Maika 3
3
Maikaʼmo Isaleli vayaʼaiteʼmo yagaiʼa neʼapataya vayaʼaifeʼmo ge hapauʼniya gemae
1 #
Yel 22:2-3; Sam 82:1-4 Maikaʼmo hunoʼaeʼmo, Yekopu vayaʼaiteʼmo yagaita neʼapataya vayane, huno, Isaleli vayaʼaiteʼmo yagaita neʼapataya vayane, huno, afiyo. Vayaʼai fatago kavaʼapimo afole aisiyafeʼmo aliʼyatapimo haneʼniye. 2-3#Emo 5:10-14; Sam 53:4; Iyi 11:6-7Haneʼniyaʼmonanafa lapakaemo hosu kavafeʼmo lusi kava huno lahapauʼnigetapa alagepa kavafeʼmo lapaini nehae. Vayaʼnimo afaʼa maiʼnagetapaeʼmo lapakaemo apakufamo gapa kalege apayamufaletiʼmo apame hege hutapa neʼnaya kavakana hutapa maiʼnae. Lapakaemo apakufaʼamo gapa kaletapa ataletetapa apayamufamo aita lo aetetapa apameʼamo haginaletiʼmo lagautapa afumo ameʼamosamofiʼmo lagauʼa nekaya agufa kavaʼmo vayaʼnilegamo nehae. 4#Sam 18:41; Mai 1:28; Aiy 1:15Mago afinaʼmo afole aisigetapaeʼmo lapakaemo Ala kava nefeʼmo keya aegayaʼmonanafa agaemo getapimo oʼafigiye. Lapakaemo hosu kavaʼmo huʼnayaʼmofeʼmo nunumuʼmo hisaya gemo oʼafigiye. 5#Mka 3:11; Aiy 9:16; Mt 7:15Goti gemo aeʼa hakalo huʼa hapa nepaiya vayaʼmogi Goti vayaʼamo hosu kateʼmo apavaleliʼa neʼvae. Ala kava neʼmoʼa ani vayaʼaifeʼmo apava gemo hunoʼaeʼmo, Apakaemo neʼyaʼmo neʼapamiya vayaʼaifeʼmo huʼapaeʼmo, Alagepa hutapa maigae, huʼa nehayaʼmonanafa neʼyaʼmo noʼapamiya vayaʼeʼmo kame hisayafeʼmo alo nehae, huno huʼniye. 6#Aiy 29:10; Iyi 13:22Lapakaemo ani agufa kavaʼmo nehayaʼmofeʼmo Gotiʼa alagamuna agegekana hutapa agesayafeʼmo haniʼilagamo alino lapave lisigetapa oʼagegae. Lapakaemo hanipiʼmo maiʼnetapaeʼmo lapaune gemo afaʼa osugae. Yegetapimo uno lamino falesigetapaeʼmo Goti gemo aeta hakalo hutapa hapa nepaiya vayaʼmo hanipiʼmo maigae. 7#Sam 74:9; Emo 8:11Apaune vayaʼmo apavagage hugiye. Vayaʼmogimo afole aisiya kavaʼmo neʼagaya vayaʼai apakiʼapileʼmo aliʼa afepiʼmo apategae. Gotiʼa geʼapileʼmo aeno atagaina huno hapa opaigiyaʼmofeʼmo apavagage hisigeʼa apaugosafiʼmo aiʼa ati kaegae.
8 #
Aiy 11:2-3; Ap 13:9-12 Apakaemo ani kava huʼa maiʼnayaʼmonanafa nagaemo Yekopu nofi vayaʼe Isaleli nofi vayaʼefeʼmo huʼnaeʼmo, Hosu kavaʼmo huʼnae, huʼna hapa paisuvafeʼmo Ala kava neʼmo Aunemeʼamoʼmo lokiya vaino nateʼnigeno naipafiʼmo lokiyaʼnigi alagepa huʼna aliʼna fako hisuva kavanagi himamuʼagi huno havai teʼniye. 9#Hos 5:1; Mai 17:15Yekopu vayaʼaiteʼmo yagaiʼnaya vayaʼe Isaleli vayaʼaiteʼmo yagaiʼnaya vayaʼeʼmo ani gemo afiyo. Lapakaemo alagepa huʼa ageteʼa aliʼa fako nehaya kavafeʼmo alagi olapauʼniye. Lapakaemo hosu kavaʼmo fatago kavakana hutapa alita afe leʼnae. 10#Yel 22:13-17Lapakaemo Goti taoniʼamo Saiyoni taonimo vayaʼaina nehapaya kavatetiʼmo kige Yulusalemu taonimo hosu kavatetiʼmo kige nehae. 11#Mka 7:3; Hos 4:18Yulusalemu vayaʼaiteʼmo yagaiʼa apateʼnaya vayaʼmogi kutulu monimo alisayafeʼmo agoti gemo afiteʼa aliʼa fako nehae. Mono huʼa neʼapataya vayaʼmogimo miyaʼmo alisayafekeʼmo Goti gemo aliʼa apaya neʼmalae. Apaune gemo aeʼa hakalo huʼa hapa nepaiya apaune vayaʼmogimo monimo alisayafekeʼmo afole aisiya kavafeʼmo ava gemo nehae. Ani kavaʼmo nehayaʼmonanafa apakaemo Ala kava nekeʼmo atafauʼa kako kiliʼneʼa ina gemo huʼapaeʼmo, Ala kava neʼmoʼa lagaeʼeʼmo magokepi lokaeno maiʼniyanageno hosu kavaʼmo lagaeteʼmo afole oʼaigiye, huʼa nehae. 12#Yel 26:18; Ap 6:14Lapakaemo ani kavaʼmo nehayaʼmofeʼmo hoyakoʼmo aliʼa vaisayafeʼmo mopafiʼmo aiʼyumo neʼaiya kava huʼa Saiyoni taonifiʼmo hosimogi aenimo vayu huliʼa uʼa mopamo aiʼyumo aigae. Yulusalemu taonimo heʼa halagape vaisageno no atufaʼageʼmo hanegaiye. Ani Goti mono noʼamo haneʼniya aveleʼmo yahaoʼageʼmo hanesigeno mono noʼmo ohanegaiye.
Currently Selected:
Maika 3: kyg2013
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
