Aiyeya 65
65
Gotiʼa gemo oʼafi kavaʼmo nehaya vayaʼmo kayoʼmo apamiteno aliʼyaʼamo neʼaliya vayaʼmo alino auleno apategaiye, huno huʼniya gemae
1 #
Aiy 55:5; Lo 9:25-26,30; Sak 2:11 Ala kava neʼmoʼa ina gemo hunoʼaeʼmo, Nagaefeʼmo ge huʼa nafi okeʼnaya vayaʼmo naipa nagesamo aliʼna apave liʼnove. Nagaefeʼmo kahauya nosaya vayaʼmogimo nageʼnae. Nagaemo nagiʼnimo apakaeteʼmo oʼmaleʼnova vayaʼaifeʼmo huʼnaeʼmo, Manile maiʼnove, manile maiʼnove, huʼna hapa paiʼnove. 2#Mai 1:24; Yel 5:23; Aiy 55:7Nagaemo muki neteʼaʼe uneʼaʼeʼmo geʼnimo oʼafiʼa himuʼnamu kavaʼmo nehaya vayaʼmo apavalesuvafeʼmo nayatalaʼmo aliʼna ataleʼna apakava maiʼnove. Apakaemo apakaiʼapimo apakesamo neʼafiya kavaʼmo kanale osu kavaʼmo nehae. 3#Loa 32:16-21; Yel 3:6Apakaemo nagae naulagaleʼmo apakaefeʼmo naipamo leʼna apateteʼna gemo hapaisuva agufa kavakeʼmo nehae. Apakaemo hoyalegamo ofalinimo huteʼa aigofe gotigimo mopaletiʼmo alo huʼnaya yafatetiʼmo alo huʼnaya yafa hiʼyalamuteʼmo alagepa atumo neʼaiya laʼnefamo atafiʼmo nekae. 4#Nap 19:16; Mt 8:28; Loa 14:8Apakaemo haniʼilagamo uʼa faliʼnaya vayaʼmogi kanoluleʼmo maiʼneʼa afulafaʼmo ameʼamo nege oʼneyo, huʼna huʼnova agufa afumo kaeʼnaya aniʼamo nege huʼnae. 5#Mt 9:11; Lo 2:17-29; Mai 16:5Apakaemo alu vayaʼaifeʼmo ina gemo huʼa hapa paiʼapaeʼmo, Nagaemo aeʼna kaga seʼna alagi alagepa naote vekamo maiʼnovaʼmofeʼmo lapakaemo nagaeteʼmo afagiʼaleʼmo maitetapa nagaetegamo oʼmeyo. Apakaemo nagaemo lusi kava huno naipamo lesiya agufa kavaʼmo nehagenoʼaeʼmo naipamo neleya kavaʼmoʼa nagoʼya kapatiʼmo halinamo neʼaiye. Muki neteʼe uneʼeʼmo naipamo lena neʼapatove. 6#Sam 50:21; Yel 16:18Afiyo, huʼna, Nagaemo hosu kavaʼapimo mukuʼnifiʼmo avoʼmo kae maleʼnovanageʼna afaʼa oʼmaigufa anonaʼapilefeʼmo kayoʼmo apamiguve. He, hapaifiyaleʼmo kayoʼmo apamiguve. 7#Mt 23:31-36; Yel 5:9Nagaemo lapakaitapi hosu kavatapilefenagi lapakinago vayaʼmogi hosu kavaʼapilefenagi huʼna kayoʼmo lapamiguve. Lapakinago vayaʼmogimo anaga aveleʼmo uʼa haiʼa alagepa atumo neʼaiya laʼnefamo ofalinimo kaege aveleʼmo maiʼneʼa huʼa faipa huʼa natege huʼnayaʼmofeʼmo muki huʼnaya hosu kavaʼmo anonaʼapilefeʼmo aliʼna fako huʼna kayoʼmo apamiguve.
8 #
Emo 9:8; Lo 9:27-29 Ala kava neʼmoʼa ina gemo hunoʼaeʼmo, Mago vekamoʼmo nofiʼmo akopaʼamo yaga auno atalesiyafeʼmo nehisigenoʼaeʼmo alu vekamoʼmo hunoʼaeʼmo, Nagava maiʼno. Magoʼamo alagepa nofi alagamo haneʼniye. Lagaemo afaʼa alita mago nofi alagafati aniʼmo alo hugune, huno huʼniya kava huʼna ani agufa kavaʼmo huguve. Nagaemo muki aliʼyaʼnimo neʼaliya Isaleli vayaʼnimo aliʼna hano huʼna oʼapatalegauve. 9#Aiy 10:20-22; Lo 11:5-7Nagaemo Yekopu nofi vayapatiʼmo mago apakinago vayaʼmo aliʼna afole aiʼna apategauve. Yuta nofi vayapatiʼmo magoʼamogimo nagae aveleʼmo haneʼniya mopamo aligae. Lekana paiʼna apateʼnova vayaʼnimogimo ani mopamo aliteʼa aliʼyaʼnimo neʼaliya vayaʼmo ani mopaleʼmo maigae. 10#Aiy 35:2; Hos 2:15Nagaefeʼmo kahauya huʼa nageʼnaya vayaʼnimogi sipisipi anagaʼapimo Saloni kagoʼmu koteʼmo maige pulumaka anagaʼapimo Ako kagoʼmu kateʼmo havaeʼa maige hugae.
11 #
Yel 17:13; 1 Ko 10:20-21 Alagepa huʼa maigayaʼmonanafa lapakaemo nataleta utapa nagaefeʼmo mono nehaya Saiyoni aote avelefeʼmo lapake kanige aigofe gotigitefeʼmo monoʼmo hutetapaeʼmo ofalinimo apamige huta maiʼnaya vayaʼmogitapae, huʼna, 12#Mon 26:25; 2 Sit 36:16; Aiy 1:16nagaemo naipeletiʼmo kamitimo lapaisayafeʼmo lekana paiʼna lapategauve. Keya aeʼna ge huʼnovana geʼnileʼmo aeta atagaina huta ge osuʼnayaʼmofeʼmo lapakaemo mopafiʼmo ape huta maiʼnisageʼa kame vayatapimogimo lugotapimo hatagaugae. Nagaemo huʼnova gemo oʼafitapa amagita ataleʼnae. Lapakaemo nagae naulagaleʼmo namogaga oʼaiʼnova agufa hosu kavaʼmo huʼnae.
13 #
Mal 3:18; Aiy 66:5,14 Ani kavaʼmo huʼnayaʼmofeʼmo nagaemo Ala kava neʼmo Gotiʼnamo ina gemo huve. Afiyo, huʼna, Aliʼyaʼnimo neʼaliya vayaʼmo neʼyaʼmo negayaʼmonanafa lapakaemo lapaka tegaiye. Afiyo, huʼna, Aliʼyaʼnimo neʼaliya vayaʼmo aniʼmo negayaʼmonanafa lapakaemo anifeʼmo lahapaugiye. Afiyo, huʼna, Aliʼyaʼnimo neʼaliya vayaʼmo apamogaga aigayaʼmonanafa lapakaemo lapavagage hugiye. 14#Aiy 52:8; Mt 8:12Afiyo, huʼna, Aliʼyaʼnimo neʼaliya vayaʼmo apaipafiʼmo apamogaga aigayaʼmofeʼmo yokemo hugayaʼmonanafa lapakaemo lapaipafiʼmo lahapau hugayaʼmofeʼmo aviʼyaʼmo huge lapaipamoʼmo lusi kava huno kana huge hugiyaʼmofeʼmo kage kage hugae. 15#Mai 10:7; Aiy 65:9; 62:2Ala kava neʼmo Gotiʼa kamitimo lapamagigiyaʼmofeʼmo lekana paiʼna lapateʼnova vayaʼmogitapamo lapakitapiletiʼmo vayaʼaifeʼmo huʼapaeʼmo, Gotiʼa alino Yu vayakana huno hamaleno lapateno, huʼa huteʼa lifana huʼa apategae. Apategayaʼmonanafa nagaemo aliʼyaʼnimo neʼaliya vayaʼaifeʼmo alu apakimo aegauve. 16#Yel 4:2; Aiy 45:24-25; 12:1Gotiʼa oʼapamagiʼniya vayaʼmo ma mopafiʼmo maiʼneʼapaeʼmo apakaiʼapimo alino auleno apatesiyafeʼmo lama geʼageʼmo nehiya Gotiʼa agiʼaletiʼmo apakaiʼapimo aliʼa auleʼa apategae. Ina kava huʼa vayaʼmogimo apagoʼyamo ataleteʼapaeʼmo lama geʼageʼmo nehiya Goti agiʼaletiʼmo gemo hugae. Nagaemo akeyaʼvilagamo hanageke kavaʼapieʼmo nage kaniʼna ataleʼnovaʼmofeʼmo aliʼna auleʼna apategauve.
Nagaemo saufa kokuʼnaʼe saufa mopaʼeʼmo alo huguve, huno huʼniya gemae
17 #
Aiy 66:22; 2 Pi 3:13 Afiyo, huʼna, Nagaemo saufa kokuʼnaʼe saufa mopaʼeʼmo afa yatetiʼmo alo nehuve. Hogoteno afole aiʼniya kavafeʼmo magoʼe huʼa apakesamo oʼafigae. 18#Aiy 12:4-6; 44:23; Sam 98:1-9Apakesamo oʼafigayaʼmonanafa lapakaemo alo hisuva kavafeʼmo muki afinaʼmo lapamogaga aime aime uta maiyo. Nagaemo saufa Yulusalemumo alo hisugeʼapaeʼmo vayaʼmogimo apamogaga aisaya taonimo afole aisigeʼapaeʼmo apamogaga neʼaiya vayaʼmo maigae. 19#Sef 3:17; Aiy 35:10Nagaemo Yulusalemu taonieʼmo namogaga aiteʼna vayaʼnieʼmo namogaga aiguve. Vayaʼmogimo saufa Yulusalemu taonifiʼmo magoʼe huʼa aviʼyaʼmo hisageʼa oʼafige aviʼyaʼmo osuge hugae.
20 #
Loa 4:40; Afi 8:12 Nute mafaʼne anagaʼmo nute mafaʼnemo maiʼnaya afiʼnamo magoʼe huʼa ofaligae. Ina kava huʼa muki kosuna vayaʼmo yatala afinaʼmo maigae, huno apamiʼniya afinaʼmo maigae. Neya vekamoʼmo vani hataletiʼa kafugamo maiteno falisiyaʼmoʼmo vayaʼmogi apakesamo afiʼapaeʼmo, Malage huno faliʼniye, huʼa apakesamo afigae. Apakesamo afigayaʼmonanafa hosu vayaʼmo vani hataletiʼa kafugamo maiteʼa falisayaʼmoʼmo vayaʼmogimo huʼapaeʼmo, Gotiʼa lifana huno apateʼniya kavane, huʼa hugae. 21#Aiy 62:8-9Ani afinaʼmo apakaemo noʼmo kiteʼa ani nopiʼmo maigae. Apakaemo nofi hoyamo vaiteʼa nofi alagafati aniʼmo alo huʼa negae. 22#Sam 92:12-14Apakaemo noʼapimo kisageʼapaeʼmo alu vayaʼmogi kumaya aliteʼa ani nopiʼmo oʼmaigae. Apakaemo neʼyaʼmo hakalesageʼapaeʼmo alu vayaʼmogi kumaya aliʼa oʼnegae. Apakaemo alagi yatala afinaʼmo lokiya yosagana agufa kava huʼa maigae. Nagaemo lekana paiʼna apateʼnova vayaʼmogi aliʼyaʼmo aliteʼapaeʼmo aliʼa afole ai malesaya yatefeʼmo yatala afinaʼmo apamogaga aime aime ugae. 23#Aiy 61:9; Sam 115:14-15; Ap 3:26Apakaemo afa aliʼyaʼmo aliʼa atalesageno lageso osugiye. Mafaʼne anagaʼapimo aliʼa apatesaya mafaʼnemogi hosu yaʼmo afaʼa oʼaligae. Apakaemo Ala kava neʼmoʼnamo aliʼna auleʼna apateʼnova vayaʼmogi mafaʼnemo maigae. Ina kava huʼa mafaʼne anagaʼapimo apakaeʼeʼmo maigae.
24 #
Aiy 58:9; Sam 50:15; 1 Yo 5:14-15 Apakaemo nagaefeʼmo hapauʼnisiya yafeʼmo nunumuʼmo huʼa ge huʼa nafi okeʼnaya afinaʼmo hogoteʼna geʼapileʼmo aeʼna atagaina huteʼna apamiguve. Mago afinaʼmo apakaemo nunumuʼmo nehisageʼnaeʼmo afiteʼnaeʼmo apamiguve. 25#Ap 9:1,19-21; Lo 16:20; Sak 8:3Lokiya afela kala anagaʼmogimo aikeli sipisipi anagaʼeʼmo magokepiʼmo lokaeʼa maiʼneʼa neʼyaʼmo negae. Lokiya afela pusi anagaʼmogimo aikeli meme anagaʼeʼmo lokaeʼa havaegae. Afayaʼe aikeli pulumaka anagaʼmogi kahaumo neʼnaya kava huʼa Aikeli laiyoni anagaʼmogimo negae. Aise mafaʼnemoʼmo yagaino apategaiye. Pulumakamogi kahaumo neʼnaya kava huʼa laiyoni anagaʼmogi kahaumo negae. Nehapaya nakaloʼyavemogimo mumusopamo negae. Vayaʼmogi aote aveʼnileʼmo muki kotegamo kaveta osuge aliʼa hosu huʼa oʼapatege huteʼa alagepa huʼa maigae, huno ani gemo Ala kava neʼmoʼa huʼniye.
Currently Selected:
Aiyeya 65: kyg2013
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
