Matiyu 14

Yoniʼa aniʼmo faleno neʼapateya vekamo faliʼniya gemae

(Mk 6:14-29; Lu 3:19-20; 9:7-9)

1Ani afinaʼmo Helotiʼa Galeliya koteʼmo yagaino neʼapateya gamani vekamoʼmo Yesufeʼmo ava gemo huʼnageno afiʼniye. 2Afitenoʼaeʼmo aliʼyaʼamo neʼaliya vayaʼaifeʼmo hapa painoʼaeʼmo, Agaemo Yoniʼa aniʼmo faleno neʼapateya vekamo maiʼniye. Ago amagiʼnogeno faliʼnigeʼa kiʼa ateʼnayatetiʼmo halate he tiʼniyaʼmofeʼmo lusi himamuʼaletiʼmo ani aliʼyaʼmo neʼaliye, huno hapa paiʼniye.

3-4 # Mon 18:16; 20:21; Mt 11:2 Hogoteno Helotiʼa ina kavaʼmo huʼniye. Agaemo aganaʼamo Filipi aʼmo Helotiyasiʼmo aliʼnigeno Yoniʼa ha painoʼaeʼmo, aʼmo aliʼnana kavaʼmo keʼaepa gemo amagika ataleʼnane, huno ha paiʼniyaʼmofeʼmo Helotiʼa atafauno nofi kino ateteno kalavusi huno ateʼniye. 5#Mt 21:26Helotiʼa Yoniʼmo kamitimo amagisiyafeʼmo huʼniyaʼmonanafa Yu vayaʼmogimo huʼapaeʼmo, Gotitegati gemo alinineno aeno hakalo huno hapa nepaiya vekamo maiʼniye, huʼa apakesamo afiʼnayaʼmofeʼmo vayaʼaifeʼmo koli huteno afaʼa ateʼniye. 6Helotiʼa itaʼamoʼmo alino ateʼniya afinaʼmo halate afole aiʼnigeno neʼyaʼmo yagita huʼnigeʼa eʼa neʼyaʼmo neʼnageno Helotiyasi aʼmafaʼnemoʼmo muki vayaʼai apaulagaleʼmo ohageʼnigeno Helotiʼa lusi kava huno amuse huno ateʼniye. 7Agaefeʼmo polomasi gemo ha painoʼaeʼmo, kahauʼnisiya yafeʼmo naha paigeʼnao, afaʼa kamiguve, huno huteno agoʼyamo ataleno ha paiʼniye. 8Itaʼamoʼmo aʼmafaʼneʼaeʼmo ha paiʼniya gemo ha painoʼaeʼmo, Yoniʼa aniʼmo faleno neʼapateya vekamo lugoʼamo heka hatagauka agenopaʼamo alika yuvapafiʼmo malelikeka namiyo, huno ha paiʼnigeno 9yagaino neʼapateya kini vekamoʼmo ani geeʼmo hau huʼniye. Hau huʼniyaʼmonanafa muki vayaʼai apaulagaleʼmo aʼmafaʼneʼaeʼmo agoʼyamo ataleno ha paiʼniyaʼmofeʼmo ati vekaeʼmo, 10#Mt 17:12uka lugoʼamo hatagauka agenopaʼamo alinikeka amiyo, huno ha paiʼnigeno ati vekamoʼmo uno lugoʼamo hatagauʼniye. 11Agenopaʼamo alino yuvapafiʼmo maleteno alinineno ani aʼmafaʼnemo amiʼnigeno alininuno itaʼamoʼmo amiʼniye. 12Yoni geʼamo neʼafiya vayaʼmogimo eʼa agufaʼamo alini uʼa kiʼa ateteʼa uʼa Yesufeʼmo ha paiʼnae.

Yesuʼa faefu tauseniʼa vayaʼmo neʼyaʼmo apamiʼniya gemae

(Mk 6:31-44; Lu 9:10-17; Yo 6:1-13)

13Yesuʼa ani gemo afitenoʼaeʼmo agaiʼageʼmo maisiyafeʼmo sipifiʼmo uʼa kaʼme kotegamo maiʼnae. Aniʼmo lakaeno uʼniye, huʼa huʼnageʼa afiteʼapaeʼmo asole vayaʼmo taoniʼafati taoniʼafatiʼmo eʼa akame huʼa visayafeʼmo ani agiʼnaleʼmo uʼnae. 14#Mt 9:36Yesuʼa ani agiʼnaleʼmo eno avaʼyi hutenoʼaeʼmo sipifatiʼmo uno lamino apakeyana asole vayaʼmo eʼa maiʼnageno apaketenoʼaeʼmo lusi kava huno hau huno apateteno kaita hapauʼniya vayaʼmo alino hapageno apateʼniye. 15Yegemo uno lamino falegefe huʼnigeʼapaeʼmo geʼamo neʼafiya vayaʼmo agaetegamo eʼapaeʼmo, mani koteʼmo kaʼme koteʼmo eta maiʼnonaʼmofeʼmo hani hugefe hiyanagi muki vayaʼmo alika apategeʼa uʼa taoniʼapifati taoniʼapifatiʼmo neʼyaʼapimo miya faiyo, huʼa ha paiʼnageno 16Yesuʼa hunoʼaeʼmo, visaya kaʼmo ohaneʼniye. Neʼyaʼmo mani vayaʼmo apamiyo, huno hapa paiʼnigeʼapaeʼmo, 17faefuʼa peleti mayaʼe lole noyamelaʼeʼmo aliʼnone, huʼa ha paiʼnae.

18Yesuʼa hunoʼaeʼmno, aliniteta namiyo, huno hapa paitenoʼaeʼmo 19#Mt 15:35-39; Mk 8:6-10muki vayaʼaifeʼmo kahauleʼmo itopale maiyo, huno hapa paiteno faefuʼa peleti mayaʼe lole noyamelaʼeʼmo aliʼneno alino maku huno kokuʼnapi ageʼneno alino auleno ateteno peleti mayamo akaya heno geʼamo neʼafiya vayaʼmo apamiʼnigeʼa muki vayaʼaina apamiʼnae. 20#2 Kin 4:44Muki vayaʼamogimo neʼa apamu huteʼapaeʼmo ataleʼnaya neʼyaʼmo atupaʼamo geʼamo neʼafiya vayaʼmogimo aliʼa tuolofuʼa hona yuvapafiʼmo maleʼnae. 21Ani neʼyaʼmo neʼnaya vayaʼmo faefu tauseniʼa agufa ve anagaʼmogimo neʼnae. Na magi aʼne anagaʼe mafaʼne anagaʼmogiʼeʼmo neʼnafi huʼa lekana opaiʼnae.

Yesuʼa ani agotofuleʼmo eʼniya gemae

(Mk 6:45-52; Yo 6:16-21)

22Yesuʼa muki vayaʼmo neʼyaʼmo ago apamiʼnigeʼa netagenoʼaeʼmo Yesuʼa geʼamo neʼafiya vayaʼaifeʼmo hapa painoʼaeʼmo, sipifiʼmo uta hogoʼneteyo, huno hapa paiteno muki vayaʼaifeʼmo, notapilegamo he tita viyo, huno hapa paiʼniye. 23#Lu 6:12; 9:28Hapa paitenoʼaeʼmo nunumuʼmo hisiyafeʼmo agaiʼageʼmo aise avefiʼmo uno haino maiʼniye. Hani hugefeʼmo huʼniya kanaleʼmo agaiʼageʼmo maiʼnigeno 24sipimo ani kotu folagapiʼmo afagiʼaleʼmo neʼvigenoʼaeʼmo sipimo uʼniya kategatiʼmo yasimo alinineno sipimo atafauno ateʼniye.

25Kotiti agufa afinaʼmo Yesuʼa apakaetegamo ani agotofuleʼmo eʼniye. 26#Lu 24:37Neʼegeʼapaeʼmo geʼamo neʼafiya vayaʼmogi agayana ani agotofuleʼmo eʼnigeʼa ageteʼapaeʼmo alopa gefatiʼmo ge huʼapaeʼmo, afene, huʼa huteʼa lusi kava huʼa koli huteʼa kagekage huʼnae. 27Yesuʼa hunoʼaeʼmo, nagaekeʼmo neʼogi koli osuta lokiya vaitapa maiyo, huno hapa paiʼniye. 28Hapa paiʼnigeno Pitaʼa hunoʼaeʼmo, Ala kava nene, huno, kagaemo neʼesanaʼmoʼmo ge hugeʼnao ani agotofuleʼmo vino, huno huʼnigenoʼaeʼmo, eno, huno huʼniye. 29#Yo 21:7Pitaʼa sipifatiʼmo ataleno ani agotofuleʼmo Yesutegamo neʼunoʼaeʼmo 30lusi kava huno yasimo aliʼnigeno koli huteno anipiʼmo alino lapanegefeʼmo nehunoʼaeʼmo, Ala kava nene, huno, nagufamo alika katika nato, huno alopa gefatiʼmo ge huʼniye. 31#Mt 8:26Yesuʼa malage huno eno ayateʼmo alino he tino atetenoʼaeʼmo, aiseʼamo kagesamo afika fatago nehana vekagi na kava higekaeʼmo lole kagesamo neʼafine, huno ha paiʼniye.

32-33 # Mk 4:39 Sipifiʼmo uʼana nehaiʼagenoʼaeʼmo yasimo oʼaliʼnigeʼa sipifiʼmo maiʼnaya vayaʼmogimo ani kavaʼmo ageteʼa agaefeʼmo mono huteʼapaeʼmo, alagi Goti mafaʼneʼamo maiʼnane, huʼa ha paiʼnae.

34Magokepi lokaeʼa Genesaleti haopalega uʼa avaʼyi huʼnageʼa 35ageteʼapaeʼmo, Yesuʼmae, huʼa huteʼa muki haopalegamo aliʼa apateʼnageʼa uʼa hapa paiʼnageʼa muki alu kaita alu kaitaʼmo hapauʼniya vayaʼmo Yesutegamo apavaleliʼa eʼnae. 36#Mt 9:20-21; Mk 5:27-28; Lu 8:44Apakaemo huʼapaeʼmo, kahao ke honanageta kukenakamo atupaʼaleʼmo ame alisunafekeʼmo lahauʼniye, huʼa huʼnagenoʼaeʼmo, he, kanalene, huno huteno muki ame aliʼnaya vayaʼmo kaitaʼapimo alino hapageno apateʼnigeʼa alagepa huʼa maiʼnae.

Currently Selected:

Matiyu 14: kyg2013

Highlight

Copy