᐐᓐ ᓴ ᑲᓇᑫ ᐯᔑᒃ ᐸᐸᑭᓀ ᒋᑮ ᑭᑫᑖᑯᓯᒡ ᐃᐃᒫ ᒥᓯᐌ ᐄᒋᐸᑮᕽ᙮ 20ᒦᑕᔥ ᑳᑎᐯᒋᑫᒡ ᑳᑮ ᑑᑕᐙᒡ ᐯᕒᐆᓐ ᒋᔕᔒᐱᑕᒥᓂᒡ, ᑳᐐᓐ ᐃᑕᔥ ᐅᑮ ᐸᑭᑎᓈᓰᓂ ᒋᒫᒑᓂᒡ ᐃᔅᕒᐃᔭᓬᐊᐞ Israel᙮

ᑮᑲᔥᑮᑎᐱᑲᒃ ᐄᒋᐸᑮᕽ

21ᒦᑕᔥ ᒨᓯᔅ ᑳᐃᑯᒡ ᑳᑎᐯᒋᑫᓂᒡ, ᐃᔥᐱᒥᕽ ᐃᓇᑫ ᐃᔑ ᓃᒥᓂᑫᓂᓐ, ᒋᑲᔥᑮᑎᐱᑲᒃ ᒥᓯᐌ ᐄᒋᐸᑮᕽ Egypt᙮ ᑫᐊᐲᒋ ᑲᔥᑮᑎᐱᑲᒃ ᓴ ᑕᑑᑭᔥᑭᑫᒪᑲᓐ, ᐅᑮᐃᑰᓐ᙮ 22#Psa 105.28; Rev 16.10. ᒨᓯᔅ ᓴ ᑕᔥ ᐃᔥᐱᒥᕽ ᐃᓇᑫ ᑮᐃᔑ ᓃᒥᓂᑫᓂ, ᐐᑫ ᑕᔥ ᑮᑭᐸᑭ ᑲᔥᑮᑎᐱᑲᓐ ᐃᐃᒫ ᒥᓯᐌ ᐊᑮᕽ ᓂᓱᑮᔑᒃ ᒥᓂᒃ᙮ 23ᑳᐐᓐ ᓴ ᐊᐙᒡ ᑮᐙᐸᑎᓰᐗᐞ, ᑳᐐᓐ ᑲᔦ ᐅᑮ ᐅᒋ ᓇᑲᑕᓰᓂ ᐅᑖᐎᓂᓂ ᓂᓱᑮᔑᒃ ᒥᓂᒃ᙮ ᑳᑮ ᐃᔑᑖᓂᒡ ᐃᑕᔥ ᐐᓐ ᐃᔅᕒᐃᔭᓬᐊᐞ Israel ᐐᑫ ᑮᐙᓭᔮᓂ᙮

24ᒦᑕᔥ ᒨᓯᔅ ᑳᑮ ᐊᑐᒥᑯᒡ ᐯᕒᐆᓐ ᐁᑮᐃᑯᒡ, ᒫᒑᒃ ᐊᐎ ᐊᓇᒥᐁᑕᐎᒃ ᑳᑎᐯᒋᑫᒡ᙮ ᐱᓵᓐ ᓴ ᑭᑎᑴᒥᐙᒃ, ᑭᑕᐱᓅᒌᔑᒥᐙᒃ ᑲᔦ ᑭᑲ ᐐᒌᐎᑯᐙᒃ᙮ ᓇᑲᓂᑾᒃ ᐃᑕᔥ ᐐᓐ ᑭᒫᓇᒑᓂᔑᒥᐙᒃ, ᑭᒪᓇᑎᑯᒥᐙᒃ, ᑭᐱᔑᑭᒥᐙᒃ ᑲᔦ, ᐅᑮᐃᑰᓐ᙮

25ᒦᔥ ᐅᐅ ᒨᓯᔅ ᑳᐃᔑ ᓇᑴᑕᕽ, ᒦ ᓴ ᑲᔦ ᐁᔑᓈᑾᒃ ᒋᐅᑎᓇᒪᐎᔮᕽ ᐊᔭᐋᐎᔕᒃ ᑫᐸᑭᑎᓈᔂᑫᔮᕽ, ᑫᐊᒀᑭᓴᒫᕽ ᑲᔦ ᐸᑭᑎᓈᓱᔮᕽ, ᑫᒦᓇᑭᒡ ᑳᑎᐯᒋᑫᒡ ᓂᑭᔐᒪᓂᑑᒥᓈᓐ᙮ 26ᒦ ᓴ ᐃ ᐁᔑᓈᑾᒃ ᒋᒫᒌᓇᑭᑣ ᓂᑕᔭᐋᐎᔑᒥᓈᓂᒃ, ᑳᐐᓐ ᐊᐙᒡ ᐯᔑᒃ ᐊᔭᐋᐎᔥ ᑕᓇᑲᓈᓰ᙮ ᒦᐗᒃ ᓴ ᐃᑭ ᐋᓂᑕ ᑫᐋᐸᒋᐊᑭᑣ ᐊᓇᒥᐁᑕᐗᑭᒡ ᑳᑎᐯᒋᑫᒡ ᓂᑭᔐᒪᓂᑑᒥᓈᓐ᙮ ᐹᓂᒫ ᑕᔥ ᐌᑎ ᑮᑕᑯᔑᓈᕽ, ᒦ ᐃ ᐸᔦᔥ ᒋᑭᑫᑕᒫᕽ ᐌᑯᓀᓐ ᑫᐋᐸᒋᑖᐗᑭᒡ ᐊᓇᒥᐁᑕᐗᑭᒡ ᑳᑎᐯᒋᑫᒡ, ᐅᑮᐃᓈᓐ᙮

27ᒦ ᓴ ᐃ ᑳᑎᐯᒋᑫᒡ ᑳᑮ ᑑᑕᐙᒡ ᐯᕒᐆᓐ ᒋᔕᔒᐱᑕᒥᓂᒡ ᐁᑮ ᐃᓀᑕᓯᓂᒃ ᒋᐸᑭᑎᓈᓂᒡ ᐃᔅᕒᐃᔭᓬᐊᐞ ᒋᒫᒑᓂᒡ᙮ 28ᒦᔥ ᒨᓯᔅ ᑳᑮᐃᑯᒡ ᐯᕒᐆᓐ, ᓂᑯᒋ ᐅᒫ ᐅᒋ ᐃᔖᓐ! ᑫᒋᓈᒡ ᑫᑯ ᒦᓇᐙ ᓈᑯᓯᑫᓐ ᐁᓈᓴᒦᔮᓐ᙮ ᐊᐲ ᑮᔑᑲᒃ ᑫᐙᐸᒥᓈᓐ, ᒦ ᓴ ᐃ ᒋᓂᐳᔭᓐ! ᐅᑮᐃᑰᓐ᙮

29ᒦᔥ ᐅᐅ ᑳᐃᓈᒡ, ᒦ ᓴ ᐃ ᑾᔭᒃ ᐁᐃᑭᑐᔭᓐ; ᑳᐐᓐ ᓴ ᒦᓇᐙ ᐐᑳ ᑭᑲ ᐙᐸᒥᓰ, ᐅᑮᐃᓈᓐ᙮

Currently Selected:

ᐁᑭᓴᑕᔅ 10: OJBS

Highlight

Copy