JOHN 4
4
Jesus áádóó asdzání Samériyagi kééhat'íinii
1Jesus bídahooł'aahii éí John bídahooł'aahii bilááh ánéelą́ą́' silį́į'go áádóó tó yee da'asį́įhgo Férisii danilíinii Jesus yaa dahodiizts'ą́ą́'. Éí Bóhólníihii bił bééhoozin, 2(azhą́ Jesus t'áá bí doo tó yee asį́įh da nidi, bídahooł'aahii t'éiyá). 3Judíyadóó Gáliliigóó dah náázdiidzá. 4Áko t'áá k'éhézdon Samériya biyi'góó ch'ídeeshááł jiniizį́į́'. 5Samériya biyi' kin haal'áá léi'gi jiníyá, ákwii Sáíkar hoolyéé lá, Jéíkab biye' Jóseph kéyah yeidiní'ą́#Gen. 33:19; Josh. 24:32. yę́ędóó t'áá áyídígi. 6Ákwe'é Jéíkab bitóhahadleeh, áko Jesus ch'ééh jideeyáago tóhahadleeh bíighahgi jineezdá, ałní'ní'ą́ągo daats'í.
7Nít'éé' Samériya dine'é asdzání léi' tó háníyáá lá. Áko Jesus áhodííniid, Tó deeshdlį́łígíí ła' shaa níkaah. 8Háálá hódahooł'aahii éí ch'iyáán nideidiyoołnih biniyé kintahgóó eekai. 9Áko Samériya dine'é asdzání áhodííniid, Ha'át'éegoshą' Jew dine'é ła' nílį́į́ léi', Tó ła' shaa níkaah, shidiní? Jó, Jew dine'é éí Samériya dine'é doo yił choda'ahool'į́į da.#Ezra 4:1-5; Neh. 4:1,2. 10Jesus hach'į' hanáánáádzíi'go áhodííniid, Diyin God einíláhígíí áádóó, Tó ła' shaa níkaah, niłnínígíí bééhonísingo bídíí'níkeedgo, tó hináanii neidookááł nít'éé'. 11Áko asdzání ánááhodoo'niid, Kwá'ásiní, jó, t'áadoo bee tó haóleehí da, áádóó tóhahadleeh góyaa hózaad, háádę́ę'shą' áko tó hináanii shóidííłt'eeł? 12Da' Jéíkab nihizhé'é yę́ęésh biláahgo ánít'é, éí díí tóhahadleeh nihaidiní'ą́, bí índa ba'áłchíní áádóó dabilį́į́' deidlą́ą́ nít'éé'? 13Jesus ánááhodoo'niid, T'áá háiida díí tó yoodlą́'ígíí éí dibáá' náádoodleeł, 14nidi t'áá háiida tó baa níką́ągo yoodlą́'ígíí éí doo dibáá' náádoodleeł da, áko tó haa deeshkáłígíí éí hayi'di tó t'áá bíni'dii háálíinii dooleeł, áko háálį́įgo iiná doo ninít'i'ii biih yílį́į dooleeł. 15Asdzání ánááhodoo'niid, Kwá'ásiní, tó baa hólne'ígíí ła' shaa níkaah, áko doo dibáá' náádeeshdleeł da, doo nidi kwe'é tó hánáshdáah da doo.
16Jesus ánááhodi'ní, Nílááh, nahastiin hágo bidiní, kwe'é bił nánít'aash. 17Áko asdzání hanáánáádzíi'go áhodííniid, Shahastiin ádin. Jesus áháłní, Shahastiin ádin, dinínígíí t'áá aaníí ádííníniid, 18háálá ashdla' nahastiin nít'éé', nidi k'ad bił nani'aashígíí doo nahastiin át'ée da, áko t'áá aaníígóó háínídzíí'. 19Asdzání ánááhodi'ní, Kwá'ásiní, k'ad lą́ą shił bééhoozin ni, Diyin God yá halne'ii nílį́į́ lá. 20Danihizhé'é yę́ę díí dził bighą́ą'di nidahałáá nít'éé', áko nihí éí Jerúsalemgi t'éiyá diné nidahałáago bá haz'ą́ dadohní. 21Jesus ánááhodoo'niid, Asdzání, shiinídlą́, díí dził bighą́ą'gi dooda, Jerúsalemgi ałdó' doo aTaa' bich'į' nidahohłáa da dooleełgo bich'į' hoolzhish. 22Nihí t'áadoo béédahonohsinii bich'į' nidahohłá, nidi nihí éí béédahoniilzinígíí bich'į' nidahwiidlá, háálá yisdá'iildééh éí Jew dine'é bitahdóó hazlį́į́'. 23Áko bich'į' hoolzhish, áádóó k'ad nidi baa hoolzhiizh, t'áá aaníígóó nidahałáii éí níłch'i ii' sizíinii yee áádóó t'áá aaníinii yee aTaa' yich'į' nidahałáa dooleeł, háálá ákót'éego aTaa' bich'į' nidahałáa dooleełígíí haintá. 24Diyin God éí Níłch'i jílį́, áko hach'į' nidahałáii éí ts'ídá níłch'i ii' sizíinii yee áádóó t'áá aaníinii yee hach'į' nidahałáa dooleeł. 25Nít'éé' asdzání ánááhodoo'niid, Mesáíyah, Christ joolyéhígíí lá jígháahgo shił bééhózin ni, áko jiníyáago t'áá ałtsoní bee nihił hozhdoolnih. 26Áko Jesus ánááhodoo'niid, Shí nich'į' yáshti'ígíí éí ásht'į́.
27Ts'ídá ákohgo hódahooł'aahii haa nákaigo asdzání bich'į' yájíłti'ígíí bik'ee t'óó bił adahóóyóí, nidi, Ha'át'íísh bínabídíłkid? t'áadoo hodííniidí da, áádóó, Ha'át'íísh biniyé bich'į' yáníłti? t'áadoo hodííniidí da. 28Áko asdzání bitóshjeeh yázhí t'áá ákǫ́ǫ́ si'ą́ągo kin haal'áágóó anídzoodzá, áko diné t'áá ałtso ábizhdííniid, 29Tį', diné léi' áát'įįdii ałtso yee shił náhoolne'ígíí deidoołtsééł. Éí daats'í Christ át'į́? 30Áko kin haal'áádóó ch'íjiizhjée'go Jesus baazhníjéé'.
Dá'ák'ehgóó da'diigaii
31T'ahdii bich'į' jookahgo Jesus hódahooł'aahii nídahookąąhgo ádahodííniid, Na'nitiní, íyą́. 32Nidi ábizhdííniid, Ch'iyáán doo nihił béédahózinii shee hólǫ́ǫgo éí yishą́. 33Áko hódahooł'aahii áda'ahidoo'niid, Da' ła'daásh ha'níłtsood? 34Jesus áhodííniid, Shiníł'a'ii yee íinízinii binaashnishgo ła'yishłéhígíí, éí shich'iyą' át'é. 35Adoogishjį' dį́į́' nídeezid hadziih, da' doósh dadohníi da? Jó, nidi shí ánihidishní, Dadohhaałgo dáda'ak'ehgóó dadóh'į́į́', háálá da'diigaii, áko k'ad agizhjį' ahoolzhiizh. 36Ayizhii éí bich'į' na'iilyé, áádóó aneest'ą' iiná doo ninít'i'ii biniyé áłah ííł'į́, áko k'éé'dídléhígíí índa ayizhii éí t'áá áłah t'áá íiyisí bił hózhǫ́ǫ dooleeł. 37Háálá kwe'é bee ha'oodzí'ígíí t'áá aaníí át'é, Ła' k'éézh'dídlééh, ła' éí ajiyish. 38T'áadoo bindashoołnish daígíí dadoohhish biniyé ákǫ́ǫ́ anihiyíł'a', áko ła' yindaashnishii nihí éí bee ákidasoohdla'.
39Áko éí kin haal'áádóó Samériya dine'é t'óó ahayóí éí asdzání bahane'ígíí binahjį' Jesus dayoosdląąd, Áát'įįdii ts'ídá t'áá ałtso yee shił náhoolne', níigo. 40Áko Samériya dine'é haa haaskaigo, T'áá kwe'é nihitah naniná, daaníigo nídahooskan, áko t'áá ákwe'é naaki hwiiską́. 41Índa t'óó ahayóí náádahoosdląąd, háálá t'áá hó hazaad deidiizts'ą́ą́'. 42Áko asdzání ádeidííniid, K'ad ni ádínínígíí doo t'áá éí t'éiyá binahjį' da'iiniidlą́ą da, háálá t'áá bí nihił nahasne'go t'áá nihí dasidiits'ą́ą'go t'áá aaníí [Christ nilíinii,] nihokáá' dine'é Yisdáyiiníiłii át'į́į́ lágo nihił béédahoozin.
Naat'áanii biye' náábi'diilzá
43Ákwe'é naaki hwiiską́ągo índa Gálilii bich'į'go dashdiiyá. 44Háálá Jesus t'áá bí ádííniid, Diyin God yá halne'ii t'áá bí bikéyahgi diné doo bił jílį́į da.#Mt. 13:57; Mk. 6:4; Lk. 4:24. 45Áko Gáliliigi jiníyáago, Gálilii dine'é bił dahóózhǫǫdgo bił k'é da'ahizhdoo'niid, Jerúsalemgi hodílzingo áłah ná'ádleehígi ájíít'įįdígíí t'áá ałtso dayiiłtsą́#Jn. 2:23. éí bąą. Jó, éí ałdó' hodílzingo áłah ná'ádleehígóó nidaaskai.
46Ákódzaago Gálilii biyi', Kéína hoolyéedi, tó wáin ájiilaa yę́ęgi#Jn. 2:1-11. náádzídzá. Nít'éé' Kapérniyamgi naat'áanii ła' biye' daatsaah lá. 47Éí Judíyadóó Gáliliijį' Jesus níyáhígíí jíínii', áko baazhníyáago nídzooskango ájíní, Kapérniyam góyaa díínáałgo shiye' náábididííłááł, háálá doo baa dzoos'níi' da. 48Jesus áhodííniid, Bee éédahózinii áádóó bik'ee t'óó ił adahayóigo ádahooníiłii doo daołtsą́ą́góó doo da'iidoohdląął da. 49Áko naat'áanii ánááhodoo'niid, Kwá'ásiní, shiye' t'ah doo daatsaahdą́ą́' ákóyaa díínááł. 50Jesus ánááhodoo'niid, Nílááh, nídídááh; niye' náádiidzá. Áko Jesus saad yee hach'į' haadzí'ígíí dzoosdląądgo anídzoodzá. 51Ákóyaa níjoodááł, nít'éé' há nidaal'a'í hadááh yíkaigo hoł dahoolne'go ádaaní, Niye' náádiidzá. 52Ákohgo na'ízhdééłkidgo ázhdííniid, Díkwíigi oolkiłgoshą' t'ah nít'éé' yá'át'ééh nídzísdlį́į́'? Áko ádahodííniid, Adą́ą́dą́ą́' yaa'adeez'ą́ągo hatah honeezgaii yę́ę hats'áldoh. 53Áko ts'ídá ákwii oo'áałgo Jesus, Niye' náádiidzá, hodííniidí góne' yá'át'ééh nídzísdlį́'ígíí hazhé'é yénáálnii', áko hó áádóó haghandóó t'áá ałtso da'oosdląąd. 54Judíyadóó Gáliliijį' Jesus jiníyáago, díidí naaki góne' habee adziilii bee bééhózinii baa nijiyáhígíí át'é.
Currently Selected:
JOHN 4: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).