LUKE 6
6
Jesus bídahooł'aahii háá'áyį́į́h jį́į́ góne' tł'oh naadą́ą́' deinizh
(Mt. 12:1-8; Mk. 2:23-28)
1Łah háá'áyį́į́h jį́ azlį́į'go tł'oh naadą́ą́' bitahgóó Jesus joogááł, nít'éé' hódahooł'aahii bił jookahgo tł'oh naadą́ą́' ła' deinizhgo, bílák'eejį' deidiniyishgo dayííyą́ą́'.#Deut. 23:25. 2Nidi Férisii danilíinii ła' ádadííniid, Ha'át'éegoshą' háá'áyį́į́h jį́į́ góne' doo bee haz'ánígíí baa naahkai? 3Áádóó Jesus hach'į' haadzíi'go ádííniid, Da' t'ahásh doo David índa yił naakaígíí dichin daazlį́į'go ádaadzaa yę́ęgi dayínółta' da? 4Shą́ą́', éí Diyin God bikin góne' yah ajííyáago, Diyin God bich'į' bááh nááhániihii nízhdii'ą́ągo jííyą́ą́', áádóó hoł naakaígíí ałdó' ła' baz'níłtsood, éí ła'da doo yidooyį́į́łgóó bee haz'ą́ą́ nít'éé' yę́ę, nááda'iiłniihii t'éiyá deiyą́ągo bee bá haz'ą́ą́ nít'éé'.#Lev. 24:9; 1Sam. 21:1-6. 5Áádóó áhodííniid, Diné Silį́į'ii háá'áyį́į́h jį́ ałdó' bee bóhólnííh.
Diné bíla' bąąh dah haz'áanii
(Mt. 12:9-14; Mk. 3:1-6)
6Łah háá'áyį́į́h jį́ náá'ásdlį́į'go kin bii' áłah ná'ádleeh góne' yah ajííyáago naz'neeztą́ą́', nít'éé' diné bíla' nish'náájígo bąąh dah haz'ą́ą́ léi' ákwe'é naagháá lá. 7Áko háá'áyį́į́h jį́į́ góne' daats'í nááhozhdidoołááł danízingo bee haz'áanii yínda'niłtinii índa Férisii danilíinii hak'i dahodidoo'ááł biniyé hadahasííd. 8Nidi baa nitsídadzikeesígíí bił bééhoozin, áko diné bíla' bąąh dah haz'ánígíí áyidííniid, Hágo, kodi yiizįįh. Áko nízhdii'na'go ákwii dziizį'. 9Áádóó Jesus áhodííniid, Łahgo haz'ą́ nanihídíshkid, Háá'áyį́į́h jį́į́ góne' daats'í yá'át'éehgo ázhdooníiłgo bee haz'ą́, éí doodaii' atízh'doolííł daats'í; hináanii yisdázhdoołtééł, éí doodaii' azhdiyoołhéełgo daats'í bee haz'ą́? 10Áádóó t'áá ałtso bitah dzideezghalgo diné bíla' bąąh dahaz'ánígíí ábizhdííniid, K'ídílchííd. Áko ákódziidzaago hála' bąąh dahaz'áanii hadaałt'é násdlį́į́'. 11Nidi t'áá íiyisí bádahazhchįįdgo Jesus atídeidoolíiłgo yaa nídaast'įįd.
Jesus éí naakits'áadahígíí náyiizláá'
(Mt. 10:1-4; Mk. 3:13-19)
12Ákwe'é yoołkááł yę́ędą́ą́' sozdidoolzįįł biniyé dayílk'idgóó ajííyá, áko tł'éé' bíighah Diyin God bich'į' sozdilzin. 13Hoos'įįdgo hódahooł'aahii hágo bizhdííniid, áko bitahdóó naakits'áadah yilt'éego nídziizláá', éí ałdó' daal'aadii bee jíízhi'; 14Sáíman, (náánáła' yízhí yee hóózhi'go Peter yinílyée doo, hodííniid) índa yił háá'áázh Andrew índa James áádóó John áádóó Philip áádóó Barthálemew 15áádóó Matthew áádóó Thomas áádóó James éí Alfíyas biye' áádóó Sáíman éí Zélat#6:15 Sáíman éí kéyah t'áá íiyisí bił danilį́įgo yaa nitsídaakeesii yá'ats'ákaii áádóó Roman binahat'a' bił haz'ánígíí nahjį' kódoolnííł nízinii bił ajítahgo bąą Zélat joolyéé nít'éé'. yolyéhígíí, 16Júdas éí James biye' índa Júdas Iskáriyat, éí nináhodidoo'áłígíí.
Hasłą́ągi Jesus na'neeztą́ą́'
(Mt. 4:23-25)
17Áádóó bił bidáájookaigo k'íhoneezláagi dziizį', hódahooł'aahii t'óó ahayóí bił, áádóó diné t'óó ahayóí Judíyadę́ę́' t'áá át'é índa Jerúsalemdę́ę́' áádóó Táir índa Sáídan tónteel bibąąhdę́ę́', éí dahodidoots'į́į́ł áádóó naałniihii bits'ąą náádabidi'dooljah biniyé neheeskai, 18áko níłch'i danchxǫ́'íii yik'ee ti'dahooníhígíí nááhizhdiiłjéé'. 19Áádóó diné t'áá yíl'áá nít'éé' hodadidiilchił ch'ééh daniizį́į́', háálá hats'ą́ą́dóó adziil hólónígíí bee t'áá ałtso hadaałt'é áńdajiidlaa.
Ak'ihojidlí índa doo hojooba' áhá'níinii
(Mt. 5:1-12)
20Áádóó hódahooł'aahii bich'į' hajííghalgo ázhdííniid:
Nihadahojoobá'íígíí nihik'idahojidlí, háálá Diyin God bee bóhólníihgo bił haz'áanii éí danihíí'.
21K'ad dichin danohłínígíí nihik'idahojidlí, háálá hwiih dadoohłeeł. K'ad daahchaígíí nihik'idahojidlí, háálá anídaahdloh dooleeł.
22Diné Silį́į'ii biniinaa diné nihik'ee dadiniihgo, áádóó t'áá sahdii nidanihinilgo áádóó danihódziihgo, índa danihízhi' baa'ihgo yaa yádaałti'go nihik'idahojidlí!#1Pet. 4:14. 23Éí beiníłką́ągo nihił dahózhǫ́ǫ le', áádóó ił hózhóonii baa nidaałgeed le', háálá yá'ąąshdi nihaa dahidoolyéełii ayóó ádaat'é éí bąą, háálá nihik'ee dadiniihii dabizhé'é yę́ę Diyin God yá dahalne'ii ákódayííł'įįd.#2Chr. 36:16; Acts 7:52.
24Nidi da'oht'ínígíí doo hojooba' ájíníi da, háálá nihí t'áá íídą́ą́' at'į́ bee ákidasoohdla'.
25K'ad hwiih danohłínígíí doo hojooba' ájíníi da, háálá dichin dadoohłeeł. K'ad daahdlohígíí doo hojooba' ájíníi da, háálá yínííł danohłį́į doo áádóó daahcha dooleeł.
26Diné t'áá ałtso yá'át'éehgo nihaa yádaałti'go doo hojooba' ájíníi da, háálá ákódanihił'íinii dabizhé'é yę́ę t'áá ákót'éego t'óó ádahodil'į́įgo dahalne'ii yaa yádaałti' nít'éé'.
E'ana'í ayóó'ó'ó'ní
(Mt. 5:38-48; 7:12)
27Nidi da'doohts'a'ígíí ádanihidishní, Nihida'ana'í ayóó'ádeínóh'ní, nihik'ee dadiniihígíí bá yá'át'éhígi ádaaht'į́, 28danihódziihígíí hózhǫ́ǫgo bá hadahohdziih, t'áá bita'ígi ádanihooł'įįłígíí bá sodadołzin. 29Ła'da niniitsį' néidííłts'ingo, łahjígo bee bich'į' dah náádíníít'ááł, áádóó nibeeldléí nighayíltsoozii ni'éé' ałdó' t'áadoo bich'į' baa níchį'í. 30Nída'dókeedígíí t'áá ałtso ba'iyínííł, áádóó ninaalye'é nighayii'níiłii t'áadoo bínéíníkeedí. 31Áádóó t'áá diné hach'į' ádaaníił le' danohsinígi át'éego, nihí ałdó' t'áá ákót'éego bich'į' ádaahnííł.#Mt. 7:12.
32Ayóó'ádanihó'nínígíí t'éí ayóó'ádeínóh'níigo, éísh bee nihaa daha'niih doo? Háálá bąąhági ádaaníiłii nidi ayóó'ádabó'níinii ayóó'ádayó'ní. 33Áádóó nihich'į' yá'át'éehgo ádaaníiłii bich'į' yá'át'éehgo ádaahníiłgo, éísh bee nihaa daha'niih doo? Háálá bąąhági ádaaníiłii nidi t'áá ákódaat'į́. 34Áádóó k'ééshididoodlííł wóh'níinii ba'ayohłéego, éísh bee nihaa daha'niih doo? Bąąhági ádaaníiłii nidi ałhada'ii'nííł, t'áá éigi át'éego k'ééda'ahidil'į́. 35Nidi nihida'ana'í ayóó'ádeínóh'ní, áádóó yá'át'éehgo ádaaht'į́, áádóó t'áadoo le'é ada'iyohnííł, t'áadoo k'ééshidi'doolnííł danohsiní, áko yá'ąąshdi nihaa dahidoolyéełii ayóó ádaat'ée dooleeł, áádóó nihí Ts'ídá Aláahgo Át'éii ba'áłchíní danohłį́į dooleeł, háálá éí doo ahééh danízinii índa doo yá'ádaashóonii yaa jooba'. 36Éí bąągo t'áá nihiTaa' jooba'ígi át'éego dajiinohba'.
Aa hwiinít'į́
(Mt. 7:1-5)
37T'áadoo aa nídaaht'íní, áko nihí ałdó' doo nihaa nídahódóot'įįł da; t'áadoo át'éégóó t'áadoo diné bá hadahohdziihí, áko nihí ałdó' t'áadoo át'éégóó diné doo nihá hadadoodzih da; bąąhági át'éii ahá yóó'adahidoh'aah, áko nihí ałdó' nihibąąhági át'éii nihá yóó'adahididoot'ááł; 38nihił dahadlee', áko nihada'doodił; le'dółt'e'go daneel'ą́ągo áádóó níłk'íbí'nees'nii'go áádóó yaa yisdzidgo índa wó'ąhazhóoshgo bił áłká dasoołzaaz doo. Háálá t'áá ła' bá ída'nóoł'ąąd yę́ęgi ánéelt'e'go nihá ínídadí'nóol'ąął.
39Áádóó hane' bee ak'idi'dootį́įłii bee hach'į' hadzoodzíí', Da' doo oo'íiniísh t'áá bí na'ahidlóozgo bíighah? Da' doósh t'áá áłah ą'ádínóodah da?#Mt. 15:14. 40Íhooł'aahii éí nabinitinii doo yiláahgo át'ée da,#Mt. 10:24,25; Jn. 13:16; 15:20. nidi ałtso íhooł'ą́ą'go índa nabineeztą́ą'ii t'áá yił aheełt'ée doo. 41Áko ha'át'íí biniyé nik'is binák'e'oolts'idígíí níníł'į́, nidi t'áá ni nástáán ninák'ee sitánígíísh doo baa ákonínízin da? 42Éí doodaii' t'áá ni nástáán ninák'ee sitánígíishą' éí doo yíní'į́į́góó, ha'át'éego nik'is ábididííniił, Shik'is, ninák'e'oolts'idígíí ná haash'aah? T'óó áhodíl'íinii, áłtsé nástáán ninák'ee sitánígíí hantįįh, áko índa hazhó'ó ííní'į́įgo nik'is binák'e'oolts'idígíí bá hadíí'ááł.
Ajéí bii' daahéełii hahwiileeh baa hane'
(Mt. 7:16-20; 12:33-35)
43Tsin yá'át'éehii éí aneest'ą' nichxǫ́'ígíí doo bąąh haleeh da, doodaii' tsin nichxǫ́'ígíí éí aneest'ą' yá'át'éehii doo bąąh haleeh da, 44háálá tsin t'áá ałtso bineest'ą' bee béédahózin.#Mt. 12:33. Ch'il deeníní fig doo bąąh wóbée da, éí doodago tsin dadeeníinii ch'il na'atł'o'ii doo bąąh wóbée da. 45Diné yá'át'éehgo hináanii éí bijéí bii' yá'ádaat'éehii hólóonii bits'ą́ą́dę́ę́' yá'át'éehii hahwiileeh, áádóó diné doo yá'áshóonii éí doo yá'ádaat'éehii bijéí bii' hólóonii bits'ą́ą́dę́ę́' doo yá'át'éehii hahwiileeh, háálá t'áá hajéí bii' hólónígíí t'áá éí bee yájíłti' łeh.#Mt. 12:34.
Kin bitł'ááh nástł'in naaki t'áá ał'ąą át'éii
(Mt. 7:24-27)
46Ha'át'íishą' biniyé, Bóhólníihii, Bóhólníihii, dashidohní, nidi ádíshnínígíí doo bida'oł'į́į da? 47T'áá háiida shaazhníyáago shizaad jidiizts'ą́ą'go bi'jił'ínígíí, éí bił ahijíłt'éhígíí bee nihił hodeeshnih: 48jó, diné éí kin ííléehii níléí wóyahdę́ę́' tsé'éłkáa'gi ha'íítł'inígíí nahojílin, áko tó dááląądgo bízdeesxał, nidi doo hidó'nááł át'ée da, háálá tsé'éłkáa'gi bidziilgo ályaa éí bąą. 49Nidi jidiizts'ą́ą'go doo bi'jił'ínígíí éí kin ájíléehgo atł'ááh nástł'inii t'áágééd t'áá łeeshtahdóó kin nizhní'ánígíí nahojílin, áko tó bízdeesxałgo t'áá áko ahiih nááłdááz, áko t'áá íiyisí yóó'i'íídéél.
Currently Selected:
LUKE 6: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).