NUMBERS 30
30
Asdzání ádee hadahadziihgo bá bee haz'áanii
1Áko Mózes éí Ízrel dine'é yiląąjį' naazíinii yich'į' haadzíi'go ání, Díí kót'éego Bóhólníihii nihich'į' haadzíí': 2Diné ła' Bóhólníihii yich'į' ádee hadoodzíi'go, doodaii' yee nihoní'áanii yee ádee hadoodzíi'go bii' sizíinii yá nihodiní'ą́ągo, yá nihodiní'ánígíí bizaad doo ałtah ánáyoodlíił da; yee haadzí'ígíí t'áá át'é bik'ehgo ye'eł'į́į doo.#Deut. 23:21-23; Mt. 5:33. 3Náá'áłdó' asdzání ła' éí Bóhólníihii yich'į' ádee hadoodzíi'go, doodaii' ániid naaghá yę́ędą́ą́' bizhé'é t'ah yił bighango t'áá bí ádá nihodiní'ą́ągo 4yee ádee hadoodzí'ígíí áádóó yee ádá nihodiní'ánígíí bizhé'é yiyíínii'go t'óó déesxéelgo éí yee ádee hadoodzí'ígíí t'áá át'é áádóó yee ádá nihodiní'ánígíí t'áá át'é bi'dzósin doo. 5Nidi hazhé'é haa hodiizts'ą́ą́' bijį́į́ góne' ádee hadzoodzí'ígíí, doodaii' ádá nihozhdiní'ánígíí doo há yinízingóó, éí doo bizhdoolíił da, áko Bóhólníihii há nahjį' ninéididoo'ááł, háálá hazhé'é doo há yinízin da. 6Áko hahastiin hólǫ́ǫgo ádee hadzoodzíi'go, doodaii' t'áá hó hazaad bee ádá nihozhdiní'ą́ągo 7nít'éé' hahastiin haa hodiizts'ą́ą́' bijį́į́ góne' t'óó déesxéelgo éí bee ádee hazdoodzí'ígíí áádóó bee ádá nihozhdiní'ánígíí bi'dzósin doo. 8Nidi hahastiin haa hodiizts'ą́ą́' bijį́į́ góne' doo há yinízingóó éí bee ádee hazdoodzí'ígíí índa t'áá hó hazaad bee ádá nihozhdiní'ánígíí doo ílį́į́góó íidoolííł, áádóó Bóhólníihii éí há yóó'anéididoo'ááł. 9Nidi asdzání bąąh áhásdįįdii ádee haadzí'ígíí t'áá át'é, doodaii' asdzání bahastiin yóó'abidíí'áanii ádee hadoodzí'ígíí t'áá át'é bii' sizíinii ádá nihodiní'ą́ągo yi'ósin doo. 10Asdzání hahastiin bighangi ádee hazdoodzíi'go, doodaii' hwii' sizíinii ádá nihodiní'ą́ągo 11hahastiin haa hodiizts'ą́ą'go t'óó hach'į' déesxéelgo áádóó doo nidi dooda hałníígóó éí bee ádee hazdoodzí'ígíí t'áá át'é, doodaii' bee ádá nihozhdiní'ánígíí t'áá át'é bi'dzósin doo. 12Nidi hahastiin haa hodiizts'ą́ą́' bijį́į́ góne' t'áá hó hazaad bee ádee hazdoodzí'ígíí, doodaii' hwii' sizíinii ádá nihodiní'ánígíí doo ílį́į́góó áyiilaago doo bi'dzósin da doo; 13t'áá bee ádee hazdoodzí'ígíí, doodaii' t'áá bee ádá nihozhdiní'ánígíí hwii' sizíinii a'ohgo í'dólzin ájiił'įįhgo hahastiin éí há bohoníłdzilgo íidoolííł, doodaii' doo ílį́į́góó íidoolííł. 14Nidi hahastiin doo áháłnínígóó i'ii'aahgo éí bee ádee hazdoodzí'ígíí, doodaii' éí bee ádá nihozhdiní'áanii t'áá át'é há chánahgo íidoolííł, háálá t'áá éí bijį́ haa hodiizts'ą́ą́' yę́ędą́ą́' t'áadoo áhodííniidí da. 15Ákondi haa hodiizts'ą́ą́'dóó bik'ijį' índa doo ílį́į́góó áyiilaago éí t'áá bí asdzání doo ákwii áát'įįdii yá ninádootłish.
16Díí éí yee nihwiiz'áanii Bóhólníihii éí Mózes yich'į' yee haadzíi'ii át'é; diné áádóó be'asdzą́ą́ bita'gi índa azhé'é bitsi' ániid naagháii t'ah yił bighango bita'gi bá yee nihwiiz'áanii át'é.
Currently Selected:
NUMBERS 30: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
