JOHN 2
2
Kéínadi iigeh
1Nít'éé' táá' yiską́ągo kéyah Gálilii biyi' Kéína kin sinilígi iigeh lá, áko Jesus bimá ákwii nijighá; 2Jesus índa bídahooł'aahii iigehjį' hágo bi'doo'niid. 3Nít'éé' wáin ásdįįdgo, Jesus bimá ábidííniid, Wáin bee ádaasdįįd. 4Áko Jesus bimá áyidííniid, Asdzání, shíísh haa shidíílíiłgo shaa nánít'į́? Baa nideeshaałígíí t'ah doo shá baa hoolzhíish da. 5Áko hamá éí nidaal'a'ígíí áyidííniid, T'áá ánihiłnínígóó ádaahnííł. 6Nít'éé' ákwii Jew dine'é binahagha' bik'ehgo tó bee tá'ádígis biniyé tóshjeeh nitsaii tsé bee ádaalyaaígíí hastą́ągo sinil, naadiin daats'í, doodaii' tádiin daats'í tó yikááł dabíighah. 7Nít'éé' Jesus áhodííniid, Tóshjeeh bii' tó hadadołbin. Áko t'áá dabidáa'jį' hadazhdééłbįįd. 8Áádóó ánááhodoo'niid, K'ad ła' haohkaahgo bik'ehgo áda'azįįdii baa nohkaah. Áko baa dadzizką́. 9Áádóó bik'ehgo áda'azįįdii tó wáin ániidíii silį́'ígíí yizlįh, nít'éé' hazlį́į́'dę́ę́' doo bił bééhózin da (nidi nidaal'a'í tó hadayiizkánígíí t'éiyá bił béédahózin), áko bik'ehgo áda'azįįdii adooyehii hágo yidííniidgo 10ííłní, Diné ła' wáin yá'át'éhígíí alą́ąjį' aa dayiikaah łeh, lą'í deidlį́į́hdóó bik'ijį' índa wáin t'áá azlį́'ígíí łeh, nidi ni t'éiyá wáin yá'át'éhígíí akéédę́ę́' aa dííkáałgo áásínísįįd lá. 11Díidí ts'ídá áłtséedi Jesus bibee adziilii bee béédahózinii áyiilaii át'é, éí kéyah Gálilii biyi' Kéína kin sinilígi yaa naayá, áko yee ayóó át'éii ííshją́ą́ áyiilaago bídahooł'aahii daboosdląądgo baa dadzoozlíí'.
12Áádóó bik'ijį' Kapérniyam#Mt. 4:13. góyaa, hamá áádóó hatsilíké índa hódahooł'aahii bił jíkai, áko áadi t'áá díkwíí dahwiiską́.
Kin bii' sohodizin nidayiiłchxǫǫhii ch'íneelkaad
(Mt. 21:12,13; Mk. 11:15-17; Lk. 19:45,46)
13Ákohgo Jew dine'é bi'atis'adeesdzá bee bééhániihii#Ex. 12:1-27. k'adę́ę baa hoolzhíishgo, Jerúsalem góde Jesus dah diiyá. 14Kin bii' sohodizin bił haz'ą́ą́ góne' béégashii áádóó dibé áádóó hasbídí nidayiiłniihígíí nida'iiłniihgo índa béeso ałghááda'a'nilii nidaháaztą́ągo béeso t'áá sahdii ádaat'éhígíí yił ałghááda'a'nilgo bik'ízhníyá. 15Áko tł'óół ts'ósí bee atsxis ájiilaago kin bii' sohodizin bił haz'ání biyi'dóó diné áádóó dibé índa béégashii t'áá ałtso ch'ínizhníłkaad, áádóó béeso ałghááda'a'nilii bibéeso yajiyiiką́, áádóó bikáa'gi ałghááda'a'nil naa'adziistł'ííd. 16Hasbídí nidayiiłniihii ábizhdííniid, Díidí ch'ídahohjááh; shiTaa' bikin biyi' góne' t'áadoo na'iiniih bá haz'ą́ągo ádaał'íní. 17Nikin t'áá íiyisí baa hą́ą́h nisingo bíneeshdlínígíí t'áá áshidoołdįįłgo shide át'é,#Ps. 69:9. ha'níigo bee ak'e'ashchínígíí hódahooł'aahii yéédáálnii'. 18Áko Jew dine'é hadaasdzíi'go ádahodííniid, Nóhólníihgo díí íinidzaaígíishą' ha'át'íí bee bééhózin dooleełii bee nihił bééhodíísįįł? 19Jesus ánáábidoo'niid, Díí kin bii' sohodizin atídaahłééh, áádóó táá' yiską́ąjį' ninádeesh'ááł.#Mt. 26:61; 27:40; Mk. 14:58; 15:29. 20T'áá áko Jew dine'é ádadííniid, Díí kin bii' sohodizin t'áá álnéehgo dízdiindóó ba'aan hastą́ą́h nááhai, da' ákoósh táá' yiską́ąjį' nínáábididííłááł lá? 21Nidi t'áá hó hats'íís kin bii' sohodizin át'éego éí ábijiní. 22Éí bąą dadziztsą́ą́dę́ę́' nááho'diilzáago, hódahooł'aahii díí bee hadzoodzí'ígíí yéédáálnii', áko Diyin God bizaad bee ak'e'ashchínígíí áádóó Jesus saad bee hadzoodzí'ígíí dayoosdląąd.
Diné ádaat'éhígíí t'áá ałtso Jesus bił bééhózin
23Atis'adeesdzá bee bééhániihgo hodílzingo áłah ná'ádleehgo Jerúsalemgi nijigháago, habee adziilii bee éédahózinii ájiilaaígíí dayoo'į́įgo t'óó ahayóí dahoosdląądgo haa dadzoozlíí', 24nidi Jesus éí t'áadoo haa ádeet'ą́ą da, háálá diné ádaat'éhígíí t'áá ałtso hoł bééhózin, 25áádóó t'áá háiida diné ádaat'éegi yee hoł hodoolnihgi doo bee hach'į' anáhóót'i' da, háálá diné ádeinízinígíí Jesus t'áá bí bił bééhózin.
Currently Selected:
JOHN 2: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).