Matiyu 13

Avina yafeʼmo aeno kalafefa gemo huʼniya gemae

(Mk 4:1-9; Lu 8:4-8)

1Ani afinaʼmo nopatiʼmo atalenuno lamino ani kotu agiʼnaleʼmo itopaleʼmo maiʼnigeʼapaeʼmo 2#Lu 5:1-3asole vayaʼmo eʼa aliʼa anupa huʼa maiʼnagenoʼaeʼmo he tino sipifiʼmo uno haino fai maiʼnigeʼapaeʼmo ani agiʼnaleʼmo he tiʼa maiʼnae. 3Agaemo aeno kalafefa gefatiʼmo magoʼe gemo huno hapa painoʼaeʼmo, avina yaʼmo nehakaleya vekamoʼmo avina yaʼmo hakalesiyafeʼmo uʼniye. 4Avina yaʼmo yaga auno hakaleme hakaleme uʼnigeno mago avina yaʼmo kateʼmo asagauno aiʼnigenoʼaeʼmo nama anagaʼmogi eʼa neʼnae. 5Mago avina yaʼmo yafa agotofuleʼmo aise mopamo haneʼniya yateʼmo asagauno aiteno aise mopamo haneʼniyaʼmofeʼmo malage huno hageʼniye. 6Hageʼniyaʼmonanafa yegemoʼmo haineno neʼagegenoʼaeʼmo hafuʼyamo oʼaeʼniyaʼmofeʼmo leno faluteteno leno saga liʼniye. 7Mago avina yaʼmo aufe nofiʼmo haneʼniya yapiʼmo asagauno aiteno hageʼniyana aufe nofiʼmoʼa ago kino ati kaeʼniye. 8Mago avina yaʼmo alagepa mopafiʼmo asagauno aiteno hageno uno haiteno magoke yosafatiʼmo vani hataletiʼamo aege sigisitiʼamo aege tetiʼamo aege huʼniye. 9Gemo afisaya lapakesamo haneʼnisiyana mani gemo afiyo, huno hapa paiʼniye.

10Geʼamo neʼafiya vayaʼmogi agaetegamo eʼa, na kava higekaeʼmo aeka kalafefa gemo huka hapa nepaine, huʼa ge huʼa afi geʼnagenoʼaeʼmo, 11Gotiʼa yagaino neʼapateya kavafeʼmo ava gemo aepaʼamo alino fala ki maleʼniya aepaʼamo ago lapamiʼniyaʼmonanafa apakaemo oʼapamiʼniye. 12#Mt 25:29; Mk 4:25; Lu 8:18; 19:26Aliʼnisaya vayaʼmo magoʼe huno apamisigeno magoʼe yaʼapimo hanegaiyaʼmonanafa oʼaliʼnisaya vayaʼai apayapatiʼmo aiseʼamo aliʼnisaya yaʼmo hapa falegaiye. 13#Loa 29:4Apakaemo aulu heʼa neʼagayaʼmonanafa noʼagae. Apaketafo huʼa neʼafiyaʼmonanafa afiʼa aeto nosayaʼmofeʼmo aeʼna kalafefa gemo huʼna hapa nepauve. 14#Aiy 6:9-10; Yo 12:40; Ap 28:26-27Aiyeyaʼa Gotitegati gemo alinineno aeno hakalo huno hapa paiʼniya vekamoʼmo huʼniya gemo apakaeteʼmo afole aiʼniye. Aiyeyaʼa hunoʼaeʼmo,

Afige afige hutapa maigayaʼmonanafa afita aeto osugae. Agege agege hutapa maigayaʼmonanafa ageta aeto osugae. 15Ani gelefeʼmo apaipamo lokiya vaige apakesamo akanige apaulagamo ali huge huʼnigeʼa maiʼnae. Ani kava huʼa oʼmaiʼnaesinana apaulagafatiʼmo ageteʼa apakesafatiʼmo afiteʼapaeʼmo apaipafiʼmo ageteʼa nagaetegamo aiʼa afe leʼa esageʼna aliʼna alagepa huʼna apateʼnovesine,

huno avoʼmo kae maleʼniye.

16 # Lu 10:23-24 Apakaemo afiʼa aeto osuʼnayaʼmonanafa Gotiʼa alino auleno lapateʼniyaʼmofeʼmo lapaulagafatiʼmo agege lapakesafatiʼmo afige hutapa maiʼnae. 17Lama gemo lapa nepauve, huno, asole vayaʼmogi Gotitegati gemo alini eʼa aeʼa hakalo huʼa hapa nepaiya vayaʼe fatago vayaʼmogiʼeʼmo lapakaemo neʼagaya kavaʼmo agesayafeʼmo hapauʼniyaʼmonanafa oʼageʼnae. Lapakaemo neʼafiya gemo afisayafeʼmo hapauʼniyaʼmonanafa oʼafiʼnae.

18Ani kavatefeʼmo avina yafeʼmo aeʼna kalafefa gemo huʼnova gemo aepaʼamo afiyo. 19Mago vayaʼmogi Gotiʼa yagaino neʼapateya kavafeʼmo ava gemo afiteʼapaeʼmo alagepa huʼa noʼafisayana hosu vekamoʼmo eno apaipafiʼmo hakaleʼniya avina yaʼmo hapa faleno alinino neʼviye. Ina kava huno kateʼmo asagauno aiʼniya avina yakana huno haneʼniye. 20Mago vayaʼmogi Goti geʼamo afiteʼapaeʼmo malage huʼa apamogaga neʼaiya kava huno yafa agotofuleʼmo asagauno aiʼniya avina yakana huʼa maiʼnae. 21Hapafuʼyamo oʼaeʼniyaʼmofeʼmo aise afinaʼmo neʼmaiye. Goti geʼamo afiʼnayaʼmofeʼmo hanageke yaʼmo alige apaini huʼa apatege nehaya kavaʼmo apakaete afole neʼaigeʼapaeʼmo ago ataleʼa asagauʼa neʼaiye. 22#Mt 6:19-34; Lu 12:16-21; 1 Ti 6:9-10,17Mago vayaʼmogi Goti geʼamo afiteʼapaeʼmo ma mopafiʼmo maisaya kavafekeʼmo hapausoli huteʼa kagemi yaʼmoʼa humi neʼapateya yaʼmo alisayafekeʼmo hapaʼye nehigenoʼaeʼmo Goti geʼamo ago aeno ati nekaeya kava huno aufe nofiʼmo haneʼniya yapiʼmo asagauno aiʼniya avina yakana huʼa maiʼnae. 23Mago vayaʼmogi Goti geʼamo afiteʼapaeʼmo gemo aepaʼamo alagepa huʼa afiʼnaya vayaʼmo alagepa mopafiʼmo asagauno aiʼniya avina yakana huʼa maiʼnae. Apaipafatiʼmo alagamo aeʼniye. Mago vayaʼamogimo vani hataletiʼa alagamo aege mago vayaʼamogimo sigisitiʼa alagamo aege mago vayaʼamogimo tetiʼa alagamo aege huʼnae, huno hapa paiʼniye.

Hoyafi inofeʼmo aeno kalafefa gemo huʼniya gemae

24Magoʼe huno aeno kalafefa gemo huno hapa painoʼaeʼmo, Gotiʼa yagaino neʼapateya kavaʼmo mago hoyagana huno haneʼniye. Mago vekamoʼmo hoyaʼafiʼmo alagepa avina yaʼmo hakale maleʼniye. 25Muki vayaʼamo ago apau kaleʼnagenoʼaeʼmo kameʼamoʼmo eno vitigana inoʼmo viti hoyafiʼmo fai maleno uʼniye. 26Viti neʼyaʼmo ago hageteno alagamo aeʼnigeʼapaeʼmo ageʼnayana aigofe viti inoʼmo mago hageʼnigeʼa ageʼnae. 27Ageteʼapaeʼmo aliʼyaʼamo neʼaliya vayaʼmogimo uʼa hoya aepa vekaeʼmo, ala nene, huʼa, alagepa avina yaʼmo hakale maleʼnana yapatiʼmo haiya kava huno ani aigofe viti inoʼmo afole aiʼniye, huʼa ge huʼa afi geʼnagenoʼaeʼmo, 28Kameʼnimoʼa ani kavaʼmo huʼniye, huno hapa paiʼnigeʼapaeʼmo, uta ani inoʼmo alita atalesupiye, huʼa afi geʼnagenoʼaeʼmo, 29haʼao, huno, inoʼmo alisayategamo vitiʼeʼmo alita vakaigayanagi afa ateyo 30#Mt 3:12vitiʼe inoʼeʼmo magokepi lokaeno haneme haneme neʼvisigeʼapaeʼmo neʼyaʼmo alisaya afinaʼmo aligae. Neʼyaʼmo lesigeʼnaeʼmo neʼyaʼmo alisaya vayaʼaifeʼmo hunoʼaeʼmo, hogoteta inoʼmo alita atafiʼmo kaesayafeʼmo hayaeta maleʼnetapa viti neʼyaʼageʼmo alita neʼyaʼmo neʼmalova nopiʼmo maleyo, huʼna hapa paiguve, huno hapa paiʼniye.

Mago avina yaʼmo agiʼamo masatetiʼe falaovafiʼmo neʼataya yaʼmo agiʼamo yisiʼefeʼmo aeno kalafefa gemo huʼniya gemae

(Mk 4:30-32; Lu 13:18-19)

31Yesuʼa magoʼe huno aeno kalafefa gemo huno hapa painoʼaeʼmo, Gotiʼa yagaino neʼapateya kavaʼmo haneʼniya kava huno mago vekamoʼmo masateti avina yaʼmo hoyaʼafiʼmo fai maleʼniya avina yakana huno haneʼniye. 32Masateti avina yaʼmo mago aise avina yaʼmo haneʼnigeno muki avina yaʼamoʼa ago aeno aga seʼniyaʼmonanafa hageno alopa hetenoʼaeʼmo muki alu neʼyaʼamo ago aeno neʼagase. Hagenuno haige haige huno kosino yosagana huno haiʼnigeʼapaeʼmo nama anagaʼmogi haleliʼeʼa akopaleʼmo hakaleʼa neʼmaiye, 33huno huteno Yesuʼa magoʼe huno aeno kalafefa gemo huno hapa painoʼaeʼmo, Gotiʼa yagaino neʼapateya kavaʼmo haneʼniya kava huno mago aʼmoʼa falaovafiʼmo neʼataya yaʼmo agiʼamo yisimo alino alopa falaovafiʼmo ate maleʼnigenoʼaeʼmo uneno huno muki falaovafiʼmo aliʼyaʼmo aliʼnigeno aeno apafu nele, huno hapa paiʼniye.

34Yesuʼa mani muki geʼamo aeno kalafefa gegeʼmo huno hapa paiʼniyana huno afole aino hapa opaiʼniye. 35#Sam 78:2Ani ge huno hapa nepaigenoʼaeʼmo Gotitegati gemo alinineno aeno hakalo huno hapa nepaiya vekamoʼmo huʼniya gemo afole aiʼniye. Ani gemoʼa hunoʼaeʼmo,

Aeʼna kalafefa gefatikeʼmo huʼna hapa paiguve. Ma mopamo alo huʼniya afinatetiʼmo alino fala kino maleʼniya gemo aeʼna hakalo huʼna hapa paiguve,

huno avoʼmo kae maleʼniye.

Inofeʼmo aeno kalafefa gemo huʼniya gemo aepaʼamo huʼniya gemae

36Yesuʼa muki vayaʼaifeʼmo hunoʼaeʼmo, inagi ago utaleyo, huno hapa paiteno alino apateʼnigeʼa utagenoʼaeʼmo nopiʼmo uno haino maiʼniye. Maiʼnigeʼapaeʼmo geʼamo neʼafiya vayaʼmo agaetegamo eʼa, inofeʼmo aeka kalafefa gemo huka hapa paiʼnana gemo aepaʼamo laha paiyo, huʼa ge huʼa afi geʼnae.

37Yesuʼa hunoʼaeʼmo, hoyaʼafiʼmo alagepa avina yaʼmo hakaleʼniya vekamo maiʼniya kava huno Vemo mafaʼnemo maiʼniye. 38#1 Ko 3:9Hoyamo haneʼniya kava huno muki ma mopamo haneʼniye. Alagepa avina yaʼmo haneʼniya kava huʼa Gotiʼa yagaino neʼapateya vayaʼmo maiʼnae. Hosu inoʼmo haneʼniya kava huʼa hosu vekamo vayaʼamo maiʼnae. 39Kame vekaʼamo maiʼniya kava huno Nevoʼa maiʼniye. Neʼyaʼmo alisaya afinaʼmo haneʼniya kava huno ma mopamo hano hisiya afinaʼmo haneʼniye. Neʼyaʼmo alisaya vayaʼmo maiʼnaya kava huʼa enisole vayaʼmo maiʼnae. 40#Mt 7:16; Yo 15:6Inoʼmo aliʼa atafiʼmo kaeʼnaya kava huno hano hisiya afinaʼmo 41#Mt 24:31; Mt 25:31-46; Mk 13:27Vemo mafaʼnemoʼmo enisole vayaʼamo alino apatesigeʼa uʼa yagaino neʼapateya kegiʼyafatiʼmo aliʼa hapafaiʼa apatalegae. Hosu kavaʼmo hisayafeʼmo aliʼa he tiʼa neʼapataya vayanagi muki hosu vayanagi huʼa apavaleliʼuʼa 42#Mt 8:12alopa atafiʼmo yaga auʼa apatalesageʼa aviʼyaʼmo huge apavepiʼmo haniʼa agafu kige huʼa maigae. 43#Nen 12:3Ani afinaʼmo afole aisigeʼapaeʼmo fatago vayaʼmo Afoʼapimoʼmo yagaino neʼapateya koteʼmo yegegana huʼa aeʼa ha leʼa maigae. Lapakesa haneʼnisiyana mani gemo afiyo, huno hapa paiʼniye.

Magoʼe huno aeno kalafefa gemo huno hapa paiʼniya gemae

44 # Mt 19:29; Lu 14:33; Fl 3:7 Gotiʼa vayaʼaiteʼmo yagaino neʼapateya kavaʼmo haneʼniya kava huno mago vekamoʼmo alopa moniʼamo kesifiʼmo maleteno hoyaʼafiʼmo keli kafiteno kesiʼamo ani kelifiʼmo maleteno aeno ati kae maleteno ataleno uʼniye. Uʼnigeno henagaʼamo mago vekamo uno ani hoyafiʼmo aiʼyu aiʼniyategamo ani kesimo ageno avateteno halate aeno ati kae maleteno uno muki kagemi yaʼamo alino maketi huʼnigeʼa miya faiʼnageno monimo aliteno ani mopamo miya faiʼniye. Alisiyafeʼmo lusi kava huno amogaga aiʼniyaʼmofeʼmo muki kagemi yaʼamo ago alino ataleʼniye.

45Halate Gotiʼa vayaʼaiteʼmo yagaino neʼapateya kavafeʼmo lapa paiʼnaeʼmo, magoʼe huno monimo alisiyafeʼmo alininuno maketi nehiya vekamoʼmo alagepa sesumo miya faisiyafeʼmo kahauya hume hume uʼniye. 46Agaemo hogote sesumo lusi moniletiʼmo miya nefaiya sesumo age maleteno uno muki kagemi yaʼamo alino maketi huʼnigeʼa miya faiʼnageno moni aliteno uno ani sesumo miya faiʼniye.

47Halate Gotiʼa vayaʼaiteʼmo yagaino neʼapateya kavafeʼmo lapa paiʼnaeʼmo, vayaʼmogimo umenimo solovala anipiʼmo yaga au maleʼnageʼapaeʼmo muki alu noyame alu noyamemo uʼa haiʼa maiʼnae. 48#Mt 22:9-10Umenifiʼmo haiʼa havai teʼnageʼapaeʼmo halauli eʼa ani kahaepaleʼmo maleteʼa itopaleʼmo maiʼneʼapaeʼmo aliʼa fako huʼa alagepa noyameʼamo paketifiʼmo maleteʼa hosu noyameʼamo aliʼa yaga auʼa neʼatalae. 49Ani kava huʼa ma mopamo hano hisiya afinaʼmo enisole vayaʼmo emiʼeʼa hosu vayaʼmo fatago vayapatiʼmo apavaleliʼuʼa 50#Mt 13:42; Lu 13:28alopa atafiʼmo yaga auʼa apatalesageʼa aviʼyaʼmo huge apavepiʼmo haniʼa agafu kige huʼa maigae, huno hapa paiʼniye.

51Yesuʼa hunoʼaeʼmo, muki mani gemo aepaʼamo afiʼnafiye, huno apafi geʼnigeʼapaeʼmo, he, huʼa huʼnae. 52Agaemo hapa painoʼaeʼmo, Afamo anagaʼai afoʼapimo noʼapifiʼmo alagepa yaʼmo saufamo ageno maleʼniya yaʼe akeyaʼvilaga ageno maleʼniya yapatiʼeʼmo alino afamo anagaʼamo neʼapamiya kava huʼa muki keʼaepa gemo tisa vayaʼmogimo Gotiʼa yagaino neʼapateya kavafeʼmo aliʼa apaya maleʼnageʼa afiʼnaya tisa vayaʼapimogi saufa geʼe atafa geʼeʼmo aliʼa neʼapamiye, huno hapa paiʼniye.

Nasalasa taonifiʼmo maiʼnaya vayaʼmogimo Yesuʼmo apakameʼyamo amiʼnaya gemae

(Mk 6:1-6; Lu 4:16-30)

53 # Mt 7:28 Yesuʼa ani aeno kalafefa gemo hapa paiteno ani haopalegatiʼmo ataleno uʼniye. 54#Yo 7:15Agaiʼa taonifiʼmo uno apakae mono nopiʼmo uno haino alino apaya maleʼnigeʼa afiʼa hapau aiteʼapaeʼmo, ani vekamoʼmo afiteno ageʼniya kavaʼe noʼagona agufa aune kavaʼmo nehiya himamuʼaʼeʼmo haiyatetiʼmo aliʼniye. 55#Yo 6:42Ala agi vekamo mafaʼneʼamo oʼmaiʼniyaʼmonanafa noʼmo nekiya vekamo velafaʼmo mafaʼnemo maiʼniye. Itaʼamoʼmo Maliyaʼa maiʼniye. Yemisiʼagi Yosefeʼagi Saimoniʼagi Yutasiʼmogi huʼa aganaʼamogimo maiʼnae. 56Muki asaʼamogimo maige huʼneʼa lagaeʼeʼmo magokepi maiʼnagi muki yaʼamo haiyatetiʼmo aliʼniye, huʼa huteʼa 57#Yo 4:44hosu apaugosa kaliteʼa apakameʼyamo amiʼnae.

Yesuʼa hapa painoʼaeʼmo, Gotitegati gemo alinineno aeno hakalo huno hapa nepaiya vekamo ala agiʼamo aliʼnisiyaʼmoʼmo taoniʼafiʼmo maiʼnaya vayaʼmogiʼe afamo anagaʼamogiʼeʼmo ala agiʼamo oʼamigae, huno hapa paiʼniye. 58Taoniʼafiʼmo maiʼnaya vayaʼmogi agaefeʼmo apakesamo afiʼa fatago osuʼnayaʼmofeʼmo taoniʼafiʼmo asole noʼagaya agufa aune kavaʼmo osuʼniye.

Currently Selected:

Matiyu 13: kyg2013

Highlight

Copy