Aiyeya 61
61
Gotiʼa vayaʼamo alino auleno apatesiya afinaʼmo ago afole aiʼniya kavafeʼmo huʼniya gemae
1 #
Aiy 11:2-5; Lu 4:18-19; Sam 45:7; Mt 11:5; Sam 147:3 Ala kava neʼmoʼa kagemi yaʼapimo ohaneʼnisiya vayaʼaifeʼmo alagepa faigoko gemo aeʼna hakalo huʼna hapa paisuvafeʼmo nagenopafiʼmo uvelimo ago lakino nateʼniyaʼmofeʼmo Ala kava neʼmo Aunemeʼamo emineno nagaeteʼmo maiʼniye. Agaemo alino nateʼnigeʼna eʼna hosu kavaʼapieʼmo apaipamoʼmo kana nehiya vayaʼaina aliʼna hapageʼna apatege kalavusifi maiʼnaya vayaʼaifeʼmo huʼnaeʼmo, hatu maeʼna lapateʼnove, huʼna hapa paige seli nofitetiʼmo kino apateʼniya vayaʼaifeʼmo huʼnaeʼmo, kalavusifatiʼmo afaʼa ugae, huʼna hapa paige hisuvafeʼmo alino nateʼnigeʼna eʼnove. 2#Lu 4:19; Aiy 34:8; Mal 4:1-3Ala kava neʼmoʼa fiku hapa maeno apamisiya afinaʼmo afole aiʼniye, huʼna hapa paige Gotiʼa hosu kavaʼapimo anonaʼapilefeʼmo kayoʼmo apamisiya afinaʼmo afole aiʼniye, huʼna hapa paige yulagefa neʼaiya vayaʼmo apaipamo aliʼna falu huʼna apatege hisuvafeʼmo alino nateʼnigeʼna eʼnove. 3#Sam 30:11; 23:5; Sak 3:5; 2 Te 1:10Saiyoni taonifiʼmo maiʼnaya vayaʼmogi yulagefa neʼaiya vayaʼmo apaipamo aliʼna falu huʼna apatege apakenopafatiʼmo laʼnefamo aliʼna ataleteʼna kanale konalimo aliʼna apatege aviʼyaʼmo nehaya kavaʼapimo aliʼna ataleteʼna apamogaga aisaya uvelimo apakufaleʼmo faleʼna apatege apaipamo kana huʼniya kavaʼapimo aliʼna ataleteʼna yokemo hisayafeʼmo aliʼna lokiya vaiʼna apatege hisuvafeʼmo alino nateʼnigeʼna eʼnove. Vayaʼmogimo ani vayaʼaifeʼmo huʼapaeʼmo, Apakaemo fatago kavatefeʼmo alagepa alagamo neʼaeya yosagana huʼa maiʼnae. Ala kava neʼmoʼa fai maleʼniye, huʼa huteʼa agiʼaleʼmo aliʼa asaga huʼa ategae.
4Apakaemo heʼa halagape vaiʼnaya taonimo halate kigae. Akeyaʼvilaga no atufafiʼmo saufa noʼmo kigae. Yatala afinaʼmo muki hosuʼniya taonimo haneʼniyana aliʼa alagepa huʼa kigae. 5#Aiy 14:1-2; Ef 2:12-20Lapakaemo oʼapakeʼnaya vayaʼmogi eʼa sipisipitapileʼmo yagaigae. Alu kotega vayaʼmogi eʼa hoyatapifiʼmo aiʼyumo aige alagamo neʼaeya nofi hoyatapileʼmo yagaige hugae. 6#1 Pi 2:5,9; 1 Ko 4:1; Lo 15:26-27Aliʼyatapimo aligayaʼmonanafa lapakaefeʼmo huʼapaeʼmo, Ala kava netefeʼmo mono huʼa neʼapataya vayaʼmo maiʼnae. Apakaemo Gotitimo aliʼyaʼamo neʼaliya vayane, huʼa lapaki aegae. Lapakaemo alu nofi vayaʼai kagemi yaʼapimo aliteta hale konali yaʼapilefeʼmo ala lapakimo aligae. 7#Aiy 40:2; Loa 21:17; Aiy 35:10; Mt 25:46Magoʼe huno lapavagage osisigetapa lole yaʼmo alitapa lokaeta aligae. Vayaʼmogimo magoʼe huʼa lapakitapileʼmo aliʼa afepiʼmo oʼatesagetapa alisaya yatapilefekeʼmo lapamogaga aigae. Mopatapileʼmo maiʼnetapaeʼmo lole yaʼmo alita lokaetapa alitetapa muki afinaʼmo lapamogaga aime aime ugae.
8 #
Sam 11:7; Emo 5:21-24; Sam 25:8; Aiy 55:3 Na kava higeʼnaene. Nagaemo Ala kava neʼmoʼnamo alagepa huʼa aliʼa fako nehaya kavafeʼmo nahauʼniyaʼmofeʼmae. Kana yaʼmo apamige kumaya alige nehaya kavafeʼmo naini nehuve. Nagaemo aliʼyaʼapimo alisayafeʼmo lama geletiʼmo yagaiʼna apategauve. Nagaemo apakaeʼeʼmo alagi hanege hanege huno hanesiya kotalakemo hu malegauve. 9#Sak 8:13; Ap 3:26Mafaʼneʼnimogi mafaʼne anagaʼapimogimo ala apakiʼapimo alisageʼapaeʼmo alu nofi vaya alu nofi vayaʼmogi apakeʼapaeʼmo, Ala apaki vayane, huʼa apakegae. Apaketeʼapaeʼmo, Ala kava neʼmoʼa alino auleno apateʼniye, huʼa hugae. 10#Aiy 51:11; 52:1; Lo 3:22; Fl 3:9; Iyi 16:8-16Ala kava nefeʼmo magoʼe huʼna lusi kava huʼna namogaga aiguve. Nagupi mafaʼnemoʼmo Gotiʼnimofeʼmo magoʼe huno amuse huno ategaiye. Na kava hinageʼnaene. Agaemo nagufamo alino katino nateteno fatago kavaʼamo yatala kukenagana huno alino vaino nateʼniye. Agaemo fatago kavaʼmo alagi alagepa yatala kukenagana huno alino nagufaleʼmo ago aino ati kaeno nateʼniye. Aʼmo alisiya vekamoʼmo konalimo neʼaliya kava huʼna maiʼnove. Veleʼmo maisiya a kanomoʼmo alopa moniletiʼmo miya nefaiya sesu konalimo aliteno neʼmaiya agufa kava huʼna maiʼnove. 11#Aiy 55:10-11; 45:8; 1 Pi 2:9Mopamoʼmo neʼyaʼmo alino afole aino atege hoyafiʼmo hakale maleʼnaya avina yaʼmo hoyamoʼmo alino hageno atege nehiya kava huno Ala kava neʼmo Gotiʼa fatago kavaʼe agiʼaleʼmo aliʼa asaga nehaya kavaʼeʼmo muki nofi vayaʼai apaulagaleʼmo alino afole aino ategaiye.
Currently Selected:
Aiyeya 61: kyg2013
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
