Matiyu 19

Aʼneʼapimo hapa faitalesageʼa visaya kavafeʼmo huʼniya gemae

(Mk 10:1-12; Lu 16:18)

1Yesuʼa ani gemo hapa paiteno Galeliya kotegatiʼmo ataleno Yutiya kotega Yoneni aniʼmo lakaeno uno mugagayaga faligamo maiʼniye. 2Asole vayaʼmo akame huʼa uʼnagenoʼaeʼmo ani haopalega kaita hapauʼniya vayaʼmo alino hapageno apateʼniye. 3#Mt 16:1Mago Falasi mono vayaʼmogimo agaetegamo eʼa amalageka huʼa ge huʼa afisayafeʼmo huʼapaeʼmo, aʼne anagaʼmogimo alu kava alu kavaʼmo hisageʼapaeʼmo anauʼapimogimo afaʼa hapa faiʼa apatalesayana keʼaepa getimo amagiʼa atalegafi kanale kavaʼmo hugae, huʼa afi geʼnagenoʼaeʼmo, 4#Aep 1:27; 5:2Ve yalavelaʼani kavafeʼmo Goti mukufiʼmo ava gemo huʼniya gemo lekana paita oʼafiʼnafiye. Gotiʼa avoʼmo kae maleʼniya gemoʼa hunoʼaeʼmo, Gotiʼa afa yatetiʼmo aepa faino alo huʼniya afinaʼmo ve kanomo alo huteno a kanomo alo huʼniye. 5#Aep 2:24; Ef 5:31Alo huteno Gotiʼa hunoʼaeʼmo, ani kavaʼmo huʼnovaʼmofeʼmo ve anagaʼmogimo aʼmo aliteʼapaeʼmo itaʼapi afoʼapimogimo apataleʼuʼa aʼapiʼeʼmo lokaeʼa maisageno lole kanolaʼmo magoke anakufamo hamalegaiye. 6#Lo 7:2; 1 Ko 7:10-14; Ef 5:28Ani kava huʼana lole kanolaʼmo oʼmaigaʼafa magoke kanolaʼmo maigaʼae. Gotiʼa ani gemo huʼniyaʼmofeʼmo alino lokaeno anateʼniya kanolapatiʼmo mago vayaʼmogimo aliʼa apaheʼana oʼanatesaya kavaʼmo haneʼniye, huno hapa paiʼnigeʼapaeʼmo.

7 # Loa 24:1-4; Mt 5:31 Ani gemo huʼnanaʼmonanafa na kava higeno Moseseʼa hunoʼaeʼmo, mago vekamoʼmo aʼamo ha faino atalegefeʼmo hunoʼaeʼmo ha faino atalesiya avoʼmo kaeno amino, huno huʼniye, huʼa ge huʼa afi geʼnae. 8Huʼa afi geʼnagenoʼaeʼmo, lokiya lapaipamo haneʼniyaʼmofeʼmo Moseseʼa hunoʼaeʼmo, aʼnetapimo afaʼa hapa faita apatalegae, huno huʼniyaʼmonanafa hogoteno ani agufa kavaʼmo ohaneʼniye. 9#Mt 5:32; 1 Ko 7:10-11Nagaemo lapa nepauve, huno, mago vekamoʼmo aʼamoʼmo kumai kavaʼmo osuʼnisiya aʼamo ha faino ataleteno alu a kanomo aliʼnisiyana kumai kavaʼmo nehiye, huʼna lapa nepauve, huno hapa paiʼniye.

10 # 1 Ko 7:1-2,7-9 Geʼamo neʼafiya vayaʼmogimo ha paiʼapaeʼmo, ve yalavelaʼani kavaʼmo ani agufa lokiya kavaʼmo haneʼnisiyana aʼmo oʼalisaya kavaʼmo mago kanale kavaʼmo haneʼniye, huʼa ha paiʼnae.

11Yesuʼa hapa painoʼaeʼmo, muki vayaʼmogimo mani gemo afaʼa oʼafigae. 12Apamiʼnisiya vayaʼmogimo afaʼa afigae. Alu kava alu kavaʼmo haneʼniyaʼmofeʼmo mago vayaʼmo anamo vayaʼmo maiʼnae. Itaʼapimogi aliʼa apateʼnaya afinatetiʼmo mago vayaʼamo meku vayaʼmo maiʼnae. Vayaʼmogi haginaletiʼmo iko nofiʼapimo hatagauʼnaya afinatetiʼmo mago vayaʼamo anamo vayaʼmo maiʼnae. Magoʼamogimo Gotiʼa neʼyagaiya kavatefeʼmo meku vayaʼmo maiʼnae. Afaʼa afiteʼa akame hisaya vayaʼmogi afaʼa afigae, huno hapa paiʼniye.

Yesuʼa mafaʼne anagaʼai apakufaleʼmo ayaʼmo maleno apateʼniya gemae

(Mk 10:13-16; Lu 18:15-17)

13Mago vayaʼmogimo mafaʼne anagaʼai apakufaleʼmo ayaʼmo maleʼnenoʼaeʼmo nunumuʼmo huno apatesiyafeʼmo Yesutegamo apavaleliʼa eʼnageʼapaeʼmo geʼamo neʼafiya vayaʼmogimo ke hapauʼnae. 14#Mt 18:2-3Yesuʼa hunoʼaeʼmo, mafaʼnegana huʼa neʼmaiya vayaʼmogi Gotiʼa yagaino neʼapateya kegiʼyafiʼmo uʼa haiʼa maiʼnageno muki yaʼamo apakaiʼapi yaʼmo haneʼniyaʼmofeʼmo mafaʼne anagaʼmo apatafauta oʼapateta afaʼa apatalegeʼa nagaetegamo eyo, huno hapa paiteno 15apakufaleʼmo ayaʼmo maleno apateteno uʼniye.

Kagemi yaʼamo haneʼniya vekaeʼmo huʼniya gemae

(Mk 10:17-31; Lu 18:18-30)

16Mago vekamoʼmo eno Yesufeʼmo hunoʼaeʼmo, Alagepa tisao, huno, alagepa huʼna maige maige huʼna maisuva yaʼmo alisuvafeʼmo na agufa alagepa kavaʼmo hisuve, huno ge huno afi geʼnigenoʼaeʼmo, na agufa kava higekaeʼmo nagaefeʼmo alagepa tisao, huka hane. 17#Mon 18:5; Lu 10:28Ma mopafi vayaʼmo alagepa vayaʼmo oʼmaiʼnafa Gotikeʼmo magokeʼageʼmo alagepa vekamo maiʼniye. Kagaemo maige maige huʼna maisuva yaʼmo alisuʼekaeʼmo keʼaepa gemo akame huvo, huno ha paiʼniye. 18-19#Hat 20:12-16; Loa 5:16-20; Mon 19:18Ha paiʼnigenoʼaeʼmo, haiya keʼaepa geeʼmo hane, huno afi geʼnigenoʼaeʼmo, Vayaʼmo ohapao. Kumai kavaʼmo osuvo. Kumayaʼmo oʼaliyo. Aigofe faigoko gemo osuvo. Itaka afokalaʼmogani geʼanimo afiteka anaiyafiʼmo maiyo. Kagaikaeʼmo kahau kayamopafiʼmo kahauʼniya kava huno kahaopaleʼmo maiʼnaya vayaʼaifeʼmo kahaino, huno ha paiʼnigenoʼaeʼmo, 20neya vekamo maiʼnova afinatetiʼmo mani muki keʼaepa geʼamo akame hume hume eʼna hemeniʼeʼmo akame nehuve. Magoʼe huʼna na agufa kavafeʼmo haiʼna metaleʼnove, huno afi geʼniye. 21#Mt 6:20; Lu 12:33; Ap 2:45; Ap 4:34-37Yesuʼa ani gemo afitenoʼaeʼmo, muki geʼamo akame huteka haika hapaisanafeʼmo uka kagemi yakamo alinikuka maketi hugeʼa miya faiʼa hano hutesageka kagemi yaʼapimo ohaneʼnisiya vayaʼaina fako huka apamigenoʼa alopa kagemi yakamo kokuʼnapiʼmo haneno. Apamiteka eka nakame huvo, huno ha paiʼniyaʼmonanafa 22neya vekamoʼmo ani gemo afitenoʼaeʼmo alopa kagemi yaʼamo haneʼniya vekamo maiʼniyaʼmofeʼmo aipamoʼmo kana huʼnigeno ataleno uʼniye.

23Ago ataleno utegenoʼaeʼmo Yesuʼa geʼamo neʼafiya vayaʼaifeʼmo hunoʼaeʼmo, alagi lama gemo lapa nepauve, huno, kagemi yaʼapimo haneʼniya vayaʼmo Gotiʼa yagaino neʼapateya kopiʼmo haisaya kaʼmo lokiya vaiʼniya kaʼmo haneʼniye. 24Magoʼe gemo lapa paigesuve, huno huteno, Kamo afumoʼmo kukena nefakaniya nekaya kapiʼmo faleno uno haisiyafeʼmo aiseʼamo lokiya vaiʼniyaʼmonanafa kagemi yaʼapimo haneʼniya vayaʼmo Gotiʼa yagaino neʼapateya kopiʼmo uʼa haisayafeʼmo magoʼe huno lokiya vaiʼniye, huno hapa paiʼniye. 25Geʼamo neʼafiya vayaʼmogimo ani gemo afiteʼapaeʼmo lusi kava huʼa hapau aiteʼapaeʼmo, uʼa haisaya kaʼmo ohaneʼnisiyaʼmoʼmo haiya vayaʼmogimo afaʼa uʼa haisageno hapau vaino apakufamo alino katino apategaiye, huʼa afi geʼnae. 26#Aep 18:14; Yop 42:2Yesuʼa aulu hapaeno apaketenoʼaeʼmo, vayaʼmogimo alagi osisaya agufa kavaʼmo Gotiʼa muki ani agufa kavaʼmo afaʼa hugiye, huno hapa paiʼniye.

27Pitaʼa hunoʼaeʼmo, afiyo, huno, lagaemo kakame hisunafeʼmo muki yatimo ago ataleta eʼnone. Lagaemo na agufa yaʼmo aligune, huno afi geʼnigenoʼaeʼmo 28#Mt 25:31; Lu 22:30; Le 3:21Yesuʼa hunoʼaeʼmo, alagi lama gemo lapa nepauve, huno, saufa mopaʼe kokuʼnaʼeʼmo afole aisigenoʼaeʼmo Vemo mafaʼnemoʼmo ha le konali yaʼamo aliteno yagaino neʼapateya siyaʼaleʼmo fai maiʼnisigetapaeʼmo nakame nehaya vayaʼmogitapamo yagaita apatesaya siyamo tuolofuʼa siyateʼmo fai maiʼnetapaeʼmo tuolofuʼa Isaleli nofi vayaʼaiteʼmo yagaita apategae. 29#Hi 10:34Muki vayaʼmogimo nagaetefeʼmo noʼapimo ataleʼa eʼnisafi konagaʼapimogi apataleʼa eʼnisafi apasaʼapimogi apataleʼa eʼnisafi afoʼapimogi apataleʼa eʼnisafi itaʼapimogi apataleʼa eʼnisafi mafaʼneʼapimo apataleʼa eʼnisafi hoyaʼapimo ataleʼa eʼnisafi huʼnisaya vayaʼmogimo vani hataletiʼa agufa yaʼmo aliteʼa alagepa huʼa maige maige huʼa maigae. 30#Mt 20:16; Lu 13:30Maigayaʼmonanafa hemenimo mago asole vayaʼmo hogote vayaʼmo henaga vayaʼmo maigae. Ani kava huʼa hemenimo mago asole vayaʼmo henaga vayaʼmo hogote vayaʼmo maigae, huno hapa paiʼniye.

Currently Selected:

Matiyu 19: kyg2013

Highlight

Copy