ACTS 12
12
James seesyį́, índa Peter yah abi'doolt'e'
1Ákwii nahalzhiish yę́ędą́ą́' Hérad aláahgo naat'áanii nilíinii, da'oodlání áłah nádleehii ła' atídadoolníiłgo yee hooł'a'. 2Áko Hérad bizaad k'ehgo John bínaaí James diltłish bee seesyį́. 3Áko Jew dine'é baa bił dahózhǫ́ǫgo hoł bééhoozingo, Peter ałdó' yidooltsołgo bee hojiił'a'. Éí díík'ǫsh t'áágééd bááh ályaii yidą́ baa nááhoolzhiizh góne'é áhóót'įįd. 4Peter bi'diiltsoodgo awáalyaa góne' yah aalt'e', áko atis'adeesdzá bee bééhániihii#Ex. 12:1-27. baa na'asdee'dóó bik'ijį' diné binááł ch'íhodi'doodlóós nízingo siláo dį́lt'éego dį́į́' níjaa'ígíí haa ádahalyą́ą dooleeł biniyé yaa honíłtį́. 5Áko awáalyaa góne' Peter bi'dótą', nidi da'oodlání áłah nádleehii t'áá íiyisí nída'ookąąhgo Diyin God yich'į' há sodadilzin.
Peter awáalyaadę́ę́' ch'ínált'e'
6Yiską́ągo Hérad bizaad k'ehgo ch'íhodi'doodlóosgo, t'áá éí bitł'éé' Peter, siláo naaki bita'gi béésh da'ahólzha'í naaki bee daho'diistł'ǫ́ǫgo ajiłhosh, índa siláo ła' awáalyaa bidáádílkał yaa ádahalyą́. 7Nít'éé' ákohgo Bóhólníihii bidiyingo naal'a'í hwíighahgi yiizį'go siláo bił jizhjé'í góne'é i'díídláád, áádóó Peter booshk'iizhjí néidííkaadgo ch'éinísidgo ííłní, Tsxį́įłgo nídiidááh! Áko béésh da'ahólzha'í hálátsíín bąąh nidí'níidee'. 8Diyingo naal'a'í áháłní, Ákánílzis áádóó kééh nánít'éés. Ákódziidzaago ánááhodoo'niid, Ni'éétsoh biih nánídáahgo shikéé' yínááł. 9Áko bikéé' joogáałgo ch'ízhníyá; diyingo naal'a'í yaa naayáhígíí t'áásh aaníí jinízin, nidi t'óó shił áhoodzaa sha'shin néizniidzį́į́'. 10Siláo aa ádahalyáanii átséhígíí índa náá'ákéé' góne'ígíí bíighah ch'ínáájít'áazhgo, kintahjį' ch'é'étiingo béésh dáádílkałígíí baazhní'áázh. Nít'éé' t'áá bíni'ídi há ąą ádzaa, áko ch'ízhní'áazhgo ła' kin bita'atiin góne' ajíí'áazhgo, t'áá áko diyingo naal'a'í hats'ą́ą́' dah diiyá. 11Áko Peter hazhó'ó ákozniizį́į'go ázhdííniid, Dííyee' t'áá aaníí! Bóhólníihii bidiyingo naal'a'í yiníł'a'go Hérad bílák'eedóó índa Jew dine'é shá nidayólíhígíí t'áá ałtso bits'ą́ąjį' yisdáshi'dooltį́į́ lá.
12Áádóó éí baa ákozniizį́į'go John éí Mark ałdó' yolyéhígíí bimá Mary bighangi jiníyá, ákwii diné lą'í áłah nilį́įgo sodadilzin lá. 13Áko kin biná'ástł'in bidáádílkał názneests'ingo at'ééd léi', Róda yolyéego íídóołts'įįł biniyé áajį' niníyá. 14Áko Peter biinéé' yééhoosįįdgo bił hóózhǫǫdgo biniinaa dáádílkał t'áadoo ąą ííléhí yah anáálwodgo, Peter tł'óó'dę́ę́' sizį́, níigo yaa hoolne'. 15Tsi'díníyáagoósh ádíní? dahałní. Nidi, T'áá aaníí, jiníigo bee nijíltee'. Éíyee' diyingo naal'a'í baa áhályánígíí át'į́! daaní. 16Nidi Peter t'ahdii dáádílkał néiniłts'ingo bá ąą dazdeeztą́ągo dajiiłtsą́, áko bik'ee t'óó hoł adahóóyóí. 17Nidi dadidoołhił biniyé bízh'deezhgishgo haash yit'éego Bóhólníihii awáalyaadę́ę́' hoł ch'ínát'ázhígíí bee bił ch'íhozhní'ą́. Áko, Díidí James índa ałk'isóó danilíinii bee bił dahodoołnih, jidííniidgo łahgóó dah náázdiidzá.
18Áko hoos'įįdgo Peter doo bééhoozinígíí biniinaa siláo bitahgóó ayóó át'éego hahodíídláád. 19Áko Hérad ch'ééh hákaneeztą́ą'go biniinaa, siláo aa ádahalyánígíí atííł'į́įgo nayídééłkid, áádóó nidootsiłgo yee hooł'a'. Índa Judíyadóó Sesaríya góyaa Hérad jiníyáago áá dzizdáá nít'éé'.
Hérad daaztsą́ągi baa hane'
20Íídą́ą́' Táirgi índa Sáídangi kéédahat'ínígíí t'áá íiyisí bich'į' Hérad báhóóchįįd, áko áádóó t'áá ła' bizhi'ee yaa yíkaigo, k'é náhodoodleeł deidííniid; éí biniyé aláahgo naat'áanii yá naal'a'í, Blástas yolyéego bich'ooní nilį́įgo ádayiilaa, háálá aláahgo naat'áanii bikéyah bits'ą́ą́dóó t'éí adazh'dilnah nít'éé'. 21Nihoot'ą́ bijį́į́ góne' Hérad aláahgo naat'áanii k'ehjí hadiidzaago bikáá'dóó nahat'áii yikáá'dóó dah neezdá, áko ayóó át'éego hach'į' niyáhaasti'. 22Áko diné hadadeeshghaazhgo ádaaní, Eiiyee' diyin biinéé' át'éé lá, doo diné biinéé' át'ée da! 23Nít'éé' Diyin God doo baa hojiniihígíí biniinaa t'ahaa'go Bóhólníihii bidiyingo naal'a'í atíhoolaa, áko ch'osh dahalghałgo hajííyol.
24Nidi Diyin God bizaad éí bilááh yileełgo k'ee'ąą yilzhish.
25Áádóó Jerúsalemgi Bárnabas índa Saul hanaanish ałtso ła'jiilaago John éí Mark ałdó' yolyéhígíí bił aníjookai.
Currently Selected:
ACTS 12: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
