ᐃᔑᒋᑫᐎᓇᓐ 22

1ᓃᒋ ᐅᒌᒫᑲᓇᒃ, ᑫᑖᑎᓯᔦᒃ ᑕᔥ, ᐱᓯᑕᐎᔑᒃ ᐅᐅ ᓅᑯᒻ ᑳᐐᐃᓂᓇᑰᒃ ᐁᐐᓈᑕᒫᓱᔮᓐ, ᐅᑮᐃᓈᐞ᙮ 2ᐊᐲ ᑕᔥ ᐁᓅᑖᑯᒡ ᐄᐸᕒᐆ Hebrew ᐃᔑᑮᔗᐎᓂᕽ ᐁᐃᔑ ᑲᓅᓈᒡ, ᑳᐐᓐ ᑮᐊᓂ ᓅᑖᑎᓰᐗᐞ᙮ ᒦᑕᔥ ᐅᐅ ᑳᐃᑭᑐᒡ:

3 # Acts 5.34-39. ᑫᓃᓐ ᓴ ᒎ ᓂᑎᓄᐤ, ᐁᑮ ᑕᔑ ᓂᑖᐎᑭᔮᓐ ᑖᕒᓴᔅ Tarsus ᐆᑌᓈᕽ ᓯᓬᐃᔑᔭ Cilicia ᐊᑮᕽ, ᐅᐅᒫ ᑕᔥ ᐆᑌᓈᕽ ᒉᕒᐆᓴᓬᐊᒥᕽ Jerusalem ᓂᑮ ᑕᔑ ᐅᐱᒃ᙮ ᑲᒣᓬᐃᔭᓬ Gamaliel ᐅᔕ ᓂᑮ ᑭᑭᓄᐊᒫᒃ, ᐁᑮ ᓴᓇᑲᓂᓂᒃ ᐁᑭᑭᓄᐊᒪᐎᒡ ᐁᔑᓯᓂᓂᒃ ᐅᓇᔓᐌᐎᓐ ᑳᑮ ᒦᓂᒥᓐᒡ ᑭᑫᑌᔭᐋᒥᓈᐸᓃᐞ᙮ ᐐᑫ ᑕᔥ ᑲᔦ ᓂᑮᐋᑴᑖᓐ ᐁᑮᑲᑴ ᓇᐁᑕᒥᐊᒃ ᑭᔐᒪᓂᑑ ᑖᐱᔥᑰ ᑲᑭᓇ ᑫᑮᓇᐙ ᐅᐅᒫ ᑳᐊᔮᔦᒃ ᓅᑯᒻ ᑳᑮᔑᑲᒃ᙮ 4#Acts 8.3; 26.9-11. ᓂᑮ ᑲᒀᑕᑭᐋᒃ ᓴ ᐃᑭ ᑳᐱᒥᓂᔕᐊᒧᐙᒡ ᐃᔖᐎᓐ ᐲᓂᔥ ᐁᑮᐊᓂ ᐅᒋ ᓂᓴᒀ, ᐁᑮ ᑕᑯᓇᒀ ᐃᑴᐗᒃ, ᐃᓂᓂᐗᒃ ᑲᔦ᙮ ᒦᑕᔥ ᑳᐃᔑ ᐲᒋᐌᐱᓇᒀ ᑭᐸᐅᑏᐎᑲᒥᑯᕽ᙮ 5ᑭᒋᐊᓇᒥᐁᐎᑭᒫ ᐅᔕ ᑖᑎᐹᒋᒧ ᐁᑌᐺᐗᒃ, ᐃᑭ ᑲᔦ ᑲᑭᓇ ᒎᐎ ᐅᓇᔓᐌᐎᓂᓂᐗᒃ᙮ ᒦᐗᒃ ᐅᔕ ᐃᑭ ᑳᑮ ᒦᔑᐙᒡ ᐅᔥᐲᐃᑲᓇᓐ ᒋᒦᓂᒪᒃ ᑭᐐᒋ ᒎᐎᒥᓈᓂᐞ ᑎᒫᔅᑲᔅ Damascus ᐆᑌᓈᕽ ᑳᑮᐊᔮᓂᒡ᙮ ᓃᓐ ᑕᔥ ᓂᑮᐃᔖ ᐌᑎ ᐁᑮᓇᓇᑐᓀᐗᒀ ᐃᑭᐌᓂᐗᒃ ᐁᑮ ᐲᓇᒀ ᐅᐅᒫ ᒉᕒᐆᓴᓬᐊᒥᕽ ᒋᑲᒀᑕᑭᐃᑣ ᐲᐙᐱᑴᔮᐲᕽ ᐁᑮᐃᔑ ᒪᒫᒋᑾᐱᓱᐙᒡ᙮

ᑆᓬ ᑮᑎᐹᑐᑕᕽ ᑳᑮᐃᔑᑴᑳᑎᓯᒡ

6ᑫᑳ ᑕᔥ ᐁᐊᓂ ᓈᐗᑴᒃ ᐯᔓ ᐁᐊᓂ ᐱᒥ ᐊᔮᔮᓐ ᑎᒫᔅᑲᔅ ᐆᑌᓈᕽ, ᒦ ᐃ ᑴᑕᑐ ᑭᒋᑮᔑᑯᕽ ᑳᑮᐅᒋ ᐋᑾᑌᒃ ᐙᑳᔭᐄ ᐃᐃᒫ ᐁᔑ ᐊᔮᔮᓐ᙮ 7ᒥᑕᑲᒥᒃ ᑕᔥ ᓂᑮᐃᔑ ᐸᑭᔑᓐ ᐁᑮᓅᑕᐗᒃ ᐊᐌᑴᓐ ᐁᑲᓅᔑᒡ ᐁᐃᔑᒡ: ᔂᓬ, ᔂᓬ Saul, ᐌᑯᓀᓐ ᐌᒋ ᑲᒀᑕᑭᐃᔭᓐ? ᐁᑮᐃᔑᒡ᙮ 8ᐊᐌᓀᓐ ᑕᔥ ᑮᓐ, ᑌᐯᒋᑫᔭᓐ? ᓂᑮᐃᔑ ᓇᑴᑕᐙ᙮ ᒦᔥ ᑳᐃᔑᒡ: ᓃᓐ ᒋᓴᔅ ᓈᓴᕒᐃᑎᕽ Nazareth ᑳᐅᒌᔮᓐ, ᑳᑲᒀᑕᑫᑕᒥᐃᔭᓐ, ᓂᑮᐃᒃ᙮ 9ᐃᑭᐌᓂᐗᒃ ᑕᔥ ᑳᑮ ᐐᒌᐎᐙᒡ ᐅᑮᐙᐸᑖᓈᐙ ᐁᐙᓭᔮᓂᒃ, ᑳᐐᓐ ᑕᔥ ᐅᑮᓅᑕᐙᓯᐙᐙᓐ ᐊᐌᑴᓇᓐ ᑳᑮ ᑲᓅᔑᒥᒡ᙮ 10ᑌᐯᒋᑫᔭᓐ, ᐋᓃᓐ ᑕᔥ ᑫᐃᔑᒋᑫᔮᓐ? ᓂᑮᐃᓈ᙮ ᐅᐅ ᑕᔥ ᓂᑮᐃᒃ: ᐸᓯᑸᓐ, ᐊᓂᒫᒑᓐ ᒋᐃᔖᔭᓐ ᑎᒫᔅᑲᔅ ᐆᑌᓈᕽ, ᒦᑕᔥ ᐌᑎ ᑲᑭᓇ ᑫᔑ ᐐᑕᒫᑰᔭᓐ ᐋᓃᓐ ᐁᔑ ᐅᓇᑕᒫᑰᔭᓐ ᒋᐃᔑᒋᑫᔭᓐ, ᓂᑮᐃᒃ᙮ 11ᑳᐐᓐ ᑕᔥ ᓂᑮᐙᐱᓰ ᑳᐊᐲᒋ ᔮᑾᑌᒃ᙮ ᓂᐐᒌᐙᑲᓇᒃ ᑕᔥ ᓂᑮᐃᔑ ᓴᑭᓂᑫᓂᑰᒃ ᑎᒫᔅᑲᔅ Damascus ᐆᑌᓈᕽ᙮

12ᐯᔑᒃ ᑕᔥ ᐃᓂᓂ ᐋᓇᓈᔭᔅ Ananias ᐁᔑᓂᑳᓱᒡ, ᑾᔭᒃ ᑳᑮᐊᓇᒥᐁᑕᐙᒡ ᑭᔐᒪᓂᑑᓐ, ᑳᑮ ᑲᓇᐌᑕᕽ ᑲᔦ ᐅᓇᔓᐌᐎᓐ, ᑳᑮ ᑭᑌᓂᒥᑯᒡ ᑲᔦ ᑲᑭᓇ ᒎᐗᐞ ᐃᐃᒫ ᑳᑮᐃᔑᑖᓂᒡ᙮ 13ᒦ ᐊᐌ ᑳᑮ ᐱᐊᑕ ᐙᐸᒥᒡ ᐁᑮᐱ ᓃᐸᐎᒡ ᐁᔑ ᐊᔮᐗᒃ ᐁᑮᐃᑭᑐᒡ: ᔂᓬ Saul ᓃᒋ ᐅᑌᐺᑕᒨ, ᑕᑲ ᒦᓇᐙ ᐙᐱᓐ, ᑮᐃᑭᑐ᙮ ᔐᒫᒃ ᑕᔥ ᓂᑮᐙᑉ, ᐁᑮᐙᐸᒪᒃ᙮ 14ᐅᐅ ᑕᔥ ᑮᐊᓂ ᐃᑭᑐ: ᐅᑭᔐᒪᓂᑑᒥᐙᓐ ᑭᑫᑌᔭᐋᒥᓈᐸᓃᒃ ᐅᔕ ᑭᑮᐅᓇᑭᒥᒃ ᒋᑭᑫᑕᒧᐗᒡ ᐅᑎᓀᑕᒧᐎᓐ, ᒋᐙᐸᒥᒪᒡ ᑲᔦ ᑾᔭᒃ ᐅᑕᓄᑮᐋᑲᓇᓐ, ᒋᓅᑕᐎᒪᒡ ᐃᑕᔥ ᑲᔦ ᑲᓅᓂᒥᒃ᙮ 15ᒦ ᓴ ᐃ ᑫᐃᓇᓄᑮᐃᒃ ᒋᑎᐹᒋᒪᒡ, ᒋᑎᐹᒋᒧᑕᐗᑣ ᑲᑭᓇ ᐊᐎᔭᒃ ᐋᓃᓐ ᑳᑮᐃᔑ ᐙᐸᑕᒪᓐ, ᐋᓃᓐ ᑲᔦ ᑳᑮᐃᓂᑕᒪᓐ᙮ 16ᐌᑯᓀᓐ ᑕᔥ ᓅᑯᒻ ᑫᔮᐱ ᐸᔮᑑᔭᓐ? ᐸᓯᑸᓐ, ᒋᓰᑲᐊᑖᓱᔭᓐ, ᒋᐯᑭᐃᑰᔭᓐ ᑲᔦ ᑭᒪᒋᑑᑕᒧᐎᓂᕽ ᐅᒋ, ᒋᑲᓅᓇᒡ ᑳᑎᐯᒋᑫᒡ ᒋᓈᑕᒪᐎᒃ, ᓂᑮᐃᒃ᙮

ᑆᓬ ᑮᑎᐹᑐᑕᕽ ᑳᑮᐃᔑᐊᑐᒥᓐᒡ ᒋᑲᑮᑭᒫᒡ ᑳᒎᐎᐎᓯᓂᒃ

17ᒦᔥ ᑳᐊᓂ ᐃᑭᑐᒡ: ᐊᐲ ᑕᔥ ᑳᐱᑮᐌᔮᓐ ᐅᐅᒫ ᒉᕒᐆᓴᓬᐊᒥᕽ Jerusalem, ᒣᒀ ᐁᐊᓇᒥᐋᔮᓐ ᑭᒋᐊᓇᒥᐁᐎᑲᒥᑯᕽ, ᐃᔑᓇᒧᐎᓐ ᓂᑮᐅᑎᓯᑯᓐ᙮ 18ᒦᑕᔥ ᑳᑮ ᐙᐸᒪᒃ ᑳᑎᐯᒋᑫᒡ ᐁᑮᐃᔑᒡ: ᐌᔩᑉ, ᓂᑯᒋ ᐅᐅᒫ ᒉᕒᐆᓴᓬᐊᒥᕽ ᐅᒋᒫᒑᓐ ᐋᓃᔥ ᑳᐐᓐ ᑭᑲ ᑌᐺᑖᑯᓰᒃ ᐋᓃᓐ ᐁᓈᒋᒥᔭᓐ, ᓂᑮᐃᒃ᙮ 19ᐅᐅ ᑕᔥ ᓂᑮᐃᓈ: ᑌᐯᒋᑫᔭᓐ, ᐐᓇᐙ ᐄᑐᒃ ᐅᑭᑫᑖᓈᐙ ᐁᑮᐸᐹ ᐃᔖᐗᒃ ᐊᓇᒥᐁᐎᑲᒥᑯᑳᕽ ᐁᑮ ᑭᐸᐗᒀ, ᑲᔦ ᑕᔥ ᐁᑮ ᐸᐸᑭᑌᐗᒀ ᐃᑭ ᑳᑌᐺᑕᐎᒀ᙮ 20#Acts 7.58. ᐊᐲ ᑲᔦ ᑮᓃᐗᓄᐅᓐᒡ ᐃᔅᑏᐱᓐ Stephen ᑳᑮ ᑎᐹᒋᒥᒃ, ᓂᑮᓃᐸᐤ ᐌᑎ ᐁᑮᒥᓍᐸᑕᒫᓐ ᑳᑮ ᑑᑕᐎᓐᒡ, ᐁᑮ ᑲᓇᐌᑕᒧᐗᒃ ᐅᑲᔥᑮᑮᐎᓂᓂ ᐃᐃ ᑳᑮ ᓃᐗᓇᐅᑯᒡ᙮ 21ᐅᐅ ᑕᔥ ᓂᑮᐃᒃ: ᒦ ᐃ ᐃᔑᒫᒑᓐ, ᐙᓴ ᐅᔕ ᑭᐐᐃᔑᓂᔕᐅᓐ ᒋᐊᑕ ᐙᐸᒪᑣ ᑳᒎᐎᐎᓯᒀ, ᓂᑮᐃᒃ᙮

22ᐅᐅ ᑕᔥ ᐁᑮᐃᑭᑐᒡ, ᒦ ᐃ ᑳᐐᓐ ᐊᐗᔑᒣ ᐅᑮ ᐱᓯᑖᑯᓰᐞ ᐋᓃᓐ ᑳᑮᐃᓈᒡ᙮ ᒦᑕᔥ ᑳᐃᔑ ᒫᒌ ᔖᔖᑯᐌᓂᒡ ᐁᑮᐃᑭᑐᓂᒡ: ᓂᑯᒋ ᐃᔑᐎᓂᒃ, ᐊᐎᓂᓯᒃ! ᑳᐐᓐ ᐃᓀᑖᑾᓯᓂᓂ ᒋᐱᒫᑎᓯᐸᓐ! ᑮᐃᑭᑐᐗᐞ᙮ 23ᑮᔖᔖᑯᐌᐗᐞ ᑕᔥ ᐁᑮ ᑮᒋᑯᐌᐱᔥᑲᒥᓂᒡ ᐅᑲᔥᑮᑮᐎᓂᓂ, ᒥᑖᐗᕽ ᑲᔦ ᐁᑮᐊᔨᔥᐱ ᐌᐱᓇᒥᓂᒡ᙮#22.23 ᒥᑖᐗᕽ ᑲᔦ ᐁᑮᐊᔨᔥᐱ ᐌᐱᓇᒥᓂᒡ: ᒎᐗᐞ ᐅᑮ ᑲᒀᓂᓴᑫᑕᒥᓂ ᐅᐅᐌᓂ ᑆᓬ ᑮᐃᑭᑐᒡ ᐁᐐ ᐐᒋᐋᒡ ᑳᒎᐎᐎᓯᓂᒃ, ᒦᑕᔥ ᐅᐅᐌ ᑳᑮᐅᒋ ᑑᑕᒥᓂᒡ ᐁᑮᐃᔥᐱ ᐌᐱᓇᒥᓂᒡ ᒥᑖᐗᕽ, ᐅᐲᓯᑲᐙᑲᓂᓂ ᑲᔦ᙮ 24ᑭᒋ ᔑᒫᑲᓂᔒᐎᑭᒫᓐ ᑕᔥ ᑮᐊᓅᑮᐗᓐ ᑆᓬ ᒋᐲᑎᑲᓂᓐᒡ ᔑᒫᑲᓂᔒᐎᑲᒥᑯᕽ, ᐁᑮᐃᑭᑐᓂᒡ ᒋᐸᐸᔕᔐᐅᓐᒡ, ᒋᑲᑴᒋᒥᓐᒡ ᑲᔦ ᐌᑯᓀᓐ ᐃᐃ ᓇᑫ ᑳᐅᒋ ᔖᔖᑯᐙᓂᑯᒡ ᐯᒫᑎᓯᓂᒡ᙮ 25ᐊᐲ ᑳᒪᒫᒋᑾᐱᓂᓐᒡ ᐁᐐ ᐸᐸᔕᔐᐅᓐᒡ, ᑆᓬ ᐅᑮᐃᓈᓐ ᔑᒫᑲᓂᔒᐎᑭᒫᓐ ᐃᐃᒫ ᑳᓃᐸᐎᓂᒡ: ᐃᓇᑌ ᓇ ᐃᓈᑯᓂᑫᐎᓐ ᒋᐸᐸᔕᔐᐅᑎᐸᓐ ᐊᐎᔭ ᐅᕒᐆᒥᕽ ᐌᒋ ᑎᐯᑖᑯᓯᒡ, ᒪᔑ ᑯᑕ ᑳᑎᐹᑯᓈᓯᐎᓐᒡ ᒋᒥᑭᑳᑌᓂᑭᐸᓐ ᐋᓃᓐ ᑳᐃᔑ ᒪᒫᔑᒡ?

26ᐊᐲ ᑕᔥ ᔑᒫᑲᓂᔒᐎᑭᒫᓐ ᑳᓅᑕᒥᓂᒡ ᐅᐅ, ᐅᑮᐊᑕ ᐙᐸᒫᓂ ᑭᒋ ᔑᒫᑲᓂᔒᐎᑭᒫᓐ ᐁᑮᐃᓈᓂᒡ: ᐋᓃᓐ ᑕᔥ ᐙᐃᔑᒋᑫᔭᓐ? ᐅᕒᐆᒥᕽ ᐅᔕ ᐊᐊ ᐅᒋ ᑎᐯᑖᑯᓯ, ᐅᑮᐃᓈᓂ᙮

27ᑭᒋ ᔑᒫᑲᓂᔒᐎᑭᒫᓐ ᑕᔥ ᐅᑮ ᐱᐊᑕ ᐙᐸᒥᑰᓐ ᐁᑮᐃᑯᒡ: ᐐᑕᒪᐎᔑᓐ, ᐅᕒᐆᒥᕽ ᐃᓇ ᑭᑑᒋ ᑎᐯᑖᑯᔅ? ᐅᑮᐃᑰᓐ᙮

ᐁᐊᐞ, ᑕᔥ ᐅᑮᐃᔑ ᓇᑴᑕᐙᓐ᙮ 28ᑭᒋ ᔑᒫᑲᓂᔒᐎᑭᒫᓐ ᑕᔥ ᑮᐃᑭᑐᐗᓐ: ᓃᐱᐗᐞ ᓴ ᓃᓐ ᓂᑮ ᑎᐸᐃᑫ ᐃᐃᒫ ᐅᕒᐆᒥᕽ ᒋᐅᒋ ᑎᐯᑖᑯᓯᔮᓐ, ᐅᑮᐃᑰᓐ᙮

ᑆᓬ ᑮᐃᑭᑐ: ᓃᓐ ᑕᔥ ᐐᓐ ᓂᑮᐃᔑ ᓂᑖᐎᒃ ᐃᐃᒫ ᒋᐅᒋ ᑎᐯᑖᑯᓯᔮᓐ, ᐅᑮᐃᓈᓐ᙮ 29ᐃᓂᐌᓂᐗᐞ ᑕᔥ ᑳᐐ ᑲᑴᒋᒥᑯᐸᓐ ᔐᒫᒃ ᐅᑮ ᐴᓂᐃᑰᐞ᙮ ᐃᓂᐌᓂᐗᓐ ᑕᔥ ᐐᓐ ᑭᒋ ᔑᒫᑲᓂᔒᐎᑭᒫᓐ ᐐᑫ ᑮᓭᑭᓯᐗᓐ ᐊᐲ ᐁᓅᑕᒥᓐᒡ ᐅᕒᐆᒥᕽ ᐁᐅᒋ ᑎᐯᑖᑯᓯᒡ ᐋᓃᔥ ᐲᐙᐱᑴᔮᐲᓐ ᐅᑮ ᔮᐸᒋᑑᓂ ᐁᑮᒪᒫᒋᑾᐱᓂᑯᒡ᙮

ᑆᓬ ᑮᑲᓅᑕᒫᓱᒡ ᐁᓈᓴᒦᓂᒡ ᐅᑑᓇᔓᐌᐞ

30ᐁᐊᓂ ᐙᐸᓂᓂᒃ ᑕᔥ ᑭᒋ ᔑᒫᑲᓂᔒᐎᑭᒫᓐ ᐅᑮᐐ ᑲᑴ ᑭᑫᑕᒥᓂ ᐌᑯᓀᓂᓂ ᒪᔮ ᒎᐗᐞ ᑳᑮᐃᔑ ᐊᓈᒥᒥᑯᒡ᙮ ᐅᑮ ᐸᑭᑎᓂᑰᓐ ᑕᔥ ᐁᑮᐃᓈᑯᓂᑫᓂᒡ ᑭᒋᐊᓇᒥᐁᐎᑭᒫᐞ, ᐃᐃ ᑲᔦ ᑲᑭᓇ ᒎᐗᐞ ᐅᑑᓇᔓᐌᐎᓂᓃᒥᓂ ᒋᒫᒪᐗᐱᓂᒡ᙮ ᑆᓬ ᑕᔥ ᑮᐃᔑᐎᒋᑲᓂᐎ ᐃᐃᒫ ᐁᑮᐃᔑ ᓃᐸᐎᐃᓐᒡ ᐁᓈᓴᒦᓂᒡ᙮

Currently Selected:

ᐃᔑᒋᑫᐎᓇᓐ 22: OJBS

Highlight

Copy