Yoani 21
21
Yesu amonekela ku basambi cine lubali
1Ilyo ifi fyapita, Yesu nakabili amonekele ku basambi bakwe kuli bemba wa Tibelia. Kanshi cali nifi. 2Simoni Petelo, Toma uo baleti, Mpundu, Natanaeli umwina Kana mu calo ca Galile, bamwana Sebede, elyo na basambi bakwa Yesu bambi babili balongene pamo. 3Simoni Petelo abeba ati, “Ine nalaya kukwipaya isabi.” Nabo bamweba abati, “Twalayafye bonse.” Awe baya, baingila na mu bwato. Nomba ubo bushiku tabaipeye nangu kamo. 4Cilya bwaca lucelocelofye, Yesu aisa iminina pa lulamba lwa bemba. Nomba abasambi tabaishibe nakalya ukuti ni Yesu. 5Yesu abepusha ati, “Mwe bana, bushe tamwipeye isabi nangu limo?” Nabo bayasuka abati, “Awe iyoo.” 6Elyo Yesu abeba ati, “Teyeni isumbu lyenu lubali lwa ku kulyo kwa bwato, lyena mwalaipaya.” Awe bateya ne sumbu. Ifimasabi ifingi nganshi fyaikatwa, icakuti bafilwa no kutintila isumbu ku bwato. 7#Yoani 13:4Elyo umusambi umbi ulya Yesu atemenwe, aeba Petelo ati, “Ala ni Mfumu!” Simoni Petelo cilya aumfwa ukuti ni Mfumu, abuula icakufimbana akaka mu musana, pantu alisamwinine. Awe aiposa na pali bemba. 8Abasambi bambi bena baisa mu bwato, baletinta isumbu ilyaisulamo ifimasabi. Tabali patali ukufuma ku mulundu, palifye cikanga intampulo umwanda umo. 9Ilyo bafika ku mulundu, bamona isabi lilepya pa mulilo wa malasha, elyo no mukate. 10Elyo Yesu abeba ati, “Letenipo isabi limo pali ilyo isabi mwaipaya nombaline.” 11Simoni Petelo epakuya mu bwato. Alakulila isumbu ku mulundu, umwiswile ifimasabi ifikulu fyeka fyeka, umwanda umo na makumi yasano na fitatu (153). Nangu ifimasabi fyafulile ifi, isumbu lyena talyalepwike. 12Yesu abeba ati, “Iseni mwikule.” Pa basambi tapali nangu umo uwapamine ukumwipusha ati, “Bushe niwani?” Balishibe ukuti ni Mfumu. 13Elyo Yesu aya buula umukate abapeela, ne sabi nalyo abapeela. 14Uyu e muku wabutatu Yesu amonekele ku basambi bakwe, panuma yakushukuka ku bafwa.
Yesu aipusha Petelo imiku itatu
15Cilya bapwa ukulya, Yesu aipusha Simoni Petelo ati, “Simoni mwana Yoani,#21:15 Mwana Yoani: Ba Baibele bamo batila, “Yona.” bushe walintemwa ukucila aba?” Petelo amwasuka ati, “Ee we Mfumu, walishiba ukuti nalikutemwa.” Yesu amweba ati, “Ulecema abana ba mpaanga shandi.” 16Yesu amwipusha umuku wabubili ati, “Simoni mwana Yoani, bushe walintemwa?” Nao amwasuka ati, “Ee we Mfumu, walishiba ukuti nalikutemwa.” Yesu amweba ati, “Ulecema impaanga shandi.” 17Yesu amwipusha umuku wabutatu ati, “Simoni mwana Yoani, bushe walintemwa?” Awe Petelo camusakamika ico Yesu amwipusha umuku wabutatu ati, “Bushe walintemwa?” Kanshi amweba ati, “We Mfumu, iwe walishiba ifintu fyonse. Walishiba ukuti nalikutemwa!” Yesu amweba ati, “Ulecema impaanga shandi. 18Ndekweba icine cine, ilyo wali umulumendo walesamwina ifyakufwala no kuya konse uko ulefwaya. Lelo ilyo ukakota, lyena ukatambalika amaboko. Elyo umbi eukakufwika no kukutwala uko ushilefwaya.” 19Mukulanda ifi, Yesu alelanga umusango wa mfwa untu Petelo ali nokufwa no kucindikilako Lesa. Cilya apwa ukulanda ifi, elyo aeba Petelo ati, “Nkonka.”
Umusambi Yesu atemenwe
20Petelo elyo apilibukila kunuma, amona no musambi umbi ulya Yesu atemenwe alekonka. Uyu musambi eulya wine washintilile pa cifuba cakwa Yesu ilyo balelya umulalilo, uwaipwishe Yesu ati, “We Mfumu, nga nani alekuposa ku balwani?” 21Ilyo Petelo amumona aipusha Yesu ati, “Nga uyo wena ni shani?” 22Yesu amwasuka ati, “Nga ndefwaya ukuti abe umumi mpaka nkabwele, bushe uyo mulandu obe? Ala iwe nkonkafye!” 23Kanshi ecalengele nokuti ilyashi lisalangane mu basambi bakwa Yesu ukuti uyu musambi wena takafwe. Lelo Yesu talandile ukuti ulya musambi takafwe. Awe atile, “Nga ndefwaya ukuti abe umumi mpaka nkabwele, bushe uyo mulandu obe?” 24Uyu musambi e kambone pali ifi fintu fyonse. Kabili no kulemba ewafilemba. Twalishiba nokuti bukambone bwakwe bwacishinka.
Amashiwi yakupelekeshako
25Kwaliba na fimbi ifintu ifingi ifyo Yesu acitile. Ine ndemona ukuti, fyonse ifyo Yesu acitile afilembwa nga tekuti pabe incende pano isonde apakubika ifitabo fingalembwa.
Currently Selected:
Yoani 21: ILL15
Highlight
Share
Copy
Want to have your highlights saved across all your devices? Sign up or sign in
Bible Society of Zambia