Aiyeya 64

1 # Sam 18:7-13; Mka 1:3-4; Niy 1:6 O Ala kava nene, huta, lagaemo lahauʼniyanagi kagaemo kokuʼnaʼmo alika halo aiteka eka emikegeʼapao kaulagaleʼmo avemogimo atete hisayafeʼmae. 2#Sam 46:10; Nen 6:25-27; Mka 7:15-17Samomo ataleʼmo haneʼnigeno aniʼmoʼa vala vala nehiya agufa kava huʼa kame vayakamogimo atete hugae. Kagaemo alopa lokiyakaʼeʼmo emikesanageʼapaeʼmo muki nofi vayaʼmogimo kagikamo afiteʼapaeʼmo atete hugae. 3#Hat 34:10; 2 Sam 7:23; Ham 3:3,6Akeyaʼvilagamo kagaemo emikeka aeto agufa kavaʼmo huʼnane. Lagesamo oʼafiʼnona agufa kavaʼmo huʼnanagetaeʼmo lusi kava huta lahau aiʼnone. Kagaemo emikeʼnanageʼapaeʼmo avemogimo lusi kava huʼa atete huʼnae. 4#1 Ko 2:9-10; Avi 3:25-26; Ye 5:7Ma mopamo afole aiʼniya afinatetiʼmo mago vayaʼmogimo kagaekana agufa gotiʼa oʼagege kagaekana agufa gotifeʼmo ava gemo oʼafige huʼa maiʼnae. Kagaikaekeʼmo kagava neʼmaiya vayaʼmo hapa maesanafeʼmo aliʼyaʼmo neʼaline. Magoʼe huno ani agufa Gotiʼa alagi oʼmaiʼniye. 5#Hat 30:6; Hi 4:16; Aiy 26:8-9; Sam 90:7-9Kagaemo apamogaga aiʼa fatago kavaʼmo nehaya vayaʼmogi nehana kavafeʼmo apake okaniʼa apakesamo neʼafiya vayaʼmo hapa maesanafeʼmo fotu nehane. Fotu nehanaʼmonanafa hosu kavaʼmo huʼnonaʼmofeʼmo kaipamo leka lateʼnane. Kaipamo leka lateʼnanaʼmonanafa kahau huka lateme lateme uganaʼmofeʼmo lagufamo alika katika lategane. 6#Yop 14:4; 15:14; Aiy 40:6-8Kaulagaleʼmo mukiʼamogitamo oʼaniʼya faiʼniya yakana huta maiʼnone. Muki fatago kavatimoʼmo mago oʼaniʼya faiʼnigeʼa aliʼa yaga auʼa neʼatalaya kukena yakana huno haneʼniye. Mukiʼamogitamo vaiʼniya yosa haitagana huta maiʼnonageno yasimoʼmo alino halelino neʼviya kava huno hosu kavatimoʼmo lavalelino uʼniye. 7#Sam 14:4; Aiy 27:5; Loa 32:19-22Kaugosamo alika fala kiʼnanaʼmofeʼmo kagikamo aeʼa nunumuʼmo nehaya vayaʼmo oʼmaige katafausageka hapa maesanafeʼmo apaipamo aliʼa he tiʼa apatesaya vayaʼmo oʼmaige huʼnae. Lagaemo hosu kavaʼmo huʼnonaʼmofeʼmo kagaemo atagana huka alika hano huka nelatalane. 8#Ga 3:26; Lo 9:20-24; Yop 10:8-9O Ala kava nene, huta, Hosu kavaʼmo huʼnonaʼmonanafa hemenimo kagaemo afotimogamo maiʼnane. Lagaemo kalipa mopagana huta maiʼnonagekaeʼmo kalipa mopaletiʼmo samomo alo nehana vekagana huka maiʼnane. Kagaemo kayatetiʼmo mukiʼamo alo huʼnana vayaʼmo maiʼnone. 9#Sam 6:1; Avi 5:20; Sam 79:13Ala kava nene, huʼna, kaipamo leka olateka muki afinaʼmo hosu kavatieʼmo kagesamo oʼafika kage kanika atalo. Kahaoke hovanagi lageteka mukiʼamogitaeʼmo, vayaʼnimo maiʼnae, huka kagesamo afiyo. 10#Aiy 1:7; Lu 21:24Muki kaote taonimoʼmo yahao kokana huno haneʼnigeno Saiyoni taonimoʼmo kaʼme kokana huno haneʼnigeno Yulusalemu taonimo alagi hosuʼnigeʼa vayaʼmo oʼmaiʼnae. 11#2 Sit 36:19; Avi 1:7,10-11Lagae aote mono noʼmo ha le konali mono noʼmo haneʼnigeʼa laginago vayaʼmogimo kagikaleʼmo aliʼa asaga huʼnaya mono noʼmo atamoʼmo alagi leno alino hosu huno ataleʼniye. Muki alagepa yatimo aliʼa hosu huʼa ataleʼnae. 12#Sam 10:1; Sak 1:12O Ala kava nene, huta, kagaemo ani kavaʼmo ageʼnananageka laha maesanafeʼmo kaipamoʼmo he otigifiye. Ge osuʼneka magoʼe huka alopa kana yaʼmo lamigapiye.

Currently Selected:

Aiyeya 64: kyg2013

Highlight

Copy

Compare