ACTS 14
14
Aikóniyamgi Paul áádóó Bárnabas naa'aash
1Áko Aikóniyamgi Jew dine'é bikin bii' áłah nádleeh góne' Paul áádóó Bárnabas yah íí'áazhgo yááłti', áko Jew dine'é índa Gríik dine'é ts'ídá t'óó ahayóí baa yájííłti'ígíí dayoosdląąd. 2Nidi Jew dine'é doo da'oodlánígíí éí doo Jew dine'é danilíinii yił hadahoneeshchaadgo, hódeidéé'į́į'go ádayiilaa. 3Áko t'áá ákwii dzizkéego t'áadoo dzisti'í Bóhólníihii bá yájíłti'go nízaadgóó nihoolzhiizh. Diyin God bibee adziilii bee béédahózinii áádóó bik'ee t'óó ił ahayóigo ádahooníiłii haa deet'ą́ągo baa nijizh'ázhígíí bee Diyin God bee ajooba' baa hane'ii t'áá aaníí át'éego bééhózingo ájiilaa. 4Nidi kin haal'áagi diné yíl'áhígíí ałts'áskai; ła' Jew dine'é yich'ijí daazlį́į́', ła' yil'aadii yich'ijí daazlį́į́'. 5Doo Jew dine'é danilíinii índa Jew dine'é ałdó' bindanit'a'í yił lą́ da'asłį́į'go, atíhodi'doolnííł índa hoł nidazdiilniił daniizį́į'go, 6éí hoł bééhoozin, áko Likeiyóniya kéyahjį', Lístra índa Dérbii kin haal'áajį' azhnííchą́ą́', áádóó binaagóó tázhdíí'áázh, 7áko ákwe'é hane' yá'át'éehii baa nahodzisne'.
Lístragi Paul bił nidzílne'
8Íídą́ą́' Lístragi diné léi' ła' sidáá lá, éí bijáád doo hináa da; naaljį́į́d jílį́įgo ho'dizhchį́, áko ts'ídá t'ah doo jidigháah da. 9Éí Paul yáłti'go jidiizts'ą́ą́', áko Paul ayóogo honíł'į́įgo hadaałt'é ánáhodidoolníłígíí joodlą́ągo yaa ákoniizį́į́'. 10Áko yéego haadzíi'go ání, K'ésínídongo yiizįįh. Áko náhizhdiitahgo dashdiiyá. 11Diné yíl'áhígíí Paul yaa naayáhígíí dayiiłtsą́ągo, Likeiyóniya bizaad yee yéego hadaasdzíi'go ádaaní, Diyin, dinégi ánoolnin léi' nihich'į' hadáá'áázh lá. 12Bárnabas éí Júpiter yee dayíízhi', índa Paul éí aláahgo yájíłti'ígíí bąą Mérkurii yee dahóózhi'. 13Áko Júpiter bikin bii' sohodizin éí kin haal'á bidáahgi si'ą́ągo Júpiter yá náá'iiłniihii béégashii índa ch'il daashbizhgo kin biná'ástł'in bich'é'étiinjį' niyiizhjaa', áádóó diné áłah nilínígíí biłgo yil'aadii bich'į' náádadi'yeeshnih niizį́į́'. 14Nidi Bárnabas índa Paul, yil'aadii nilíinii, éí yiyíínii'go, ák'i na'ooldláadgo áádóó áłah ílínígíí bitahjį' ch'íhi'neelchą́ą'go dilwoshgo 15ání, Shoo hastóí, díishą' ha'át'íí biniyé ádaaht'į́? T'áá nihígi át'éego, nihí ałdó' diné niidlį́įgo át'é, áko hane' yá'át'éehii nihaa niit'ą́, áko t'óó ádaat'éii bits'áhidoohkahgo Diyin God hináanii yádiłhił áádóó nahasdzáán áádóó tónteel, índa t'áá ałtsoní biyi'di dahólóonii áyiilaii bich'į' dah dahididoohkah.#Ex. 20:11; Ps. 146:6. 16Éí aníchį́į́dę́ę́' ał'ąą dine'é t'áá ałtso t'áá bí danízinígi ádaat'į́į doogo ya'di'ní'ą́, 17ákondi bee bééhózin dooleełii doo nihich'į' áyiilaa daígíí éí dooda, háálá yá'át'éehgi ádzaa áádóó wót'ááhdę́ę́' níłtsą́ índa anit'ą́ baa náhwiilzhíishgo nihaidiní'ą́, áko ch'iyáán índa bee ił hózhóonii bee hwiih danohłį́įgo ánihósin. 18Kót'éego hadziisdzí'ígíí bee t'áadoo hach'į' nááda'iisnii' da, t'óó k'asdą́ą́' ákódaadzaa.
19Nidi Ántiyak índa Aikóniyamdę́ę́' Jew dine'é ła' neheeskai, áko Lístragi diné yíl'áhígíí yíni' yá ádahoolaago Paul yił nidadzisne', áko dadziztsą́ daniizį́į'go, kin haal'áádóó ch'ídahashóód. 20Nidi ídahooł'aahii haa áłah silį́į́', nít'éé' nízhdii'na', áko kin haal'áajį' náádzídzá, áádóó biiskání Bárnabas bił Dérbiigóó jiní'áázh.
Síriya kéyahdi Ántiyak kin haal'áagi níjít'áázh
21Éí kin haal'áagi hane' yá'át'éehii baa nahodzisne' áádóó lą'í nazneeztą́ą'go ídahooł'aahii ánáádajiidlaago, Lístrajį' áádóó Aikóniyamjį' índa Ántiyakjį' níjít'áázh. 22Ákwe'é ídahooł'aahii, Yéego da'iinohdlą́ągo dahinohná, bijiníigo biyahoozhniiłįįhgo bi'oodlą' yee dabidziilgo dah yikahgo ájiilaa, áádóó, Ach'į' nidahwiiłnáanii lą'í bibahididiikahgo Diyin God bee bóhólníihgo bił haz'áanii biih hidiikah, jiníigo bich'į' hadzoodzíí'. 23Áádóó da'oodlání t'áá áłah nídaadleehígi yá aląąjį' naazį́į dooleełii bá nídziizláá'dóó bik'ijį' dahozdísingo t'áadoo da'jiyání sodazdilzingo, éí Bóhólníihii dajoosdląądgo baa dadzoozlí'ígíí t'áá éí baa hozhdiní'ą́.
24Áko Pisídiya kéyah góne' ch'ízhní'áazhgo, Pamfíliya kéyahdi jiní'áázh. 25Áádóó Pérga kin haal'áagi Diyin God bizaad bee yájííłti'go Ataláíya góyaa jiní'áázh, 26áko áádóó Ántiyakgóó hoł dah ní'dii'éél, áadi naanish ła'jidoolííł biniyé Diyin God bibee ajooba' baa ho'dee'nilii bohoolyaa. 27Áadi níjít'áazhgo da'oodlání áłah ájiilaa, áko Diyin God hanahjį' yaa naayáhígíí t'áá ałtso índa doo Jew dine'é danilíinii da'iidoodląąłígíí bá honít'i'go áyiilaago baa nahodzisne'. 28Áko t'áá ákwii ídahooł'aahii yił nidaháaztą́ągo nízaad nihoolzhiizh.
Currently Selected:
ACTS 14: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
