Roma 15

Sakamaneni abanenu

1Ifwe fwe ba cisumino cakosa tuli nokwafwako abo icisumino cishilakosa mu bwafya balesanga. Twilacita ifyakutuwaminafye. 2Bonse umo umo tufwile ukucitila bamunyinefwe ifyakubawamina, pakuti nabo bakose mu cisumino. 3#Amalu 69:9Pantu nangu ni Kristu wine talecita ifyakumuwaminafye. Lelo calembwa ukuti, “Umusaalula abantu bakusaalula waba pali ine.” 4Fyonse ifyalembwa mu Malembo Yamushilo fyalembelwa pakutufunda. Pantu Amalembo Yamushilo yapeela umutekatima ne cikoseleshi epakuti tube ne subilo. 5Kanshi Lesa uupeela umutekatima ne cikoseleshi, engalenga nokuti imwe bonse mubefye umutima umo ngefyo Kristu Yesu atulanga. 6Epakuti bonse capamo ne shiwi limo mulelumbanya Lesa, Wishi wa Mfumu yesu Yesu Kristu. 7Eico mulesekelelana nga filya fine Kristu amusekelela, pakuti Lesa acindikwe.

Imbila Nsuma ya bantufye bonse

8Kanshi ndemweba ukuti Kristu alebombela Abayuda, pakufikilisha ifyo Lesa alaile ifikolwe ifyalumbuka, kabili alanga nefyo Lesa aba uwacishinka. 9#2 Sam 22:50Kabili alenga nokuti Abenafyalo nabo balelumbanya Lesa pa mulandu wa luse lwakwe. Efyo calembwa ukuti,

“Eco nkalakulumbanishisha pakati ka Benafyalo.

Nkalakwimbila ishamalumbo ishe shina lyobe.”

10 # Amaf 32:43 Na pambi calembwa ukuti,

“Mwe Benafyalo akusansamukileni

pamo no mushobo wa Mfumu!”

11 # Amalu 117:1 Pambi napo calembwa ukuti,

“Mwe Benafyalo akutasheni Imfumu.

Mwe mishobo yonse akwimbileni Imfumu inyimbo sha malumbo.”

12 # Esaya 11:10 Kabili Esaya nao alanda ati,

“Umo uwaba umushila wakwa Yese akesa.

Akema ukwisa kukuteeka imishobo.

Eukaba e subilo lya Benafyalo.”

13Cawama Lesa uulenga ukuti mube ne subilo, engalenga nokuti imitima yenu isulemo insansa, mube no mutende pali ico mwamusumina. Epakuti ku maka yakwa Mupashi Wamushilo mulecililakofye ukulasubila.

Lesa ewasala Paulo ukubila Imbila Nsuma ku Benafyalo

14Mwe bamunyinane ine nalishininkisha ukuti muli basuma icine cine. Kabili mwalishiba fyonse ifyo muli nokucita. Kanshi kuti mulefundana. 15Kwena muli uyu kalata naba uwapama nganshi mukulanda pa milandu imo imo iyo namwibukishako. Nalanda ifi, pa mulandu wa cikuuku Lesa ankwatila. 16Ni Lesa wanenga ukuba umubomfi wakwa Kristu uwakubombela Abenafyalo. Pakuti, mukulabomba umulimo wa bushimapepo uwakubila Imbila Nsuma yakwa Lesa, Abenafyalo nabo babe ngo mutuulo wakusansamusha Lesa, abasangululwa na Mupashi Wamushilo. 17Kanshi ine kwena kuti naumfwa icilumba cakuba umubomfi wakwa Lesa ku maka Kristu ampeela. 18Teti ntendeke ukulanda pa fintu fimbi kanofye ifyo Kristu afikilisha ukubomba muli ine ifyakulenga ukuti abenafyalo nabo banakile Lesa ukupitila mufyo nalelanda no kucita. 19Kabili nefyo Kristu alenga ukuti ncite ifishibilo ne finjelengwe ku maka yakwa Mupashi Wamushilo. Kanshi nalibila Imbila Nsuma yakwa Kristu mpangafye yonse ukufuma ku Yerusalemu ukufika na ku Ililikamu. 20Eico mfwaishafye kubila Imbila Nsuma mu ncende umo bashilaishiba Kristu. Pantu mukucita ifi, ninshi lyena nshilekuula apo bambi baimba umufula. 21#Esaya 52:15Efyo calembwa ukuti,

“Abantu abo bashatala abebwa pali Lesa, bakamumona,

na bantu abashatala abamumfwapo, bakamwishiba.”

Paulo apanga ukuya ku Roma

22Imiku iyingi nalefwaya ukwisa kumwenu, lelo uyu mulandu ewandesha. 23Ku ncende ya kuno kwena imilimo naipwa. Kabili pa myaka iyingi iyapita nalefwaisha nganshi ukwisa mumona. 24Nomba ndesubila ukwisa mumona ili nkalaya ku Speni. Ndesubila mukesa ngafwilishako pali ulu lwendo, lelo kwena nkasansamuka ukwikala na imwe akashita kanono. 25#1 Kol 16:1-4Pali nomba ndi nokuya ku Yerusalemu kukutwalako ifyakwafwilisha. 26Abena Makedonia na bena Akaia abenefye balipingushanya ukusangula ifyakwafwako abalanda mu bamushilo mu Yerusalemu. 27#1 Kol 9:11Abene bekafye ebapingushanya ukucita ifyo. Lelo kwena baba nokwafwilisha abalanda. Apo Abenafyalo nabo bashukilako ipaalo lyakwa Lesa ilyo Abayuda bakwata, kanshi Abenafyalo nabo bali nokwafwilishako Abayuda ku fyuma Lesa abapeela. 28Kanshi nkatila nga napwisha uyu mulimo, nabapeela na fyonse ifyo basangula ifyakubafwako, lyena ninshi nkema ubulendo bwa ku Speni. Lelo ilyo nkalaya, nkesa mupempula. 29Ilyo nkesa uko, ninjishiba ukuti nkamwishila ne paalo lyonse ilyakwa Kristu.

30Mwe bamunyinane, ku cisumino mwakwata mu Mfumu yesu Yesu Kristu na ku citemwiko Mupashi Wamushilo amukwatila, ndemupapata mulengafwilishako mu bulwi mukumpepelako kuli Lesa. 31Mulempepelako pakuti nkapusuke ku bantu ba mu Yudeya abashinakila Lesa. Mulempepelako na pakuti mu Yerusalemu bakapokelele ifyakubafwako ifyo ndebatwalila. 32Lesa nga alefwaya, lyena nkashukila insansa shakwisa kumwenu nkese tuushako, tukasansamuke pamo na imwe. 33Lesa wamutende, engalaba na imwe bonse. Ameni.

Currently Selected:

Roma 15: ILL15

Highlight

Copy

Compare